Дәрбази һондоре буйин

Дәрбази навәроке буйин

Гӧһ бьдьнә де-баве хԝә, әԝ мина ԝе йәке йә ча дәйне банке бьди. Чьԛас тӧ мәрьвәки бь итʹбар би, һаԛас ԝе баԝәрийа хԝә тә биньн

 БОНА ЩАҺЬЛА

10: Мәрьвәки Итʹбар

10: Мәрьвәки Итʹбар

ӘԜ ЧЬ ТЕ ҺʹӘСАБЕ

Де-бав, һәвал у мәзьне хәбате һеса итʹбарийа хԝә мәрьвед итʹбар тиньн. Әԝ мәрьв ль гора ԛәйда дькьн, хԝәйе созе хԝә нә у тʹьме рʹастийе хәбәр дьдьн.

ЧЬМА ФӘРЗ Ә

Бь рʹасти һәр дәрәщада бәндә дькарә һаԛас азайе бьстинә, чьԛас кӧ әԝи избат кьрийә ԝәки дькарьн итʹбарийа хԝә ԝи биньн.

Сараһи дьбежә: «Сәва кӧ де-баве тә итʹбарийа хԝә тә биньн, тӧ гәрәке бьди кʹьфше, ԝәки тӧ йәки сәрԝахт и у щерʹьбанди йи. Әԝе йәке тӧ гәрәке нә кӧ һьнге бьди кʹьфше гава тӧ тʹәви ԝан и, ле ӧса жи чахе тӧ тʹәне йи».

ПРИНСИПА КʹЬТЕБА ПИРОЗ: «Дьле хԝә бьщерʹьбиньн у дина хԝә бьдьне, кʹа һун нава баԝәрийеда нә?» (2 Корьнтʹи 13:5).

ТӦ ЧЬ ДЬКАРИ БЬКИ

Һәрге тӧ дьхԝази кӧ мәрьв һе зедә итʹбарийа хԝә тә биньн, йан жи тӧ дьхԝази итʹбарийа ӧндакьри диса ԛазанч ки, ширәтед кӧ жере тенә дайине, дькарьн али тә бькьн.

Йәки рʹаст бә. Мәрьв дәрбера дькарьн итʹбарийа хԝә һьндава тәда ӧнда кьн, чахе бьвиньн кӧ тӧ дәрәԝа дьки. Алийе дьнва жи, чахе тӧ мәрьвәки рʹаст у дьлвәкьри йи, илаки һьндава шашийед хԝә, һьнге мәрьв дәстпедькьн итʹбарийа хԝә тә биньн.

Каиман дьбежә: «Чахе һʹәму тьшт баш ә, һьнге һеса йә мәрьвәки һәԛ би. Ле гава тӧ дәрәщед гьранда кемасийед хԝә вәнашери, мәрьв һе зедә итʹбарийа хԝә тә тиньн».

ПРИНСИПА КʹЬТЕБА ПИРОЗ: «Әм . . . дьхԝазьн кӧ һәр тьшти рʹаст бькьн» (Ибрани 13:18).

Мәрьвәки итʹбар бә. Ль гора һʹәсаба, 78 сәләф мәрьвед щерʹьбанди дь Дәԝләтед Йәкбуйида готьнә, кӧ «чахе кәсәки һьлдьдьн ль кампанийәкеда бьхәбьтә, һьнге мәзьне хәбате нав мәрьвида дьхԝазьн бьвиньн, һәла әԝ чьԛас мәрьвәки итʹбар ә». Һәрге тӧ ньһа һин дьби кӧ мәрьвәки итʹбар би, ахьрийеда жи гава мәзьн би, әв йәк ԝе тәрʹа керһати бә.

Сара дьбежә: «Чахе де-баве мьн дьвиньн кӧ әз йәкә щабдар ьм, у һʹәму шьхӧли бь щабадьрийе дькьм, һьнге әԝана ида сәд щари мьнрʹа тьшта навәкʹьлиньн. Чьԛас һе зәʹф әз ӧса хԝә кʹьфш дькьм, һаԛас һе зедә әԝана итʹбарийа хԝә мьн тиньн».

ПРИНСИПА КʹЬТЕБА ПИРОЗ: «Мьн әв йәк тәрʹа ньвиси, чьмки әз заньм те жь готьна мьн зедәтьр бьки» (Фьлимон 21).

Сәбьр кә. Һәмьки ԝәʹдә у сәбьр лазьм ә, кӧ мәрьвед дьн бьвиньн ԝәки тӧ чьԛас мәзьн буйи, бьльнд буйи у алийе физикида ԛәԝи буйи. Анәгори ԝе йәке вьра жи сәбьр лазьм ә, ԝәки мәрьв бьвиньн кӧ тӧ буйи йәки щерʹьбанди у сәрԝахт.

Брандон дьбежә: «Сәва кӧ де-бав у мәрьвед дьн итʹбарийа хԝә тә биньн, бона ԝе йәке лазьм ә ԝәʹдә у ԛәԝат. Һәрге тӧ тʹәне щарәке дьди кʹьфше кӧ йәки щабдар и, у паши ԝе йәке тʹӧ тьшти наки, те нькарьби һивийе би, кӧ де-баве тә итʹбарийа хԝә тә биньн».

ПРИНСИПА КʹЬТЕБА ПИРОЗ: «Сәбьре ль хԝә ԝәргьрьн» (Колоси 3:12).