Дәрбази һондоре буйин

Дәрбази навәроке буйин

 СӘРЕ 2

Ча Тö Дькари Исафа Хwә Тʹәмьз Хwәй ки?

Ча Тö Дькари Исафа Хwә Тʹәмьз Хwәй ки?

«Исафа хwә тʹәмьз хwәй кьн» (1 ПӘТРУС 3:16, ДТʹ).

1, 2. Һәрге тö дьчи щики нәнас, чьма гәрәке гöрʹа рʹебәре хwә бьки, у ча рʹебәр бәрамбәри исафе дьбә?

ГӘМИВАН гәмийе дажо ль сәр пʹелед окиана мәзьн. Рʹеви рʹе кʹәтийә у дьчә нав бәрʹийа хькә-хали. Тәйарван жи бь тәйаре дьфьрʹә у хенщи әʹwьра тʹö тьшти навинә. Ле тö зани wан һәрсекарʹа чь лазьм ә? Wанарʹа лазьм ә рʹебәри.

2 Мәсәлә бьдә һʹәсабе хwә кö тö рʹе кʹәти у дьчи щики нәнас. Тö тʹәви кәсәки дьчи у баwәрийа хwә wи тини кö wе тә бьгьһинә щи. Һәрге әw мәри рʹе рʹьнд занә, әw wе рʹебәрәки баш бә. Һәрге тö гöһ бьди рʹебәрийа wи, тöйе öнда нәби. Исаф жи мина рʹебәр ә. Әв пʹешкʹеша пʹьрʹ qимәт ә, кʹижан кö Йаһоwа Хwәде дайә мә (Аqуб 1:17). Бе исаф әме бе рʹебәри буна. Һәрге әм гöһ бьдьнә  исафе, әwе али мә бькә ль сәр рʹийа рʹаст бьн, у жь wе рʹе дәрнәкʹәвьн. Ньһа әм хәбәр дьн дәрһәqа wе йәке кö чь йә исаф у ча әw дьхәбьтә. Әм öса жи дькарьн хәбәр дьн дәрһәqа wе йәке кö: 1) ча дькарьн исафе һин кьн, 2) чьма әм гәрәке исафа мәрьвед дьн һьлдьн һʹәсаб, у 3) ча исафа тʹәмьз кʹәрәма тинә.

ЧЬ ЙӘ ИСАФ У ЧА ДЬХӘБЬТӘ

3. Хәбәра Йунани йе кö һатийә wәлгәрʹандьне ча «исаф» чь те һʹәсабе, у бь аликʹарийа исафе, мәрьв чь дькарә бькә?

3 Дь Кʹьтеба Пирозда хәбәра Йунани йе кö һатийә wәлгәрʹандьне ча «исаф», те һʹәсабе «хwәнаскьрьн». Әм щöда дьбьн жь һʹәму әʹфьрандьнед ль сәр әʹрде. Хwәде фәрәсәтәки öса дайә мә кö әм дькарьн хwәха хwә нас кьн. Демәк әм дькарьн кʹеләкева хwә бьньһерʹьн, у тедәрхьн кö әм мәрьвнә ча нә. Исаф мина һʹакьме дьле мә йә, йе кö мәрʹа дьбежә кö чаwа хwә кʹьфш кьн, кʹижан ньһерʹандьн хwәй кьн у чь сафикьрьна бькьн. Әw öса жи али мә дькә кö сафикьрьнед баш бькьн, у мә хwәй дькә жь сафикьрьнед öса кö дькарьн зийане бьдьнә мә. Исаф дькарә йан мә ша кә, йан мә бьчәрчьринә.

4, 5. (а) Жь кʹö әм заньн wәки исафа Адәм у Һеwайе һәбу, у чь qәwьми чахе wана qануна Хwәде инкʹар кьр? (б) Жь кʹижан мәсәла те кʹьфше, кö бәре исафа мәрьвед амьн ча рʹебәрийа wан дькьр?

