Дәрбази һондоре буйин

Дәрбази навәроке буйин

 СӘРҺАТИ

Мьн Һәр Тьшт Һишт сәва Пәй Иса Һәрʹьм

Мьн Һәр Тьшт Һишт сәва Пәй Иса Һәрʹьм

Чахе әз 16 сали бум, баве мьн готә мьн: «Һәрге тӧ һәрʹи хьзмәт ки, ида вәнәгәрʹә мал. Һәрге тӧ вәгәрʹи, әзе ньге тә бьшкеньм». Ләма мьн сафи кьр кӧ жь мал һәрʹьм. Әʹмьре мьнда щара пешьн бу кӧ мьн һәр тьшт һишт сәва пәй Иса һәрʹьм.

ЛЕ ЧЬРʹА баве мьн ӧса һерс кʹәт? Әзе ньһа ԝәрʹа гьли кьм. Әз сала 1929-да 29 Тирмәһе һатьмә буйине, у гӧндда мәзьн бум, кʹижан кӧ провинсийа Булаканеда нә (Филипин). Мә дәԝләти нәдьжит. Чахе әз щаһьл бум, ордийа Жапони Филипин зәфт кьрьбун. Ле гӧнде мә гәләк дур бу жь ԝи шәһәри, ләма жи әԝ шәрʹ дури мә бу. Ԝедәре нә радио бал мә һәбу, нә телевисийон у нә жи рʹожнамә. Дәрһәԛа шәрʹ әм жь мәрьва педьһʹәсийан.

Жь һʹәйшт зарʹа, әз йе дӧда бум, у кальк у пирька мьн әз бьрьн мала хԝә кӧ тʹәви ԝан бьжим. Һьнге әз һʹәйшт сали бум. Рʹаст ә әм Католик бун, ле кальке мьн һʹьз дькьр дәрһәԛа щурʹә-щурʹә религийа пебьһʹәсә, у ләма әԝи әʹдәбйәтед религи тʹоп дькьр, кʹижан кӧ һәвалед ԝи дьданә ԝи. Те бира мьн чахе әԝи бәлавокед сәр зьмане Тагалог нишани мьн кьр, кʹидәреда һинкьрьнед рʹелигийа ԛәлп әшкәрә дькьрьн, у ӧса жи әԝи Кʹьтеба Пироз нишани мьн кьр. Мьн һʹьз дькьр Кʹьтеба Пироз бьхуньм, илаһи чар кʹьтебед пешьн йед мьзгини. Бь сайа ԝе йәке мьн нет хԝәрʹа дани кӧ пәй Иса һәрʹьм (Йуһʹн. 10:27).

ҺИН ДЬБЬМ ПӘЙ ИСА ҺӘРʹЬМ

Сала 1945-да Жапонйа зәфтькьрьн данә сәкьнандьн. Һьнге де-баве мьн готьнә мьн кӧ әз вәгәрʹьмә мал, у кальке мьн ширәт да мьн кӧ әз һәрʹьм, у әз жи чум.

Һьнә ԝәʹдә шунда, сала 1945 мәһа Кануна Пешьн, кʹомәкә Шәʹдед Йаһоԝа жь шәһәре Ангат һатьнә гӧнде мә сәва мьзгинийе бәла кьн. Шәʹдәки әʹмьрда мәзьн һатә мала мә у мәрʹа шьровәкьр кӧ Кʹьтеба Пироз чь дьбежә дәрһәԛа «рʹожед ахьрийе» (2 Тимтʹ. 3:1-5). Әԝи әм тʹәглиф кьрьн һәрʹьнә гӧнде незики мә сәр һинбуна Кʹьтеба Пироз. Де-баве мьн нәһатьн, ле әз чум. Ԝедәре ԝәкә 20 мәри һатьн, у һьнәк жь ԝан пьрсед Кʹьтеба Пирозва гьредайи дьдан.

Рʹаст бежьм мьн фәʹм нәдькьр кӧ әԝана дәрһәԛа чь хәбәр дьдан, ләма жи мьн сафи кьр кӧ жь щьвине һәрʹьм. Ле гава ԝана дәстпекьр кʹьлама Пʹадшатийе бьстьрен, әз мам, чьмки әԝе  кʹьламе гәләк дьле мьн гьрт. Паши ве кʹьламе у дӧа, әм гьшк һатьнә тʹәглифкьрьне кӧ һәрʹьн Ангате сәр щьвине кӧ Ләʹде гәрәке бьбуйа.

