Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Ekitabu Kyaghe eky’Esyangano sye Biblia

Olhughano 3: Omulhume n’Omukali ab’Erimbere

Olhughano 3: Omulhume n’Omukali ab’Erimbere

NI MBAGHANE ki eyiri omwa kisasani kino? Kwenene, b’abandu abalimo. Y’omulhume n’omukali abatsuka. Oyuwabakolha nindi? Ni Nyamuhanga. Wunasi erina liwe? Ni Yehova. Kandi omulhume n’omukali mubahulhwa mwa Adamu na Eva.

Adamu na Eva omw’irima lya Edeni

Nyamuhanga Yehova kw’akolha athya Adamu. Mwimya olhuthuthu olhw’ekithaka akolha mw’omubiri ow’ahikene, omubiri w’omulhume. Neryo mwabuhira omwa nyindo sy’omulhume mw’omuka, neryo Adamu mwabyaho.

Yehova Nyamuhanga abya awithire Adamu y’omubiiri. Mwabwira Adamu erilhuka ebisoro byosi by’amena. Adamu angabya imwathwalha obuthuku akayitheghererya ebisoro eribana amena awatholere ebyosi. Adamu abere anamulhuka ebisoro by’amena mwatsuka eriyitheghererya ekindi kindu. Wunasi ekyo nga kyabya niki?

Ebisoro ebyosi byabya ekilhume n’ekikali. Habya thatha nzowu na mama nzowu, kandi habya thatha ndale na mama ndale. Aliriryo Adamu syabya awithe oyuwangabya mukali wiwe. Neryo Yehova mwa lethera Adamu y’othulho thunene, neryo mwamulhusya mw’olhukanga lhwiwe. Omw’ikolesya olhukanga lhuno, Yehova mwakolera Adamu y’omukali, neryo mwabya mukali wiwe.

Endambi eno Adamu kamwabya n’obutseme! Kandi thalengekania obutseme Eva abya nabu erihirwa omw’irima eryuwene lithya ery’erikalhamu! Lino bangabuthire abana n’erikalha haghuma omwa butseme.

Yehova aby’anzire Adamu na Eva ibikalhaho kera na kera. Aby’anzire ibakolha ekihugho kyosi ikyuwana ng’eririma ery’Edeni. Kakyangabya imukyatsemesya Adamu na Eva omughulhu balengekanaya erikolha ekindu eki! Nawu wangana simire erighabana omwa mubiiri ow’erikolha ekihugho mw’eririma eryuwene? Aliriryo obutseme bwa Adamu na Eva mwa buthaghunza buthuku. Thulebaye nga ni busana naki.

Esyonyimbo 83:18, New World Translation; Enzuko 1:26-31; 2:7-25.



Ebibulyo

  • Ekisasani ekiri omwa Lhughano 3 ni ky’embaghane kithi okwa kisasani ekiri omwa Lhughano 2?
  • Oyuwakolha omulhume ow’erimbere nindi, n’erina ery’omulhume yuwabya ndi?
  • Nyamuhanga mwahererya Adamu y’omubiiri ki ow’erikolha?
  • Ekyaleka Nyamuhanga inya ghotserya Adamu y’omwa thulho thungi niki?
  • Adamu na Eva bangabere ho mughulhu mungahi, kandi ni mubiiri ki owa Yehova aby’anzire ibakolha?

Ebibulyo eby’eryongerako

  • Soma Esyonyimbo 83:18, “NW.”

    Erina lya Nyamuhanga yandi, n’ekitsumbi kiwe eky’embaghane okwa kihugho ni kyahi? (Yer. 16:21; Dan. 4:17)

  • Soma Enzuko 1:26-31.

    Erighunzerera ery’erihangika lya Nyamuhanga okwa kiro eky’omukagha lyabya niki, n’erihangika eri lyabya lya mbaghane lithi okwa bisoro? (Enz. 1:26)

    Niki ekya Yehova aby’ahere abandu n’ebisoro? (Enz. 1:30)

  • Soma Enzuko 2:7-25.

    Omubiiri wa Adamu ow’erilhuka ebisoro by’amena ayithaghisaya ki? (Enz. 2:19)

    Enzuko 2:24 akathuwathikaya athi eriyitheghererya ngoku Yehova akalhangira olhuthahyo, erilhuamu, n’erikomolhana? (Mt. 19:4-6, 9)