4 Дәма әʹфьрандьна жьн у мере пешьн, исаф wанарʹа һатьбу дайине. Чахе Адәм у Һеwайе гöнә кьрьн, wана шәрми кьр, у öса һатә кʹьфше кö исафа wан һәбу. (Дәстпебун 3:7, 8). Ле ида исафа wанә нәтʹәмьз нькарьбу һʹале wан рʹаст кьра. Чьмки әwана рʹьнд заньбун чь дькьн. Адәм у Һеwайе qануна Хwәде инкʹар кьрьн. Жь бо wе йәке кö әwана кʹамьл бун, wана рʹьнд фәʹм дькьр кö öса мьqабьли Йаһоwа Хwәде дәрдькʹәвьн у wе бьбьнә дьжмьнед wи. Ләма жи әwана нәһатьнә бахшандьне.

 5 Ле һәбун мәрьвед öса йед кö рʹаст ә нәкʹамьл бун, ле гöһ дьданә исафа хwә. Мәсәлә, мерәки амьн бь наве Ибо, гьлийе öса гот: «Әз бь зәхми бь растийа хwә вә дьгьрьм у wе бәрнадьм, . . . дьле мьн, мьн шәрмәзар нәкә!» (Ибо 27:6). Бь рʹасти жи исафа Ибо тʹәмьз бу. Чьмки чахе әwи тьштәк сафи дькьр дәнге исафа хwә пьшт гöһе хwәва нәдавит. Ләма жи әwи бь сәрбәсти дькарьбу бьгота, кö исафа wи әw шәрмәзар накә, демәк wи начәрчьринә. Ле дина хwә бьдьн кö һәстед Даwьд пʹехәмбәр щöдә бун. Йане исафа Даwьд әw дьчәрчьранд. Чьмки Даwьд һьмбәри Шаwул пʹадша, йе кö жь алийе Йаһоwада һатьбу кʹьфшкьрьне, беһöрмәти нишан кьр. Ләма жи дьле wи дәстпекьр әw бьчәрчьринә (1 Самуйел 24:5). Әве чәрчьрандьне Даwьдрʹа кʹарәкә мәзьн ани, чьмки әв һин бу, кö щарәкә дьн тьште öса нәкә.

6. Жь чь те кʹьфше кö исафа һʹәму мәрийа һәйә?

6 Ле гәло тʹәне щәм хьзмәткʹаред Йаһоwа һәйә исаф? Wәред әм бьфькьрьн ль сәр гьлийе Паwлосе шанди: «Нәщьһуйед кö Qануна wан тʹöнә, гава бе һʹәмде хwә хwәстьнед Qануне дьqәдиньн, бәле әwә бе Qанун ьн, хwәха бона хwә дьбьнә qанун. Чьмки әwана дьдьнә кʹьфше, кö хwәстьна Qануне дьле wанда ньвисар ә. Исафа wан жи шәʹдәтийа ве йәке дьдә у фькьред wан щарна ль wан нәһәq дькьн, щарна бесущ дькьн» (Рʹомайи 2:14, 15). Чаwа те кʹьфше, әw мәрьвед кö qә ньзаньн qанунед Йаһоwа Хwәде, щар-щара бь сайа дәнге исафа хwә дькарьн ль гора принсипед Хwәде бьжин.

7. Чьма щар-щара исаф дькарә рʹебәрийа нәрʹаст бьдә?

