Дәрбази һондоре буйин

Дәрбази навәроке буйин

Ньһерʹандьна Мә сәр Шашийа Гәрәке Чаԝа бә?

Ньһерʹандьна Мә сәр Шашийа Гәрәке Чаԝа бә?

Тәйо у Зәйнәб * гәләк ша бун кӧ ԛиза ԝан малбәта хԝәва, һатьн щәм ԝан мевани, сәва кӧ тʹәвайи хԝарьне бьхԝьн. Зәйнәб кӧ бәре ашпеж дьхәбьти, дәстпекьр рʹьштә тʹәви пәнир чекә. Нәбийед ԝе әв хԝарьн гәләк һʹьз дькьрьн.

Чахе гьшк бәр сьфре рʹуньштьн, Зәйнәб һат у чʹьгун дани сәр сьфре. Чахе әԝе дәвлик вәкьр, дит кӧ чʹьгунеда тʹәне пәнире һʹәланди бу! Зәйнәбе бир кьрьбу рʹьштә бавеже!

Фьрԛи тʹӧнә әм чәнд сали нә, йан чьԛас щерʹьбанди нә, әм гьшк шашийа бәрдьдьн. Дьбәкә мә тьштәки бефәʹми готийә, йан тьштәки баш кьрийә нә ԝәʹде лайиԛда. Йан дьԛәԝьмә мә тьштәк пьшт гӧһе хԝәва авитийә у бир кьрийә. Гәло чьма шаши дьԛәԝьмьн? Чаԝа әм дькарьн ӧса бькьн кӧ шашийа нәкьн? Ньһерʹандьна рʹаст сәр шашийа, ԝе али мә бькә щаба ԝан пьрса бьвиньн.

НЬҺЕРʹАНДЬНА МӘ У ЙА ХԜӘДЕ

Чахе әм тьштәки баш дькьн, әм бь шабун ԛәбул дькьн пʹайидайине чьмки фәʹм дькьн кӧ әм һежа нә. Чахе әм ньшкева шашийа бәрʹдьдьн, у һәрге йед дьнена дина хԝә нәданә шашийед мә, йәкә әм гәрәке шашийед хԝә биньн рʹуйе хԝә. Бона ве йәке мьлукти лазьм ә.

Һәрге әм гәләк бона хԝә дьфькьрьн, әме нькарьбьн сәр хԝә бьхәбьтьн, чьмки әме йед дьнена нәһәԛ кьн, йан жи әме ԛайил нәбьн кӧ мә шаши бәрʹда. Кьред ӧса щар-щара бәр бь ахьрийа хьраб дьбьн. Проблем ԝе нәйенә сафикьрьне у мәрьвед дьн жи ԝе нәрʹаст бенә нәһәԛкьрьне. Һәла һе жи чахе әм шашийа бәрʹдьдьн у әв йәк сәр мә хьраб һʹӧкӧм накә, йәкә әм гәрәке тʹьме бир нәкьн кӧ ль ахьрийе «жь мә һәр кәсе бона хԝә щабе ль бәр Хԝәде бьдә» (Рʹомайи 14:12).

Хԝәде рʹаст дьньһерʹә сәр шашийа. Кʹьтеба Зәбурда, Хԝәде әʹйан дьбә ча йәки «дьлшәԝат у рʹәʹм»; у «Әԝ һʹәта хьлазийе һерс накʹәвә, һʹәта-һʹәтайе кʹине нажо». Әԝ фәʹм дькә кӧ әм гӧнәкʹар ьн, кӧ кемасийед мә һәнә, у «Әԝ бьбир тинә кӧ әм ах ьн» (Зәбур 103:8, 9, 14).

Хенщи ԝе йәке ча бавәки дьлован, Хԝәде дьхԝазә кӧ зарʹед ԝи жи ль сәр шашийа ӧса бьньһерʹьн ча әԝ дьньһерʹә (Зәбур 130:3). Хәбәра хԝәда Әԝ бь һʹьзкьрьн гәләк ширәт у рʹебәри дайә ньвисаре, кӧ али мә бькә ль сәр шашийед хԝә у йед дьнена рʹаст бьньһерʹьн.

