Дәрбази һондоре буйин

Дәрбази навәроке буйин

Чьма Нәрʹаст Фәʹм Дькьн?

Чьма Нәрʹаст Фәʹм Дькьн?

Кәчʹькәкә бьчʹук дит, кӧ чаԝа жь кʹархане ду һьлдькʹьшә у дьбә мина әʹԝьра. Әԝ дьфькьрә кӧ әԝ кʹарханә хут сәва ве йәке йә, кӧ әԝьра чекә. Зарʹ гәләк тьшт фәʹм накә у ньзанә, ләма жи сәва мә әв дькарә пекʹәни бе кʹьфше. Ле чахе мәрьв тьштәки ньзанә йан фәʹм накә, әв йәк дькарә ль сәр жийина ԝи хьраб һʹӧкӧм кә. Бәʹса хәбәре, чахе тӧ дәрбера дәрман вәдьхԝи у нахуни һәла чь рʹебәри сәва ве йәке те дайине, жь бо ве йәке тӧ дькари зийане бькʹәви.

Нәфәʹмкьрьн у нәзанийа тьштед рʹӧһʹани дькарә һе хьраб бә сәва мә. Мәсәлә, һьнә мәрьв һинкьрьнед Иса фәʹм накьн (Йуһʹәнна 6:48-68). Дәԝса кӧ һе зедә пебьһʹәсьн, әԝана һʹәму тьштед кӧ Иса һин дькьр, инкʹар дькьн. Сәд һʹәйф!

Һәрге тӧ Кʹьтеба Пироз дьхуни сәва кӧ рʹебәрийе бьвини, әв гәләк баш ә. Ле дьбәкә чахе тӧ дьхуни, һьнә тьшт сәва тә нәфәʹмдари йә. Гәләк мәрьв ве йәкерʹа ԛайил ьн. Ԝәрен әм шеԝьр кьн се фькьред нәрʹаст йед кӧ Кʹьтеба Пирозва гьредайи нә.

  • Һьнә мәрьв нәрʹаст фәʹм дькьн әве тʹәмийа жь Кʹьтеба Пироз «Жь Хԝәде . . . бьтьрсә». Әԝана әве тʹәмийе рʹастә-рʹаст фәʹм дькьн (Ԝаиз 12:13). Ле Хԝәде нахԝазә кӧ хьзмәткʹаред ԝи бәр ԝи бьләрьзьн. Әԝ дьбежә: «Тӧ нәтьрсә, жь бәр кӧ әз бь тәрʹа мә; ль дора хԝә нәньһерʹә, жь бәр кʹӧ Хԝәдайе тә әз ьм; әзе тә зәхм бькьм [ԛәԝи кьм]; бәле, әзе али тә бькьм; . . . әзе бь дәсте рʹасте дадийа хԝә жь тәрʹа бьбьм аликʹар» (Ишайа 41:10). Жь Хԝәде бьтьрсьн тʹәне те һʹәсабе, кӧ ԛәдьре ԝи бьзаньбьн у бьтьрсьн дьле ԝи бешиньн.

  • Гәло әʹрд ԝе агьрда бе шәԝьтандьне?

    Йед дьн жи нәрʹаст фәʹм дькьн әван гьлийа: «Ԝәхта һәр кʹари һәйә; . . . ԝәхта рʹакьрьна йә . . . ԝәхта кӧштьне һәйә». Әԝана дьфькьрьн кӧ Хԝәде хԝәха сафи дькә, кӧ һәр мәрьв чь чах бьмьрә (Ԝаиз 3:1, 2). Бь рʹасти әв гьли-готьн дина мә дьдьн ль сәр ԝәʹде жийина мә у нә кӧ сәр бәхт йан йазийа мә. Хәбәра Хԝәде ӧса жи мә һин дькә, ԝәки сафикьрьнед мә дькарьн ль сәр дьрежайа жийина мә һʹӧкӧм кьн. Әм дьхуньн: «Тьрса ХӦДАН тʹәмәне [жийине] дьреж дькә» (Мәтʹәлок 10:27; Зәбур 90:10; Ишайа 55:3). Гәло чь щурʹәйи? Мәсәлә чахе әм Хәбәра Хԝәде һьлдьдьн һʹәсаб у ԛимәт дькьн, әв мә һелан кә жь кьред ӧса хԝә дур бьгьрьн, ча гәләк ичʹкәԝәхԝарьн у бенамуси (1 Корьнтʹи 6:9, 10).

