Дәрбази һондоре буйин

КʹЬТЕБА ПИРОЗ ЖИЙИНА МӘРЬВА ДЬГӦҺЕЗӘ

«Спорта Шәрʹкьрьне Нета Жийина Мьн бу»

«Спорта Шәрʹкьрьне Нета Жийина Мьн бу»
  • Сала Буйине: 1962

  • Ԝәлат: Дәԝләтед Йәкбуйи

  • Бәре: Спорта шәрʹкьрьнева мьжул дьбу

ЖИЙИНА МЬНӘ БӘРЕ

 Щарәке ԝәʹде һинбуна спорте, ньшкева ньге мьн позе һәвале мьн кʹәт у әԝи зийанәкә мәзьн станд. Жь бо ве йәке мьн хԝә нәһәԛ тʹәхмин дькьр у дәстпекьр бьфькьрьм, гәло һежа йә әз бәрдәԝам кьм ве спортева мьжул бьм. Чьрʹа әве ԛәԝьмандьне әз һелан кьрьм, ԝәки ньһерʹандьна хԝә һьндава ве спорте бьгӧһезьм, кʹижан кӧ гәләк сала нета әʹмьре мьн бу? Әзе пешийе гьли кьм, кӧ чаԝа мьн дәстпекьр ве спортева мьжул бьм.

 Әз бажаре Буфалойеда, штата Нийу Йоркеда, мәзьн бумә. Нәфәред мала мьн әʹдьлайиһʹьз у Католикед амьн бун. Әз мәкʹтәба Католикида һин дьбум, ӧса жи мьн дереда аликʹари дьда кʹәшиша. Де-баве мьн дьхԝәстьн ԝәки әз у хушка мьн жийина хԝәда пешдачуйи бьн. Ләма жи ԝана изьн дьда мьн, кӧ паши дәрсед мәкʹтәбе һәрʹьмә спорте, һәрге әве йәке рʹийа һинбуна мьн нәгьрта. Ӧса әз бьчʹуктайеда һин бум, бьбьмә мәрьвәки тʹәрбәт.

 Чахе әз 17 сали бум, мьн дәстпекьр спорта шәрʹкьрьнева мьжул бьм. Һʹәфтийе шәш рʹожа, рʹоже се сьһʹәта әз спорте һин дьбум. У әв йәк бь сала бәрдәԝам дьбу. Мьн ӧса жи бь сьһʹәта һʹьше хԝәда щурʹә-щурʹә методед тʹәзәйә шәрʹкьрьне чедькьр у гәләк видео дьньһерʹи, сәва кӧ ве спортеда һе пешдачуйи бьм. Зәʹф мьн хԝәш дьһат методед шәрʹкьрьнейә чʹәʹвгьрти һин бьм, һәла һе жи гава мьн чʹәк дьданә хәбате. Бь лехьстьнәке мьн дькарьбу тʹәхтәк йан жи кʹәлпичʹәк бьшкенанда. Ахьрийа-ахьрийе әз бумә йәки щерʹьбанди у һостә. Мьн гәләк хәлат стандьн. У ӧса спорта шәрʹкьрьне бу нета әʹмьре мьн.

 Әз дьфькьрим ԝәки әз сәрфьнийаз ьм. Заньнгәһеда әз рʹьнд һин дьбум у сәва ве йәке әз һатьмә хәлаткьрьне. Паше мьн дәстпекьр компанийәкә навдарда, йа кӧ бона системед компотәре щабдар бу, бьхәбьтьм. Хәбата мьнә баш, пʹәре мьн, таме мьн у ӧса жи дьлкʹәтийа мьн һәбу. Аликива ӧса дьһатә кʹьфше кӧ әз гәләк бәхтәԝар ьм, ле бь рʹасти ӧса нибу, чьмки гәләк пьрсед мьнә фәрз һәбун, щаба кʹижана мьн гәләк дьхԝәст пебьһʹәсийама.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ

 Сәва кӧ щаба пьрсед хԝә бьвиньм, мьн дәстпекьр һʹәфтийе дӧ щара һәрʹьмә дере у Хԝәдерʹа дӧа бькьм кӧ али мьн бькә. Ле рʹожәке паши хәбәрдана мьн у һәвале мьн, жийина мьн һатә гӧһастьне. Мьн пьрс да ԝи: «Тӧ ԛә фькьрийи дәрһәԛа ве йәке, кӧ нета жийине чь йә у чьрʹа һаԛас проблем у нәһәԛи һәнә!» Әԝи гот, ԝәки пешда пьрсед ԝи щурʹәйи щәм ԝи жи һәбун, ле щаба ԝан пьрса әԝи Кʹьтеба Пирозда дитийә. Әԝи кʹьтеба «Тӧ Дькари Һʹәта-Һʹәтайе Щьнәтеда сәр Әʹрде Бьжи» a да мьн у гот, ԝәки әԝ тʹәви Шәʹдед Йаһоԝа Кʹьтеба Пироз һин дьбә. Пешийе әз ләз нәдькʹәтьм әве кʹьтебе бьхуньм, чьмки әз дьфькьрим ԝәки нәрʹаст ә кʹьтебед религийәкә дьн бьхуньм. Ле мьн гәләк дьхԝәст щаба пьрсед хԝә бьстиньм, ләма жи мьн хԝәст пебьһʹәсьм, һәла чь кӧ Шәʹдед Йаһоԝа һин дькьн, рʹаст ә йан на.

