Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 29: Ekyaleka Musa Inyathibitha

Olhughano 29: Ekyaleka Musa Inyathibitha

THALEBYA Musa akathibitha erilhua e Misiri. Wanamalhangira abalhume baka muthibithako? Wunasi ekikaleka ibanza eritha Musa? Thuthalebya nga thwangana kiminya.

Musa akathibitha erilhua e Misiri

Musa mwa kulira omwa nyumba ya Farao, omuthabali we Misiri. Mwabya mulhume w’amenge kandi mulhume w’ekitsumbi. Musa mwaminya ngokwa si munya Misiri, aliriryo ngokw’ababuthi biwe benyine-nyine babya Abaisraeli abakobe.

Kiro kighuma, inyamabiribya birimo 40 eby’obukulhu, Musa mwathwamu eriyalebya abandu biwe ngokwa bali. Kyabya ky’obulighe ngoku babya baka banubya. Mwalhangira omunya Misiri akaswirya omukobe omu Israeli. Neryo Musa mwathimbya ameso, abere abirilhangira ngokwa yithe mundu oyumulhangire, mwaswira omunya Misiri, n’omunya Misiri aholha. Neryo Musa mwabisa ekinda ky’omwa museghe.

Ekindi kiro Musa mwaghenda eriyalebya abandu biwe kandi. Mwalengekania athi angana bawathikya, bangaleka erithasyabya bakobe kandi. Aliriryo mwalhangira abalhume babiri Abaisraeli bakalhwa, neryo Musa mwabugha noyo oyuwabya musobya athi: ‘Busana naki iwaswirya mughalha wenyu?’

Omulhume mwabugha athi: ‘Nindi oyuwakukolha mwa muthabali n’omutsweri wethu? Wukanza erinyitha ngoku w’itha omunya Misiri?’

Musa neryo mwakwa obuba. Mwaminya ngokw’abandu babiriminya eky’akolha okwa munya Misiri. Na Farao nayu mwaminya, neryo mwathuma abalhume eriyitha Musa. Eki kyakyaleka Musa inya thibitha erilhua e Misiri.

Musa abere alhua e Misiri, mwaghenda hali omwa kihugho kye Midiani. Mw’eya yo erihiika lya Yetero, neryo mwathahya omughuma oku bali biwe oyukahulhawa mwa Zipora. Musa mwabya mulisya we syambuli neryo mwalisya esyambuli sya Yetero. Mwikalha omwa kihugho kye Midiani ahabw’ebirimo 40. Abya inyamabiriyira ebirimo 80. Neryo kiro kighuma, Musa ane mulisya esyambuli sya Yetero, muhabanika ekindu ky’eriswekya ekya bindulha engebe ya Musa yosi. Thulhangire ekindu ky’eriswekya eki nga ni kyahi.

Eriluayo 2:11-25; Emibiri 7:22-29.



Ebibulyo

  • Musa mwakulira hayi, aliriryo aby’asi ki okw’ababuthi biwe?
  • Musa mwakolha ki omughulhu abya w’ebirimo 40 eby’obukulhu?
  • Musa mwabwira omulhume Omuisraeli oyuwabya akalhwa yaki, n’omulhume mwasubirya athiki?
  • Ekyaleka Musa inyathibitha akalhua e Misiri niki?
  • Musa mwathibitha hayi, kandi mwasangana yandi?
  • Musa mwakolha ki omwa birimo 40 alhwire e Misiri?

Ebibulyo eby’eryongerako

  • Soma Eriluayo 2:11-25.

    Nomwakine indi mwakangiriribwa obwenge obw’abanya Misiri habw’ebirimo bingi, Musa mwakangania athi obuyisiwa oku Yehova n’oku abandu biwe? (Eri. 2:11, 12; Ebr. 11:24)

  • Soma Eriluayo 7:22-29.

    Ni somo ki erya thuk’ighira oku Musa akalengesya iyuwene-wene erilhamya Abaisraeli erilhua omwa bukobe obwe Misiri? (Emib. 7:23-25; 1 Pet. 5:6, 10)