Eyantiya Yûhenna 5:1-14
5 Min destê wîyî rastêda, yê ku ser text rûniştî bû, kitêbeke gulometkkirî dît. Ev her du aliyava hatibû nivîsarê û pê heft mora hatibû morkirinê.
2 Min melekekî zor dît, yê ku bi dengekî bilind got: “Kî hêja ye ku morên wê kitêba gulometkkirî rake û vê kitêbê veke?”
3 Lê ne li ezmên, ne ser erdê, ne jî bin erdêda tu kesî nikaribû vê kitêba gulometkkirî veke û binihêre têda çi nivîsar e.
4 Ez gelek giriyam, çimkî min tu kes nedît, yê ku hêja bûya ev kitêba gulometkkirî vekira û binihêriya têda çi nivîsar e.
5 Lê yek ji rûspiya minra got: “Negirî. Va, Şêrê ku ji bereka Cihûda ye û ji koka Dawid e, serketiye, û ew dikare heft morên vê kitêba gulometkkirî rake û vê kitêbê veke”.
6 Min ber text, orta çar efrînên bînber û rûspiyada, berxekî sekinî dît. Ev berx têbêjî serjêkirî bû, heft stirûyên wî û heft çevên wî hebûn. Ev çev heft ruhên Xwedê têne hesabê, yên ku hatine şandinê li temamiya dinyayê.
7 Derbêra ew berx hate ber text û kitêba gulometkkirî ji destê wîyî rastê, yê ku ser text rûniştî bû, stand.
8 Gava ewî ew kitêba gulometkkirî stand, çar efrînên bînber û 24 rûspî ber Berx ketine ser çoka. Destê her rûspîkîda çeng hebû, û cem wan tasên zêrîn tijî bixûr hebûn. Bixûr duayên pîroza tê hesabê.
9 Û wana kilameke teze distira:* “Tu hêja yî ku morên vê kitêba gulometkkirî rakî û vê kitêbê vekî, çimkî tu hatî serjêkirinê û te pê xûna xwe bona Xwedê meriv kirîn ji her berekî, ji her zimanî, ji her cimetê û ji her miletî.
10 Û te ewana kirine padşa û kahîn bona xizmetkariya Xwedayê me, û ewana wê ser dinyayêra ça padşa serwêrtiyê bikin”.
11 Û min dora text, dora efrînên bînber û rûspiya, gelek melek dîtin û dengê wan bihîst. Hejmara wan bi hezara hezar û bi deh hezara deh hezar bû.
12 Û wana bi dengekî bilind usa digot: “Berxê ku hatiye serjêkirinê hêja ye ku hukumtiyê, dewlemendtiyê, bîlaniyê, qewatê, hurmetê, rûmetê û pesinê bistîne”.
13 Û min dengê her efrînê li ezmên, ser erdê, bin erdêda û berêda bihîst, û wana hemûya digot: “Bira heta-hetayê pesin, hurmet, rûmet û qewat yê ser text rûniştîra û Berxra be”.
14 Çar efrînên bînber usa digotin: “Amîn!” Û rûspî ketine ser çoka û serê xwe ber Xwedê danîn.
Спартьн
^ Raste-rast “distirên”.
