Дәрбази һондоре буйин

Дәрбази навәроке буйин

Бьред Щабдар; Чʹәʹв Бьдьнә Тимотʹейо

Бьред Щабдар; Чʹәʹв Бьдьнә Тимотʹейо

САЛА пар, нав тʹәмамийа дьнйайеда, бь һʹәзара бьра һатьнә кʹьфшкьрьне ча рʹуспи у бәрдәстийед щьвате. Һәрге тӧ йәк жь ԝан бьра йи, бешьк тӧ ша дьби бона ԝи ԛәдьрәки тʹәзә.

Ле фәʹмдари йә тӧ ӧса жи һьнәки бәрхԝә дькʹәви. Щейсон, рʹуспики щаһьл, гьли дькә: «Чахе әз ча рʹуспи һатьмә кʹьфшкьрьне, әз һьнәки бәрхԝә кʹәтьм кӧ щабдарийед мьнә тʹәзә һәнә». Муса у Йерәмйа жи дьфькьрин, ԝәки ԝе нькарьбьн шьхӧле кӧ Йаһоԝа дабу ԝан, биньн сери (Дәркʹ. 4:10; Йерәм. 1:6). Һәрге тӧ жи ӧса дьфькьри, ча тӧ дькари әԝе шьке жь дьле хԝә дәрхи у пешда һәрʹи? Дина хԝә бьдә мәсәла Тимотʹейо (Кʹар. Шанд. 16:1-3).

ЧʹӘʹВ БЬДӘ МӘСӘЛА ТИМОТʹЕЙО

Ча те кʹьфше Тимотʹейо ԝәкә 20 сали бу чахе Паԝлосе шанди ԝи тʹәглиф кьр кӧ бьбә һәвалрʹеԝийе ԝи. Пешийе, дьԛәԝьмә Тимотʹейо хԝәда баԝәр нибу у һьнәки дьтьрсийа кӧ ԝе щабдарийа хԝәйә тʹәзә ча бинә сери (1 Тимтʹ. 4:11, 12; 2 Тимтʹ. 1:1, 2, 7). Ле йәкә, паши чәнд сала, Паԝлос дәрһәԛа Тимотʹейо щьвата Филипирʹа ньвиси: «Ищар һевийа мьн жь Хӧдан Иса һәйә кӧ әз дь дәмәкә незикда Тимотʹейос бьшиньм ба ԝә . . . Чьмки тӧ кәсе мьн йе кӧ мина ԝи бь дьл у щан ль сәр ԝә бьфькьрә . . . тʹӧнә» (Фили. 2:19, 20, ИМ).

Гәло чьрʹа Тимотʹейо рʹуспики ӧса баш бу? Ԝәрә әм шәш тьшта шеԝьр кьн, кӧ чьда тӧ дькари чʹәʹв бьди ԝи.

1. Әԝи бь дьл бона мәрьва хәм дькьр. Паԝлос готә бьред Филипи: «[Тимотʹейо] жь бо һал у рәԝша ԝә хәме бьхԝә» (Фили. 2:20, ИМ). Бәле, Тимотʹейо мәрьв һʹьз дькьрьн. Әԝи бь дьл у щан бона һʹалхԝәшийа ԝанә рʹӧһʹани хәм дькьр, у һʹәйфа хԝә ԛәԝат у ԝәʹде хԝә нәдьани бона ԝан.

Нәбә мина ажоване отобусе, кʹижанирʹа дьһа фәрз ә ԝәʹдәда бьгьһижә сәр һәр сәкьнандьна отобусе, нә кӧ ԝәки мәрьв бькʹәвьнә отобусе. Ԝилиам кӧ 20 сала зедәтьр ча рʹуспи хьзмәт дькә, ширәте дьдә бьред кӧ тʹәзә щабдарийе дьстиньн: «Хушк-бьра һʹьз бькьн. Дина хԝә бьдьнә һʹәԝщед ԝан, нә кӧ ԛәйдед организасийоне кӧ чь у ча гәрәке бьбә».

2. Әԝи тьштед рʹӧһʹани датани щийе пешьн. Чахе Паԝлос мәсәла Тимотʹейо бәрамбәри йед дьн кьр, әԝи гот: «Йед майин һәр кәс ль пәй кʹара хԝә кʹәтийә, нә кӧ йа Иса Мәсиһ» (Фили. 2:21). Чахе Паԝлос Рʹомеда бу, әԝи дина хԝә дайе ԝәки хушк-бьред ԝедәре, пәй хԝәстьнед хԝә дькʹәтьн у шьхӧле Хԝәдеда хирәт нибун. Ле Тимотʹейо мәрьвәки ӧса нибу. Чахе мәщал чедьбун кӧ мьзгинийе бәла кә, ньһерʹандьна ԝи мина йа Ишайа бу, йе кӧ гот: «А вай әз, мьн бьшинә!» (Иша. 6:8).

