Клоден Шәʹде Йаһоԝа йә у әԝ Африкайа Башуреда дьжи. Әԝ кʹәтә нәхԝәшхане чьмки жерʹа операсийа фәрз лазьм бу. Щәм ԝе гәләк проблемед сьһʹәт-ԛәԝатева гьредайи һәбун, ләма жи әԝе гәрәке сафи кьра кʹижан щурʹе ԛәнщкьрьне бьжбарта. Пешийа у паше операсийайе әԝе гәләк еш дькʹьшанд, ԝәстийайи бу у стреседа бу. Ԝәкә дәһ һʹәфте шунда чахе әԝ вәгәрʹийа мал, әԝ һе нькарьбу рʹуньшта. У жь бо пандемийа COVID-19 тʹӧ кәс нькарьбу бьһата щәм ԝе.

 Клоден нәдьхԝәст бона һʹале хԝә гәләк бәр хԝә кʹәвә, ләма жи әԝе жь Хԝәде ԛәԝат хԝәст ԝәки бәр дьле кәсед дьнда бе. Чахе әԝе ида карьбу рʹуньшта, әԝ тʹәви хушка щинара хԝә текли бу, йа кӧ ԝәʹдәки тʹәви Шәʹдед Йаһоԝа Кʹьтеба Пироз һин дьбу, у паше да сәкьнандьне. Клоден жерʹа фькьрәкә дьлгәрм жь Хәбәра Хԝәде гот, йа кӧ ле һелан кьр һинбуна Кʹьтеба Пироз диса дәстпекә. Клоден ӧса жи гот кӧ һатьна сәр щьвата чьԛас фәрз ә у али ԝе кьр кӧ әԝ бькарьбә пе видеоконференсийайе щьвате бьньһерʹә. Әв кʹӧлфәт пе видеоконференсийайе кʹәтә щьвате у ԝәʹде шеԝьркьрьна пьрс у щаба, әԝе жи щаба хԝә да.

 Паше Клоден тʹәви хушка хԝәндәкʹара хԝә хәбәр да у әԝе жи гәләк дьхԝәст Кʹьтеба Пироз һин бә. Әԝе готә Клоден кӧ диса кәсед дьн һәнә, йед кӧ ԝе бьхԝәстана һин бьн. Ахьрийе, Клоден тʹәви диса 4 кʹӧлфәта һинбуна Кʹьтеба Пироз дәстпекьр. Ле сәрһатийа ԝе ӧса хьлаз нәбу!

 Жь бо ве йәке кӧ Клоден бона мәрьва хәм дькьр, әԝе карьбу диса тʹәви дәһ кʹӧлфәта һинбуна Кʹьтеба Пироз дәстпекә. Ԝәʹде пандемийайе әԝе бь тʹәмами тʹәви 16 кʹӧлфәта һинбуна Кʹьтеба Пироз дәрбаз дькьр! Һьнәк жь ԝан кʹӧлфәта тʹьме пе видеоконференсийайе щьвате дьньһерʹьн. Клоден һинбунед Кʹьтеба Пироз дәрбаз дькә у ве йәкева мьжул ә, ләма жи әԝ ида бь зедәйи бона һʹале хԝә бәр хԝә накʹәвә. Әԝе ӧса жи сәр хԝә тʹәхмин кьр, ԝәки Йаһоԝа йе кӧ «Хԝәдайе һʹәму бәрдьлийе йә», һʹәму тәнгасийада бәр дьле ԝеда дьһат. Әв йәк ле һелан кьр, кӧ әԝ жи бәр дьле мәрьвед дьнда бе (2 Корьнтʹи 1:3, 4).

 Хԝәндәкʹаред Клоден чь дьбежьн дәрһәԛа ве йәке чь кӧ һин бунә? Йәк жь ԝан ӧса дьбежә: «Мьн гәләк алийава кʹар станд. Ле йа лапә фәрз бона мьн әԝ бу, кӧ әз наве Хԝәде пеһʹәсийам. Әв йәк али мьн кьр дьһа незики Йаһоԝа бьм». Әв кʹӧлфәта пешьн йа кӧ дәстпекьр Кʹьтеба Пироз һин бә, һивийе йә бе ньхӧмандьне. Әв сәрһати Клоденрʹа гәләк шабун анин. У паше операсийайе әԝ зу ԛәнщ бу.