ЧАԜА ШАШИЙЕД ХԜӘ РʹАСТ КЬН

Гәләк щар дьԛәԝьмә кӧ чахе шашийа бәрʹдьдьн, мәри ԝәʹдә у ԛәԝата хԝә хәрч дькьн, кӧ йед дьнена нәһәԛ кьн йан жи хԝә рʹаст дәрхьн. Ле дәԝсе һәрге тә бь гьлийа кәсәк дайә хәйидандьне, бахшандьне бьхԝазә кӧ шашийед хԝә рʹаст ки у һәвалтийа хԝә хьраб нәки. Дьԛәԝьмә тә жи һьндава кәсәкида тьштәки нәрʹаст кьрийә, жь бо чь жи тә, йан жи әԝи кәси, хԝә нәбаш тʹәхмин кьрийә? Дәԝса кӧ сәр хԝә һерс кʹәвьн, йан йед дьнена нәһәԛ кьн, ԝе баш бә һʹәму тьшти бьки кӧ шашийед хԝә рʹаст ки. Ле һәрге тӧ тʹьме дина хԝә бьди сәр шашийа, әв йәк ԝе бадиһәԝа  нәрʹьһʹәтийе пешда бинә у проблем зедә бә. Ләма жи һе баш ә, ча лазьм ә ӧса бьки.

Чахе кәсәк шашийа бәрʹдьдә, мәрʹа һеса йә нәԛайилийа хԝә бьдьнә кʹьфше. Ләма жи баш бә ширәта Иса Мәсиһ һьлдьн һʹәсаб: «Һәр чь кӧ һун дьхԝазьн мәрьв бона ԝә бькьн, һун жи ӧса ԝанарʹа бькьн» (Мәтта 7:12). Чахе тӧ шашийа бәрʹдьди илаһи йед бьчʹук, бешьк тӧ дьхԝази, кӧ йед дьнәна һьндава тәда дьлрʹәмийе бьдьнә кʹьфше, йан жи кӧ бь тʹәмами дина хԝә нәдьнә шашийед тә. Ләма жи ԝе баш бә, кӧ тӧ жи ԛәнщийа ԝи щурʹәйи һьндава мәрьва бьди кʹьфше (Әфәси 4:32).

ПРИНСИПЕД КӦ АЛИКʹАРИЙЕ ДЬДЬН, ԜӘКИ ШАШИЙА КЕМ БӘРДЬН

Фәрһәнгәк ӧса дьбежә: «Шаши пешда тен жь бо сущдаркьрьнед нәрʹаст, занәбуна кем йан жи чахе рʹьнд дина хԝә надьнә тьшта». Әм гәрәке фәʹм бькьн кӧ щарәке йан чәнд щара һʹәму мәрьв, һьнә жь ԝан тьште жоре готи дьдьнә кʹьфше. Һәрге әм һьнә принсипед сәрәкә жь Ньвисаред Пироз һьлдьн һʹәсаб, әв йәк ԝе али мә бькә кем шашийа бәрдьн.

Принсипәкә ви щурʹәйи әм дьвиньн Мәтʹәлок 18:13-да кʹидәре кӧ ньвисар ә: «Йе һе нәбьһисти щабе дьдә, әԝ беһʹьш у ԛара ԝи йә». Бәле чахе әм һʹәму тьшти һʹәта хьлазийе дьбьһен, әв йәк һәмьки аликʹарийе дьдә сәва кӧ бь ләз тьштәки нәбежьн у һерс нәкʹәвьн. Чахе рʹьнд гӧһ дьди мәрьва, ӧса тӧйе бькарьби хԝә жь сущдаркьрьне, дур бьгьри у шашийа бәрʹнәди.

