Дәрбази һондоре буйин

Дәрбази навәроке буйин

 КʹЬТЕБА ПИРОЗ ЖИЙИНА МӘРЬВА ДЬГӦҺЕЗӘ

Әз дьлбьриндар бум у бумә зӧлм

Әз дьлбьриндар бум у бумә зӧлм
  • САЛА БУЙИНЕ: 1974

  • ԜӘЛАТ: МӘКСИКА

  • БӘРЕ: ЙӘКИ ЗӦЛМ У ԚАЧАХ

ЖИЙИНА МЬНӘ БӘРЕ:

Әз ль бажаре Манте һатьмә буйине. Әв һәремәкә бәдәԝ ә дь кʹомара Тамулипасда (Мәксика). Бьнәлийед ви бажари, мәрьвнә ԛәнщ у мәрʹд ьн. Ле йазьх, жь бо кʹомед ԛачаха кӧ ԝедәре һәнә, әв щи гәләк хоф буйә.

Әм чар бьра бун у әз йе дӧда бум. Де-баве мьн әз Дера Католикида ньхӧмандьн. Ԝәʹдә шунда ве дереда әз кʹорда дьстьрийам. Мьн дьхԝәст дьле Хԝәде ша кьра, чьмки әз жь диԝана Хԝәде гәләк дьтьрсийам, кӧ һʹәта-һʹәтайе дь щәньмеда бемә шәԝьтандьне.

Чахе әз пенщ сали бум, баве мьн әм һиштьн. Жь бо ве йәке әз пʹьрʹ дьлтәнг бум. Мьн фәʹм нәдькьр, чьма әԝи әм һиштьн. Нә мә әԝ гәләк һʹьз дькьр. Дийа мьн гәләк сьһʹәта дьхәбьти, сәва кӧ мә хԝәй кә.

Щарна әз нәдьчум мәкʹтәбе, ле тʹәви щаһьлед дьн дәстпекьр һәвалтийе бькьм. Әԝана әз һин кьрьм, бьдьмә чʹера, щьхаре бькʹьшиньм, дьзийе бькьм, у бь кʹӧлма шәрʹа бькьм. Жь бо ԝе йәке кӧ мьн һʹьз дькьр хԝә сәр мәрийарʹа бьльнд бьгьрьм, әз һин бум бь щурʹә-щурʹә шәрʹ бькьм у чʹәк бьдьмә хәбате. Әз бумә хортәки зӧлм. Гәләк щара бь чʹәк әз дькʹәтьмә һʹӧщәте. У чәнд щара әз жь бо ве йәке педа хунеда дьмам у һьндьк мабу бьмьрама. Ви һалида мьн нивкӧшти давитнә кʹучʹа. Дьле дийа мьн чьԛас дьешийа, чахе әԝе әз ви һалида дьдитьм. Әԝе мьн һьлдькʹьшандә сәр ньга у ләзә-ләз дьбьрьм нәхԝәшхане!

Чахе әз 16 сали бум, һәваләки мьн Щорщ, кʹижана кӧ мьн жь бьчʹуктайе нас дькьр, һатьбу мала мә. Әԝи готә мә кӧ әԝ Шәʹде Йаһоԝа йә у дьхԝәст әʹламәтийа фәрз мәрʹа бьгота. Әԝи дәстпекьр дәрһәԛа баԝәрийа хԝә мәрʹа хәбәр дә, у Кʹьтеба Пироз жи бьдә хәбате. Мьн тʹӧ щар Кʹьтеба Пироз нәхԝандьбу у гәләк һьзрәт бум дәрһәԛа наве Хԝәде у ԛьрара ԝи пебьһʹәсьм. Щорщ мәрʹа гот кӧ ԝе али мә бькә Кʹьтеба Пироз һе рʹьнд фәʹм кьн. У әм ԛайил бун.

