Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 8: Ebilhume by’Emikaka Omwa Kihugho

Olhughano 8: Ebilhume by’Emikaka Omwa Kihugho

KIRYABYA indi omundu anemwasa eyawuli kandi ni muli erihika okwa lhuthwe lhw’enyumba yawu, wangalengekania ki? Omundu oyo inyakendibya ini w’omukaka! Mughulhu mughuma abandu b’emikaka banabya okwa kihugho. E Biblia yikakanganaya yithi abathatha wabu babya bamalaika erilhua elhubulha. Eki kyanga thokakene kithi?

Ebilhume by’emikaka eby’omwagha

Wibuke indi, malaika mubi Sitani abya akasurusutha analethe omulyambo. Inyakalengesaya nibya erikolha abamalaika ba Nyamuhanga mwa babi. Obuthuku bwabere bwahika, abaghuma okwa bamalaika aba mubatsuka erihulikirira Sitani. Mubaleka omubiiri owa Nyamuhanga ahabo erikolha elhubulha. Neryo mubasa okwa kihugho n’eriyambalya emibiri y’abandu. Wunasi nga ni busana naki?

Biblia yikabugha yithi ni busana baghalha ba Nyamuhanga aba mubalhangira abakali babuya okwa kihugho kandi banza er’ikalha haghuma nabu. Neryo mubasa okwa kihugho n’erithahya abakali bano. E Biblia yikabugha yithi kino kyabya kibi, kusangwa Nyamuhanga mwakolha abamalaika er’ikalha elhubulha.

Omughulhu abamalaika n’abakali babu babutha abana, abana aba babya bambaghane. Erimbere bangabya imubatha sosa bambaghane. Aliriryo mubakulha mwa banene-banene, n’eribya ab’akaghalha kanene erihika ahababera ab’emikaka.

Ab’emikaka aba babya babi. Kandi kusangwa babya banene-banene kandi b’akaghalha, ibakahuthalhaya abandu. Mubalengesya erikaka buli mundu eribya mubi ng’ibo.

Enoka abya inyabiri holha, aliriryo habya mulhume mughuma okwa kihugho lino oyuwabya mubuya. Erina ly’omulhume ono yuwabya Noa. Mughulhu wosi inyakakolha ebya Nyamuhanga aby’anzire akole.

Kiro kighuma Nyamuhanga mwabwira Noa athi endambi yabirihika erithoghothya abandu babi abosi. Aliriryo Nyamuhanga abya inyakaya lhamaya Noa, erihiika liwe n’ebingi okwa bisoro. Thulebaye Nyamuhanga ngokw’abya akolire kino.

Enzuko 6:1-8; Yuda 6.



Ebibulyo

  • Ekyabya kyabere niki omughulhu abaghuma b’okwa abamalaika ba Nyamuhanga bahulikirira ebye Sitani?
  • Ekyaleka abaghuma b’okwa abamalaika ibaleka omubiiri wabu elhubulha n’eriandaghalira okwa kihugho niki?
  • Busana naki kyabya kibi abamalaika eriandaghalira okwa kihugho n’eriyambalya emibiri y’abandu?
  • Ni mbaghane ki eyabyaho okw’abana b’abamalaika?
  • Ngokwa wunalhangire omwa kisasani, abana b’abamalaika babere babiribya b’emikaka mubakolha ki?
  • Enyuma wa Enoka, ni mulhume wahi mubuya oyuwabyaho okwa kihugho, kandi ekyaleka Nyamuhanga inyamusima niki?

Ebibulyo eby’eryongerako

  • Soma Enzuko 6:1-8.

    Enzuko 6:6 akakanganaya athi ngokwa Yehova akayowa erilingana n’emibere yethu? (Esy. 78:40, 41; Emi. 27:11)

  • Soma Yuda 6.

    Abamalaika ‘abasigha omwanya wabu w’elhubulha’ omwa biro bya Noa, baka thw’ibukaya ki munabwire? (1 Kor. 3:5-9; 2 Pet. 2:4, 9, 10)