7 Ле щар-щара исаф дькарә рʹебәрийа нәрʹаст бьдә. Чьма? Wәрен әм диса хәбәр дьн дәрһәqа wе мәсәле йа кö мә дәстпекеда гот. Һәрге рʹебәр шаш бә, рʹеви wе öнда бә. Öса жи һәрге тö тʹәви рʹебәр шәрʹ бьки у рʹебәрийа  wи инкʹар ки, те öнда би. Демәк һәрге хwәстьна дьле мә ль сәр исафа мә һʹöкöм кә, у әм гöһ дьдьнә дьле хwә, нә кö исафа хwә, wи чахи исафа мә wе нәрʹаст рʹебәрийа мә бькә. У һәрге исафа мә нә ль сәр һʹиме занәбуна рʹаст ә жь Хәбәра Хwәде, әме нькарьбьн qәнщи у хьрабийе жь һәв дәрхьн. Ләма жи, сәва кö исафа мә рʹаст бьхәбьтә, әм гәрәке пәй рʹебәрийа рʹöһʹе пироз һәрʹьн, йе кö Йаһоwа дьдә. Паwлос ньвиси: «Исафа мьн жи бь сайа Рʹöһʹе Пироз мьнрʹа шәʹдәтийе дьдә» (Рʹомайи 9:1). Ле чаwа әм дькарьн баwәр бьн, кö исафа мә ль гора рʹöһʹе Йаһоwайи пироз дьхәбьтә? Әм гәрәке исафа хwә һин кьн.

ЧА ДЬКАРЬН ИСАФА ХWӘ ҺИН КЬН

8. (а) Ча дьл дькарә һʹöкöм кә ль сәр исафа мә, у чь гәрәке һьлдьн һʹәсаб чахе тьштәки сафи дькьн? (б) Чьма бәс нинә кö исафа мә тʹәмьз бә? (Бьньһерʹә әʹламәтийа зедә.)

8 Һьнә мәри гöһ дьдьнә дьле хwә, у сафи дькьн чь у ча бькьн. Паше жи дьбежьн: «Исафа мьн рʹьһʹәт ә». Ль сәр исафа мә, хwәстьна дьл qайим дькарә һʹöкöм кә. Дь Кʹьтеба Пирозда öса те готьне: «Дьл жь һәр тьшти зедәтьр хапиноки йә у qәлс ә; ма ки дькарә wи феһм бькә?» (Йерәмйа 17:9). Ләма жи әм гәрәке гöһ нәдьнә хwәстьнед дьле хwә. Ле әм гәрәке бьфькьрьн дәрһәqа wе йәке, чь wе дьле Йаһоwа Хwәде хwәш бе. *

9. Чь йә хофа Хwәде, у ча әw ль сәр исафа мә һʹöкöм дькә?

9 Чахе әм wәʹде сафикьрьна гöһ дьдьнә дәнге исафа хwәйә һинкьри, әм әʹйан дькьн кö әм жь Хwәде хоф  дькьн, у начьн пәй хwәстьнед дьле хwә. Әв йәк рʹьнд те кʹьфше жь мәсәла Нәһәмийайе амьн. Изьна wи һәбу ча сәрwер wәки жь бьнәлийед хwә хәрщ тʹоп кә. Ле әwи әw йәк нәдькьр. Чьма? Чьмки әw дьфькьри кö бь ве йәке wе щьмәʹта Йаһоwа бьдә зерандьне у һерса Йаһоwа ль сәр хwә рʹакә, у һәла әв фькьр жи бәр чʹәʹве wи рʹәш бу. Әwи öса гот: «Жь бәр тьрса Хwәде тьштәки wöса нәкьрьм» (Нәһәмийа 5:15). Гәләк фәрз ә кö хофа Хwәде дьле мәда һәбә, демәк әм гәрәке бьтьрсьн, кö Хwәде нәдьнә хәйдандьне. Бь ве тьрсе әме һелан бьн кö рʹебәрийе дь Хәбәра Хwәдеда бьгәрʹьн, чахе мәрʹа лазьм бә тьштәки сафи кьн.

