ಒಂದನೇ ಅರಸು 22:1-53
22 ಮೂರು ವರ್ಷ ತನಕ ಅರಾಮ್ಯರ, ಇಸ್ರಾಯೇಲ್ಯರ ಮಧ್ಯ ಯುದ್ಧ ನಡಿಲಿಲ್ಲ.
2 ಮೂರನೇ ವರ್ಷದಲ್ಲಿ ಯೆಹೂದದ ರಾಜ ಯೆಹೋಷಾಫಾಟ+ ಇಸ್ರಾಯೇಲ್ ರಾಜನ ಹತ್ರ ಹೋದ.+
3 ಆಮೇಲೆ ಇಸ್ರಾಯೇಲ್ ರಾಜ ತನ್ನ ಸೇವಕರಿಗೆ “ರಾಮೋತ್-ಗಿಲ್ಯಾದ್+ ನಮಗೆ ಸೇರಿದ್ದು ಅಂತ ನಿಮಗೆ ಗೊತ್ತು. ಆದ್ರೂ ಅದನ್ನ ಅರಾಮ್ಯದ ರಾಜನಿಂದ ವಾಪಸ್ ತಗೊಳ್ಳೋಕೆ ಹಿಂದೆ ಮುಂದೆ ನೋಡ್ತಾ ಇದ್ದೀವಿ” ಅಂದ.
4 ಆಮೇಲೆ ಅವನು ಯೆಹೋಷಾಫಾಟನಿಗೆ “ರಾಮೋತ್-ಗಿಲ್ಯಾದಿನ ವಿರುದ್ಧ ಯುದ್ಧ ಮಾಡೋಕೆ ನನ್ನ ಜೊತೆ ಬರ್ತಿಯಾ?” ಅಂತ ಕೇಳಿದ. ಅದಕ್ಕೆ ಯೆಹೋಷಾಫಾಟ ಇಸ್ರಾಯೇಲ್ ರಾಜನಿಗೆ “ನಾನು ನೀನು, ನನ್ನ ಜನ್ರು, ನಿನ್ನ ಜನ್ರು, ನನ್ನ ಕುದುರೆಗಳು ನಿನ್ನ ಕುದುರೆಗಳು ಒಂದೇ ಅಲ್ವಾ”+ ಅಂದ.
5 ಆದ್ರೆ ಯೆಹೋಷಾಫಾಟ ಇಸ್ರಾಯೇಲ್ ರಾಜನಿಗೆ “ದಯವಿಟ್ಟು, ಮೊದ್ಲು ಯೆಹೋವನ ಹತ್ರ ಹೋಗಿ ಕೇಳು”+ ಅಂದ.
6 ಆಗ ಇಸ್ರಾಯೇಲ್ ರಾಜ ಸುಮಾರು 400 ಪ್ರವಾದಿಗಳನ್ನ ಸೇರಿಸಿ ಅವ್ರಿಗೆ “ರಾಮೋತ್-ಗಿಲ್ಯಾದಿನ ವಿರುದ್ಧ ನಾನು ಯುದ್ಧಕ್ಕೆ ಹೋಗ್ಲಾ ಬೇಡ್ವಾ?” ಅಂತ ಕೇಳಿದ. ಅದಕ್ಕೆ ಅವರು “ಯುದ್ಧಕ್ಕೆ ಹೋಗು. ಯೆಹೋವ ಅದನ್ನ ನಿನ್ನ ಕೈಗೆ ಒಪ್ಪಿಸ್ತಾನೆ” ಅಂದ್ರು.
7 ಆಗ ಯೆಹೋಷಾಫಾಟ “ಇಲ್ಲಿ ಬೇರೆ ಯಾರೂ ಯೆಹೋವನ ಪ್ರವಾದಿ ಇಲ್ವಾ? ಇದ್ರೆ ಅವನ ಹತ್ರನೂ ಕೇಳೋಣ”+ ಅಂದ.
