ಕೀರ್ತನೆ 9:1-20

  • ದೇವರ ಅದ್ಭುತಗಳ ವರ್ಣನೆ

    • ಯೆಹೋವ, ಸುರಕ್ಷಿತ ಆಶ್ರಯ (9)

    • ಆತನ ಹೆಸ್ರು ತಿಳ್ಕೊಳ್ಳೋದು, ಆತನಲ್ಲಿ ಭರವಸೆ ಇಡೋದು (10)

ದಾವೀದನ ಮಧುರ ಗೀತೆ. ಗಾಯಕರ ನಿರ್ದೇಶಕನಿಗೆ ಸೂಚನೆ: ಈ ಗೀತೆ ಮೂತ್‌-ಲಾಬ್ಬೆನ್‌* ರಾಗದಲ್ಲಿದೆ. א [ಆಲೆಫ್‌] 9  ಯೆಹೋವನೇ, ನಾನು ಪೂರ್ಣಹೃದಯದಿಂದ ನಿನ್ನನ್ನ ಹೊಗಳ್ತೀನಿ,ನಿನ್ನ ಎಲ್ಲ ಅದ್ಭುತ ಕೆಲಸಗಳನ್ನ ವರ್ಣಿಸ್ತೀನಿ.+  2  ನಾನು ನಿನ್ನಲ್ಲಿ ಖುಷಿಪಡ್ತೀನಿ, ಸಂತೋಷಪಡ್ತೀನಿ. ಸರ್ವೋನ್ನತನೇ, ನಿನ್ನ ಹೆಸ್ರನ್ನ ಸ್ತುತಿಸ್ತೀನಿ.*+ ב [ಬೆತ್‌]  3  ನನ್ನ ಶತ್ರುಗಳು ವಾಪಸ್‌ ಹೋಗುವಾಗ,+ನಿನ್ನ ಮುಂದೆ ಎಡವಿಬಿದ್ದು ನಾಶವಾಗಿ ಹೋಗ್ತಾರೆ.  4  ಯಾಕಂದ್ರೆ ನೀನು ನನ್ನ ಪರ ವಾದಿಸಿ ನನಗೆ ನ್ಯಾಯ ಸಿಗೋ ತರ ಮಾಡ್ತೀಯ. ನಿನ್ನ ಸಿಂಹಾಸನದ ಮೇಲೆ ಕೂತು ನ್ಯಾಯವಾಗಿ ತೀರ್ಪು ಕೊಡ್ತೀಯ.+ ג [ಗಿಮೆಲ್‌]  5  ನೀನು ಜನ್ರನ್ನ ಗದರಿಸಿ+ ಕೆಟ್ಟವರನ್ನ ನಾಶಮಾಡಿದೆ. ಅವ್ರ ಹೆಸ್ರನ್ನ ಶಾಶ್ವತವಾಗಿ ಅಳಿಸಿಹಾಕಿದೆ.  6  ಶತ್ರುಗಳು ಶಾಶ್ವತವಾಗಿ ನಿರ್ನಾಮ ಆದ್ರು,ನೀನು ಅವ್ರ ಪಟ್ಟಣಗಳನ್ನ ಬೇರುಸಹಿತ ಕಿತ್ತುಹಾಕಿದೆ,ಅವ್ರ ನೆನಪುಗಳೂ ಇಲ್ಲದ ಹಾಗೆ ಮಾಡಿದೆ.+ ה [ಹೆ]  7  ಆದ್ರೆ ಯೆಹೋವ ಯಾವಾಗಲೂ ರಾಜನಾಗಿ ಇರ್ತಾನೆ,+ನ್ಯಾಯ ತೀರಿಸೋಕೆ ಆತನು ತನ್ನ ಸಿಂಹಾಸನವನ್ನ ದೃಢವಾಗಿ ಸ್ಥಾಪಿಸಿದ್ದಾನೆ.+  8  ಆತನು ಇಡೀ ಭೂಮಿಗೆ* ನ್ಯಾಯವಾಗಿ ತೀರ್ಪು ಕೊಡ್ತಾನೆ,+ಜನ್ರಿಗೆ ನೀತಿಯಿಂದ ತೀರ್ಪನ್ನ ಹೇಳ್ತಾನೆ.+ ו [ವಾವ್‌]  9  ಯೆಹೋವ ದಬ್ಬಾಳಿಕೆಯಿಂದ ಕುಗ್ಗಿದವರಿಗೆ ಸುರಕ್ಷಿತವಾದ ಆಶ್ರಯ ಆಗ್ತಾನೆ,+ಕಷ್ಟದ ಸಮಯದಲ್ಲಿ ಭದ್ರಕೋಟೆಯಾಗಿ ಇರ್ತಾನೆ.+ 10  ನಿನ್ನ ಹೆಸ್ರನ್ನ ತಿಳ್ಕೊಳ್ಳೋರು ನಿನ್ನ ಮೇಲೆ ಭರವಸೆ ಇಡ್ತಾರೆ.