Жь мә чәнд мәри, рʹийа ԝәкә 8 км ньга чун, сәва һәрʹьн сәр щьвине, кʹижан кӧ малбәта Крузда дәрбаз дьбу. Ԝәкә 50 мәрьв һатьбун ве щьвине. Әз әʹщебмайи мам кӧ һәла һе зарʹед бьчʹук жи сәр пьрсед чәтьн щаба хԝә дьдан. Паши чәнд щьвина, Дамеан Сантос бьра, йе кӧ пешәнг бу у әʹмьрда мәзьн бу, әз тʹәглиф кьрьм кӧ шәв мала ԝида бьминьм. Мә тʹәмамийа шәве дәрһәԛа Кʹьтеба Пироз хәбәр да.

Һьнге, гәләк жь мә рʹастийед Кʹьтеба Пироз зу ԛәбул кьрьн. Паши чәнд щьвина, бьра жь мьн у жь йед дьн пьрсин: «Һун дьхԝазьн бенә ньхӧмандьне?» Мьн гот: «Бәле, әз дьхԝазьм». Мьн дьхԝәст кӧ «Хӧдан Мәсиһрʹа ... хӧламтийе» бькьм (Колс. 3:24). Әм чунә бәр чʹәме незики мә, у ԝедәре әм дӧ мәрьв һатьнә ньхӧмандьне сала 1946-да, 15 Сьбате.

Мә фәʹм кьр кӧ әм чаԝа Мәсиһи, гәрәке чʹәʹв бьдьнә Иса у тʹьме хьзмәт кьн. Әԝ йәк баве мьн хԝәш нәдьһат, әԝи готә мьн: «Тӧ һе бьчʹук и ԝәки бьби мьзгинван. Тӧ кӧ нӧԛи ава чʹем буйи, бь ԝе йәке тӧ наби мьзгинван». Мьн жерʹа шьровәкьр кӧ ԛьрара Хԝәде йә, ԝәки әм мьзгинийа Пʹадшатийе бәла кьн (Мәт. 24:14). Ӧса жи мьн готә ԝи: «Әз гәрәке сонда хԝә кӧ мьн бәр Хԝәде хԝәр, биньм сери». Әԝ һәма әԝ дәрәщә бу чахе баве мьн әз дамә тьрсандьне, чаԝа мьн жоре гьли кьр. Бәле, әԝи рʹе мьн дьгьрт, ԝәки әз хьзмәт нәкьм. Әԝ һәма әԝ ԝәʹдә бу, кʹәнге мьн щара пешьн бона нетед рʹӧһʹани, һәр тьшт пьшт хԝәва һишт.

Малбәта Круз әз тʹәглиф кьрьм, ԝәки Ангатеда тʹәви ԝан бьжим. Паше ԝана әз у ԛиза хԝәйә бьчʹук Нора, һелан кьрьн кӧ әм бьбьнә пешәнг. Мә һәрда жи 1 Мьждаре сала 1947 пешәнгти дәстпекьр. Норайе шәһәрәки дьнда хьзмәт дькьр, ле мьн бәрдәԝам дькьр Ангатеда хьзмәт кьм.

ДӘРӘЩА ДЬН КʹИЖАНЕДА ҺӘР ТЬШТИ ДЬҺЕЛЬМ

Әз се сал ида ча пешәнг бум, чахе бьрак жь филиале Ерл Стйуард, Ангатеда щийе кӧ гәләк мәрьв тʹоп дьбьн готар хԝәнд, у 500 мәрьви зедәтьр һатьн. Әԝи сәр зьмане Инглизи хәбәр дьда, у паши готара ԝи мьн сәр зьмане Тагалоги фькьред сәрәкә жь готара ԝи ԝәкʹьланд. Әз тʹәне һʹәта кʹома һʹәфта һин бумә. Мәкʹтәбеда дәрсдаред мьн тʹьме сәр зьмане Инглизи хәбәр дьдан. Диса чь али мьн кьр ԝәки зьмане Инглизи һин бьм, әԝ бу кӧ бь зьмане Тагалог әʹдәбйәтед сәр һʹиме Кʹьтеба Пироз һьндьк бун. Ләма жи мьн гәләк жь әʹдәбйәтед мә сәр зьмане Инглизи леколин дькьр. Ӧса әз зьмане Инглизи рʹьнд һин бум у ида мьн дькарьбу готар тʹәрщмә кьра.