10. Wәʹде ичʹкәвәхwарьне, кʹижан принсипед Кʹьтеба Пироз әм гәрәке һьлдьн һʹәсаб?

10 Ча әм дькарьн шьхöлед хwә öса сафи кьн, кö мьqабьли исафе нәчьн? Мәсәлә, wәрен әм хәбәр дьн дәрһәqа ичʹкәвәхwарьне. Чахе әм тʹоп дьбьн кö кʹеф кьн, гәрәке жь хwә бьпьрсьн: «Әзе ичʹке вәхwьм, йан на?» Бәре әʹwльн фәрз ә кö әм пебьһʹәсьн, һәла кʹижан принсипед жь Кʹьтеба Пироз дь ве дәрәщеда лазьм тен. Кʹьтеба Пироз шьровәдькә, wәки Хwәде бь хwә ичʹкәвәхwарьн qәдәхә накә. Һәла һе дь Кʹьтеба Пирозда пәсьне Йаһоwа те дайине жь бо пʹешкʹешдайина шәраве (Зәбур 104:14, 15). Кʹьтеба Пироз qәдәхә дькә ичʹкәвәхwарьна зедә у сәрхwәшбуне (Луqа 21:34; Рʹомайи 13:13). Хенщи ве йәке, сәрхwәшбун бәрамбәри гöнед öса гьран дьбә, ча qави у зьнекʹари (1 Корьнтʹи 6:9, 10). *

11. Ча әм дькарьн рʹебәрийа Хwәде бьстиньн?

11 Бь сайа принсипед öса, исафа Мәсиһийа һе баш те һинкьрьне. Ләма жи, чахе тʹоп дьбьн wәки кʹеф кьн, лазьм ә сафи ки ичʹке вәхwи йан на. У гәрәке пьрсед  öса бьди хwә: «Нета ве wәʹдәдәрбазкьрьне чь йә? Дьбә кö әв wәʹдәдәрбазкьрьн жь qәйдә дәркʹәвә у бьбә ча кʹефәкә бе qәйдә? Гәло әз һʹьз дькьм ичʹке вәхwьм у бе ичʹкә дькарьм? Әз ичʹке бона чь вәдьхwьм, сәва кö кʹефхwәш бьм? Әз дькарьм хwә бьгьрьм кö кем ичʹке вәхwьм?» Чахе әм дьфькьрьн ль сәр принсипед жь Кʹьтеба Пироз у ль сәр пьрса кö тʹәви ван принсипа гьредайи нә, әм гәрәке Йаһоwарʹа сәва рʹебәрийе дöа бькьн. (Бьхунә Зәбур 139:23, 24). Бь ве йәке әм изьне дьдьнә рʹöһʹе Йаһоwайи пироз кö рʹебәрийе мә бькә. Әм öса жи дьхәбьтьн, wәки исафа мә ль гора принсипед Йаһоwа Хwәде бьхәбьтә. Чахе әм сафикьрьна дькьн, гәрәке диса тьштәки һьлдьн һʹәсаб.

ЧЬМА ГӘРӘКЕ ИСАФА МӘРЬВЕД ДЬН ҺЬЛДЬН ҺʹӘСАБ?

Исафа кö бь Кʹьтеба Пироз һатийә һинкьрьне wе али тә бькә сафи ки, кö ичʹке вәхwи йан на

12, 13. Чьма исафа Мәсиһийа жь һәв щöдә дьбә, у һьндава ве йәке әм гәрәке ча бьн?

12 Дьбәк тö әʹщебмайи бьмини кö исафа Мәсиһики чьqас зәʹф щöда дьбә жь исафа Мәсиһийе дьн. Мәсәлә, кәсәк бь дьл у щан дькарә еваре тʹәви һәвала ичʹкә вәхwә, ле исафа мәрьве дьн изьне наде әве йәке бькә. Ле гәло чьрʹа фьрqийа öса һәйә, у әв йәк ча дькарә ль сәр сафикьрьна мә һʹöкöм кә?

13 Мәрьв гәләк тьштада жь һәв щöдә дьбьн. У һәр мәрьвәк жийина хwә бь щурʹәки дәрбаз кьрийә. Мәсәлә, һьнәк рʹьнд заньн чьда сьст ьн, у ль сәр ве йәке хәбьтин, ле әв йәк щәм wана һеса нәһатийә стандьн (1 Пʹадшати 8:38, 39). У һьндава ичʹкәвәхwарьне исафа wана даһа назьк ә. Һәрге мәрьвәки öса бе мала тә мевани, исафа wи дькарә әw һелан кә ичʹке вәнәхwә. Ле гәло щайиз ә кö тö жь бо ве йәке бьхәйиди? Те wи бьди зоре? Бе шьк, на. У фьрqи тʹöнә тö зани йан ньзани әwе мәʹнийе кö чьма әw ичʹке вәнахwә, дьбәк әw нахwазә  дәрһәqа ве йәке дь ве дәрәщеда хәбәр дә. Ле һʹьзкьрьна бьрати wе али тә бькә, кö шәһрәза би.