8 ಅದಕ್ಕೆ ಇಸ್ರಾಯೇಲ್ ರಾಜ ಯೆಹೋಷಾಫಾಟನಿಗೆ “ಇನ್ನೂ ಒಬ್ಬ ಪ್ರವಾದಿ ಇದ್ದಾನೆ. ಅವನ ಮೂಲಕ ನಾವು ಯೆಹೋವನ ಹತ್ರ ಕೇಳಬಹುದು.+ ಆದ್ರೆ ನಾನು ಅವನನ್ನ ದ್ವೇಷಿಸ್ತೀನಿ.+ ಅವನು ಇಲ್ಲಿ ತನಕ ನನ್ನ ಬಗ್ಗೆ ಒಳ್ಳೇ ಭವಿಷ್ಯ ಹೇಳಿದ್ದೇ ಇಲ್ಲ. ಬರೀ ಕೆಟ್ಟದ್ದೇ ಹೇಳ್ತಾನೆ.+ ಅವನ ಹೆಸ್ರು ಮೀಕಾಯೆಹು. ಅವನು ಇಮ್ಲನ ಮಗ” ಅಂದ. ಹಾಗಿದ್ರೂ ಯೆಹೋಷಾಫಾಟ “ರಾಜ, ನೀನು ಹೀಗೆ ಮಾತಾಡಬಾರದು” ಅಂದ.
9 ಹಾಗಾಗಿ ಇಸ್ರಾಯೇಲ್ ರಾಜ ಆಸ್ಥಾನದ ಅಧಿಕಾರಿನ ಕರೆದು “ಇಮ್ಲನ ಮಗ ಮೀಕಾಯೆಹುನ ತಕ್ಷಣ ಕರ್ಕೊಂಡು ಬಾ”+ ಅಂದ.
10 ಇಸ್ರಾಯೇಲ್ ರಾಜ ಅಹಾಬ ಮತ್ತು ಯೆಹೂದದ ರಾಜ ಯೆಹೋಷಾಫಾಟ ರಾಜರ ಬಟ್ಟೆಗಳನ್ನ ಹಾಕೊಂಡ್ರು. ಸಮಾರ್ಯದ ಬಾಗಿಲ ಹತ್ರ ಇದ್ದ ಬೈಲಲ್ಲಿ ತಮ್ಮತಮ್ಮ ಸಿಂಹಾಸನದ ಮೇಲೆ ಕೂತ್ರು. ಎಲ್ಲ ಪ್ರವಾದಿಗಳು ಅವರಿಬ್ರ ಮುಂದೆ ಭವಿಷ್ಯ ಹೇಳ್ತಿದ್ರು.+
11 ಆಮೇಲೆ ಕೆನಾನನ ಮಗ ಚಿದ್ಕೀಯ ತನಗಾಗಿ ಕಬ್ಬಿಣದ ಕೊಂಬುಗಳನ್ನ ಮಾಡ್ಕೊಂಡು “ಯೆಹೋವ ಹೀಗೆ ಹೇಳ್ತಾನೆ: ‘ನೀನು ಅರಾಮ್ಯದ ಜನ್ರನ್ನ ಸರ್ವನಾಶ ಮಾಡೋ ತನಕ ಇದ್ರಿಂದ ಅರಾಮ್ಯರನ್ನ ಕೊಲ್ತಾ ಹೋಗ್ತೀಯ’” ಅಂದ.
12 ಬೇರೆ ಪ್ರವಾದಿಗಳೂ ಇದನ್ನೇ ಹೇಳಿದ್ರು. ಅವರು ಅವನಿಗೆ “ರಾಮೋತ್-ಗಿಲ್ಯಾದಿನ ವಿರುದ್ಧ ಯುದ್ಧಕ್ಕೆ ಹೋಗು, ನಿನಗೆ ಜಯ ಸಿಗುತ್ತೆ. ಯೆಹೋವ ಅದನ್ನ ರಾಜನ ಕೈಗೆ ಒಪ್ಪಿಸ್ತಾನೆ” ಅಂದ್ರು.
13 ಮೀಕಾಯೆಹುನ ಕರೆಯೋಕೆ ಹೋಗಿದ್ದ ಸಂದೇಶವಾಹಕ ಅವನಿಗೆ “ನೋಡು! ಎಲ್ಲ ಪ್ರವಾದಿಗಳು ರಾಜನಿಗೆ ಒಂದೇ ರೀತಿ ಭವಿಷ್ಯವಾಣಿ ಹೇಳ್ತಿದ್ದಾರೆ. ಅವರು ಒಳ್ಳೇದೇ ಹೇಳ್ತಿದ್ದಾರೆ. ಹಾಗಾಗಿ ದಯವಿಟ್ಟು, ನೀನೂ ಅವ್ರ ತರ ಒಳ್ಳೇ ಮಾತು ಹೇಳು”+ ಅಂದ.