Ве рʹоже, Стйуард бьра щьвата ве мьһалерʹа гот, ԝәки филиал дьхԝазә дӧ бьра тʹәглифи Бәйтʹәле кә. Филиалерʹа аликʹарийа ԝан лазьм бу, һʹәта кӧ мисйонер жь ԝәлат бьчуна сәр Щьвата Мәзьн бь наве «Пешдачуйина Теократийайе», кʹижан кӧ сала 1950 Нийу Йоркеда дәрбаз дьбу. Жь ԝан бьра йед кӧ тʹәглифи Бәйтʹәле кьрьбун, йәк әз бум. Сәва кӧ шьхӧле Бәйтʹәледа аликʹарийе бьдьм, мьн диса һәр тьшт пьшт хԝә һишт. Диса әз һини чь жи бьбум, мьн әԝ һʹәму тьшт пьшт хԝә һиштьн.

Сала 1950, 19 Һʹәзиране, әз һатьмә Бәйтʹәле у мьн дәстпекьр шьхӧле хԝә биньм сери. Бәйтʹәл маләкә мәзьн у кәвьнда бу, дор бәре кʹижани гәләк бахед мәзьн һәбун. Ԝедәре гәләк бьред азәп хьзмәт дькьрьн. Шәбәԛе мьн хԝарьнгәһеда аликʹари дьда. Паше незикайа сьһʹәта нәһа, мьн щийе кʹьнщшуштьнеда кʹьнщ утʹи дькьр. У паши нанхԝарьне жи мьн ӧса дькьр. Рʹаст ә мисйонер жь щьвата мәзьнә һʹәмдьнйайе вәгәрʹийан һатьн, йәкә мьн бәрдәԝам дькьр Бәйтʹәледа хьзмәт кьм. Мьн журнал дьпечʹан бона шандьне, документ тʹьжә дькьр кӧ журнала кʹӧда бьшиньн, у ӧса жи әз чаԝа секретар бум. Мьн әԝ шьхӧл дькьрьн, кʹижан кӧ жь мьн дьхԝәстьн.

ФИЛИПИНЕ ДЬҺЕЛЬМ У ДЬЧЬМ МӘКʹТӘБА ГИЛӘД

Сала 1952-да, әз у 6 бьра жь Филипине тʹәглифи Мәкʹтәба Гиләд кьрьн. Шабуна мьн беһʹәсаб бу. Амәрикайеда гәләк тьшт бона мә тʹәзә бун у нәнас бун. Әԝ гәләк щӧдә дьбу жь гӧнде бьчʹук кʹидәре мьн дьжит.

Тʹәви һәвалдәрсханед Гиләде

Мәсәлә, әм гәрәке һин буна кӧ ча һащәт у фьраԛед мәрʹа нәнас, бьдьнә хәбате. У хенщи ве йәке, һәԝа жи гәләк сар бу! Шәбәԛе гава әз  дәркʹәтьм дәрва, мьн дит һʹәму тьшт сьпи йә. Әԝ щара пешьн бу чахе мьн бәрф дит. Әԝ гәләк бәдәԝ бу, ле мьн дәрберʹа фәʹм кьр кӧ ԛайим сар ә.

Чахе әз Мәкʹтәба Гиләдда һин дьбум, әԝ һʹәму гӧһастьн бәр чʹәʹве мьн нәдьһатьн. Һинкьрьнеда дәрсдара щурʹә-щурʹә методед керһати дьданә хәбате. Әм һин бун кӧ леколина кʹур бькьн. Һинбуна Мәкʹтәба Гиләдда, гәләк али мьн кьр кӧ рʹӧһʹанида һе ԛәԝи бьм.

Чахе мьн әв мәкʹтәб хьлаз кьр, сәр ԝәхтәки әз һатьм кʹьфшкьрьне ча пешәнге мәхсус Бронкседа, (Нийу Йорк). Сала 1953, мәһа Тирмәһе, әз чумә сәр щьвата мәзьн, кʹижан кӧ Бронкседа дәрбаз дьбу. Паши ве щьвате әз һатьмә кʹьфшкьрьне Филипинеда.

