Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 26: Yobu ni Muthaleghulha oku Nyamuhanga

Olhughano 26: Yobu ni Muthaleghulha oku Nyamuhanga

WANA makwira omulhume oyulhwere oyu y’obulighe? Erina liwe ya Yobu, n’omukali y’omughole wiwe. Wunasi eby’akabwira Yobu? ‘Tsuma Nyamuhanga, wuhole.’ Thutha lebya ekyangalekire omukali inyabugha ekindu ekiri ng’eki, kandi ekyaleka Yobu inyaghalhwa kutsibu.

Yobu inianakwire ebimatha

Yobu abya mulhume muthaleghulha oku Nyamuhanga oyuwabya akowa Yehova. Abya ikere omwa kihugho kya Usi, ekithe hali erilhua e Kanana. Yehova aby’anzire Yobu ya kutsibu, aliriryo habya oyuwabya amuponire. Wunasi nga nindi?

Abya ini Sitani Diabolo. Wibuke, Sitani y’omumalaika mubi oyu ponire Yehova. Mwathoka eritheba-theba Adamu na Eva baghane erikenga Nyamuhanga, neryo mwalengekania athi anga thokire obuli mundu wosi nibya erithendi kenga Yehova. Aliriryo mwana thoka? Eyihi. Thalengekania okwa batheleghulha bangi abalhume n’abakali abo thwabiri ighako. Ni bangahi aba wanga thondogholha?

Yakobo na Yozefu babere babiri holera e Misiri, Yobu yuwabya omundu muthaleghulha oku Yehova omwa kihugho kyosi. Yehova aby’anzire Sitani aminye athi syanga kolire buli mundu wosi eribya mubi, neryo Yehova mwabugha athi: ‘Thasamalira Yobu. Thalhangira kwa ni muthaleghulha okw’ingye.’

Sitani amabugha athi, ‘Ni muthaleghulha, kusangwa wuka mutsumulha kandi awithe ebindu bingi ebyuwene. Aliriryo wamamwiha byoko, inyakendi kutsuma.’

Neryo Yehova mwabugha athi: ‘Lholha embere. Mulhusaye byoko. Wukole obuli kindu kyosi ekibi ekya wanzire oku Yobu. Thukendi lhangira ngana mwendi nyitsuma. Aliriryo siwumwithe.’

Erimbere, Sitani amakolesya abalhume eriba esyande n’esyapunda sya Yobu, n’esyambuli siwe musyithibwa. Kandi amitha baghalha n’abali ba Yobu 10 omwa kihunga kinene. Erikwamako, Sitani amaswira Yobu y’omwa bulhwere obukalire kutsibu. Yobu mwaghalhwa kutsibu. Kyakyaleka mukali wiwe inyamubwira athi: ‘Tsuma Nyamuhanga, wuhole.’ Aliriryo Yobu isyanga kikolha. Kandi, banywani biwe ab’amabehi mubasa n’erimubwira bathi abya akayithwalha nabi omwa ngebe yiwe. Aliriryo Yobu mwathaleghulha.

Eki mukya tsemesya Yehova ya kutsibu, n’enyuma waho mwa tsumulha Yobu, ngoku wanamalhangira omwa kisasani. Mwamulhamya kw’obulhwere bwiwe. Yobu mwabutha abandi bana 10 abuwene, abya n’esyande, esyambuli, n’esyapunda mirundi ibiri kwilhaba esyabya awithe erimbere.

Wunamwendibya muthaleghulha oku Yehova mughulhu wosi nga Yobu? Wamabya wuthya, nawu Nyamuhanga akendi kutsumulha. Wukendi thoka eribyaho kera na kera omughulhu ekihugho kyosi kikendi kolhwa mwa kibuya ng’eririma lya Edeni.

Yobu 1:1-22; 2:1-13; 42:10-17.

Yobu n’erihiika liwe


Ebibulyo

  • Yobu abya inindi?
  • Sitani mwalengesya erikolha ki, aliriryo mwana kinda?
  • Yehova mwalighira Sitani akole ki, kandi busana naki?
  • Ekyaleka muka Yobu inyamubwira athi “tsuma Nyamuhanga wuhole” niki? (Lebaya ekisasani.)
  • Ngokwa wanganalhangira omwa kisasani ekya kabiri, Yehova mwatsumulha athi Yobu, kandi busana naki?
  • Nethu, thwamabya bathaleghulha nga Yobu oku Yehova, ni mighisa ki eya thukendi syabana?

Ebibulyo eby’eryongerako

  • Soma Yobu 1:1-22.

    Abakristayo munabwire banga gherererya bathi Yobu? (Yobu 1:1; Fil. 2:15; 2 Pet. 3:14)

  • Soma Yobu 2:1-13.

    Yobu na mukali wiwe mubasubirya bathi eryendererya rya Sitani omu nzira ki ibiri esiri mbaghane? (Yobu 2:9, 10; Emi. 19:3; Mika 7:7; Mal. 3:14)

  • Soma Yobu 42:10-17.

    Ebihembo ebya Yobu abana na Yesu abana ahabw’erithendi leghulha omwa syangebe syabu, bisosene bithi? (Yobu 42:12; Fil. 2:9-11)

    Thukahimbawa thuthi omwa mighisa eya Yobu abana busana n’erisighalha muthaleghulha oku Nyamuhanga? (Yobu 42:10, 12; Ebr. 6:10; Yak. 1:2-4, 12; 5:11)