 Әз гәләк әʹщебмайи мам, чахе пеһʹәсийам кӧ бь рʹасти Кʹьтеба Пироз чь һин дькә. Мьн фәʹм кьр, ԝәки сәре-серида ԛьрара Хԝәде әԝ бу, кӧ мәрьв щьнәтеда һʹәта-һʹәтайе бьжин, у әв ԛьрара ԝи нәһатийә гӧһастьне (Дәстпебун 1:28). Һʹьше мьн чу чахе мьн Кʹьтеба Пирозда, йа Ԝәлгәрʹандьна Кʹинг Щеймсда, кʹижан кӧ щәм мьн һәбу, дит ԝәки наве Хԝәде Йаһоԝа йә. Әв һәма әԝ нав бу, дәрһәԛа кʹижани мьн дӧа дькьр чахе Дӧакьрьна Хӧдан дьԝәкʹьланд (Зәбур 83:18; Мәтта 6:9). Ӧса жи ахьрийеда әз пеһʹәсийам, ԝәки чьрʹа Хԝәде дьһелә кӧ мәрьв бьчәрчьрьн. Мьн дьдит ԝәки һәр тьшт чь кӧ әз педьһʹәсьм, логики у рʹаст ә! Жь шабуне дьле мьн дьпʹьрпьти.

 Бира мьн начә кӧ мьн чь сәр хԝә тʹәхмин кьр, гава щара пешьн чумә щьвата Шәʹдед Йаһоԝа. Гьшк һәвалһʹьз бун у дьхԝәстьн тʹәви мьн бьбьнә нас. Ве рʹоже готар һәбу, жь кʹижане әз пеһʹәсийам ԝәки әм гәрәке ча дӧа бькьн, сәва кӧ Хԝәде мә бьбьһе у щаба мә бьдә. Әве готаре гәләк дьле мьн гьрт, чьмки мьн гәләк щар Хԝәдерʹа бона аликʹарийе дӧа дькьр. Һьнә ԝәхт шунда әз ӧса жи чумә сәр Евара Биранина Мьрьна Иса. Әз гәләк әʹщебмайи мам, чахе мьн дит ԝәки гава рʹезед жь Кʹьтеба Пироз тенә хԝәндьне, зарʹ жи ԝан рʹеза вәдькьн у дьньһерʹьн. Пешийе мьн ньзаньбу, кӧ чаԝа гәрәке рʹезед Кʹьтеба Пироз бьвиньм, ле Шәʹдед Йаһоԝа әз һин кьрьм.

 Чьԛас һе зедә әз дьчумә щьватед Шәʹдед Йаһоԝа, һаԛас һе зедә мьн һинкьрьнед Шәʹдед Йаһоԝа дьшекьранд. Һәр щар сәр щьвата әз тьштәки тʹәзә педьһʹәсийам, чь кӧ һелани у дьлрʹьһʹәти дьда мьн. Паше Шәʹдед Йаһоԝа әз тʹәглиф кьрьм, ԝәки һинбуна Кʹьтеба Пироз тʹәви мьн дәрбаз кьн.

 Чь кӧ мьн нава Шәʹдед Йаһоԝада дьдит, бь тʹәмами щӧдә дьбу жь ԝе йәке чь кӧ мьн дереда дьдит. Мьн тʹәхмин кьр ԝәки Шәʹдед Йаһоԝа мәрьвед һʹәлал у дьлтʹәмьз ьн, йед кӧ хирәт дькьн дьле Хԝәде ша кьн. Әз тʹьме избат дьбум ԝе йәкеда, кӧ әԝана Мәсиһийед рʹаст ьн у ԝе һʹьзкьрьне дьдьнә кʹьфше, дәрһәԛа кʹижани Иса дьгот (Йуһʹәнна 13:35).

 Чьԛас һе зедә әз Кʹьтеба Пироз һин дьбум, һаԛас һе зедә мьн гӧһастьн нав хԝәда дькьрьн, сәва кӧ ль гора нормед Кʹьтеба Пироз бьжим. Ле мьн тʹьре әзе тʹӧ щар нькарьбьм тʹәрка спорта шәрʹкьрьне бьдьм. Гәләк мьн хԝәш дьһат ве спорте һин бьм у бькʹәвьмә ләща шәрʹ. Чахе мьн дәрһәԛа ве йәке дьле хԝә ԝи бьрайирʹа вәкьр, кʹижани кӧ һинбуна Кʹьтеба Пироз тʹәви мьн дәрбаз дькьр, әԝи бь һʹьзкьрьн мьнрʹа ӧса гот: «Тӧ бәрдәԝам кә Кʹьтеба Пироз һин бә. Әз баԝәр ьм әв йәк ԝе али тә бькә, кӧ сафикьрьна рʹаст бьки». Әв ширәтәкә лапә баш бу. Чьԛас һе зедә әз һин дьбум, һаԛас һе зедә мьн дьхԝәст дьле Йаһоԝа Хԝәде ша кьм.

