Шәʼдед Йаһоԝа ԝәʼде лекʼолине щурʼә-щурʼә ԝәлгәрʼандьнед Кʼьтеба Пироз дьдьнә хәбате. Һʼәчʼи зәʼф әԝана Ԝәлгәрʼандьна Дьнйа Тʼәзә йа Ньвисаред Пироз дьдьнә хәбате, һәрге сәр зьмане ԝан һәйә, чьмки әԝ ԝәлгәрʼандьна рʼаст у зәлал ә у теда наве Хԝәде те хәбьтандьне.

•   Хәбьтандьна наве Хԝәде. Һьнә нәшьркʼаред Кʼьтеба Пироз һӧрмәте надьнә ԝи кәси, кʼе бь рʼасти һежайи ԝе йәке йә. Мәсәлә, ԝәлгәрʼандьнәкә Кʼьтеба Пирозда, наве 70 мәрьва һатийә ньвисаре, йед кӧ ԝи нәшьркьрьнеда кʼар кьрьнә. Ле ԝе нәшьркьрьнеда наве Ньвискʼаре Әʼсьли йе Кʼьтеба Пироз, демәк Йаһоԝа Хԝәде, ԛә нәһатийә ньвисаре!

   Ле Ԝәлгәрʼандьна Дьнйа Тʼәзәда наве Хԝәде бь һʼәзара щара һатийә хәбьтандьне, хут ԝан щийа кʼидәре кӧ орижиналеда һәйә, ле наве ԝәлгәрʼа нәһатийә әʼйанкьрьне.

•   Ԝәлгәрʼандьна рʼаст. Нә һәр ԝәлгәрʼандьнед Кʼьтеба Пироз текста орижинале рʼаст ԝәлдьгәрʼиньн. Мәсәлә, ԝәлгәрʼандьнәкеда рʼеза жь Мәтта 7:13, ԝи щурʼәйи һатийә ԝәлгәрʼандьне: «Дәре тәнгрʼа бькʼәвьнә һьндӧрʼ, чьмки фьрә йә әԝ дәри у бәр ә әԝ рʼийа кӧ дьбә бәрбь ‹щәʼньме›». Ле орижиналеда әв хәбәр һатийә ньвисаре ча «ԛьрʼкьрьн» нә кӧ «щәʼньм». Дьԛәԝьмә ԝәлгәрʼа хәбәра «щәʼньм» данә хәбате, чьмки баԝәр дькьрьн, ԝәки мәрьве хьраб ԝе һʼәта-һʼәтайе щәʼньмеда бьчәрчьрьн. Әԝ һинкьрьн сәр һʼиме Кʼьтеба Пироз нинә. Ԝәлгәрʼандьна Дьнйа Тʼәзәда әԝ рʼез ӧса һатийә ԝәлгәрʼандьне: «Дәре тәнгрʼа дәрбаз бьн, чьмки фьрә йә әԝ дәри у һеса йә әԝ рʼе, кʼижан кӧ дьбә бәрбь мьрьне».

•   Ԝәлгәрʼандьна зәлал. Ԝәлгәрʼандьна баш нә тʼәне гәрәке рʼаст бә, ле ӧса жи зәлал бә у һеса бе фәʼм кьрьне. Соз мәсәлә, Рʼомайи 12:11-да, Паԝлосе шанди хәбәра ӧса дьдә хәбате, йа кӧ рʼастә-рʼаст те һʼәсабе «рʼӧһʼда кʼәләгәрм бьн», ле чьмки әԝ ԝәлгәрʼандьн иро мәрьварʼа фәʼмдари нинә, Ԝәлгәрʼандьна Дьнйа Тʼәзәда әв готьн бь ԝи щурʼәйи һатийә ԝәлгәрʼандьне, «бьра рʼӧһʼе пироз дьле ԝәда агьре хирәте вехә».

 Хенщи ве йәке кӧ Ԝәлгәрʼандьна Дьнйа Тʼәзә зәлал ә, һеса те фәʼм кьрьне у теда наве Хԝәде те хәбьтандьне, диса кʼарәкә ԝе һәйә кӧ әԝ бепʼәрә йә. Бь сайа ве йәке бь милйона мәрьв дькарьн Кʼьтеба Пироз сәр зьмане хԝә бьхуньн, һәла һе әв мәрьв жи, йед кӧ нькарьн Кʼьтеба Пироз бькʼьрʼьн.