ШӘҺӘРЕ КОМФОРТ ДЬҺЕЛЬМ

Бьред жь филиале готьн: «Ньһа тӧйе хьзмәт ки ча бәрпьрсийаре мьһале». Әԝе кʹьфшкьрьне дьһа зәʹф мәщал да мьн кӧ рʹастә-рʹаст пәй Иса һәрʹьм, кʹижан кӧ дьчу шәһәр у гӧндед дур, ԝәки али щьмәʹта Йаһоԝа бькә (1 Пәт. 2:21). Әԝ мьһала кӧ мьн гәрәке ча бәрпьрсийаре мьһале ԝедәре хьзмәт кьра, територйакә мәзьн бу. Әԝ Лусонайа Навәнд бу, кʹижан кӧ Филипинеда гьравәкә һәрә мәзьн ә. Провинсийа Булакан, Нуева-Есижа, Тарлак, у Замбалес дькʹәтьнә нава ве територийайе. Сәва тʹәсәлийа һьнә шәһәра бькьм, әз гәрәке Чʹийайед Сийера Мадрейә чʹәʹл-кʹорʹтрʹа дәрбаз бума. Нә отобус дьчунә ль ԝан щийа, нә жи трен, ләма жи мьн жь хԝәйед әʹрәбед баркʹеш һиви дькьр сәр кʹерана рʹунем, кʹижан ԝана пе әʹрәба дьбьр. Гәләк щар әԝана ԛайил дьбун, ле рʹаст бежьм һеса нибу.

Гәләк щьватед мьһала мьнда бьчʹук бун у тʹәзә бун. Бьред ԝан щьватада гәләк рʹази бун кӧ мьн али ԝан кьр һе рʹьнд щьвата у ӧса жи щьватед хьзмәтийе организә кьм.

Ԝәʹдә шунда әз һатьмә кʹьфшкьрьне региона Биколеда. Ԝедәре гәләк кʹом һәбун кӧ щийед гәләк дур бун, у ԝан щийада щара пешьн пешәнгед мәхсус хьзмәт дькьрьн. Дәстава Маләке әԝ бу кӧ әʹрдеда чʹәл кʹолайи бу, кʹидәре һәрдӧ алийава кʹеран һатьбун данине. Щарәке чахе мьн ньгед хԝә дани сәр кʹерана, кʹеран кʹәтьн у әз жи кʹәтьм чʹәле. Мьнрʹа ԝәʹдә лазьм бу кӧ хԝә тʹәмьз кьм бьшом, у дәстпекьм шьхӧле хԝә бькьм.

Чахе мьн ԝе мьһалида хьзмәт дькьр, һьнге мьн дәстпекьр дәрһәԛа Норайе бьфькьрьм, йа кӧ тʹәви мьн Булаканеда пешәнгти дәстпекьр. Һьнге әԝ пешәнга мәхсус бу, шәһәре Думагетеда, у әз чум тʹәсәлийа ԝе бькьм. Паши ве йәке, һьнә ԝәʹдә мә һәвдӧрʹа нәʹмә дьньвиси, у сала 1956, мә һәв станд. Һʹәфтеки шунда паши дәʹԝата мә, мә тʹәсәлийа щьвата Гьрава Рапу Рапу кьр. Әм чʹийарʹа дәрбаз бун, у ньга гәләк әʹрд чун, ле әԝ шабунәкә мәзьн бу кӧ мә тʹәвайи али хушк-бьра дькьр кӧ щийед дурда дьжитьн!

 ДИСА ТʹӘГЛИФИ БӘЙТʹӘЛЕ ДЬКЬН

Паши ԝәкә чар салед шьхӧле бәрпьрсийартийе, мә тʹәглифкьрьн станд кӧ филиаледа хьзмәт кьн. У сала 1960, мәһа Чьләйе, хьзмәтийа мәйә Бәйтʹәле дәстпебу. Нава ԝан гәләк салада һʹәта рʹожа иро әз гәләк тьшт һин бумә жь ԝан бьра, йед кӧ щабдарийед мәзьн тиньн сери, у Нора жи щурʹә-щурʹә шьхӧл дькә Бәйтʹәледа.