КʹЬТЕБА ПИРОЗ ЧА ЖИЙИНА МЬН ГӦҺАСТ:

Әз гәләк ша бум чахе пеһʹәсийам кӧ һинкьрьн дәрһәԛа щәньме, нә ль сәр һʹиме Кʹьтеба Пироз ә (Зәбур 146:4; Ԝаиз 9:5). Чахе әз дәрһәԛа ве йәке пеһʹәсийам, һьнгева әз нәдьтьрсийам кӧ Хԝәде, ԝе мьн бавежә щәньме. Дәԝсе мьн дьдит кӧ әԝ ча Бав, мә һʹьз дькә у ԛәнщийа мә дьхԝазә.

 Чахе мьн бәрдәԝам дькьр Кʹьтеба Пироз һин бьм, мьн фәʹм кьр кӧ гәрәке хәйсәте хԝә бьгӧһезьм. Мьнрʹа лазьм бу мьлуктийе нав хԝәда пешда биньм у зӧлмийе нәкьм. Ве йәкеда гәләк али мьн кьр ширәта жь 1 Корьнтʹи 15:33, кʹидәре кӧ те готьне ԝәки һәвалтийа хьраб «мәрьве хԝәйипʹәргал хьраб дькә». Мьн фәʹм кьр кӧ һәрге әз дьхԝазьм бемә гӧһастьне, әз гәрәке жь һәвалтийа хьраб хԝә дур бьгьрьм, чьмки әԝана сәр мьн хьраб һʹӧкӧм дькьн. Ләма жи мьн һәвалед хԝәйә бәре һишт у мьн дәстпекьр тʹәви Мәсиһийед рʹаст һәвалтийе бькьм. Чьмки һәрге чәтьнайед ԝан жи һәбә, әԝана нә кӧ бь шәрʹ-дәԝа әван чәтьнайа сафи дькьн, ле принсипед Кʹьтеба Пироз дьдьнә хәбате.

Диса гьли-готьнәкә жь Ньвисаред Пироз гәләк ль сәр мьн һʹӧкӧм кьр. Әв дь Рʹомайи 12:17-19-да ньвисар ә: «Жь бәр хьрабийева хьрабийе ль тʹӧ кәси нәкьн. . . . Чьԛас жь дәст ԝә те, тʹәви һʹәму мәрьва әʹдьлайийеда бьн. Һʹәйфе һьлнәдьн . . . чьмки ньвисар ә: «‹Һʹәйфһьлдан дәсте мьн ә, әзе һʹәйфе һьлиньм, Хӧдан дьбежә›». Мьн фәʹм кьр кӧ Йаһоԝа ԝәʹдәда нәһәԛийе бьдә һьлдане. Һеди-һеди мьн хәйсәте хԝәйи зӧлм тʹәрьканд.

Әзе тʹӧ щар бир нәкьм чь һатә сәре мьн, чахе еварәке әз вәдьгәрʹийам мал. Кʹомәкә щаһьла, йе кӧ бәре кʹома ԛачахийеда бун, һӧщуми сәр мьн кьрьн. Мәзьне ԝан пьшта мьн хьст у кьрә ԛужини: «Дә хԝә хьлаз кә!» Һьнге мьн кьн Йаһоԝарʹа дӧа кьр у хԝәст кӧ али мьн бькә тәйах кьм. Рʹаст ә мьн гәләк хԝәст щаба ԝан бьдьм у ԝана хьм, ле әз жь ԝана рʹәвим. Рʹожәкә дьн ньшкева әз рʹасти ви мәзьне кʹома ԛачаха һатьм. Һерса мьн рʹабу у мьн хԝәст щаба ԝи бьдьм, ле диса жи мьн лавайа Йаһоԝа кьр кӧ али мьн бькә хԝә бьгьрьм. Әз гәләк әʹщебмайи мам, чахе әԝ гәдә незики мьн бу у гот: «Бьбахшинә сәва ԛәԝьмандьна дӧ. Бь рʹасти бежьм, әз дьхԝазьм мина тә бьм. Әз жи дьхԝазьм Кʹьтеба Пироз һин бьм». Әз чьԛас ша бум, кӧ пешда мьн карьбу һерса хԝә дахьм! У паше чахе Шәʹдед Йаһоԝа дьһатьнә щәм мьн кӧ мьн һин кьн, әв гәдә жи дьһатә сәр һинбуне.

