Ghenda ahali omwatsi

Ghenda ahali obutsukiro obwakabiri

Ghenda ahali ebirimo

Abema ba Yehova

Lhukonzo

Mukangiriraye Abaana Benyu

 ERISOMO 4

Mwatsemesya Thatha Wiwe na Yehova

Mwatsemesya Thatha Wiwe na Yehova

Yefuta anemulhagha Yehova yaki?

Sikyabya kyolho, aliwe mwali wa Yefuta mwakolha ekya thatha wiwe ayilhagha

Wanamalhangira omusika oyuli omwa kisasani?— Ni mwali w’omulhume oyukahulhawa mwa Yefuta. E Biblia siyirithubwira erina liwe, aliriryo thunasi ku mwatsemesya thatha wiwe na Yehova. Leka thutha mw’ighako na thatha wiwe, Yefuta.

Yefuta abya mulhume mubuya kandi iniakaghunza buthuku bungyi inianemukangirirya mwali wiwe oku Yehova. Abya mulhume w’amani kandi musondoli mubuya. Neryo Abaisraeli mubamusaba bathi abasondole omwa malhwa w’esyonzighu syabu.

Yefuta mwasaba Nyamuhanga y’obuwathikya nuku basingure. Yefuta mwayilhagha athi amasingura, iniakendi hererya Yehova y’omundu oyuwanga tsukire erilhua omwa nyumba yiwe erisyamwangirira  akasubulha. Omundu oyo ang’ikere n’erikolera eyiri ehema ya Nyamuhanga omwa ngebe yiwe yosi. Eyabya ehema, eyo ya bandu babya bakaya eriyaramya Nyamuhanga okwa mughulhu oyo. Neryo kwenene Yefuta mwasingura! Wunasi nga nindi oyuwatsuka erisyamwangirira akasuba eka?—

Mwabya iy’omwali wiwe! Yana mwana abya awithe, neryo obo mukyabya ikyamayithaghisya Yefuta eribwira omwana wiwe athi aghende. Eki mukyamwitha obulighe bunene. Aliriryo wibuke ngoku abya iniabiriyilhagha. Aho-n’aho mwali wiwe mwamubwira athi: ‘Thatha, muwayilhagha oku Yehova, kiberereraye.’

Obuli mwaka, banywani ba mwali wa Yefuta ibakayamulebaya

Mwali wa Yefuta nayu mwakwa obulighe. Iniane eyiri ehema, syangathahibwe kutse eributha abaana. Aliriryo abya anzire kutsibu eriberererya omulhaghe wa thatha wiwe n’eritsemesya Yehova. Okw’iyo eki kyabya kirengire erithahibwa kutse eributha abaana. Neryo mwalhua eka n’eriyikalha eyiri ehema engebe yiwe yosi.

Wukalengekanaya eky’akolha mukyanatsemesya thatha wiwe na Yehova?— Ni kwenene, mukyabatsemesya! Wamabya mwowa kandi iwanzire Yehova, iwukendibya nga mwali wa Yefuta. Nawu iwukendi tsemesya kutsibu ababuthi bawu na Yehova.

SOMA OMWA BIBLIA

  • Eryibuka Ebihano 6:4-6

  • Abatsweri 11:30-40

  • 1 Abanya Korinto 7:37, 38