Derbazî serecemê

Derbazî naverokê bin

 SERÊ 13

Padşêd Qenc û yêd Xirab

Padşêd Qenc û yêd Xirab

Îsraêl dibe du para. Gelek padşêd Îsraêlê guhdariya Xwedê nakin. Babîloniya, Orşelîmê hildişînin

PAŞÎ wê yekê ku Silêman Yahowa înkar kir, Îsraêl bû du para, ça jî Yahowa pêşda gotibû. Kurê Silêman Rehobowam padşakî bê rem bû. Lema jî dehe berekêd îsraêliya miqabilî wî derketin, û padşatiya Îsraêlêye bakûrê saz kirin. Lê du berekêd dinê, textê Dawidra yê ku di Orşelîmêda bû, amin man, û padşatiya Cihûdayê başûrê saz kirin.

Halê Îsraêlê û Cihûdayê baş nîbû, çimkî padşêd wan Xwedêra amin nîbûn û gura wî nedikirin. Lê halê padşatiya bakûrê diha xirab bû, çimkî padşêd wan hê sêrîda qulixkirina qelp pêşda dianîn. Rast e wan çaxa pêxemberêd usa qulix dikirin ça Êlyas û Êlîşa, yêd ku şixulêd mezin dikirin û hela hê mirî jî sax dikirin, lê yeke cimet riya xirabda diçû. Di axiriyêda, Yahowa hîşt wekî Aşûriya, padşatiya bakûrê hilşîne.

Ji sed salî hinek zêde derbaz bû, padşatiya Cihûda jî kete vê rojê, û cezakirina Xwedê stand. Tenê çend padşêd Cihûdê guh didane pêxemberêd Xwedê, û dixwestin wekî cimetê vegerînin cem Yahowa. Mesele, Yoşiya padşa destpêkir Cihûda ji qulixkirina qelp temiz ke, û paristgeha Yahowa teze ke. Çaxê ew kitêba, ku Qanûnêd Xwedê dabû Mûsa têda hatibûn nivîsarê, hate dîtinê, Yoşiya gelek ecêbmayî ma û destpêkir hê bi dil-can û bi xîret qulixkirina qelp kuta ke.

Lê yazix, wekî paşî Yoşiya kî ku li ser textê padşatiyê rûniştin, pey mesela wiye baş neçûn. Lema jî Yahowa hîşt ku Babîloniya, Cihûda zeft kin, bajarê Orşelîmê û paristgehê jî hilşînin. Lê yêd ku sax bimînin, wana bibine Babîlonê ça dîl. Xwedê pêşda gotibû wekî dîltiya wan, 70 sal wê bikişîne û Cihûda wê wêran bimîne heta hingê, çaxê cimet îzinê bistîne vegere li Orşelîmê ser erdê xweyî helal.

Lê kesek ji rikinyata Dawid îda wê nebe padşa, heta Xilazkarê sozdayî, dêmek Mesîhê ku pêşda derheqa wî hatibû gotinê, bê ser text. Meselêd gelek padşa, yêd ku li ser textê Dawid rûniştibûn, îzbat kirin wekî merivêd neqedandî nikarin serwêrtiyê bikin. Tenê Mesîh hêjayî vê yekê ye. Lema jî Yahowa derheqa Mesîh giliyê usa got: “Ewê heta-hetayê padşatiyê ser mala Aqûb bike û xilaziya Padşatiya wî wê tunebe” (Lûqa 1:33).

Li ser hîmê kitêbêd 1 Padşatî; 2 Padşatî; 2 Dîrok serê 10 heta 36; Yêremya 25:8-11.