14 ಅದಕ್ಕೆ ಮೀಕಾಯೆಹು “ಯೆಹೋವನ ಆಣೆ, ಯೆಹೋವ ನನಗೆ ಏನ್ ಹೇಳ್ತಾನೋ ಅದನ್ನೇ ಹೇಳ್ತೀನಿ” ಅಂದ.
15 ಆಮೇಲೆ ಅವನು ರಾಜನ ಹತ್ರ ಬಂದ. ರಾಜ ಅವನಿಗೆ “ಮೀಕಾಯೆಹು, ನೀನೇನು ಹೇಳ್ತೀಯಾ? ರಾಮೋತ್-ಗಿಲ್ಯಾದಿನ ವಿರುದ್ಧ ಯುದ್ಧಕ್ಕೆ ನಾವು ಹೋಗಬಹುದಾ?” ಅಂತ ಕೇಳಿದ. ಅದಕ್ಕವನು “ರಾಮೋತ್-ಗಿಲ್ಯಾದಿನ ವಿರುದ್ಧ ಯುದ್ಧಕ್ಕೆ ಹೋಗು, ನಿನಗೆ ಜಯ ಸಿಗುತ್ತೆ. ಯೆಹೋವ ಅದನ್ನ ನಿನ್ನ ಕೈಗೆ ಒಪ್ಪಿಸ್ತಾನೆ” ಅಂದ.
16 ಆಗ ರಾಜ “ಯೆಹೋವನ ಹೆಸ್ರಲ್ಲಿ ಆಣೆ ಮಾಡಿಸಿ ಸತ್ಯಾನೇ ಹೇಳಬೇಕು ಅಂತ ನಿನಗೆ ಇನ್ನೆಷ್ಟು ಸಾರಿ ಹೇಳಬೇಕು?” ಅಂದ.
17 ಆಗ ಮೀಕಾಯೆಹು “ಇಡೀ ಇಸ್ರಾಯೇಲ್ ಕುರುಬನಿಲ್ಲದ ಕುರಿಗಳ ಹಾಗೇ ಬೆಟ್ಟದ ಮೇಲೆ ಚೆಲ್ಲಾಪಿಲ್ಲಿ ಆಗಿರೋದು ನನಗೆ ಕಾಣ್ತಿದೆ.+ ಯೆಹೋವ ಹೀಗೆ ಹೇಳ್ತಾನೆ: ‘ಅವ್ರಿಗೆ ಯಜಮಾನನೇ ಇಲ್ಲ. ಅವ್ರೆಲ್ಲ ಸಮಾಧಾನವಾಗಿ ಅವ್ರ ಮನೆಗೆ ವಾಪಸ್ ಹೋಗ್ಲಿ’” ಅಂದ.
18 ಆಗ ಇಸ್ರಾಯೇಲ್ ರಾಜನು ಯೆಹೋಷಾಫಾಟನಿಗೆ “‘ಇವನು ನನ್ನ ಬಗ್ಗೆ ಒಳ್ಳೇ ಭವಿಷ್ಯ ಹೇಳಿದ್ದೇ ಇಲ್ಲ. ಬರೀ ಕೆಟ್ಟದ್ದೇ ಹೇಳ್ತಾನೆ’ ಅಂತ ನಾನು ನಿನಗೆ ಹೇಳಿದ್ದೆ ತಾನೇ?”+ ಅಂದ.
19 ಆಗ ಮೀಕಾಯೆಹು “ಯೆಹೋವನ ಈ ಸಂದೇಶ ಕೇಳು: ಯೆಹೋವ ತನ್ನ ಸಿಂಹಾಸನದ ಮೇಲೆ ಕೂತಿರೋದನ್ನ,+ ಸ್ವರ್ಗದಲ್ಲಿರೋ ಇಡೀ ಸೈನ್ಯ ಆತನ ಹತ್ರ ಅಂದ್ರೆ ಆತನ ಬಲಗಡೆ ಎಡಗಡೆ ನಿಂತಿರೋದನ್ನ ನೋಡಿದೆ.+
20 ಯೆಹೋವ ಅವ್ರಿಗೆ ‘ಅಹಾಬ ರಾಮೋತ್-ಗಿಲ್ಯಾದಿನ ವಿರುದ್ಧ ಯುದ್ಧ ಮಾಡೋಕೆ ಹೋಗಿ ಸಾಯೋ ತರ ಯಾರು ಅವನನ್ನ ಮರುಳು ಮಾಡ್ತೀರಾ?’ ಅಂತ ಕೇಳಿದಾಗ ಒಬ್ಬ ದೇವದೂತ ಒಂದು ಹೇಳಿದ್ರೆ, ಇನ್ನೊಬ್ಬ ದೇವದೂತ ಇನ್ನೊಂದು ಹೇಳ್ತಿದ್ದ.