14, 15. Кʹижан пьрседа исафа Мәсиһийед qьрʹна жь һәв щöдә дьбу, у Паwлос чь ширәт да?

14 Паwлосе шанди дьдит, кö чьqас фьрqи һәйә ортʹа исафа Мәсиһийед qьрʹна йәке. Дь wан чаха исафа һьнә Мәсиһийа рʹьһʹәти нәдьда wан сәва хwарьне, кʹижан кö пʹутарʹа һатьбу qöрбанкьрьне (1 Корьнтʹи 10:25). Ле исафа Паwлос әw qәдәхә нәдькьр бьхwә хwарьнед öса, йед кö пʹутарʹа qöрбан дькьрьн у паше жи базарада дьфьротьн. Чьмки пʹут, сәва Паwлос тʹö тьшт нәдьһатьнә һʹәсабе; у әwи фәʹм дькьр кö пʹут нькарьн хwарьне бьдьн, сазкʹаре кʹижани кö бь рʹасти Йаһоwа йә. Хенщи ве йәке, Паwлос фәʹм дькьр кö һʹәмушк ньһерʹандьна wи qәбул накьн. Чьмки һьнәк жь wан, пешийа кö бьбуна Мәсиһи бь дьл у щан ван пʹута дьһʹәбандьн. У һʹәму тьшт чь кö тʹәви пʹутпʹарьстийе гьредайи бу, бәр чʹәʹве wана рʹәш бу. Ле гәло Паwлос әв пьрс ча сафи кьр?

15 Паwлос гот: «Әм кö баwәрийеда qәwат ьн, гәрәке бькʹәвьнә бьн баре сьста, нә кö әм ль хwә хwәш бен. Чьмки Мәсиһ жи нә кö ль хwә хwәш һат» (Рʹомайи 15:1, 3). Паwлос мә һелан дькә wәки әм чʹәʹв бьдьнә Иса Мәсиһ, у пешийе бона кʹара хушк-бьред хwә бьфькьрьн, паше ида бона кʹара хwә. Һьм жи Паwлос гот, кö һе баш әw qәт гошт нәхwә, нә кö бьбә кәвьре лькʹöмандьне сәва wан мәрийа сәва кʹижана кö Иса Мәсиһ жийина хwә бәрва да. (Бьхунә 1 Корьнтʹи 8:13; 10:23, 24, 31-33).

16. Чьма мәрьве бь исафа назьк гәрәке сущдар нәкә wан мәрийа, исафа кʹижана кö жь йа wи щöда дьбә?

16 Әw Мәсиһи исафа кʹижана кö гәләк назьк ә, гәрәке Мәсиһийед дьн сущдар нәкьн у ль сәр йа хwә нәсәкьньн, wәки һәр кәс бь исафа wан һʹәму тьшти  сафи кә. (Бьхунә Рʹомайи 14:10). Бь рʹасти, һе баш ә wәки исафа һәр кәси wи сущдар бькә, нә кö мәрийед дьн. Әм гәрәке бир нәкьн, гьлийе Иса Мәсиһ: «Лома нәкьн, кö ломә ль wә нәбьн» (Мәтта 7:1). Һәр әндәме щьвате гәрәке бьхәбьтә кö нәкә сәр йед дьн, wәки бь ньһерʹандьна wи бькьн. Ле дәwсе, һәр кәс жь мә дьхәбьтә кö һʹьзкьрьн у йәктийе бьдьнә кʹьфше, у wәки һәв әʹщьз нәкьн ле qәwи кьн (Рʹомайи 14:19).

