Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 14: Nyamuhanga Akalenga okw’Ikirirya lya Abrahamu

Olhughano 14: Nyamuhanga Akalenga okw’Ikirirya lya Abrahamu

WANA malhangira ekya Abrahamu akakolha hano? Ali n’omuhamba, kandi kikalhangirika ng’akay’itha mughalha wiwe. Busana naki angakolire eki? Erimbere, thutha lebya ngokwa Abrahamu na Sara babana omwana wabu.

Abrahamu akahonga Isaka

Wibuke, Nyamuhanga mwabalhaghanisya athi banga buthire omwana w’obulhume. Aliriryo eki mukyabya nga si kyanga thokekana, kusangwa Abrahamu na Sara babya ibabiri kekelhuha kutsibu. Aliriryo, ya Abrahamu aby’ikirirye ndeke-ndeke athi Nyamuhanga angana kolha ekyangabya nga si kyanga thokekana. Neryo ekyabya kyabere niki?

Nyamuhanga abere abirikolha endaghane yiwe, ekirimo kyosi mukyahwa. Neryo omughulhu Abrahamu ahika ebirimo 100 na Sara 90 eby’obukulhu, mubabutha omwana oyuwahulhawa mwa Isaka. Nyamuhanga mwatheya endaghane yiwe!

Aliriryo Isaka abere abirikulha, Yehova mwalengesya erikirirya lya Abrahamu. Mwa birikira: ‘Abrahamu!’ Na Abrahamu mwasubirya: ‘Ingye yono hano!’ Neryo Nyamuhanga mwabugha athi: ‘Imaya mughalha wawu, ekyusa kyawu, ya Isaka, neryo wughende okwa kithwa ekya ngendi kukangya. Eyo, withe mughalha wawu n’erimuherera ng’obuhere.’

Ebinywe ebi ka byangabya mubya kolha Abrahamu mw’ow’obulighe, kusangwa Abrahamu aby’anzire mughalha wiwe ya kutsibu. Kandi wibuke, Nyamuhanga asangirwe inyabiri lhaghanisya athi abana ba Abrahamu bang’ikere omwa kihugho ekya Kanana. Hathya ibbwa eki kyangabere kithi ya Isaka kw’ithibwa? Abrahamu mwa thayitheghererya, aliriryo mwalholya embere n’eryowa Nyamuhanga.

Abere ahika okwa kithwa, Abrahamu mwaboha Isaka n’erimuhira okwa kiherero ekya himba. Neryo mwa hulhukya omuhamba erikera mughalha wiwe. Aliriryo okwa ndambi eyo omumalaika wa Nyamuhanga mwabirikira athi: ‘Abrahamu, Abrahamu!’ Na Abrahamu mwasubirya: ‘Ingye yono hano!’

‘Si wuhuthalhaye omulhwana, kutse si wumukole kwa kindu,’ Nyamuhanga athya. ‘Lino nyasi ngokwa wuwithe erikirirya omw’ingye, kusangwa siwuthanyikagha mughalha wawu, ekyusa kyawu.’

Ka n’ikirirya linene Abrahamu abya withe omu Nyamuhanga! Aby’ikirirye athi sihali ekithathokekana oku Yehova, kandi ngoku Yehova nibya angana lhubukya Isaka omwa lhuholho. Aliriryo kwenene siryabya erisonda lya Nyamuhanga ya Abrahamu er’itha Isaka. Neryo Nyamuhanga mwaletha embuli yihambawe omwa lhusaka olhwabya hakuhi, n’eribwira Abrahamu athi ahongeyo ng’ekihongo omwa mwanya wa mughalha wiwe.

Enzuko 21:1-7; 22:1-18.



Ebibulyo

  • Nyamuhanga mwalhaghanisya Abrahamu yaki, kandi mwa berererya athi endaghano yiwe?
  • Ngokwa kikanganibwe omwa kisasani, Nyamuhanga mwalenga athi okw’ikirirya lya Abrahamu?
  • Abrahamu mwakolha ki, n’omwakine indi mwa thayitheghererya enzumwa ey’ekiraghiro kya Nyamuhanga?
  • Abrahamu abere alhusyayo omuhamba athi ak’itha mughalha wiwe niki ekyabya kyabere?
  • Erikirirya lya Abrahamu omu Nyamuhanga lyabya lighumire lithi?
  • Nyamuhanga mwahererya Abrahamu yaki eky’erihonga, kandi athi?

Ebibulyo eby’eryongerako

  • Soma Enzuko 21:1-7.

    Ekyaleka Abrahamu inyabania mughalha wiwe okwa kiro ky’omunani niki? (Enz. 17:10-12; 21:4)

  • Soma Enzuko 22:1-18.

    Isaka mwaghondera athi thatha wiwe, Abrahamu, n’eki kyakanganaya mwatsi ki mukulhu owa kendi syabya embere? (Enz. 22:7-9; 1 Kor. 5:7; Fil. 2:8, 9)

Thasyaminya Bingyi

GHERERERAYA ERIKIRIRYA LYABU

Abrahamu—‘Thatha w’Abosi Abawithe Erikirirya’

Abrahamu mwakangania athi erikirirya? Wanzire iwagherererya erikirirya lya Abrahamu omu nzira syahi?