Готаре дьхуньм сәр щьвата мәзьн у бьрак сәр зьмане Кебуани готара мьн тʹәрщьмә дькә

Бона мьн кʹәрәмәкә мәзьн бу кӧ мьн пе чʹәʹве хԝә дьдит, ԝәки Филипинеда чьԛас гәләк мәрьв дьбунә хьзмәткʹаред Йаһоԝа. Чахе әз щара пешьн щаһьлтийеда һатьмә Бәйтʹәле, тʹәмамийа ԝәлатда ԝәкә 10 000 мьзгинван һәбун. Ле иро ԝедәре 200 000 мьзгинвана зедәтьр һәнә, жь ԝана бь сәда хьзмәткʹаред Бәйтʹәле нә, йед кӧ аликʹарийе дьдьнә шьхӧле бәлакьрьна мьзгинийе.

Ԝәʹдә дәрбаз дьбу у лазьм бу кӧ Бәйтʹәле мәзьн кьн. Ләма жи Кʹома Рʹебәрийе мәрʹа гот кӧ әʹрд бьгәрʹьн, сәва авайа тʹәзә ава кьн. Әз тʹәви сәркʹаре идара нәшьркьрьне, мал бь мал дьчумә бал щинара кӧ незики филиале дьжитьн, сәва бьпьрсьн һәла кәсәк әʹрд дьфьрошә. Ԝедәре гәләк Чинайи дьжитьн. Ле тʹӧ кәси нәдьфрот, у мәрьвәк һәла һе жи мәрʹа ӧса гот: «Чинайи нафьрошьн, ле тʹәне дькʹьрʹьн».

Готара Алберт Шредер тʹәрщмә дькьм

Ле рʹожәке, щинарәки мәрʹа гот кӧ әԝ дьхԝазә әʹрде хԝә бьфьрошә мә, чьмки дәрбази Амәрикайе дьбә. Әм гәләк әʹщебмайи ман. Паши ве йәке диса тьштед ӧса ԛәԝьмин кӧ мә ԛә нә жи дькарьбу баԝәр кьра. Щинарәки дьн жи хԝәст әʹрде хԝә бьфьрошә, у әԝи йед майин жи һелан дькьр сәва әʹрде хԝә бьфьрошьн. Мә һәла һе жи жь ԝи мәрьви әʹрд кʹьри, кʹижани мәрʹа гот кӧ «Чинайи нафьрошьн». Ԝәʹдәки кьнда, мәзьнайа щийе филиале се щара зедәтьр бу. Әз сәд сәләфи баԝәр ьм кӧ әԝ йәк ԛьрара Йаһоԝа Хԝәде бу.

Сала 1950, әз жь әндәмед Бәйтʹәле йе лапи щаһьл бум, ле иро әз жьна хԝәва әндәмед лапи әʹмьрда мәзьн ьн. Әз тʹӧ щар пʹошман набьм кӧ пәй Иса дьчум, кʹӧда жи әԝи мьн дьшанд. Рʹаст ә де-баве мьн, әз жь мал дәрхьстьм, ле Йаһоԝа малбәтәкә гәләк мәзьн да мьн, у әԝ малбәт гьшк ԝи һʹьз дькьн. Әз ԛә дӧдьли ниньм кӧ Йаһоԝа һәр тьшти дьдә мә чь кӧ мәрʹа лазьм ә, фьрԛи тʹӧнә әм кʹижан щабдарийа дьстиньн. Әз у Нора гәләк жь Йаһоԝа рʹази нә бона һәр ԛәнщийа ԝи, у әм йед дьн жи һелан дькьн кӧ ԛәнщийа ԝи бьщерʹьбиньн (Малх. 3:10).

Иса щарәке хәрщгьрәкирʹа наве кʹижани Мәттайе Леԝи бу, гот: «Пәй мьн ԝәрә». Ле Мәтта чь кьр? «Әԝи жи һәр тьшт һьшт, рʹабу пәй [Иса] чу» (Луԛа 5:27, 28). Мәщалед мьн жи һәбун кӧ тьшта пьшт хԝәва бьһельм сәва пәй Иса һәрʹьм, у әз йед дьн жи һелан дькьм ԝәки ӧса бькьн, у ԝе гәләк кʹәрәма бьстиньн.

Бь шабуне бәрдәԝам дькьм Филипинеда хьзмәт кьм