+ ಯೆಹೋವನೇ, ನಿನ್ನನ್ನ ಹುಡುಕೋರ ಕೈಯನ್ನ ನೀನು ಯಾವತ್ತೂ ಬಿಡಲ್ಲ.+ ז [ಜಯಿನ್‌] 11  ಚೀಯೋನಿನಲ್ಲಿರೋ ಯೆಹೋವನಿಗೆ ಹಾಡಿ ಹೊಗಳಿ. ಆತನ ಕೆಲಸಗಳ ಬಗ್ಗೆ ಜನರಿಗೆ ಹೋಗಿ ಹೇಳಿ.+ 12  ಯಾಕಂದ್ರೆ ಆತನು ನೊಂದವರನ್ನ ನೆನಪು ಮಾಡ್ಕೊತ್ತಾನೆ, ಅವ್ರ ರಕ್ತ ಸುರಿಸಿದವರನ್ನ ಸುಮ್ಮನೆ ಬಿಡಲ್ಲ.+ ನೊಂದವರ ಗೋಳಾಟವನ್ನ ಯಾವ ಕಾರಣಕ್ಕೂ ಆತನು ಮರಿಯಲ್ಲ.+ ח [ಹೆತ್‌] 13  ಯೆಹೋವನೇ, ನನಗೆ ದಯೆ ತೋರಿಸು. ಸಾವಿನ ದವಡೆಯಿಂದ ನನ್ನನ್ನ ಎತ್ತುವವನೇ,+ಶತ್ರುಗಳಿಂದ ನಾನು ಅನುಭವಿಸ್ತಿರೋ ಯಾತನೆಯನ್ನ ನೋಡು. 14  ಆಗ ನಾನು ನಿನ್ನ ಕೆಲಸಗಳ ಬಗ್ಗೆ ಚೀಯೋನಿನ ಮಗಳ ಬಾಗಿಲ ಹತ್ರ ಹೊಗಳೋಕೆ ಆಗುತ್ತೆ.+ ನಿನ್ನ ರಕ್ಷಣೆಯ ಕೆಲಸಗಳನ್ನ ನೋಡಿ ಖುಷಿಪಡೋಕೆ ಆಗುತ್ತೆ.+ ט [ಟೆತ್‌] 15  ಜನಾಂಗಗಳು ತೋಡಿದ ಗುಂಡಿಗಳಲ್ಲಿ ಅವೇ ಬಿದ್ದು ಮುಳುಗಿದ್ವು. ಅವರು ರಹಸ್ಯವಾಗಿ ಬಚ್ಚಿಟ್ಟಿದ್ದ ಬಲೆಗೆ ಅವ್ರ ಕಾಲೇ ಸಿಕ್ಕಿಹಾಕೊಳ್ತು.+ 16  ಯೆಹೋವ ಕೊಡೋ ತೀರ್ಪುಗಳಿಂದ ಆತನು ಎಂಥ ದೇವರು ಅಂತ ಗೊತ್ತಾಗುತ್ತೆ.+ ಕೆಟ್ಟವನ ಕುಯುಕ್ತಿ ಅವನನ್ನೇ ಸಿಕ್ಕಿಕೊಳ್ಳೋ ತರ ಮಾಡುತ್ತೆ.+ ಹಿಗ್ಗಯಾನ್‌* (ಸೆಲಾ) י [ಯೋದ್‌] 17  ದುಷ್ಟರು ಸಮಾಧಿಗೆ* ಹೋಗ್ತಾರೆ,ದೇವರನ್ನ ಮರೆತು ಹೋಗೋ ದೇಶಗಳೆಲ್ಲ ಅಲ್ಲಿಗೇ ಹೋಗುತ್ತೆ. 18  ಆದ್ರೆ ಬಡವರನ್ನ ದೇವರು ಯಾವತ್ತೂ ಮರಿಯಲ್ಲ,+ದೀನರ ನಿರೀಕ್ಷೆ ನೀರುಪಾಲು ಆಗಲ್ಲ.+ כ [ಕಾಫ್‌] 19  ಯೆಹೋವನೇ, ಒಬ್ಬ ಮನುಷ್ಯ ಜಯ ಸಾಧಿಸೋಕೆ ಬಿಡಬೇಡ. ದೇಶಗಳಿಗೆ ನಿನ್ನ ಮುಂದೆ ತೀರ್ಪು ಆಗಲಿ.+ 20  ಯೆಹೋವನೇ, ಅವರಲ್ಲಿ ಭಯ ಹುಟ್ಟಿಸು.+ ಅವರು ಬರೀ ಮನುಷ್ಯರು ಅಂತ ಅವರಿಗೆ ಗೊತ್ತಾಗಲಿ. (ಸೆಲಾ)

ಪಾದಟಿಪ್ಪಣಿ

ಅಥವಾ “ಸಂಗೀತ ನುಡಿಸ್ತೀನಿ.”
ಅಥವಾ “ಫಲವತ್ತಾದ ನೆಲಕ್ಕೆ.”