Langsung ka’ Content

Langsung ka’ menu kadua

Langsung ka’ daptar isi

Saksi-Saksi Yehuwa

Dayak Ahe

Barita Baik dari Allah!

 PALAJARAN 14

Ngahe Allah Ngumpulatn man Ngatur Umat-Nya?

Ngahe Allah Ngumpulatn man Ngatur Umat-Nya?

1. Ngahe Allah milih urakng Israel jaman de’e untu’ jadi umat-Nya?

Allah milih katurunan Abraham untu’ jadi sabuah bangsa man mare’ ia ka’ koa ukum. Allah nyabut ia ka’ koa ”Israel” man ngunaan bangsa nian untu’ ngalinukngi’ ibadah nang banar man pakataatn-Nya. (Mazmur 147:19, 20) Jadi, urakng-urakng dari samua bangsa bisa namu barakat ngalalui’ Israel.Baca Kejadian 22:18.

Allah milih bangsa Israel untu’ jadi saksi-saksi-Nya. Contoh Israel jaman de’e nojokatn kade’ ukum Allah koa baguna. (Ulangan 4:6) Jadi ngalalui’ bangsa Israel, bangsa-bangsa lain bisa nganal Allah nang banar.Baca Yesaya 43:10, 12.

2. Ngahe Allah mao’ pangikut-Nya basatu ampaikng?

Bangsa Israel ahirnya nana’ agi’ ditarima’ Allah. Yehuwa nganti bangsa koa jadi sidang jemaat Karisten. (Matius 21:43; 23:37, 38) Ampaikng, urakng Karisten nang banar nganti posisi bangsa Israel de’e jadi saksi-saksi untu’ Yehuwa.Baca Kisah 15:14, 17.

Yesus ngumpulatn pangikutnya untu’ ngabar man mamuat urakng-urakng dari samua bangsa jadi muridnya. (Matius 10:7, 11; 24:14; 28:19, 20) Pakarajaatn nian ka’ jaman diri’ ampaikng dah sampe ka’ ujukngnya. Yehuwa nyatuatn manyak urakng dari samua bangsa ka’ dalapm ibadah nang banar. (Wahyu 7:9, 10) Urakng Karisten nang banar dingumpulatn untu’ saling manto’ man nguatatn. Ka’ saluruh dunia, urakng Karisten nang banar balajar pangajaratn Alkitab nang sama ka’ patamuan ibadah.Baca Ibrani 10:24, 25.

 3. Ampahe asal mula Saksi-Saksi Yehuwa nang ada ampaikng?

Tahutn 1870-an, sakalompok enek palajar Alkitab mulai’ namuan kabanaran-kabanaran Alkitab nang dah lama ilang. Palajar Alkitab nian nau’an kade’ Yesus dah ngumpulatn sidang Karisten untu’ ngabar, jadi ia ka’ koa mulai’ kampanye maritaatn barita baik ka’ saluruh dunia. Tahutn 1931, palajar Alkitab nian barubah dama jadi Saksi-Saksi Yehuwa.Baca Kisah 1:8; 2:1, 4, 11; 5:42.

4. Ampahe pakarajaatn Saksi-Saksi Yehuwa diatur?

Jaman Yesus, sidang-sidang jemaat Karisten ka’ manyak nagari namu pantojok dari badan pimpinan pusat nang ngakoi’ Yesus sabage Kapala’ sidang jemaat. (Kisah 16:4, 5) Ampaikng, Saksi-Saksi Yehuwa ka’ saluruh dunia namu bimbingan dari Badan Pimpinan. Ia ka’ koa panatua-panatua nang bapangalaman. Badan Pimpinan ngawasi’ kantor-kantor cabang Saksi-Saksi Yehuwa nang nerjemahan, nyetak, man nyabaratn bacaan untu’ palajaratn Alkitab ka’ dalapm labih dari 600 bahasa. Badan Pimpinan nyadiaatn pangiburan man pantojok Alkitab untu’ labih dari 100.000 sidang ka’ saluruh dunia. Ka’ tiap sidang, nang laki nang manuhi’ sarat ngalayani’ sabage panatua ato pangawas. Urakng-urakng nian sidi paduli ka’ umat Allah.Baca 1 Petrus 5:2, 3.

Saksi-Saksi Yehuwa dimare’ pantojok untu’ maritaatn barita baik man mamuat murid. Lea murid-murid Yesus, Ia ka’ koa ngabar dari rumah ka’ rumah. (Kisah 20:20) Saksi-Saksi Yehuwa nawaratn palajaran Alkitab ka’ urakng-urakng nang sidi kasih ka’ kabanaran. Tapi, Saksi-Saksi Yehuwa buke’ hanya sabuah organisasi. Saksi-Saksi Yehuwa koa kaluarga nang saling ngasihi’ man nyambah Allah nang sama. (2 Tesalonika 1:3) Umat Yehuwa dimare’ pantojok untu’ muat Allah repo man manto’ urakng lain, koalah sababnya ia ka’ koa kaluarga nang sidi bahagia ka’ dunia nian.Baca Mazmur 33:12; Kisah 20:35.