21 ಆಗ ಒಬ್ಬ ದೇವದೂತ+ ಮುಂದೆ ಬಂದು ಯೆಹೋವನ ಮುಂದೆ ನಿಂತು ‘ಅವನನ್ನ ನಾನು ಮರುಳು ಮಾಡ್ತೀನಿ’ ಅಂದನು. ಅದಕ್ಕೆ ಯೆಹೋವ ಅವನಿಗೆ ‘ಹೇಗೆ ಮರುಳು ಮಾಡ್ತೀಯಾ?’ ಅಂತ ಕೇಳಿದನು.
22 ಅದಕ್ಕೆ ಅವನು ‘ನಾನು ಹೋಗಿ ಅವನ ಎಲ್ಲ ಪ್ರವಾದಿಗಳ ಬಾಯಿಂದ ಸುಳ್ಳನ್ನ ಹೇಳಿಸ್ತೀನಿ’+ ಅಂದ. ಆಗ ಆತನು ‘ನೀನು ಅವನನ್ನ ಮರುಳು ಮಾಡ್ತೀಯ. ನೀನು ಮಾಡೇ ಮಾಡ್ತೀಯ. ಹೋಗು, ನೀನು ಹೇಳಿದ ಹಾಗೇ ಮಾಡು’ ಅಂದನು.
23 ಹಾಗಾಗಿ ಯೆಹೋವ ಈ ನಿನ್ನ ಎಲ್ಲ ಪ್ರವಾದಿಗಳ ಬಾಯಲ್ಲಿ ಸುಳ್ಳು ಹೇಳಿಸ್ತಿದ್ದಾನೆ.+ ಆದ್ರೆ ನಿಜ ಏನೆಂದ್ರೆ, ನಿನ್ನ ಮೇಲೆ ಕಷ್ಟ ಬರುತ್ತೆ ಅಂತ ಯೆಹೋವ ಮುಂಚೆನೇ ಹೇಳಿದ್ದಾನೆ”+ ಅಂದ.
24 ಕೆನಾನನ ಮಗ ಚಿದ್ಕೀಯ ಮೀಕಾಯೆಹು ಹತ್ರ ಬಂದು ಕಪಾಳಕ್ಕೆ ಹೊಡೆದು “ಯೆಹೋವನ ದೂತ ನನ್ನನ್ನ ಬಿಟ್ಟು ಯಾವತ್ತಿಂದ ನಿನ್ನ ಹತ್ರ ಮಾತಾಡ್ತಾ ಇದ್ದಾನೆ?”+ ಅಂತ ಕೇಳಿದ.
25 ಅದಕ್ಕೆ ಮೀಕಾಯೆಹು “ಯಾವ ದಿನ ನೀನು ಓಡಿಹೋಗಿ ಒಳಗಿನ ಕೋಣೆಯಲ್ಲಿ ಬಚ್ಚಿಟ್ಕೊಳ್ತೀಯೋ ಆ ದಿನ ನಿನಗೆ ಈ ಪ್ರಶ್ನೆಗೆ ಉತ್ತರ ಸಿಗುತ್ತೆ” ಅಂದ.
26 ಆಮೇಲೆ ಇಸ್ರಾಯೇಲ್ ರಾಜ ತನ್ನ ಸೇವಕರಿಗೆ “ಈ ಮೀಕಾಯೆಹುನ ಕರ್ಕೊಂಡು ಹೋಗಿ. ಇವನನ್ನ ಪಟ್ಟಣದ ಮುಖ್ಯಸ್ಥನಾಗಿರೋ ಆಮೋನನಿಗೆ, ರಾಜನ ಮಗನಾಗಿರೋ ಯೋವಾಷನಿಗೆ ಒಪ್ಪಿಸಿ.