Йазьх, ле тʹәмамийа малбәта мьн ԝи чахи бәрдәԝам нәкьрьн Кʹьтеба Пироз һин бьн. Ле мьн сәва хԝә сафи кьрьбу кӧ чь жи һәбә, бәрдәԝам кьм һин бьм у изне нәдьмә тʹӧ кәси у тʹӧ тьшти кӧ мьн вәгәрʹьньнә шьхӧле мьнә бәре. Мьн заньбу кӧ һәрге әз һәргав тʹәви щьмәʹта Хԝәде бьм, әв йәк ԝе бьринед дьле мьн ԛәнщ кә у әԝана ԝе бона мьн бьбьн ча малбәт. Әз рʹӧһʹанида пешда дьчум у сала 1991-да әз һатьмә ньхӧмандьне у бумә Шәʹде Йаһоԝа.

ЧЬ КʹАР МЬН СТАНД:

Әз дьлбьриндар бум у бумә зӧлм. Ле Хәбәра Хԝәде педа жийина мьн гӧһаст. Ньһа әз һʹәмуйарʹа гьли дькьм дәрһәԛа мьзгинийа жь Кʹьтеба Пироз, йа кӧ әʹдьлайе тинә. Әз гәләк дьлша мә кӧ нава 23 салада әз ча пешәнге һәртʹьм хьзмәт дькьм.

Мьн ӧса жи бь рʹәзәдьли аликʹари дьда авакьрьна офиса Шәʹдед Йаһоԝа дь Мәксикайеда. Һәма ԝе дәре жи әз рʹасти Клаудийа һатьм. Әԝ Шәʹде Йаһоԝа йә у кʹӧлфәтәкә сәрхԝә. Дь сала 1999-да мә һәв станд. Әз чьԛас Йаһоԝарʹа рʹази мә, кӧ бь жьнәкә ӧса амьн әз кʹәрәм кьрьн!

Мә тʹәвай дь щьвата Мәксики йа Кәр-Лалада хьзмәт дькьр, у али ԝан мәрийа дькьрьн дәрһәԛа Йаһоԝа Хԝәде пебьһʹәсьн. Һьнә ԝәʹдә шунда мә дәрбази ԝәлате Белизе кьрьн, сәва кӧ ԝе дәре али мәрийа бькьн Кʹьтеба Пироз һин бьн у фәʹм бькьн. Вьра әм ӧса дьжин кӧ щәм мә тʹәне һәбә әԝ тьшт чьда әм һʹәԝщә нә у жь ԝи зедәтьр әм ԛәзанщ накьн. У әм бәхтәԝар ьн. Әме жийина хԝәйә ӧса ль сәр тʹӧ тьшти нәгӧһезьн.

Ԝәʹдә шунда дийа мьн диса дәстпекьр Кʹьтеба Пироз һин бә у һатә ньхӧмандьне. Бьре мьни мәзьн тʹәви жьн зарʹед хԝә ньһа Шәʹдед Йаһоԝа нә. Ӧса жи һьнә жь һәвалед мьнә бәре, кʹижанирʹа кӧ мьн мьзгинийа Пʹадшатийе әʹлам кьр, ньһа Йаһоԝарʹа хьзмәт дькьн.

Сәд һәйф, ле һьнә жь нәфәред мала мьн мьрьн, чьмки жийина хԝәйә зӧлм нәгӧһастьн. Һәрге мьн жи жийина хԝә нәгӧһаста, дьбәкә ахьрийа мьн жи мина йа ԝан буйа. Әз гәләк спасдар ьм Йаһоԝарʹа, кӧ әԝи әз незики хԝә кьрьм. Әз ӧса жи спасдар ьм хьзмәткʹаред ԝирʹа, йед кӧ бь сәбьр у ԛәнщийе әз һин дькьрьм принсипед Кʹьтеба Пироз жийина хԝәда бьдьмә хәбате.