Дәрбази һондоре буйин

Дәрбази навәроке буйин

 ТʹЕМА ЖЬ РʹУЙЕ ЖУРНАЛЕ | ГӘЛО РʹАСТИ ҺʹАЛЕ ДЬНЙАЙЕ ХЬРАБ Ә?

Гәло Рʹасти Һʹале Дьнйайе Хьраб ә?

Гәло Рʹасти Һʹале Дьнйайе Хьраб ә?

Сала 2017-да дь мәһа Чьләйеда, зандар әʹламәтийа хьраб әʹлам кьрьн, демәк кӧ дьнйа ида гәләк незики хәзәба хоф буйә. Сәва кӧ һе рʹьнд нишан кьн ԝәки инсанәт чьԛас незики хәзәба һʹәмдьнйайе дьбә, ԝана да хәбате сьһʹәта симболик, демәк Сьһʹәта Нишанкьрьна Кʹӧтасийа Дьнйайе. Зандар миле дәԛәйед ве сьһʹәте ль сәр 30 сәни пешда бьрьн. Ньһа Сьһʹәта Нишанкьрьна Кʹӧтасийа Дьнйайе нишан дькә, кӧ һʹәта ниве шәве дӧ у нив дәԛә майә. 60 сал зедәтьр пешда әв ԝәʹдә ӧса незики хәзәба һʹәмдьнйайе нибу чаԝа ньһа!

Дь сала 2018-да, зандар дьхԝазьн диса щарәке һʹәсаб кьн, кӧ әм чьԛас незики кʹӧтасийа дьнйайе бунә. Гәло дь сала нуда, Сьһʹәта Нишанкьрьна Кʹӧтасийа Дьнйайе ԝе чь мәрʹа әʹйан кә? Гәло рʹасти һʹале дьнйайе ӧса хьраб ә? Дьбәкә ԝәрʹа чәтьн ә щаба ве пьрсе бьдьн. Һәла һе ньһерʹандьна зандара жи дәрһәԛа ве йәке жь һәв щӧдә дьбә. Ле нә һʹәмушк баԝәр дькьн, ԝәки дьнйа незики кʹӧтасийе дьбә.

Бь милйона мәрьв баԝәр дькьн, кӧ ахьрийа баш һивийа мә йә. Әԝана дьбежьн ԝәки һәнә избати, чь кӧ әʹйан дькьн ԝәки гәрдуна мә ԝе кʹӧта нәбә у жийина мә жи баш бә. Гәло әв избати чьԛаси рʹаст ьн? Һʹале дьнйайе бь рʹасти ӧса хьраб ә?