Принсипәкә дьн жь Кʹьтеба Пироз ӧса дьбежә: «Чьԛас жь дәст ԝә те, тʹәви һʹәму мәрьва әʹдьлайийеда бьн» (Рʹомайи 12:18). Жь алийе хԝәда һʹәму тьшти бькә кӧ әʹдьлайи у шьхӧлкʹарийе пешда бьби. Чахе тʹәви йед дьнена дьхәбьти сәрԝахт бә у ԛәдьре мәрийа бьзаньбә, ӧса жи пʹайе ԝан бьдә у ԝана һелан кә. Дәрәща ӧсада гьлийед бефәʹмти у шьхӧл дькарьн һеса бенә бахшандьне, йане ԝе дина хԝә нәдьнә сәр ԝан шашийа. У хәйда лапә гьран жи дькарә һеса бе биркьрьне.

Жь шашийа тьштәки баш хԝәрʹа һин бә. Дәԝса кӧ бьхәбьти сәва шашийед хԝә рʹаст дәрхи, һе баш ә сәр ван шашийед хԝә һин би хәйсәт-һʹӧнӧред баш нав хԝәда пешда бини. Дьбә кӧ тәрʹа лазьм ә һе зедә сәбре, ԛәнщийе у хԝәгьртьне бьди кʹьфше? Ле ӧса жи бир нәкә дәрһәԛа мьлуктийе, әʹдьлайе у һʹьзкьрьне (Галати 5:22, 23). Жь шашийед хԝә тӧ һин дьби ԝәки щарәкә дьн чь гәрәке нәки. Гәләк дина хԝә нәдә ԝе йәке, кӧ әв йәк ча сәр тә һʹӧкӧм буйә. Һәрге тӧ һьнә тьшта бь һʹәнәк у кʹән дәрбаз ки, тӧйе хԝә рʹьһʹәт тʹәхмин ки.

КʹАР ЖЬ НЬҺЕРʹАНДЬНА РʹАСТ

Чахе әм ньһерʹандьна рʹаст сәр шашийа хԝәй дькьн, һьнге әм хԝә рʹаст дьдьнә кʹьфше, дьлрʹьһʹәт дьбьн у тʹәви йед дьнена жи әʹдьлайеда ньн. Һәрге әм дьхәбьтьн кӧ жь шашийед хԝә һин бьн, әм даһа билан дьбьн у мәрийарʹа һеса дьбә тʹәви мә шьхӧлкʹарийе бькьн. Ӧса әме нә жи гәләк дьлтәнг бьн у дәрһәԛа хԝә жи хьраб нәфькьрьн. Чахе әм фәʹм дькьн у дьвиньн, ԝәки йед дьн жи сәр шашийед хԝә дьхәбьтьн, мәрʹа даһа һеса дьбә жь ԝана фәʹм бькьн. Һе фәрз әԝ ә кӧ әм һин дьбьн чʹәʹв бьдьнә Хԝәде, кӧ һʹьзкьрьне бьдьнә кʹьфше у һазьр бьн бьбахшиньн (Колоси 3:13).

Шашийа Зәйнәбе дәрһәԛа кʹижани кӧ жоре һатьбу готьне, малбәта ԝе дьлтәнг кьр? Һәмьки на. Һәр кәси бь кʹән сәр ԝе йәке ньһерʹи, хут Зәйнәбе хԝәха, у ԝана ԝәʹде хԝә рʹьнд дәрбаз кьрьн һәла һе бе рʹьштә жи! Чәнд сал шунда дӧ нәбийед ԝе әв ԛәԝьмандьн зарʹед хԝәрʹа гьли кьрьн у кьрьнә бира хԝә, әԝ ԝәʹде баш йе кӧ ԝана тʹәви кальк-пирке хԝә дәрбаз кьрьн. Әԝ тʹәне шашийа бьчʹук бу!

^ абз. 2 Нав һатьнә гӧһастьне.