  • Һәнә йед ӧса жи, йед кӧ әван гьлийед жь Кʹьтеба Пироз нәрʹаст фәʹм дькьн, кʹидәре кӧ те готьне ԝәки әʹзман у әʹрд «тенә хԝәйкьрьне, кӧ бь агьр ӧнда бьн» (2 Пәтрус 3:7). Хԝәде соз дьдә, кӧ әԝ ԝе тʹӧ щар әʹрде кʹӧта нәкә. Хԝәде «әʹрд дани ль сәр бьнгәһ, кӧ тʹӧ щар жь щи нәһʹәжә» (Зәбур 104:5; Ишайа 45:18). Вьра те готьне дәрһәԛа шьхӧлед дьнйа дӧру, нә кӧ дәрһәԛа әʹрде, йе кӧ ԝе кʹӧта бә у агьрда ӧнда бә. Ле чь әм дькарьн бежьн дәрһәԛа әʹзман? Әԝ гьли рʹастә-рʹаст дькаре бе һʹәсабе ча әʹзман, щийе стәйрка, йан жи щийе Хԝәде. Әԝ щи ԝе тʹӧ щар найне кʹӧтакьрьне.

ЧЬМА КʹЬТЕБА ПИРОЗ ЩАРНА НӘРʹАСТ ТЕ ФӘʹМКЬРЬНЕ?

Чаԝа кʹьфш ә, гәләк щар мәрьв фәʹм накьн гьли-готьнед кӧ жь Кʹьтеба Пироз дьхуньн. Ле чьма Хԝәде дьһелә ԝәки тьште ӧса бьԛәԝьмә? Һьнәк дьбә кӧ ӧса дьфькьрьн: «Һәрге Хԝәде пʹьрʹ билан ә у һʹәму тьшти занә, әԝи ԝе бькарьбуйа кʹьтебәкә ӧса мәрʹа бьда, йе кӧ бь гьлийе һеса бьһата ньвисандьне, у һәр кәсирʹа ԝе фәʹмдари буйа. Чьма Әԝи әв йәк нәкьр?» Дина хԝә бьдьнә се мәʹнийа кӧ чьма гәләк щара мәрьв нәрʹаст Кʹьтеба Пироз фәʹм дькьн.

  1.   Кʹьтеба Пироз дькарьн тʹәне мәрьвед мьлук фәʹм бькьн у йед кӧ һазьр ьн һин бьн. Иса готә Баве хԝә: «Шькьр наве тә бә Баво, Хӧдане әʹрд у әʹзман, кӧ тә әв тьшт жь зана у билана вәшартьн у ль бәр зарʹа вәкьр» (Луԛа 10:21). Кʹьтеба Пироз бь щурʹе ӧса һатә ньвисандьне, кӧ тʹәне мәрьвед бь ньһерʹандьна рʹаст дькарьн әве фәʹм бькьн. Мәрьвед бабах, йед кӧ чʹәʹвед хԝәда занә у билан ьн, нәрʹаст Кʹьтеба Пироз фәʹм дькьн. Ле мәрьвед кӧ Кʹьтеба Пироз дьхуньн, у ньһерʹандьна «зарʹа» хԝәй дькьн, әԝана мьлук ьн у һьзрәт ьн һин бьн. Ләма жи Хԝәде ԝана кʹәрәм дькә у әԝана әʹламәтийа Хԝәде гәләк баш фәʹм дькьн. Бь рʹасти жи Хԝәде чьԛас бь аԛьлайи Кʹьтеба Пироз да ньвисаре!

  2. Кʹьтеба Пироз сәва ԝан мәрьва йә, йед кӧ бь дьл у щан аликʹарийе жь Хԝәде дьхԝазьн сәва кӧ фәʹм бькьн. Иса да кʹьфше кӧ мәрьварʹа ԝе аликʹари лазьм бә, сәва кӧ бь тʹәмами бькарьбьн фәʹм бькьн тьштед кӧ әԝ һин дькьр. Чаԝа ԝана гәрәке әв аликʹари бьстанда? Иса шьровәкьр: «Пьштован, аԝа готи Рʹӧһʹе Пироз, кӧ Бав ԝе бь наве мьн бьшинә, әԝе ԝә һини һʹәму тьшти кә» (Йуһʹәнна 14:26). Демәк Хԝәде рʹӧһʹе хԝәйи пироз дьдә мә, йане ԛәԝата хԝә, сәва кӧ али мәрийа бькә тьштед хԝәнди фәʹм бькьн. Рӧһе пироз ӧса жи ча бежи гәләк Мәсиһийед щерʹьбанди һелан дькә, сәва кӧ әԝана аликʹарийе бьдьнә йед дьнена кӧ тьштед хԝәнди фәʹм бькьн (Кʹаред Шандийа 8:26-35).