27 ಅವ್ರಿಗೆ ನನ್ನ ಈ ಮಾತುಗಳನ್ನ ಹೇಳಿ: ‘ಇವನನ್ನ ಜೈಲಿಗೆ ಹಾಕಿ,+ ನಾನು ಸಮಾಧಾನವಾಗಿ ವಾಪಸ್ ಬರೋ ತನಕ ಇವನಿಗೆ ಸ್ವಲ್ಪ ಊಟ, ನೀರು ಕೊಟ್ರೆ ಸಾಕು’” ಅಂದ.
28 ಆದ್ರೆ ಮೀಕಾಯೆಹು “ಒಂದುವೇಳೆ ನೀನು ಸಮಾಧಾನವಾಗಿ ವಾಪಸ್ ಬಂದ್ರೆ ನಾನು ಹೇಳಿದ್ದು ಯೆಹೋವನ ಮಾತಲ್ಲ ಅಂತ ತಿಳ್ಕೋ”+ ಅಂತ ಹೇಳಿ ಜನ್ರಿಗೆ “ಈ ಮಾತನ್ನ ನೀವೆಲ್ಲ ಚೆನ್ನಾಗಿ ನೆನಪಿಟ್ಕೊಳ್ಳಿ” ಅಂದ.
29 ಇದಾದ್ಮೇಲೆ ಇಸ್ರಾಯೇಲ್ ರಾಜ, ಯೆಹೂದದ ರಾಜ ಯೆಹೋಷಾಫಾಟ ರಾಮೋತ್-ಗಿಲ್ಯಾದಿಗೆ ಹೋದ್ರು.+
30 ಇಸ್ರಾಯೇಲ್ ರಾಜ ಯೆಹೋಷಾಫಾಟನಿಗೆ “ನಾನು ವೇಷ ಬದಲಾಯಿಸ್ಕೊಂಡು ಯುದ್ಧಕ್ಕೆ ಹೋಗ್ತೀನಿ. ನೀನು ರಾಜನ ಬಟ್ಟೆ ಹಾಕೊಂಡು ಬಾ” ಅಂದ. ಹೀಗೆ ಯೆಹೋಷಾಫಾಟ ಇಸ್ರಾಯೇಲ್ ರಾಜನ ವೇಷ ಹಾಕೊಂಡು+ ಯುದ್ಧಕ್ಕೆ ಹೋದ.
31 ಆಗ ಅರಾಮ್ಯದ ರಾಜ ತನ್ನ 32 ರಥಗಳ ಅಧಿಪತಿಗಳಿಗೆ+ “ನೀವು ಮಾಮೂಲಿ ಸೈನಿಕರ ಜೊತೆ ಆಗಲಿ ದೊಡ್ಡ ಅಧಿಕಾರಿಗಳ ಜೊತೆ ಆಗಲಿ ಯುದ್ಧ ಮಾಡಬೇಡಿ. ಇಸ್ರಾಯೇಲ್ ರಾಜನ ಮೇಲೆನೇ ಗುರಿ ಇಡಿ” ಅಂತ ಹೇಳಿದ.
32 ರಥಗಳ ಅಧಿಪತಿಗಳು ಯೆಹೋಷಾಫಾಟನನ್ನ ನೋಡಿದ ತಕ್ಷಣ “ಇವನೇ ಇಸ್ರಾಯೇಲ್ ರಾಜ” ಅಂತ ಮಾತಾಡ್ಕೊಂಡ್ರು. ಹಾಗಾಗಿ ಅವ್ರೆಲ್ಲ ಯೆಹೋಷಾಫಾಟನ ಮೇಲೆ ದಾಳಿ ಮಾಡಿದ್ರು. ಆಗ ಅವನು ಸಹಾಯಕ್ಕಾಗಿ ಕೂಗಿದ.
33 ಯೆಹೋಷಾಫಾಟ ಇಸ್ರಾಯೇಲ್ ರಾಜನಲ್ಲ ಅಂತ ರಥಗಳ ಅಧಿಪತಿಗಳಿಗೆ ಗೊತ್ತಾದಾಗ ಅವರು ಅವನನ್ನ ಅಟ್ಟಿಸ್ಕೊಂಡು ಹೋಗೋದನ್ನ ಬಿಟ್ಟುಬಿಟ್ರು.
