Langsung ka’ Content

Langsung ka’ daptar isi

Saksi-Saksi Yehuwa

Pilih Bahasa Dayak Ahe

 PALAJARAN 9

Ampahe Caranya Supaya Kaluarga Kita’ Bahagia?

Ampahe Caranya Supaya Kaluarga Kita’ Bahagia?

1. Ngahe panganten nang sah ngatangan kabahagiaan?

Barita baik barasal dari Yehuwa, Allah nang bahagia. Ia mao’ kaluarga-kaluarga bahagia. (1 Timotius 1:11) Allah Yehuwa pancipta kaluarga pertama. Panganten nang sah panting supaya kaluarga bahagia. Nian bisa muat dua laki bini man da’naknya ngampu’ status nang aman sasue ukum. Urakng Karisten harus ta’at ukum ka’ tampat ia badiapm man harus ada surat nikah.Baca Lukas 2:1, 4, 5.

Ahe nang Allah mao’ dari urakng nang panganten? Yehuwa mao’ urakng nang panganten koa satia sampe mati. (Ibrani 13:4) Ia teget ka’ urakng nang bacare. (Maleakhi 2:16) Tapi, Allah ngijinan urakng Karisten bacare man panganten agi’ kade’ pasangannya salingkuh.Baca Matius 19:3-6, 9.

2. Ampahe dua laki bini harus basikap?

Yehuwa mamuat nang laki man nang bini untu’ saling ngalangkapi’. (Kejadian 2:18) Laki sabage kapala’ kaluarga, wajib ngidupi’ kaluarganya man ngajar kaluarganya tentang Allah. Ia harus nele’atn kasih nang rela bakaroban ka’ bininya. Dua laki bini harus saling ngasihi’ man ngormati’. Karna nana’ sampurana, dua laki bini harus balajar untu’ saling ngampuni’. Koalah kunci kabahagiaan kaluarga.Baca Efesus 4:31, 32; 5:22-25, 33; 1 Petrus 3:7.

3. Ahe ge’ panganten nang nana’ bahagia mulih bacare?

Kade’ dua laki bini ada masalah, ia badua tatap harus saling ngasihi’. (1 Korintus  13:4, 5) Alkitab bakata bapisah buke’ cara nang tapat untu’ ngatasi’ masalah nang ada ka’ dalapm kaluarga.Baca 1 Korintus 7:10-13.

4. Ahe nang Allah mao’ untu’ kamuda’?

Yehuwa mao’ Kita’ bahagia. Ia mare’ nasihat nang paling edo’ supaya Kita’ repo waktu gi’ muda’. Ia mao’ Kita ta’at ka’ urakng tuha, sabab urakng tuha labih bapangalaman. (Kolose 3:20) Yehuwa uga’ mao’ Kita’ repo mamuat hal-hal nang Ia man Yesus sukai’.Baca Pengkhotbah 11:9–12:1; Matius 19:13-15; 21:15, 16.

5. Supaya bahagia, ahe nang kamuda’ paraluatn dari urakng tuha?

Urakng tuha paralu rajin bakaraja untu’ nyadia’atn makanan, tampat badiapm man pakean untu’ anak-anaknya. (1 Timotius 5:8) Tapi supaya kamuda’ bahagia, urakng tuha panting uga’ ngajari’ anaknya untu’ balajar man kasih ka’ Allah. (Efesus 6:4) Kamuda’ bisa nele’ man balajar dari kasih Kita’ ka’ Allah. Maka panting ngajari’ kamuda’ Alkitab, sabab hal nian bapangaruh baik untu’ kamuda’.Baca Ulangan 6:4-7; Amsal 22:6.

Dukungan man pujian sidi baguna untu’ kamuda’. Kamuda’ uga’ paralu nasehat man taguran. Palatihan lea nian bisa ngalinukngi’ kamuda’ supaya nana’ mamuat hal-hal nang bisa muat ia nana’ bahagia. (Amsal 22:15) Tapi, ame sampe mare’ taguran nang miah kasar ato karas.Baca Kolose 3:21.

Saksi-Saksi Yehuwa narabitatn manyak buku nang dinulis kusus untu’ manto’ urakng tuha man kamuda’. Buku nian sasue man Alkitab.Baca Mazmur 19:7, 11.