  3. Һьнә пʹаред Кʹьтеба Пироз, мәрьв дькарьн тʹәне ԝәʹде кʹьфшкьрида фәʹм бькьн. Мәсәлә, Данийел пʹехәмбәррʹа һатьбу готьне ԝәки әʹламәтийа дәрһәԛа ахьрийе бьньвисә. Мьлйакʹәтәки ԝирʹа гот: «Ле бәле тӧ, йа Даниел, һәта ԝәхта даԝине ван готьна вәшерә у пьртуке мор бькә». Ԛьрнә дәрбаз бун, у гәләк мәрьва дәстпекьрьн кʹьтеба Данийел бьхуньн, ле нькарьбун мәʹна ве фәʹм бькьн. Бь рʹасти хԝәха Данийел жи фәʹм нәдькьр һʹәму тьштед кӧ әԝи дьньвиси. Әԝи бь мьлукти гот: «У мьн әв бьһист, ле бәле феһм нәкьрьм». Ԝәʹдә шунда мәрьв гәрәке рʹаст фәʹм кьрана пʹехәмбәртийа Хԝәде йа кӧ Данийел ньвиси. Ле һәмьки әԝ йәк ԝе бьԛәԝьмийа ԝәʹдәки кʹьфшкьрида, кʹижан кӧ Хԝәде бьжартьбу. Мьлйакʹәт дьбежә: «Һәрә, Даниел, жь бәр кӧ һәта ԝәхта даԝине ван готьнан вәшарти нә у мор кьри нә». Гәло кʹи ԝе әʹламәтийа Хԝәде фәм бькә? «Тӧ кәси жь йед хәрабан ә, ԝе фәм нәкьн. Ле бәле, йед бь фәмкʹари нә ԝе фәʹм бькьн» (Данийел 12:4, 8-10). Ләма жи Хԝәде, мәʹна әʹламәтийа Кʹьтеба Пироз вәнакә, һʹәта ԝәде кʹьфшкьри нәйе.

Шәʹдед Йаһоԝа жи гәләк тьшт жь Кʹьтеба Пироз нәрʹаст фәʹм дькьрьн. Ле чахе ԝәʹде Хԝәде гьһишт сәва кӧ һьнә тьшт зәлал бьн, Шәʹдед Йаһоԝа бь һазьрбун ньһерʹандьна хԝә у фәʹмкьрьна хԝә гӧһастьн. Бь ве йәке әԝана чʹәʹв дьдьнә шандийед Иса, йед кӧ бь мьлукти ньһерʹандьна хԝә гӧһастьн чахе Иса ԝана рʹаст кьр (Кʹаред Шандийа 1:6, 7).

Кәчʹька бьчʹук дәрһәԛа кʹижани кӧ мә жоре гьли кьр, дьфькьри кӧ әԝьр жь кʹархане чедьбьн. Әԝе әв йәк нәрʹаст фәʹм дькьр. Ле гәләк фәрз ә кӧ әм һинкьрьнед Кʹьтеба Пироз рʹаст фәʹм бькьн. Мәрьве кӧ хԝәха дьхунә Кʹьтеба Пироз у дьхәбьтә сәва кӧ фәм бькә, дькарә тьштед фәрз жь дина хԝә бәрдә. Ләма жи аликʹарийе бьгәрʹә сәва кӧ тьштед хԝәнди фәʹм бьки. Аликʹарийе бьхԝазә жь ԝан мәрийа, йед кӧ бь ньһерʹандьна рʹаст у бь мьлукти Кʹьтеба Пироз һин дьбьн. Әв әԝ мәрьв ьн йед кӧ баԝәр ьн, ԝәки рʹӧһʹе Хԝәдейи пироз ԝе али ԝан бькә Кʹьтеба Пироз фәʹм бькьн. Әԝ мәрьв ӧса жи баԝәр дькьн кӧ әм дьжин һәма ви ԝәʹде кʹьфшкьрида, чь чах кӧ Хԝәде дьхԝазә ԝәки әм һе рʹьнд Кʹьтеба Пироз фәʹм бькьн. Шәрʹм нәкә незики Шәʹдед Йаһоԝа би у тʹәви ԝана хәбәр ди, йан жи бьхунә әʹламәти ль сәр малпәра jԝ.org. Кʹьтеба Пироз соз дьдә: «Гәр тӧ банги аԛьле бьки . . .  Тӧйе тьрса ХӦДАН фем бьки» (Мәтʹәлок 2:3-5).