Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 24: Yozefu Akalenga oku Baghalha Babu

Olhughano 24: Yozefu Akalenga oku Baghalha Babu

YOZEFU akanza eriminya baghalha babu 10 nga bakina yitsomene kandi n’erithendibya n’olhukeri. Neryo abugha athi: ‘Muli balingi. Mulyasya linga aha ekihugho kyethu kilemererwe.’

Nabu bamasubirya bathi: ‘Eyihi, sithuli balingi. Thuli bandu b’ekwenene. Ithwe abosi thuli baghalha b’omundu mughuma. Thuli 12. Aliriryo mughalha wethu mughuma syakiriho, n’omulere ali eka na thatha wethu.’

Yozefu amayithwalha ng’oyuthe th’ikirirya ebyabu. Akatheka mughalha wabu ya Simioni y’omwa muliki, neryo akaleka abandi bathwale ebyalya by’eka. Aliriryo amababwira athi: ‘Omughulhu mwasya subulha, musyasa na mughalha wenyu omulere.’

Bakabya bahika ewabu e Kanana, bakabwira thatha wabu Yakobo y’ebyosi ebya bahikako. Yakobo akakwa bulighe bunene. Neryo akalira athi, ‘Yozefu syakiriho, kandi hathya na Simioni nayu syakiriho. Singendi balighira muka ghenda na mughalha waghe omulere ya Benyamini.’ Aliriryo ebyalya byabu bikabya bikatsuka erikeha, Yakobo akakwama kyaleka bathwale Benyamini Ye Misiri lithya bangabana ebindi byalya.

Yozefu neryo akalhangira baghalha babu bakasa. Ali n’etseme nene akalhangira Benyamini mughalha wabu omulere. Omwa kwenene, sihabya n’omughuma okw’ibo oyuwabya asi athi omulhume w’ekitsumbi oyu ni Yozefu. Yozefu neryo akakolha ekindu erilenga oku baghalha babu 10, aba mama wiwe wundi.

Akimaya abaghombe biwe busulhaye esyangunza syabu mw’ebyalya. Aliriryo akahira olhuthehi lhwiwe olhuli mbaghane olhw’ekitsipa lhw’omwa ngunza ya Benyamini, isyathababwira. Neryo bakabya babiri ghenda akaghendo kake omwa nzira, Yozefu akabathuma kw’abaghombe biwe. Bakabya babiri bawatha, abaghombe bakabugha bathi: ‘Busana naki imw’iba olhuthehi olhw’ekitsipa olhw’omukama wethu?’

Abosi bamabugha bathi, ‘Sithwe thiba olhuthehi lhwiwe. Wamabana olhuthehi ilhune n’omughuma okw’ithwe, omundu oyu wuleke akwe.’

Neryo abaghombe bama rondekania omwa syanguza, neryo bamabana olhuthehi omwa ngunza ya Benyamini, ngoku wanamalhangira hano. Abaghombe bamabugha bathi: ‘Abandi bangana ghenda, aliriryo Benyamini thukendi ghenda nayu.’ Hathya baghalha babu 10 bano bakendi kolha ki?

Abosi bakasubulha na Benyamini eriya okwa nyumba ya Yozefu. Yozefu akabwira baghalha babu athi: ‘Inywe bosi mwangana ghenda eka, aliriryo Benyamini ni w’erisighalha hano ng’omukobe waghe.’

Yuda neryo akasumba omulenge, n’eribugha athi: ‘Namaghenda eka ngathe n’omulhwana oyu, thatha waghe inyakendi holha kusangwa amwanzire kutsibu. Neryo kisi, wuleke ngabye hano ng’omukobe wawu, aliriryo wuleke omulhwana aghende eka.’

Yozefu akalhangira indi baghalha babu babiri bindulha emibere yabu. Sibakiri mw’omuthima w’eriyitsomana kandi n’ow’erithendibya n’olhukeri. Thulebaye ekya Yozefu aka thasyakolha.

Enzuko 42:9-38; 43:1-34; 44:1-34.

Baghalha babu Yozefu bakahangirirawa


Ebibulyo

  • Ekikaleka Yozefu inyahandikirira baghalha babu athi ni balingi niki?
  • Ekikaleka Yakobo inyalighira mughalha wiwe omulere, ya Benyamini, erighenda e Misiri niki?
  • Olhuthehi lhwa Yozefu olhw’ebitsipa lhukahika lhuthi omwa ngunza ya Benyamini?
  • Yuda akathwamu erikolha ki banga lhwika Benyamini?
  • Baghalha babu Yozefu babiri bindulha bathi emibere yabu?

Ebibulyo eby’eryongerako

  • Soma Enzuko 42:9-38.

    Ebya Yozefu abugha omwa Nzuko 42:18 bikibukaya ki abawithe olhukwamirwa omwa kithunga kya Yehova munabwire? (Neh. 5:15; 2 Kor. 7:1, 2)

  • Soma Enzuko 43:1-34.

    Nomwakine indi Rubeni yuwabya kambere, kikalhangirika kithi indi Yuda mwabya mbuyi ya baghalha babu? (Enz. 43:3, 8, 9; 44:14, 18; 1 Emy. 5:2)

    Yozefu mwalenga athi oku baghalha babu, kandi busana naki? (Enz. 43:33, 34)

  • Soma Enzuko 44:1-34.

    Akanza eriyibisa alikiminyikalha oku baghalha babu, Yozefu mwayikangania athi? (Enz. 44:5, 15; Law. 19:26)

    Baghalha babu Yozefu mubakangania bathi ngokw’emibere mibi ey’eriyighomba eya byabya nayu oku mughalha wabu yabirihwa? (Enz. 44:13, 33, 34)