Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 6: Omulhwana Mubuya, n’Omubi

Olhughano 6: Omulhwana Mubuya, n’Omubi

THATHUNGERERA Kaina na Abeli hathya. Abosi babirikulha. Kaina abiribya mulimi. Akahera esyambutho n’ebighuma n’esyanyinyi.

Kaina na Abeli bakahongera Nyamuhanga y’ebihongo

Abeli abiribya mulisya w’esyambuli. Anzire erilisya esyambuli esikine ndere. Sikakulha isyabya nene-nene, neryo Abeli awithe ekihyo kyosi eky’esyambuli esy’erilisya.

Kiro kighuma Kaina na Abeli bakalethera Nyamuhanga y’obuhere. Kaina akaletha okwa birimwa eby’ahera. Na Abeli akaletha embuli eyuwene omwa syambuli siwe. Yehova akatsemesibawa n’obuhere bwa Abeli. Aliriryo syatha tsemesibwa n’obuhere bwa Kaina. Wunasi nga ni busana naki?

Si busana n’eribya indi ekihembo kya Abeli kyuwene kwilhaba ekya Kaina. Ni busana Abeli ni mulhume mubuya. Anzire Yehova na mughalha wabu. Aliriryo Kaina ni mubi; syanzire mughalha wabu.

Lithya Nyamuhanga akabwira Kaina athi atholere inya bindulha emibere yiwe. Aliriryo Kaina syaliowa. Akahithana kusangwa Nyamuhanga anzire Abeli ya ndeke. Neryo Kaina akabwira Abeli athi, ‘Thutha ghende omwoli.’ Eyo, banali ibibene, Kaina akaswiraya mughalha wabu ya Abeli. Akamuswiraya kutsibu erihika okwi mwitha. Ekyo sikyabya kindu kibi kutsibu Kaina erikolha?

Kaina akathibitha enyuma w’eritha Abeli

Abeli nomwanabya aholire, Nyamuhanga akina mw’ibuka. Abeli iyo abya mubuya, kandi Yehova syalibirirawa omundu oyuli ng’oyo. Busana nekyo, kiro kighuma Yehova Nyamuhanga akendi syasubya Abeli y’okwa ngebe. Okwa mughulhu oyo Abeli siendi syaswaholha. Akendi syikalha hano okwa kihugho kwa kera na kera. Sikyendi syabya kibuya eriminya abandu abali nga Abeli?

Aliriryo Nyamuhanga syali tsemesibawa n’abandu abali nga Kaina. Kaina abere abir’itha mughalha wabu, Nyamuhanga mwa musuyira akamutsindika hali erilhua okw’ihiika ery’abandu biwe. Kaina abere abirighenda n’eriyikalha omwa kindi kitsweka eky’ekihugho, mwaghenda n’omughuma oku bali babu, neryo mwa yabya mukali wiwe.

Endambi yabere yahika Kaina na mukali wiwe mubatsuka eributha abana. Abandi baghalha n’abali ba Adamu na Eva mubathahania, nabu babutha abana. Obuthuku obuthe bwa hali neryo okwa kihugho mukwabya bandu bangi. Thuth’igha okwa baghuma-baghuma okw’ibo.

Enzuko 4:2-26; 1 Yoane 3:11, 12; Yoane 11:25.



Ebibulyo

  • Ni mibiiri ki eya Kaina na Abeli bakakolha?
  • Kaina na Abeli bakalethera Yehova ya bihembo ki?
  • Busana naki Yehova akatsemera ekihembo kya Abeli, kandi habwa ki syathatsemera ekya Kaina?
  • Kaina ni mundu ali athi? Kandi Yehova akalengesaya erimuhabulha athi?
  • Kaina akakolha ki inyane omw’irima mw’iyuwene na mughalha wabu?
  • Soborera ekyabya kyabere oku Kaina abir’itha mughalha wabu.

Ebibulyo eby’eryongerako

  • Soma Enzuko 4:2-26.

    Yehova mwakania athi omubere mubi owa Kaina abyamu? (Enz. 4:7)

    Kaina mwakangania athi emibere ey’omuthima wiwe? (Enz. 4:9)

    Yehova akalhangira athi eryutha omusasi owathe kwa lhubanza? (Enz. 4:10; Isa. 26:21)

  • Soma 1 Yoane 3:11,12.

    Ekyaleka Kaina inyahithana kutsibu niki, kandi eki kikabya kithi ng’erikunga eyathuli munabwire? (Enz. 4:4, 5; Emi. 14:30; 28:22)

    E Biblia yikakanganaya yithi indi ab’omwaka yethu abosi n’omwa banga hakanisya Yehova, thwangana sighalha ithune bayisiwa? (Esy. 27:10; Mt. 10:21, 22)

  • Soma Yoane 11:25.

    Ni lhaghanisya ki erya Yehova akaha abosi abaka holha busana n’erithunganene? (Yn. 5:24)