Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 12: Abandu Baka Himba Enyumba Nyiri-Nyiri

Olhughano 12: Abandu Baka Himba Enyumba Nyiri-Nyiri

EBIRIMO bingi mubya lhaba. Abana ba Noa mubabya n’abana bangi. N’abana babu muba kulha babya n’abana bangi. Neryo abandu mubabya bangi okwa kihugho.

Omughuma w’okw’abandu aba, abya mwitsikulhu wa Noa oyu wabya Nimurodi. Abya mulhume mubi oyuwabya akahigha n’eritha ebisoro n’abandu. Nimurodi kandi mwayikolha mwa Mwami athabale okw’abandi bandu. Nyamuhanga mwathanza Nimurodi.

Abandu okw’omughulhu oyo babya bakabugha mubughe mughuma. Nimurodi mwanza abahire haghuma nuku anga bathabalha. Neryo wunasi ekyabya akolire? Mwabwira abandu athi bahimbe omuyi n’erihira mugho mw’enyumba nyiri-nyiri. Lhangirabo omwa kisasani baka bumba amatafali.

Yehova Nyamuhanga mwatha tsemesibwa n’erihimba eri. Nyamuhanga aby’anzire abandu bayitsatsange n’er’ikalha omwa kihugho kyosi. Aliriryo abandu mubabugha bathi: ‘Mwase! Thuyihimbire omuyi n’enyumba nyiri-nyiri, akasweswe kayo kahike elhubulha. Neryo thwasya minywa!’ Abandu mubanza bahebawe ekitsumbi kwilhaba Nyamuhanga.

Neryo Nyamuhanga mwimania abandu erihimba enyumba eyo. Wunasi ngokw’abya akikolire. Mwa kwama ky’aha abandu b’emibughe eyiri mbaghane, omw’omwanya w’omubughe mughuma. Abahimbi mubathathoka erithasya yitheghererania. Kyaleka omuyi oyu inyahulhwa mwa Babeli, kutse Babiloni, ekikamanyisaya “Eritalibana.”

Neryo abandu mubatsuka erilhua omwa Babeli. Ebithunga by’abandu ababya bakabugha omubughe mughuma mubay’ikalha haghuma omwa bitsweka ebindi eby’ekihugho.

Enzuko 10:1, 8-10; 11:1-9.

Abakoli bane muhimba


Ebibulyo

  • Nimurodi abya inindi, kandi Nyamuhanga mwamulhangira athi?
  • Omwa kisasani, busana naki abandu babya bakabumba amatafali?
  • Busana naki Yehova mwathatsemera omubiiri w’obuhimbe?
  • Nyamuhanga mwimania athi obuhimbe obw’enyumba enyiri-nyiri?
  • Omuyi mwahebwa lina ki, n’erina eri lyabya likamanyisya ki?
  • Ekyabya kyabere okw’abandu niki Nyamuhanga abiri tabura emibughe yabu?

Ebibulyo eby’eryongerako

  • Soma Enzuko 10:1, 8-10.

    Ni mibere ki eya Nimurodi akanganaya, kandi eki kikathukunga kithi munabwire? (Emi. 3:31)

  • Soma Enzuko 11:1-9.

    Ekighendererwa eky’erihimba enyumba nyiri-nyiri kyabya iniki, kandi busana naki obuhimbe mubwalemesibwa? (Enz. 11:4; Emi. 16:18; Yn. 5:44)