ЧА ИСАФА ТʹӘМЬЗ КʹӘРӘМА ТИНӘ

Исафа кö бәр чʹәʹве Йаһоwа тʹәмьз ә, дькарә мә бь рʹийа жийине бьвә. Әв шабуне тинә у рʹьһʹәтийе жи дьдә

17. Иро исафа гәләк мәрийа чь щурʹәйи буйә?

17 Паwлосе шанди ньвиси: «Исафа хwә тʹәмьз хwәй кьн» (1 Пәтрус 3:16, ДТʹ). Әва кʹәрәмәкә пʹьрʹ мәзьн ә, кö исафа мә бәр чʹәʹве Йаһоwа Хwәде тʹәмьз ә. Ле рʹожа иро, исафа öса щәм гәләка тʹöнә. Паwлос хәбәр  дьда дәрһәqа wан мәрийа, «исафа кʹижана кʹьзьри йә» (1 Тимотʹейо 4:2). Чахе чʹәрме мәрийа дах дьбә, паше әw ида тьштәки тʹәхмин накә. Дәрһәqа исафа гәләк мәрийа жи әм дькарьн бежьн кö әw мьри йә, йане öса дах буйә у һʹьшк буйә кö тьштәки тʹәхмин накә. Әw öса жи нькарә бежә чь изьн тʹöнә, у һʹәму тьштирʹа рʹази йә. Исафа wан, wана начәрчьринә у жь бо гöнед wан, надә шәрме. У иро мәрьвед öса гәләк ша дьбьн кö исафа wан ида wана начәрчьринә.

18, 19. (а) Чь кʹаре дькарә бинә чахе исафа мәрийа wана дьчәрчьринә у дьдә шәрме? (б) Чь әм дькарьн бькьн һәрге исаф мә дьчәрчьринә, һәла һе чахе мә гöне хwә дайә рʹуйе хwә?

18 Чахе исаф мә дьчәрчьринә, әм фәʹм дькьн кö мә тьштәки нәрʹаст кьрийә. Чахе исафа кәсәки әw  дьчәрчьринә, әв мәрьв һелан дьбә гöне хwә бьдә рʹуйе хwә, у жь бо ве йәке гöнәки лапи мәзьн жи wирʹа дькарә бе бахшандьне. Мәсәлә, Даwьд пʹадша гöнәки лапи мәзьн кьр, ле гöне wи wирʹа һатә бахшандьне, чьмки әwи бь дьл гöне хwә да рʹуйе хwә. Даwьд кьред хwә нәфрʹәт кьр у сафи кьр тʹьме гöрʹа qанунед Йаһоwа Хwәде бькә, чьмки әwи ль сәр хwә дит кö Йаһоwа чьqас «qәнщ у әфукьр ә» (Зәбур 51:1-19; 86:5). Ле чь әм гәрәке бькьн һәрге мә гöне хwә дайә рʹуйе хwә, бахьшандьн стандийә, ле диса жи исафа мә, мә дьчәрчьринә?

19 Һәрге мә гöне хwә дайә рʹуйе хwә у исафа мә диса гәләк wәхт мә дьчәрчьринә, әв йәк ида кʹаре найнә. Дәрәща öсада әм гәрәке баwәр бьн, кö Йаһоwа жь дьле мә мәстьр ә, у занә әм чь һʹалида ньн. Әм гәрәке баwәр кьн кö Хwәде мә һʹьз дькә у дьбахшинә мә, нә әм хwәха мәрийа һелан дькьн кö баwәрийа хwә ве йәке биньн. (Бьхунә 1 Йуһʹәнна 3:19, 20). Хенщи ве йәке, исафа тʹәмьз мәрʹа әʹдьлайе, рʹьһʹәтийе у шабуна пʹьрʹ мәзьн тинә, чь кö дь ве дьнйайеда һьндьки дьвини. Мәсәлә, әwед кö бәре гöне гьран кьрьнә у паше тʹобәкьрьнә, рʹьһʹәтийа öса тʹәхмин кьрьнә у ньһа жи дькарьн бь исафа тʹәмьз Йаһоwарʹа хьзмәт кьн (1 Корьнтʹи 6:11).

