Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 17: Abahasa Ababya Mbaghane

Olhughano 17: Abahasa Ababya Mbaghane
Esau

ABALHWANA babiri hano bali mbaghane, kwabithe? Wunasi amenabo? Omuhighi ni Esau, n’omulhwana oyukatheghaya esyambuli ni Yakobo.

Esau na Yakobo babya bahasa ba Isaka na Rebeka. Isaka thatha wabu aby’anzire Esau ya kutsibu, kusangwa abya muhighi mubuya kandi inyaka lethera abeka b’ebyalya eby’erirya. Aliriryo Rebeka aby’anzire Yakobo ya kwilhaba, kusangwa abya mukuthu, kandi mulhwana w’obuholho.

Sukulhu wabu ya Abrahamu abya inyakineho, kandi thwangana lengekania ngokwa Yakobo aby’anzire erimuhulikirira akakania oku Yehova. Abrahamu neryo mwaholha inyawithe ebirimo 175, omughulhu abahasa babya n’ebirimo 15 eby’obukulhu.

Omughulhu Esau abya birimo 40 eby’obukulhu, mwa thahya abakali babiri erilhua omwa kihugho kya Kanana. Eki mwakithatsemesya Isaka na Rebeka, kusangwa abakali aba isibali ramaya Yehova.

Neryo kiro kighuma muhabanika ekindu ekyaleka Esau inyahithana kutsibu oku mughalha wabu ya Yakobo. Obuthuku mubwahika omughulhu Isaka angabere inyakaha mughalha wiwe omukulhu y’omughisa. Kundi Esau abya mukulhu oku Yakobo, Esau abya n’amaha athi akendi bana omughisa oyu. Aliriryo Esau asangirwe inyabiri wulya Yakobo y’ehamuli ey’eribana omughisa oyu. Kandi, omughulhu abalhwana babiri bano ba buthawa Nyamuhanga asangawa inyabiri bugha athi Yakobo asyahebwa omughisa. N’eki kya kyabya kyabere. Isaka mwaha omughisa wa mughalha wiwe ya Yakobo.

Yakobo

Enyuma waho, Esau abere aminya eki mwaghalirwa oku Yakobo. Mwahithana kutsibu erihika eribugha athi akendi itha Yakobo. Rebeka abere abiriowa eki, mwakwa obuba kutsibu. Neryo mwabwira mwira wiwe Isaka athi: ‘Bwangabya butsibu Yakobo nayu alyathahaya okw’abakali aba abe Kanana.’

Busana n’ekyo Isaka mwabirikira mughalha wiwe Yakobo n’erimubwira athi: ‘Si wuthahaye okw’abakali be Kanana. Hakiri wughende ewa Betweli e Harani okw’ab’ekithunga kya sukulhu wawu. Wuthahaye okwa bali ba mughalha wiwe ya Labani.’

Yakobo mwowa thatha wiwe, neryo aho n’aho mwatsuka olhughendo lhwiwe lhuli eriya okwa b’ekithunga kiwe abikere e Harani.

Enzuko 25:5-11, 20-34; 26:34, 35; 27:1-46; 28:1-5; Abaebrania 12:16, 17.



Ebibulyo

  • Esau na Yakobo babya ini bahi, kandi babya bambaghane bathi?
  • Esau na Yakobo babya bawithe birimo bingahi eby’obukulhu omughulhu sukulhu wabu Abrahamu aholha?
  • Esau mwakolha ki ekyaleka thatha na mama wiwe ibakwa bulighe bunene?
  • Busana naki Esau mwahithana kutsibu oku mughalha wabu, ya Yakobo?
  • Isaka mwaha mughalha wiwe ya Yakobo yihano ki?

Ebibulyo eby’eryongerako

  • Soma Enzuko 25:5-11, 20-34.

    Abahasa babiri ab’obulhume aba Rebeka, Yehova mwabalhaghulhako athiki? (Enz. 25:23)

    Ni mbaghane ki eyabya ahakathi-kathi ka Yakobo na Esau okw’isima omwandu w’obukulhu? (Enz. 25:31-34)

  • Soma Enzuko 26:34, 35; 27:1-46; na 28:1-5.

    Esau erithendi sima ebindu by’obunyakirimu mulyalhangirika lithi? (Enz. 26:34, 35; 27:46)

    Isaka mwabwira Yakobo athi akole ki eribana omughisa wa Nyamuhanga? (Enz. 28:1-4)

  • Soma Abaebrania 12:16, 17.

    Eky’erireberyako kye Esau kikakanganaya kithi ekya nga lhwiririramu okw’abo abathetsomana ebindu eby’obunyakirimu?