Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 16: Isaka Akabana Omukali Mubuya

Olhughano 16: Isaka Akabana Omukali Mubuya

WUNASI omukali oyuli omwa kisasani eki nga nindi? Erina liwe ya Rebeka. N’omulhume oyu akasyasanga-sangana nayu ni Isaka. Akayabya mukali wiwe. Eki mukyabya kithi?

Thatha wa Isaka, Abrahamu, aby’anzire inyabanira mughalha wiwe y’omukali mubuya. Syabya anzire Isaka akathahya okw’abakali be Kanana, kusangwa abandu aba babya bakaramya esyanyamuhanga esy’amabehi. Neryo Abrahamu mwabirikira omughombe wiwe n’eribugha athi: ‘Nganza wughende okwa b’ekithunga kyaghe abikere e Harani n’eribanira mughalha waghe Isaka y’omukali.’

Aho n’aho omughombe wa Abrahamu mwimya esyangamiya ikumi n’erighenda olhughendo lhuli. Abere ahika hakuhi n’ekitsweka eky’ab’ekithunga kya Abrahamu babya bikeremo, mw’imana okwa kithehero. Abya malengera, obuthuku obw’abakali b’omwa muyi babya bakasiramo erisyatheha amaghetse okwa kithehero. Neryo omughombe wa Abrahamu mwasaba oku Yehova: ‘Leka omukali oyukendi ndehera amaghetse haghuma n’esyangamiya abye iy’oyuwabiri sombolha eribya mukali wa Isaka.’

Rebeka akabandana Isaka

Muhathalhaba mughulhu muli Rebeka asire erisyatheha amaghetse. Neryo omughombe abere amusaba aw’erinywa, Rebeka mwamuhagho. Neryo mwaghenda n’eriyathehera esyangamiya esyosi esikwire enyotha sy’amaghetse awakaghunza. Oyu abya mubiiri owakalire kusangwa esyangamiya sikanywa amaghetse mangi.

Rebeka abere abirighunza erikolha eki, omughombe wa Abrahamu mwamubulya erina lya thatha wiwe. Kandi athasyamubulya nga angana ghotsera omwa nyumba yabu. Rebeka abugha athi: ‘Thatha waghe ni Betweli, kandi hane omwanya owa wanga ghotseramu.’ Omughombe wa Abrahamu mwaminya athi Betweli abya mughalha wa Nahori mughalha wabu Abrahamu. Neryo mwa kukama ahisi n’erisima Yehova ahabw’erimusondolha erihika okw’ab’ekithunga kya Abrahamu.

Erigholho-gholho eryo, omughombe wa Abrahamu mwabwira Betweli na mughalha wabu Rebeka Labani, ekighendererwa eky’eryasa liwe. Abosi mubikirirya bathi Rebeka angaghendire nayu inyayathahibwa na Isaka. Rebeka mwabugha athiki abulibawa? Mwabugha athi, ‘Ee,’ aby’anzire erighenda. Neryo engyakya mubasambira okwa syangamiya n’eritsuka olhughendo lhuli olhw’erisuba e Kanana.

Mubahika omw’igholho-gholho. Rebeka mwalhangira omulhume inyane mulendera omw’irima. Abya ini Isaka. Isaka mwa tsema akalhangira Rebeka. Mama wa Isaka abya inya maghunza birimo bisathu aholire, neryo abya inyakine mw’obulighe obwo. Aliriryo endambi eyo Isaka mwanza Rebeka ya kutsibu, neryo mwabya n’etseme kandi.

Enzuko 24:1-67.



Ebibulyo

  • Omulhume n’omukali abali omwa kisasani nibahi?
  • Abrahamu mwakolha ki eribanira mughalha wiwe y’omukali, kandi busana naki?
  • Omusabe w’omughombe wa Abrahamu mwasubiribwa athi?
  • Rebeka mwasubirya athiki omughulhu bamubulhaya ngananzire erithahibwa na Isaka?
  • Ekyaleka Isaka inyathasya tsema niki?

Ebibulyo eby’eryongerako

  • Soma Enzuko 24:1-67.

    Ni mibere ki mibuya eya Rebeka akanganaya omughulhu asanga omughombe wa Abrahamu y’okwa kithehero? (Enz. 24:17-20; Emi. 31:17, 31)

    Abrahamu eritheghekera Isaka ni ky’erireberyako kibuya kithi okwa Abakristayo munabwire? (Enz. 24:37, 38; 1 Kor. 7:39; 2 Kor. 6:14)

    Busana naki thutholere ithwabana endambi ey’erilengekania buli nga Isaka kw’akolha? (Enz. 24:63; Esy. 77:12; Fil. 4:8)