Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 13: Abrahamu—Omunywani wa Nyamuhanga

Olhughano 13: Abrahamu—Omunywani wa Nyamuhanga

EKIGHUMA okwa bitsweka ey’abandu bay’ikalha enyuma w’eribogha ly’amaghetse kyabya kikahulhwamu Uri. Mwabya muyi mukulhu owali mw’amanyumba awuwene. Aliriryo abandu b’omwa muyi oyo babya bakaramya esyanyamuhanga esy’amabehi. Kwabana kolha bathya ne Babeli. Abandu be Uri ne Babeli si babya nga Noa n’omwana wiwe Semu, ababya bakakolera Yehova.

Okw’ighunzerera, enyuma w’ebirimo 350 eby’eribogha ly’amaghetse, omuyisiwa Noa mwaholha. Omulhume oyuwamalhangira omwa kisasani eki, abuthawa ihamathalhaba ebirimo bibiri bisa. Abya mundu w’embaghane eyiri Nyamuhanga. Erina liwe yuwabya Abrahamu. Mwikalha n’erihiika lyabu omwa muyi oyo owe Uri.

Abrahamu akasamalira esyongununu

Kiro kighuma Yehova mwabwira Abrahamu athi: ‘Sigha e Uri n’ekithunga kyawu, wughende omwa kihugho n’asya kukangya.’ Abrahamu mwana hulikirira Nyamuhanga n’erisigha enyuma y’ebibuya ebyosi ebyabya e Uri? Inga, mwakolha athya. Kandi kyabya kithya kusangwa Abrahamu inyakowa Nyamuhanga mughulhu wosi, kyaleka inya minywa nga munywani wa Nyamuhanga.

Abaghuma b’okw’ihiika lyabu Abrahamu mubaghenda nayu omughulhu alhwa omwa Uri. Thatha wiwe iya Tera mwakolha athya. N’omwana wa mughalha wabu iya Loti mwa kolha athya. Kuthya na Sara mukali wa Abrahamu mwa ghenda. Obuthuku mubwahika bamahika e Harani, aho Tera aholera. Babya hali kutsibu okwa Uri.

Habere halhaba mughulhu muke, Abrahamu n’erihiika liwe mubalhua e Harani baghenda omwa kihugho kye Kanana. Eyo, Yehova mwabugha athi: ‘Eki ky’ekihugho ngendisyaha abana bawu.’ Abrahamu mwabya omwa Kanana n’erikalha omwa syahema.

Nyamuhanga mwatsuka eriwathikya Abrahamu ahika okw’ithunga ebihyo bingi eby’esyambuli n’ebindi bisoro n’ebikumi by’abaghombe. Aliriryo iyo na Sara mubathabya n’omwana wosi-wosi ahabwabu.

Omughulhu Abrahamu abya n’ebirimo 99 eby’obukulhu, Yehova mwabugha: ‘Nga lhaghanisaya nyithi wasyabya thatha ow’ebihanda bingi eby’abandu.’ Aliriryo eki kyangabere kithi, kundi ya Abrahamu na Sara babya ibamabiri kulha kutsibu eributha omwana?

Enzuko 11:27-32; 12:1-7; 17:1-8, 15-17; 18:9-19.



Ebibulyo

  • Omwa muyi we Uri mwabya mw’ikere abandu abali bathi?
  • Omulhume oyuli omwa kisasani nindi, abuthawa mughulhu wahi, kandi mw’ikalha hayi?
  • Nyamuhanga mwabwira Abrahamu athi akole ki?
  • Ekyaleka Abrahamu inyahulhwa mwa munywani wa Nyamuhanga niki?
  • Ababya baghendire na Abrahamu akalhua e Uri ni bahi?
  • Abrahamu abere ahika omwa kihugho kye Kanana, Nyamuhanga mwamubwira ki?
  • Abrahamu abere ayira ebirimo 99 eby’obukulhu, Nyamuhanga mwa mulhaghanisya ki?

Ebibulyo eby’eryongerako

  • Soma Enzuko 11:27-32.

    Abrahamu na Loti babya basene bathi? (Enz. 11:27)

    N’omwakine indi Tera yuka kanibawako ng’oyuwahumiraya erihiika lye Kanana, thukaminya thuthi indi Abrahamu yuwatsukisaya olhughendo lhuno, n’ekyaleka inyakolha athya niki? (Enz. 11:31; Emib. 7:2-4)

  • Soma Enzuko 12:1-7.

    Abrahamu abere abirihika omwa kihugho kye Kanana, Yehova mwongera athi okwa ndaghano eya akolha nayu? (Enz. 12:7)

  • Soma Enzuko 17:1-8, 15-17.

    Abramu abere abirihikya ebirimo 99 eby’obukulhu, erina liwe mulyahindulhwa mwaki, kandi busana naki? (Enz. 17:5)

    Yehova mwalhaghanisya Sara ya mighisa ki eyendiasa embere? (Enz. 17:15, 16)

  • Soma Enzuko 18:9-19.

    Erikwamana n’Enzuko 18:19, abathatha bawithe mibiiri ki omwa maka abo? (Ebi. 6:6, 7; Efe. 6:4)

    Niki ekyabya kyahikire oku Sara ekikakanganaya indi sithwangabisa Yehova ya kindu kyosi-kyosi? (Enz. 18:12, 15; Esy. 44:21)