Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 7: Omulhume Embangi

Olhughano 7: Omulhume Embangi
Enoka

OMUHENDO w’abandu abere akayongera okwa kihugho, abangi kubo mubakolha ebindu bibi nga Kaina. Aliriryo omulhume mughuma abya wa mbaghane. Y’omulhume ono oyukahulhawa mwa Enoka. Enoka abya mulhume mbangi. Abandu ababya bamuthimbireko ibakakolha ebindu bibi, aliriryo Enoka mwalholya embere n’erikolera Nyamuhanga.

Wunasi ekyaleka abandu b’omughulhu w’enyuma ibakolha bindu bibi bingi? Kale, thalengekania, Oyuwaleka Adamu na Eva ibathowa Nyamuhanga n’erirya okwa kighuma ekya Nyamuhanga abugha athi isibalya? Inga, abya malaika omubi. E Biblia yika mwahulha mwa Sitani. Kandi akalengesaya erikolha buli mundu mwa mubi.

Am’iba n’er’itha

Kiro kighuma Yehova Nyamuhanga mwabwira Enoka athi abwire abandu b’ekindu ekya bathanzire eriowa. Kyabya ikyakino: ‘Kiro kithe ndaghano Nyamuhanga akendi thoghothya abandu bosi ababi.’ Obundi abandu ibakahithana bakowa kino. Banganabya nibya imubanalengesya n’eritha Enoka. Lithya Enoka abya atholere inyabya mbangi eribwira abandu okwa bya Nyamuhanga abya inyakayakolha.

Nyamuhanga mwath’ikirirya Enoka akabyaho mughulhu mungi omwa kathi-kathi k’abandu babi abo. Enoka mwabyaho erighunza ebirimo by’obukulhu 365 bisa. Busana naki ithwabugha thuthi “ebirimo 365 bisa”? Kusangwa abandu b’omughulhu oyo babya ab’akaghalha kwilhaba lino kandi ibakaghunza mughulhu muli. Lebaya, mughalha wa Enoka ya Metusela mwaghunza ebirimo 969 eby’obukulhu!

Abandu bakakolha ebibi

Neryo, Enoka abere abiri holha, abandu mubayongera eribya babi kutsibu. E Biblia yikabugha yithi ‘obuli kindu ekyababya bakalengekania kyabya kibi obuli ndambi,’ kandi yithi ‘ekihugho mwakyusulha mw’ebikorwa by’obwithi.’

Wunasi enguma yokwa syanzumwa esyaleka ihabya butsibu bunene okwa kihugho omwa biro ebyo? Ni busana Sitani abya na nzira nyihya-nyihya eyakahambira mw’abandu erikolha ebindu bibi. Thukendi igha okw’eki eyindi ndambi.

Enzuko 5:21-24, 27; 6:5; Abaebrania 11:5; Yuda 14, 15.



Ebibulyo

  • Enoka abya athi wa mbaghane?
  • Ekyaleka abandu ab’omwa buthuku bwa Enoka ibakolha ebindu bibi bingi niki?
  • Ni bindu ki ebibi eby’abandu babya bakakolha? (Lebaya ekisasani.)
  • Ekyalekire Enoka inyathakwa obuba niki?
  • Abandu omughulhu oyo ibakaghunza birimo nga bingahi, aliriryo Enoka mwabyaho birimo bingahi?
  • Niki ekyabya kyabere Enoka abiriholha?

Ebibulyo eby’eryongerako

  • Soma Enzuko 5:21-24, 27.

    Enoka abya withe engolangana eyisosire yithi na Yehova? (Enz. 5:24)

    Erikwamana ne Biblia, ni mundu wahi oyuwabirithabyaho birimo bingi, kandi mwaholha inyawithe birimo bingahi? (Enz. 5:27)

  • Soma Enzuko 6:5.

    Emibere ye kihugho muyabya mibi yithi enyuma w’olhuholho lhwa Enoka, kandi eki kiringene kithi n’omughulhu wethu ono? (2 Tim. 3:13)

  • Soma Abaebrania 11:5.

    Enoka abya withe mubere ki ‘owa tsemesaya Nyamuhanga,’ kandi niki ekyabya kyalhwiremu? (Enz. 5:22)

  • Soma Yuda 14, 15.

    Abakristayo munabwire banga gherererya bathi obuthubaha bwa Enoka omughulhu bakakunga abandu okwa lhuhi olhukayasa olhwa Harmagedoni? (2 Tim. 4:2; Ebr. 13:6)