Langsung ka’ Content

Langsung ka’ menu kadua

Langsung ka’ daptar isi

Saksi-Saksi Yehuwa

Dayak Ahe

Barita Baik dari Allah!

 PALAJARAN 4

Sae ge’ Yesus Karistus?

Sae ge’ Yesus Karistus?

1. Ampahe asal mula kaidupatn Yesus?

Sipat ahe ma’an nang mamuat Yesus mudah disamaki’? —MATIUS 11:29; MARKUS 10:13-16.

Yesus koa ciptaan Allah nang pertama. Nana’ lea manusia lain, Yesus idup ka’ saruga sabage mahluk roh sanape’ ia dimaranakatn ka’ dunia. (Yohanes 8:23) Ia nana’ dimaranakatn seko’ nang bini ka’ saruga. Ia langsung dimamuat Allah Yehuwa. Jadi, tapat kade’ Yesus disabut Anak Allah. Ia uga’ disabut ”Firman” sabab ia nang ngomong ngawakili’ Allah. (Yohanes 1:14) Yesus uga’ dimare’ kuasa untu’ mamuat hal-hal nang lain.Baca Amsal 8:22, 23, 30; Kolose 1:15, 16.

2. Ngahe Yesus atakng ka’ dunia?

Allah nyuruh Yesus atakng ka’ dunia. Ia mindahatn kaidupatn Yesus dari saruga ka’ dunia untu’ dimaranakatn seko’ nang dara Yahudi badama Maria. Jadi, Yesus nana’ ba apa’ manusia. (Lukas 1:30-35) Tujuan Yesus atakng ka’ dunia untu’ (1) ngajaratn kabanaran tentang Allah, (2) mare’ contoh cara nyalanan parentah Allah walopun dalapm kaadaan nang susah, man (3) mare’atn kaidupatnnya nang sampurana sabage ”tabusan”.Baca Matius 20:28.

3. Ngahe diri’ paralu ditabus?

Tabusan koa raga nang harus dibayar untu’ mebasatn urakng dari kamatiatn. (Keluaran 21:29, 30) Waktu mamuat manusia, Allah nana’ paranah mao’ manusia jadi tuha man mati. Ahe buktinya? Ka’ dalapm Alkitab, Allah bakata ka’ manusia pertama Adam kade’ ia babuat ”dosa”, ia pasti mati. Jadi, kade’ Adam nana’ babuat dosa, ia ina’ paranah mati. (Kejadian 2:16, 17; 5:5) Alkitab bakata, kamatiatn ”tama’” ka’ dalapm dunia ngalalui’ Adam. Jadi, Adam narusatn  dosa man ukuman kamatiatn koa ka’ katurunannya. Diri’ paralu ditabus supaya dibebasatn dari ukuman kamatiatn nang diri’ warisi’ dari Adam.Baca Roma 5:12; 6:23.

Sae nang bisa mayar tabusan untu’ mebasatn diri’ dari kamatiatn? Waktu diri’ mati, diri’ hanya mayar ukuman dosa diri’ babaro. Manusia nang nana’ sampurana, nana’ bisa mayar tabusan untu’ dosa urakng lain.Baca Mazmur 49:7-9.

4. Ngahe Yesus paralu mati?

Nana’ lea diri’, Yesus sampurana sabab ia dimaranakatn sacara mujijat. Ia nana’ paranah babuat dosa. Jadi, ia nana’ paralu mati karna dosanya babaro, tapi ia mati untu’ urakng-urakng nang badosa. Allah nyuruh Yesus atakng ka’ dunia sabab Allah kasih ka’ manusia. Yesus uga’ nojokatn kasihnya ka’ diri’ man naati’ Apa’nya untu’ mare’atn nyawanya ka’ diri’.Baca Yohanes 3:16; Roma 5:18, 19.

5. Jadi ahe Yesus ampaikng?

Waktu ka’ dunia, Yesus nyamuhatn urakng sakit, ngidupatn urakng mati, man nolong urakng nang mandarita. Nianlah cara ia nojokatn ahe nang mao’ ia pamuat ka’ masa depan untu’ samua manusia nang ta’at. (Matius 15:30, 31; Yohanes 5:28) Laka’ Yesus mati, Allah ngidupatnnya agi’ sabage mahluk roh. (1 Petrus 3:18) Laka’ koa Yesus duduk ka’ sabalah kanan Allah nunggu sampe Yehuwa mare’ ia kuasa untu’ mamarentah sabage raja ka’ saluruh dunia. (Ibrani 10:12, 13) Ampaikng, Yesus dah mamarentah sabage Raja ka’ saruga, man samua pangikutnya mare’ nau’an barita baik nian ka’ saluruh dunia.Baca Daniel 7:13, 14; Matius 24:14.

Ina’ lama agi’, Yesus mao’ ngunaan kuasanya sabage Raja untu’ ngalanyapatn samua pandaritaatn man urakng-urakng nang nyabapatnnya. Samua urakng nang pucaya’ ka’ Yesus, ta’at ka’ ia, pasti idup ka’ bumi firdaus.Baca Mazmur 37:9-11.