20, 21. (а) Әв кʹьтеб чьда wе али тә бькә? (б) Щәм Мәсиһийа кʹижан азайи һәйә у ча гәрәке әв бьдьн хәбате?

20 Нета ве кʹьтебе әw ә, кö али тә бькә бьстини шабуне у дь ве дьнйа qәлпда бькарьби һʹәта хьлазийа исафа тʹәмьз хwәй ки. Һәмьки дь ве кʹьтебеда әм нькарьн һʹәму qанун у принсипед Хwәде шеwьр кьн, дәрһәqа кʹижани кö әм гәрәке бьфькьрьн у һәр рʹож бьдьнә хәбате. Хенщи ве йәке, чахе пьрс исафева гьредайи нә, әм гәрәке һивийа щабед конкрет нибьн. Нета ве кʹьтебе öса жи әw ә, кö Хәбәра Хwәде һин би у дь жийина хwәйи һәр рʹожида бьди хәбате. Öса исафа тә һин бә у тә һазьр кә, кö бькарьби перʹа-перʹа тʹәхмин ки, чь  йә qәнщи у чь йә хьраби. Һьмбәри qануна Муса, «qануна Мәсиһ» һелан дькә, wәки әм бьжин у рʹебәри бьн бь исафе у принсипа, нә кö бь qанунед кö һатьбунә ньвисаре (Галати 6:2). Ләма жи Йаһоwа азайа бьжартьне дьдә Мәсиһийа. Хәбәра Хwәде мә öса жи хwәй дькә, wәки әв азайи нәбә «хелийа хьрабикьрьне», демәк мәщала хьрабивәшартьне (1 Пәтрус 2:16). Азайа öса, мәщале дьдә мә, кö һьндава Йаһоwа Хwәде һʹьзкьрьна хwә бьдьнә кʹьфше.

21 Чахе тә дәстпекьр һинбуна Кʹьтеба Пироз, һьнге тә гавәкә гәләк фәрз авит, демәк әв һәйә һинкьрьна фәʹмкʹарийа тә. Һәрге тö дöа дьки у дьфькьри, кö чаwа принсипед Кʹьтеба Пироз баш бьди хәбате у паше öса жи дьки, öса тö бәрдәwам дьки гавед хwә давежи, у дькари «qәнщи у хьрабийе жь һәв» дәрхи (Ибрани 5:14). Исафа тәйә бь Кʹьтеба Пироз һинкьри, wе һәр рʹож тәрʹа кʹаре бинә. Чаwа рʹебәр аликʹарийе дьдә рʹеви, öса жи исафа тә wе али тә бькә бьжийи öса чаwа кö Баве тәйи әʹзманрʹа хwәш бе. Бь ве йәке те бькарьби хwә нава һʹьзкьрьна Хwәдеда хwәй ки.

^ абз. 8 Жь Кʹьтеба Пироз әм педьһʹәсьн кö бәс нинә wәки исафа мә тʹәмьз бә. Мәсәлә, Паwлосе шанди öса гот: «Исафа мьн рʹьһʹәт ә, нә кö бь ве йәке әз хwә софи дькьм, ле һʹакьме мьн Хöдан ә» (1 Корьнтʹи 4:4). Һәла һе әwед кö мина Паwлосе шанди пәй Мәсиһийа дькʹәвьн, дьбәк һʹәсаб дькьн кö исафа wан тʹәмьз ә, чьмки wана тʹьре кö Хwәде кьред wан qәбул дькә. Ле гәләк фәрз ә кö исафа мә, нә кö тʹәне бәр чʹәʹве мә тʹәмьз бә, ле бәр чʹәʹве Хwәде жи (Кʹаред Шандийа 23:1; 2 Тимотʹейо 1:3).

^ абз. 10 Гәләк һʹәким дьбежьн, wәки бона алкоголика, ичʹкәвәхwарьн qәдәхә йә. Демәк бона wан qәдәхә йә һьнәк жи вәхwьн.