34 ಆಗ ಒಬ್ಬ ಸೈನಿಕ ಹಾಗೇ ಸುಮ್ಮನೆ* ಒಂದು ಬಾಣ ಬಿಟ್ಟ. ಅದು ಬಂದು ಇಸ್ರಾಯೇಲ್ ರಾಜನ ಯುದ್ಧ ಕವಚದ ಸಂದಿಗೆ ತಾಗಿತು. ಹಾಗಾಗಿ ರಾಜ ರಥದ ಸಾರಥಿಗೆ “ನನಗೆ ದೊಡ್ಡ ಗಾಯ ಆಗಿದೆ, ರಥ ತಿರುಗಿಸಿ ನನ್ನನ್ನ ರಣರಂಗದಿಂದ ಹೊರಗೆ ಕರ್ಕೊಂಡು ಹೋಗು”+ ಅಂದ.
35 ಇಡೀ ದಿನ ದೊಡ್ಡ ಯುದ್ಧ ನಡಿತು. ರಾಜನಿಗೆ ಆಧಾರ ಕೊಟ್ಟು ಅರಾಮ್ಯರ ಮುಂದೆ ಅವನನ್ನ ರಥದಲ್ಲಿ ನಿಲ್ಲಿಸಬೇಕಾಯ್ತು. ರಾಜನ ಗಾಯದಿಂದ ರಕ್ತ ಸೋರ್ತಿತ್ತು. ರಥದಲ್ಲೆಲ್ಲ ರಕ್ತ ಆಯ್ತು. ಸಾಯಂಕಾಲ ಆಗ್ತಿದ್ದ ಹಾಗೆ ಅವನು ತೀರಿಹೋದ.+
36 ಸೂರ್ಯ ಮುಳುಗೋ ಸಮಯಕ್ಕೆ ಇಸ್ರಾಯೇಲಿನ ಸೈನಿಕರಿಗೆ “ಪ್ರತಿಯೊಬ್ರೂ ಅವ್ರವ್ರ ಪಟ್ಟಣಕ್ಕೆ, ದೇಶಕ್ಕೆ ಹೋಗ್ಲಿ!”+ ಅನ್ನೋ ಸಂದೇಶ ಹೊರಡಿಸಿದ್ರು.
37 ಹೀಗೆ ರಾಜ ತೀರಿಹೋದ, ಅವನ ಶವವನ್ನ ಸಮಾರ್ಯಕ್ಕೆ ತಂದು ಸಮಾಧಿ ಮಾಡಿದ್ರು.
38 ಅವರು ಅವನ ರಥನ ಸಮಾರ್ಯದ ಕೊಳದಲ್ಲಿ ತೊಳಿತಿದ್ದಾಗ ನಾಯಿಗಳು ಅವನ ರಕ್ತ ನೆಕ್ಕಿದ್ವು. ಆ ಕಾಲದಲ್ಲಿ ವೇಶ್ಯೆಯರು ಆ ಕೊಳದಲ್ಲಿ ಸ್ನಾನ ಮಾಡ್ತಿದ್ರು.* ಹೀಗೆ ಯೆಹೋವ ಹೇಳಿದ ಹಾಗೇ ಆಯ್ತು.+
39 ಅಹಾಬನ ಉಳಿದ ಜೀವನಚರಿತ್ರೆ ಬಗ್ಗೆ, ಅವನು ಮಾಡಿದ ಎಲ್ಲ ಕೆಲಸಗಳ ಬಗ್ಗೆ, ಅವನು ಕಟ್ಟಿದ ದಂತದ+ ಅರಮನೆ ಬಗ್ಗೆ, ಅವನು ಕಟ್ಟಿದ ಎಲ್ಲ ಪಟ್ಟಣಗಳ ಬಗ್ಗೆ ಇಸ್ರಾಯೇಲ್ ರಾಜರ ಕಾಲದ ಇತಿಹಾಸ ಪುಸ್ತಕದಲ್ಲಿ ಇದೆ.
40 ಅಹಾಬ ತೀರಿಹೋದ+ ಮೇಲೆ ಅವನ ಮಗ ಅಹಜ್ಯ+ ರಾಜ ಆದ.
