Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 28: Emibere eya Musa Alhamiramu Inyane Lhumekeke

Olhughano 28: Emibere eya Musa Alhamiramu Inyane Lhumekeke

THALEBYA olhumekeke olhukalira, kandi ilhunahambire omunwe w’omukali. Oyu ni Musa. Wunasi omukali mubuya kutsibu oyu nga nindi? Ni munya-mwami w’obukali owe Misiri, mwali wa Farao we nyine-nyine.

Mwali wa Farao akabana Musa

Mama wa Musa mwabisa olhumekeke lhwiwe erihika ahalhwabera emikera isathu, kusangwa syabya anzire lhuk’ithibwa n’abanya Misiri. Aliriryo mwaminya athi Musa angana banwa, neryo eki kyabya akolire erimulhamya.

Mwimya ekisero eky’ebikindo n’eriwathya kyo ndeke sikilhabire mw’amaghetse. Neryo mwahira mukyo mwa Musa, n’eritheka ekisero ky’omwa kisaka ekiri omwa Lhusi Nili. Miriamu mwali wabu Musa, mwabwirwa indi imane hakuhi asamalire ekyangabya ho.

Habere halhaba buthuku buke, mwali wa Farao mwasa okwa Lhusi Nili akasyogha. Athayitsulireki neryo mwalhangira ekisero ky’omwa kisaka. Neryo mwabirikira omughuma w’okw’abaghombe biwe ab’obukali: ‘Ghenda wunyirethere ekisero kirya.’ Omunya-mwami w’obukali abere akunulha ekisero, lebaya olhumekeke olhuwene lhwabya alhangire! Olhumekeke lhwabya ilhune mulira, n’omunya-mwami w’obukali mwalhukwira obulighe. Mwathanza baka lhw’itha.

Neryo Miriamu mwasa. Wangana mulhangira omwa kisasani. Miriamu mwabulya mwali wa Farao: ‘Nga ghende nga birikire omukali omu Israeli anga kulemberera olhumekeke olhu?’

Omunya-mwami w’obukali athi, ‘Kisi kwa wunakole wuthya.’

Neryo Miriamu mwathibitha lhuba eriyabwira mama wiwe. Mama wa Musa abere ahika okw’omunya-mwami w’obukali, omunya-mwami w’obukali mwabugha athi: ‘Imaya olhumekeke olhu wunyilemberere lho, ngendi syakuthuha.’

Neryo mama wa Musa mwalembera omwana wiwe. Enyuma waho Musa abere abiri kulha ndeke, mwa muthwalira mwali wa Farao, oyuwamukulhaya ng’omwana wiwe. Musa kwabya akulire athya omwa nyumba ya Farao.

Eriluayo 2:1-10.



Ebibulyo

  • Olhumekeke olhuli omwa kisasani nindi, kandi lhuhambire omunwe wandi?
  • Mama wa Musa mwakolha ki erimulhamya okw’ithibwa?
  • Omumbesa oyuli omwa kisasani nindi, kandi mwakolha ki?
  • Mwali wa Farao abere abana olhumekeke, Miriamu mwaha ekirengekanio ki?
  • Omunya mwami w’obukali mwabwira mama wa Musa yaki?

Ebibulyo eby’eryongerako

  • Soma Eriluayo 2:1-10.

    Ni mughisa wahi owa mama wa Musa abana erikangirirya Musa mwa bumekeke, n’eki kikaha eky’erireberyako kyahi okw’ababuthi munabwire? (Eri. 2:9, 10; Ebi. 6:6-9; Emi. 22:6; Efe. 6:4; 2 Tim. 3:15)