Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 30: Olhusaka Olhukaka kw’Omuliro

Olhughano 30: Olhusaka Olhukaka kw’Omuliro

MUSA asangawa inyabiri asa okwa kithwa ekya Horebu akasyarondya omuyonga w’esyambuli siwe. Mwalhangira olhusaka olhukaka kw’omuliro, aliriryo isilhulihya!

Musa iniane ahali olhusaka olhukaka kw’omuliro

Musa mwalengekania athi, ‘Eki ni ky’eriswekya. Nga seghere hakuhi na ngalhangira ndeke.’ Abere akolha athya, omulenge mwalhua omwa kisaka, akabugha athi: ‘Wulikithasya seghera eno. Lhusaya esyangendero syawu, kusangwa w’imene okwa kithaka ekibuyirire.’ Abya ini Nyamuhanga oyukakanaya erilhabira omumalaika, neryo Musa mwabisa obusu bwiwe.

Neryo Nyamuhanga mwabugha athi: ‘Nabiri lhangira eriaghalhwa ly’abandu baghe e Misiri. Ngaya baboholha, kandi n’iwe ngaya thuma eriya basondolha erilhua e Misiri.’ Yehova abya inyakaya letha abandu biwe omwa kihugho ekyuwene ekye Kanana.

Aliriryo Musa mwabugha athi: ‘Indi buyira. Eki nanga kikolha yithi? Aliriryo thutha bugha thuthi nama ghenda. Abaisraeli basya bugha naghe bathi, “Oyuwakuthuma nindi?” Naghe nasyabwirabo nyithiki?’

Nyamuhanga mwamusubirya athi, ‘Wusyabugha wuthya: “YEHOVA Nyamuhanga wa Abrahamu, Nyamuhanga wa Isaka na Nyamuhanga wa Yakobo amanyithuma okwinywe.”’ Kandi Yehova ongera athi: ‘Eri ry’erina lyaghe kera na kera.’

Musa asubirya athi: ‘Ibbwa bamathendi ikirirya nabiri babwira indi wanyithuma.’

Neryo Nyamuhanga mwamubulya athi: ‘Wuwithe omwa byalha byawu mwaki?’

Musa mwasubirya athi: ‘Ni mutso.’

Nyamuhanga mwabugha athi, ‘Wusagho ahisi.’ Neryo Musa abere akolha athya, omutso mwahinduka nzoka. Kandi Yehova mwathasya mukangania ekindi kithiko-thiko. Abugha athi: ‘Hira ebyalha byawu by’omwa kanzu yawu.’ Musa akolha athya, neryo abere alhusaya ebyalha biwe byomo, ibya biribya nzeru ng’enzururu! Ebyalha mubya sosa nga biwithe obulhwere bubi obw’ebihagha. Erithasya kwamyako, Yehova mwaha Musa y’akaghalha ak’erikolha ekithiko-thiko ekya kasathu. Erighunzerera mwabugha athi: ‘Omughulhu wasya kolha ebithiko-thiko ebi Abaisraeli basy’ikirirya bathi na kuthuma.’

Enyuma waho Musa mwaghenda eka n’eriyabwira Yetero athi: ‘Wuleke nga ghende okwa bahughu baghe e Misiri erilebya nga bali bathi.’ Neryo Yetero mwabugha athi bukyaghe, na Musa mwatsuka olhughendo lhwiwe olhwe Misiri.

Eriluayo 3:1-22; 4:1-20, NW.



Ebibulyo

  • Ekithwa ekiri omwa kisasani kikahulhawa kithi?
  • Kanaya okwa kindu ekithe kya bulikiro ekya Musa alhangira omughulhu aghenda okwa kithwa n’esyambuli siwe.
  • Omulenge mwabugha athi ki akalhua omwa lhusaka olhukaka kw’omuliro, n’omulenge abya wandi?
  • Nyamuhanga abere abwira Musa athi anga sondwere abandu biwe eribalhusya e Misiri, Musa mwasubirya athiki?
  • Nyamuhanga mwabwira Musa athi abughe ki, abandu bamamubulya oyuwamuthumire nga nindi?
  • Musa angathokire athi erikangania indi kwenene Nyamuhanga amuthumire?

Ebibulyo eby’eryongerako

  • Soma Eriluayo 3:1-22.

    Eky’erireberyako kya Musa kikathuha kithi eriyikethera indi n’omwa thwangayowa nga sithutholere eriberererya omubiiri wa Nyamuhanga, Yehova inyakendi thuwathikya? (Eri. 3:11, 13; 2 Kor. 3:5, 6)

  • Soma Eriluayo 4:1-20.

    Ebirengekanio bya Musa mubya hinduka bithi omwa birimo 40 abya ghunza e Midiani, kandi abakanza eribana esyanzunzo omwa kithunga bang’igha isomo ki omw’eki? (Eri. 2:11, 12; 4:10, 13; Mika 6:8; 1 Tim. 3:1, 6, 10)

    Yehova n’omw’angathuhana erilhabira omwa kithunga kiwe, ni yikethera muhanda ki erya thukabana omwa ky’erireberyako kya Musa? (Eri. 4:12-14; Esy. 103:14; Ebr. 12:4-11)