41 ಇಸ್ರಾಯೇಲ್ ರಾಜ ಅಹಾಬನ ಆಳ್ವಿಕೆಯ ನಾಲ್ಕನೇ ವರ್ಷದಲ್ಲಿ ಆಸನ ಮಗ ಯೆಹೋಷಾಫಾಟ+ ಯೆಹೂದದ ರಾಜನಾದ.
42 ಯೆಹೋಷಾಫಾಟ ರಾಜನಾದಾಗ ಅವನಿಗೆ 35 ವರ್ಷ. ಅವನು ಯೆರೂಸಲೇಮಲ್ಲಿದ್ದು 25 ವರ್ಷ ಆಳಿದ. ಅವನ ಅಮ್ಮನ ಹೆಸ್ರು ಅಜೂಬ. ಅವಳು ಶಿಲ್ಹಿಯ ಮಗಳು.
43 ಯೆಹೋಷಾಫಾಟ ಅವನ ಅಪ್ಪ ಆಸನ+ ತರಾನೇ ನಡ್ಕೊಂಡ. ಅದನ್ನ ಬಿಟ್ಟು ಬೇರೆ ದಾರಿ ಹಿಡಿಲಿಲ್ಲ. ಅವನು ಯೆಹೋವನಿಗೆ ಇಷ್ಟ ಆಗೋದನ್ನೇ ಮಾಡಿದ.+ ಆದ್ರೆ ಅವನು ದೇವಸ್ಥಾನಗಳನ್ನ ತೆಗೆದುಹಾಕಲಿಲ್ಲ. ಜನ್ರು ಇನ್ನೂ ಆ ಜಾಗಗಳಲ್ಲಿ ಬಲಿಗಳನ್ನ ಅರ್ಪಿಸಿ ಬಲಿಯ ಹೊಗೆ ಏರೋ ಹಾಗೆ ಮಾಡ್ತಿದ್ರು.+
44 ಯೆಹೋಷಾಫಾಟ ಇಸ್ರಾಯೇಲ್ ರಾಜನ ಜೊತೆ ಒಳ್ಳೇ ಸಂಬಂಧ ಕಾಪಾಡ್ಕೊಂಡಿದ್ದ.+
45 ಯೆಹೋಷಾಫಾಟನ ಉಳಿದ ಜೀವನಚರಿತ್ರೆ ಬಗ್ಗೆ, ಅವನ ಸಾಹಸಗಳ ಬಗ್ಗೆ, ಅವನು ಹೇಗೆ ಯುದ್ಧಮಾಡಿದ ಅನ್ನೋದರ ಬಗ್ಗೆ ಯೆಹೂದದ ರಾಜರ ಕಾಲದ ಇತಿಹಾಸ ಪುಸ್ತಕದಲ್ಲಿ ಇದೆ.
46 ಯೆಹೋಷಾಫಾಟನ ಅಪ್ಪ ಆಸ ತನ್ನ ಸಮಯದಲ್ಲಿ, ದೇವಸ್ಥಾನದಲ್ಲಿ ಲೈಂಗಿಕ ಅನೈತಿಕತೆ* ಮಾಡ್ತಿದ್ದ ಗಂಡಸ್ರನ್ನ+ ಓಡಿಸಿಬಿಟ್ಟಿದ್ದ. ಅವ್ರಲ್ಲಿ ಕೆಲವರು ಉಳ್ಕೊಂಡಿದ್ರು. ಯೆಹೋಷಾಫಾಟ ಅವ್ರನ್ನೂ ದೇಶದಿಂದ ಹೊರಗೆ ಹಾಕಿದ.+
47 ಆಗ ಎದೋಮಲ್ಲಿ+ ಯಾವ ರಾಜನೂ ಇರಲಿಲ್ಲ. ಉಪಾಧಿಪತಿಗಳು ರಾಜರ ಹಾಗೆ ಅಲ್ಲಿ ಆಳ್ತಿದ್ರು.+
48 ಯೆಹೋಷಾಫಾಟ ಓಫೀರಿಗೆ ಹೋಗಿ ಚಿನ್ನ ತಗೊಂಡು ಬರೋಕೆ ತಾರ್ಷೀಷಿನ ಹಡಗುಗಳನ್ನ* ಮಾಡಿಸಿದ.+ ಆದ್ರೆ ಎಚ್ಯೋನ್-ಗೆಬೆರಿನಲ್ಲಿ+ ಆ ಹಡಗುಗಳು ಒಡೆದು ಹೋಗಿದ್ರಿಂದ ಅವರು ಓಫೀರಿಗೆ ಹೋಗಲಿಲ್ಲ.