 Жь бо ве дәрәще, дәрһәԛа кʹижани мьн серида гот, демәк гава ньшкева ньге мьн позе һәвале мьн кʹәт, ньһерʹандьна мьн һатә гӧһастьне. Пәй ве дәрәщерʹа мьн дәстпекьр кʹур бьфькьрьм: «Гәло әз дькарьм бьбьмә пәйчуйе Иса у әʹдьлайиһʹьз бьм, һәрге бәрдәԝам кьм спорта шәрʹкьрьнева мьжул бьм?» Ишайа 2:3, 4, дьбежә ԝәки әԝед кӧ ль гора ԛанунед Йаһоԝа дьжин, «т′ӧ щар ԝе һин нәбьн кӧ шәр′ кьн», (ДТʹ). У Иса жи готә шагьртед хԝә, ԝәки әԝана зӧлмийе нәкьн һьнге жи, гава нәһәԛийе ԝан дькьн (Мәтта 26:52). Ләма жи мьн тʹәрка ве спорте да, кʹижан кӧ нета жийина мьн бу.

 Паши ве йәке мьн әв ширәта Кʹьтеба Пироз да хәбате: «Хԝә хԝәденасийеда һиндар кә» (1 Тимотʹейо 4:7). Мьн сафи кьр кӧ һʹәму ԝәʹдә у ԛәԝата хԝә, кʹижан кӧ бәре мьн бона спорта шәрʹкьрьне хәрщ дькьр, ида бона шьхӧлед рʹӧһʹани бьдьмә хәбате. Дьлкʹәтийа мьн рʹази нибу ԝан һʹәму тьштарʹа, чь кӧ әз жь Кʹьтеба Пироз һин дьбум, ләма жи әм һәв ԛәтийан. Сала 1987-да, 24 Чьләйе әз һатьмә ньхӧмандьне у бумә Шәʹде Йаһоԝа. Зутьрәке мьн дәстпекьр ча пешәнге һәртʹьм хьзмәт кьм у һʹәчʹи зәʹф ԝәʹде хԝә мьн сәр ԝе йәке хәрщ дькьр, кӧ рʹастийа Кʹьтеба Пироз мәрийа һин кьм. Һʹәта ньһа әз бәрдәԝам дькьм ча пешәнге һәртʹьм хьзмәт кьм. Хенщи ԝе йәке мьн һьнә ԝәʹдә офиса сәрәкәйә Шәʹдед Йаһоԝада, Нийу Йоркеда хьзмәт кьрийә. Әв бона мьн ԛәдьрәки гәләк мәзьн бу.

ЧЬ КʹАР МЬН СТАНД

 Ньһа әз дәрһәԛа Хԝәде рʹастийе заньм у фәʹм дькьм кӧ мьн әв йәк дитийә, чь кӧ жь мьн кем бу. Әз ида нафькьрьм кӧ жийина мьн бош-бәтал ә. Ньһа нета жийина мьн у һевийа мьнә баш бона ахьрийе һәйә, чь кӧ әз гәләк бәхтәԝар кьрьмә. Һʹәта ньһа әз спортева мьжул дьбьм, ле әв ида жийина мьнда щийе әʹԝльн нагьрә. Нета мьнә сәрәкә әԝ ә, кӧ Йаһоԝа Хԝәдерʹа хьзмәт кьм.

 Чахе әз спорта шәрʹкьрьнева мьжул дьбум, әз тʹьме һʹьшйар бум һьндава мәрьвед дәр-доре хԝә, чьмки дьфькьрим һәрге кәсәк һʹьщуми сәр мьн кә, әз гәрәке хԝә хԝәй кьм. Иро жи әз һʹьшйар ьм, ле ида бь нетәкә дьн, демәк кӧ али мәрийа бькьм. Бь сайа Кʹьтеба Пироз әз бумә мәрьвәки мәрʹд у мерәки баш бона кʹӧлфәта хԝәйә бәдәԝ, Брендайе.

 Рʹаст ә спорта шәрʹкьрьне бьбу нета жийина мьн, ле дәԝсе мьн тьштәки дьһа баш дит. Кʹьтеба Пироз дьбежә: «Һиндарийа ԛальб кери һьндьк тьшти те, ле йа хԝәденасийе кери һәр тьшти те, созе ԝе һьн ль ве дьне һәйә, һьн жи ль ԝе дьне» (1 Тимотʹейо 4:8).

a Шәʹдед Йаһоԝа нәшьр кьрьнә, ле ида найе нәшьркьрьне.