Eyantiya Yûhenna 7:1-17
7 Pey vê yekêra, min dît çar melek li her çar qulbên dinyayê sekinî ne. Wana bayên çar qulbên dinyayê qayîm digirtin, wekî ba li erdê, li berê û li dara nexe.
2 Û min melekekî din jî dît, yê ku ji rohilatê derdiket, û destê wîda mora Xwedayê sax hebû. Ewî bi dengekî bilind li wan çar meleka kire gazî, kîjanara îzin hatibû dayînê, wekî zirarê bidine erdê û berê, û wanra got:
3 “Heta ku em morê ser eniya xulamên Xwedayê xwe nexin, zirarê nedine erdê, berê û dara”.
4 Û min hejmara kesên ku hatibûn morkirinê bihîst. Hejmara wan 144 000 bû, û ewana ji hemû berekên kurên Îsraêl bûn:
5 Ji bereka Cihûda 12 000 hatibûn morkirinê,ji bereka Rûbên 12 000,ji bereka Gad 12 000,
6 ji bereka Aşêr 12 000,ji bereka Neftelî 12 000,ji bereka Minaşe 12 000,
7 ji bereka Şîmeyon 12 000,ji bereka Lêwî 12 000,ji bereka Îsaxar 12 000,
8 ji bereka Zebûlon 12 000,ji bereka Ûsiv 12 000,ji bereka Binyamîn 12 000 hatibûne morkirinê.
9 Pey vê yekêra, va min elaleteke mezin dît, ku tu kesî nikaribû bijimarta, ewana ji her miletî, ji her berekê, ji her cimetê û ji her zimanî bûn. Çuxên sipî li wan bûn û çiqilên xurma jî destên wanda bûn, û ewana ber text û ber Berx sekinî bûn.
10 Wana bi dengekî bilind digot: “Xilazbûna me ji Xwedayê me tê, yê ku ser text rûniştî ye, û ji Berx tê”.
11 Hemû melekên ku li dora text, rûspiya û çar efrînên bînber sekinî bûn, ber text ketine ser çoka û serê xwe ber Xwedê danîn,
12 û digotin: “Amîn! Bira pesin, rûmet, bîlanî, şikirî, hurmet, hukum û qewat heta-hetayê Xwedayê mera be. Amîn!”
13 Hingê yek ji rûspiya minra got: “Ev kesên bi çuxên sipî kî ne û ji kîderê hatine?”
14 Min derbêra jêra got: “Ezxulam, tu caba vê pirsê zanî”. Û ewî minra got: “Ewana ew in, yên ku ji tengasiya mezin derketine, çuxên xwe pê xûna wî Berxî şûştine û çîl-qerqaş kirine.
15 Lema ewana ber textê Xwedê sekinî ne û paristgeha wîda şev û roj wîra xizmetiya pîroz dikin. Û Yê ku ser text rûniştî ye, wê konê xwe ser wan veke.
16 Ewana wê îda tî û birçî nebin, û ne jî tev û germayê li wan xe,
17 çimkî Berxê ku ber text e, wê şivantiya wan bike û wana berbi kaniyên ava jîyînê bive. Û Xwedê wê hemû hêsira ji çevên wan paqij ke”.
