Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 22: Yozefu Akahirawa Omwa Muliki

Olhughano 22: Yozefu Akahirawa Omwa Muliki

YOZEFU ali n’ebirimo 17 bisa eby’obukulhu akathwalhwa e Misiri. Eyo amaghulibwa okwa mulhume oyukahulhawa mwa Potifa. Potifa akakolera omwami we Misiri, oyukahulhawa mwa Farao.

Yozefu omwa muliki

Yozefu akakolha n’akaghalha emibiiri ya mukama wiwe Potifa. Neryo Yozefu akabya abirikulha, Potifa akamuyira mwa mutheya ow’enyumba yiwe yosi. Neryo ibbwa, busana naki Yozefu hano ali omwa muliki? Ni busana na mukali wa Potifa.

Yozefu amakulha mwa mulhume mubuya kutsibu omwa busu, na muka Potifa amanza Yozefu aghotsere nayu. Aliriryo Yozefu asi athi eki ni kibi, kandi syendi kikolha. Muka Potifa amahithana kutsibu. Neryo mwira wiwe amabya ahika eka, akamutheba inyane mubugha athi: ‘Ya Yozefu oyu ni mubi mw’akanza erighotsera naghe!’ Potifa ak’ikirirya ebya mukali wiwe, nayu akahithana kutsibu oku Yozefu. Neryo akamuthwalha omwa muliki.

Omutheya w’omuliki neryo akalhangira Yozefu ngokwa ni mulhume mubuya. Neryo akamukolha mw’omutheya ow’abandi abosi ab’omuliki. Enyuma waho, Farao akahithana okwa muthengi wiwe n’omutsumbi wiwe ow’emiggati, n’eribahira omwa muliki. Erithumbi ighuma obuli mundu akabya n’erilhotha eriri mbaghane, aliriryo isibasi ebilhotho byabu nga bikamanyisaya ki. Engyakya Yozefu akabugha athi: ‘Mumbwire ebilhotho byenyu.’ Bamabya bamubwira, busana n’obuwathikya bwa Nyamuhanga Yozefu akabasoborera ebilhotho ebyo nga bikamanyisaya ki.

Okwa muthengi, Yozefu amabugha athi: ‘Omwa biro bisathu wukendi lhusibwa omwa muliki, kandi wukendi thasyabya muthengi wa Farao.’ Kandi Yozefu amongera athi: ‘Wamabiri boholhwa, bwira Farao y’okw’ingye, kandi wungwathikaye erilhua omwa muliki ono.’ Aliriryo okw’omutsumbi, Yozefu amabugha athi: ‘Omwa biro bisathu bisa Farao akendi lhaghira bakutheme kw’omuthwe wawu.’

Omwa biro bisathu kwa kyanamabya kithya ngokwa Yozefu abugha. Farao akalhaghira neryo bakathwa omuthwe w’omutsumbi. Omuthengi iyo, akalhusibawa omwa muliki n’eritsuka erikolera omwami kandi. Aliriryo omuthengi am’ibirirwa Yozefu! Syatha bwira Farao oku Yozefu, neryo Yozefu asighalha omwa muliki.

Enzuko 39:1-23; 40:1-23.



Ebibulyo

  • Yozefu ni wa birimo bingahi akathwalhwa e Misiri, kandi akabya abirihikayo, niki ekikabya?
  • Yozefu akayisanga athi omwa muliki?
  • Ni lhukwamirwa ki olhwa Yozefu akahebawa omwa muliki?
  • Ane omwa muliki, niki ekya Yozefu akakolera omuthengi n’omutsumbi w’emiggati wa Farao?
  • Omuthengi akabya abirilhua omwa muliki, ekikabya niki?

Ebibulyo eby’eryongerako

  • Soma Enzuko 39:1-23.

    Nomwakine indi sihabya ebihano ebisakangire erilhua eyiri Nyamuhanga ebikaghana obusingiri omwa buthuku bwa Yozefu, ekya musukuma erithibitha erilhua eyiri mukali wa Potifari niki? (Enz. 2:24; 20:3; 39:9)

  • Soma Enzuko 40:1-23.

    Omwa bikuhi kanaya okwa kilhotho eky’omuthengi n’erisoborera erya Yehova aha Yozefu. (Enz. 40:9-13)

    Omutsumbi w’emiggati mwalhotha ki, kandi kyamanyisaya ki? (Enz. 40:16-19)

    Munabwire omughombe oyutheleghulha n’ow’amenge abirigherererya athi emibere ya Yozefu? (Enz. 40:8; Esy. 36:9; Yn. 17:17; Emib. 17:2, 3)

    Enzuko 40:20 akaha athi ekyakakalha okw’Abakristayo eriyitheghererya ebiro bikulhu eby’amabuthwa? (Omu. 7:1; Mk. 6:21-28)