Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 9: Noa Akahimba Obwathu

Olhughano 9: Noa Akahimba Obwathu
Abandu bakasekerera Noa

NOA abya awithe omukali n’abaghalha basathu. Amena w’abaghalha biwe babya Semu, Hamu na Yafeti. Kandi buli mughuma w’okw’ibo abya awithe omukali. Neryo omw’ihiika lya Noa mwabya abandu munani.

Hathya Nyamuhanga mwanza Noa akole ekindu eky’embaghane. Mwamubwira athi ahimbe obwathu bunene. Obwathu buno bwabya bunene ng’emeri, aliriryo ibukabya nga busosire esanduko enene, kandi enyiri. Nyamuhanga mwamubwira athi, ‘Kolhabu mwa kayina isathu eyighulhu, kandi wuhire mubwo mw’ebisenge.’ Ebisenge byabya bya Noa n’erihiika liwe, ebisoro, n’ebyalya eby’abosi bangayithaghire.

Nyamuhanga kandi mwabwira Noa ahimbe obwathu bwa ndeke indi amaghetse syalhabe mubwo. Nyamuhanga mwabugha: ‘Ngaya thuma eribogha linene ly’amaghetse n’erithoghothya ekihugho kyosi. Obuli mundu oyuthe omwa bwathu akendisya holha.’

Noa n’abaghalha biwe mubowa Yehova kandi batsuka erihimba. Aliriryo abandi bandu mubakwama eky’eriseka. Mubalholya embere n’eribya babi. Sihabya na mughuma oyu w’ikiriraya Noa omughulhu abwirabo ekya Nyamuhanga akayakolha.

Eka ya Noa yine mwingirya ebisoro n’ebyalya by’omw’obwathu

Mukyathwalha buthuku buli erihimba obwathu kusangwa bwabya bunene kutsibu. Erighunzerera, enyuma w’ebirimo bingi, mubwahwa. Neryo Nyamuhanga mwabwira Noa eriretha okwa muhanda w’ebisoro omwa bwathu. Nyamuhanga mwabugha athi bingiraye bibiri-bibiri okwa buli bisoro ebyosi, eky’obulhume n’eky’obukali. Aliriryo okwa wundi muhanda w’ebisoro, Nyamuhanga mwabwira Noa eringirya birinda-birinda. Nyamuhanga kandi mwabwira Noa eringirya obuli muhanda wosi owa buli binyonyi. Noa mwakolha nga Nyamuhanga kw’anabugha.

Enyuma waho, Noa n’erihiika liwe nabo mubingira omw’obwathu. Neryo Nyamuhanga mwakyinga olhuyi. Bane omwa kathi, Noa n’erihiika liwe mubalindirira. Thayiri lengekania iwune nabo omwa bwathu, mukalindirira. Amaghetse anemendi bogha nga Nyamuhanga kw’abugha?

Enzuko 6:9-22; 7:1-9.



Ebibulyo

  • Omw’ihiika lya Noa mwabya bandu bangahi, kandi amena w’abaghalha biwe abasathu ni wahi?
  • Ni kindu ki ekithe kya bulikiro ekya Nyamuhanga babwira Noa athi akole, kandi busana naki?
  • Abaliranwa ba Noa mubasubirya bathi abiribabwira okwa bwathu?
  • Nyamuhanga mwabwira Noa athi akole ki okwa bisoro?
  • Nyamuhanga abere abirikinga olhuyi olhw’obwathu, Noa n’erihiika liwe babya b’erikolha ki?

Ebibulyo eby’eryongerako

  • Soma Enzuko 6:9-22.

    Ekyaleka Noa inyabya muramya ow’embaghane wa Nyamuhanga ow’ekwenene niki? (Enz. 6:9, 22)

    Yehova akalhangira athi ebikorwa eby’obw’ithi, n’eki kikahamba kithi okwi sombolha ery’eriyitsemesya lyethu? (Enz. 6:11, 12; Esy. 11:5)

    Thwangagherererya thuthi ya Noa omughulhu thukabana obusondoli erilhabira omwa kithunga kya Yehova? (Enz. 6:22; 1 Yn. 5:3)

  • Soma Enzuko 7:1-9.

    Yehova erilhangira ya Noa omulhume oyuthahikene ng’omuthunganene kikathuhimba kithi munabwire? (Enz. 7:1; Emi. 10:16; Isa. 26:7)