49 ಆಮೇಲೆ ಅಹಾಬನ ಮಗ ಅಹಜ್ಯ ಯೆಹೋಷಾಫಾಟನಿಗೆ “ನನ್ನ ಸೇವಕರಿಗೆ ನಿನ್ನ ಸೇವಕರ ಜೊತೆ ಹಡಗುಗಳಲ್ಲಿ ಹೋಗೋಕೆ ಅನುಮತಿ ಕೊಡು” ಅಂತ ಕೇಳ್ಕೊಂಡ. ಆದ್ರೆ ಯೆಹೋಷಾಫಾಟ ಒಪ್ಪಲಿಲ್ಲ.
50 ಯೆಹೋಷಾಫಾಟ ತೀರಿಹೋದ.+ ಅವನನ್ನ ಅವನ ಪೂರ್ವಜನ ಪಟ್ಟಣವಾದ ದಾವೀದಪಟ್ಟಣದಲ್ಲಿ ಸಮಾಧಿ ಮಾಡಿದ್ರು. ಆಮೇಲೆ ಅವನ ಮಗ ಯೆಹೋರಾಮ ರಾಜನಾದ.+
51 ಯೆಹೂದದ ರಾಜ ಯೆಹೋಷಾಫಾಟನ ಆಳ್ವಿಕೆಯ 17ನೇ ವರ್ಷದಲ್ಲಿ ಅಹಾಬನ ಮಗ ಅಹಜ್ಯ+ ಸಮಾರ್ಯದಲ್ಲಿ ಇಸ್ರಾಯೇಲಿನ ರಾಜನಾದ. ಅವನು ಇಸ್ರಾಯೇಲಿನ ಮೇಲೆ ಎರಡು ವರ್ಷ ಆಳಿದ.
52 ಅವನು ಯೆಹೋವನ ದೃಷ್ಟಿಯಲ್ಲಿ ಕೆಟ್ಟದೇ ಮಾಡ್ತಾ ತನ್ನ ಅಪ್ಪಅಮ್ಮ ತರಾನೇ ನಡ್ಕೊಂಡ.+ ನೆಬಾಟನ ಮಗ ಯಾರೊಬ್ಬಾಮ ಇಸ್ರಾಯೇಲ್ಯರ ಕೈಯಲ್ಲಿ ಯಾವ ಪಾಪಗಳನ್ನ ಮಾಡಿಸಿದ್ನೋ ಅದನ್ನೇ ಇವನೂ ಅವ್ರಿಂದ ಮಾಡಿಸಿದ.+
53 ಅವನು ಬಾಳನ+ ಆರಾಧನೆ ಮುಂದುವರಿಸಿ ಅವನಿಗೆ ಅಡ್ಡಬಿದ್ದು ಇಸ್ರಾಯೇಲ್ ದೇವರಾದ ಯೆಹೋವನನ್ನ ರೇಗಿಸ್ತಾ ಹೋದ.+ ಹೀಗೆ ಅವನು ತನ್ನ ಅಪ್ಪನ ತರಾನೇ ನಡ್ಕೊಂಡ.
ಪಾದಟಿಪ್ಪಣಿ
^ ಅಥವಾ “ತನ್ನ ಅಮಾಯಕತೆಯಿಂದ ಗೊತ್ತಾಗದೆ.”
^ ಬಹುಶಃ, “ವೇಶ್ಯೆಯರು ಎಲ್ಲಿ ಸ್ನಾನ ಮಾಡ್ತಿದ್ರೋ ಅಲ್ಲಿ ಯುದ್ಧ ರಥ ತೊಳಿತಿದ್ದಾಗ ನಾಯಿಗಳು ಅವನ ರಕ್ತ ನೆಕ್ಕಿದವು.”
^ ಅಕ್ಷ. “ದೇವಸ್ಥಾನದಲ್ಲಿ ಬೇರೆ ಗಂಡಸರ ಜೊತೆ ಅನೈತಿಕತೆ ಮಾಡ್ತಿದ್ದ ಗಂಡಸರು.”