Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 19: Yakobo Awithe Erihiika Linene

Olhughano 19: Yakobo Awithe Erihiika Linene
Yakobo n’abaana biwe

THASAMALIRA erihiika linene eri. Aba ni baghalha ba Yakobo 12. Kandi abya inyana withe na bali biwe. Wunasi amena w’okw’abaghuma b’okw’abana abo? Leka thutha minya gho.

Lea mwabutha Rubeni, Simioni, Lawi, na Yuda. Rakeli abere alhangira athi syawithe omwana, mwa yowa nabi. Neryo mwaha Yakobo y’omubegherya wiwe Biliha, na Biliha mwabya n’abana babiri ab’obulhume ya Dani na Nafutali. Neryo Lea nayu mwaha Yakobo y’omubegherya wiwe Zilpa, na Zilpa mwabutha Gadi na Aseri. Erighunzerera Lea kandi mwabutha abana b’obulhume babiri, Isakari na Zebuloni.

Okw’ighunzerera Rakeli mwathoka eribya n’omwana. Mwa mwahulha mwa Yozefu. Enyuma waho thukendi igha bingi oku Yozefu, kusangwa mwabya omundu w’ekitsumbi. Aba b’abana b’obulhume 11 aba Yakobo abutha omughulhu abya ikere na thatha wa Rakeli ya Labani.

Yakobo anabya n’abali biwe, aliriryo e Biblia yikaha erina ly’omughuma musa. Erina liwe abya ni Dina.

Obuthuku mubwahika omughulhu Yakobo athwamu erilhua oku Labani erisuba e Kanana. Neryo mwa hindania erihiika liwe, esyambuli n’esyande siwe syosi haghuma, neryo batsuka olhughendo lhuli.

Yakobo n’erihiika liwe babere babiri hika e Kanana n’erighunza yo buthuku, Rakeli mwabutha owundi mwana w’obulhume. Kyabanika ibane okwa lhughendo. Rakeli mwa kunda kutsibu, neryo erighunzerera mwaholha akabutha. Aliriryo omwana mwabya ndeke. Yakobo mwamulhuka mwa Benyamini.

Thukanza ithwibuka amena abana 12 ba Yakobo kusangwa ekihanda kyosi ekye Israeli kyalhua omw’ibo. Omwa kwenene, ebihanda 12 ebya Israeli bya hebawa amena enyuma w’abana 10 ba Yakobo n’abana babiri ba Yosefu. Isaka mwaghunza birimo bingi enyuma w’abalhwana aba ababiri babuthirwe, kandi kyangabya imukya mutsemesya eribya n’abitsikulhu bangi. Aliriryo thutha thalebya ekyabya kyabere oku mwitsikulhu wiwe Dina.

Enzuko 29:32-35; 30:1-26; 35:16-19; 37:35.



Ebibulyo

  • Amena w’abaghalha ba Yakobo mukagha ab’abutha oku mukali wiwe ow’erimbere ya Lea ni ahi?
  • Ni balhwana bahi ababiri ab’omubegherya wa Lea ya Zilpa abuthira Yakobo?
  • Amena w’abaghalha babiri ab’omubegherya wa Rakeli ya Biliha abuthira Yakobo ni ahi?
  • Ni balhwana bahi babiri aba Rakeli abutha, aliriryo niki ekyabya kyabere akabutha omulhwana owakabiri?
  • Erisighikira n’ekisasani, Yakobo mwabya n’abaghalha bangahi, n’ekyabya kyalhwire mw’ibo niki?

Ebibulyo eby’eryongerako

  • Soma Enzuko 29:32-35; 30:1-26 na 35:16-19.

    Ngokwa kikanganibwe oku baghalha ba Yakobo 12, abalhwana Abaebrania omughulhu wakera ibakahebawa bathi amena?

  • Soma Enzuko 37:35.

    Nomwakine indi Dina yukahulhawa omwa Biblia, thukaminya thuthi ngokwa Yakobo abya withe bali bangi? (Enz. 37:34, 35)