Ле тӧ ча дькари рʹаст шьхӧлед хԝә у борщдарийед хԝәйә рʹӧһʹани бини сери? Пешийе, тьштед фәрз дайнә сәр щийе пешьн. Паԝлос гот: «Кʹижан һәрә ԛәнщ ә, һун ԝе бьбьжерьн» (Фили. 1:10). Чь кӧ чʹәʹве Хԝәдеда фәрз ә, бона тә жи бьра фәрз бә. Йа дӧда, әʹмьре хԝә сьвьк кә. Ԝәʹдә у ԛәԝата хԝә сәр тьштед нәлазьм хәрщ нәкә. Паԝлос ширәт да Тимотʹейо: «Жь дьлхԝәстьнед  щаһьлтийе бьрʹәвә, хԝә ль рʹастийе, баԝәрийе, һʹьзкьрьне, әʹдьлайийе бьгьрә» (2 Тимтʹ. 2:22).

3. Әԝ гәләк хирәт бу хьзмәтийа пирозда. Паԝлос ани бира Филипийа: «Һун хԝәха заньн кӧ [Тимотʹейо] йәки чаԝайи щерʹьбанди йә у хԝәха тʹәви мьн Мьзгинидайинерʹа ӧса хьзмәти кьр, чаԝа кӧрʹ баверʹа» (Фили. 2:22). Тимотʹейо йәки тʹәмбәл нибу. Әԝ тʹәви Паԝлос гьран дьхәбьти у әԝ йәк һʹьзкьрьна ԝан һьндава һәвдӧ ԛәԝи кьр.

Иро тʹәшкиләта Хԝәдеда шьхӧл тʹьме һәйә, у әԝ шьхӧл бь рʹасти шабуне тинә у дькарә хушк-бьра һе незики һәв кә. Ләма жи хԝәрʹа бькә нет, ԝәки һәр гав «шьхӧле Хӧданда пешда» һәрʹи (1 Корн. 15:58).

4. Әԝи ширәт ԛәбул дькьрьн у һин дьбу. Паԝлос Тимотʹейорʹа ньвиси: «Тә насийа хԝә дайә һинкьрьн, рʹабун-рʹуньштьн у нет-мәрәме мьн, баԝәри, сәбьр у һʹьзкьрьна мьн, бинфьрәйи» (2 Тимтʹ. 3:10). Тимотʹейо чь жи һин дьбу дьда хәбате, ләма һазьр бу кӧ щабдарийед мәзьн бинә сери (1 Корн. 4:17).

Ле бона тә һәйә мәрьвәки ӧса кӧ дьхԝази чʹәʹв бьди ԝи? Һәрге на, бьжберʹә кәсәки йе кӧ дькарә тәрʹа бьбә мәсәла баш. Том, кӧ ида гәләк сал рʹуспи йә, тинә бира хԝә: «Рʹуспики щерʹьбанди мьн кьрә бьн пʹәрʹе хԝә у әԝи рʹьнд мьн һин дькьр у ширәт дькьр. Мьн тʹьме жь ԝи ширәт дьхԝәстьн у мьн әԝ ширәт дьданә хәбате. Әԝе йәке али мьн кьр ԝәки хԝәда һе баԝәр бьм».

5. Әԝи бәрдәԝам дькьр хԝәха һин дьбу. Паԝлос Тимотʹейо ширәт дькьр: «Хԝә хԝәденасийеда һиндар кә» (1 Тимтʹ. 4:7). Дәрсдаре һәр спортсменәки һәйә кӧ ԝи һин дькә, ле әв спортсмен ӧса жи гәрәке хԝәха һин бә. Паԝлос готә Тимотʹейо: «Хԝә бьдә ԝе йәке, кӧ щьмәʹтерʹа ньвисаред пироз бьхуни, ширәт ки, һин ки . . . Гӧһе тә сәр ԝан тьшта бә у нава ԝанда бьминә, ԝәки пешдачуйина тә һʹәмуйава әʹйан бә» (1 Тимтʹ. 4:13-15).

Тӧ жи гәрәке фәрәсәтед хԝә һе баш ки. Алийе рʹӧһʹанида тʹьме пешда һәрʹә у дина хԝә бьдә рʹебәрийед тʹәзә кӧ щьватеда дьстини. Хенщи ве йәке, чьԛас жи щерʹьбанди би, бь тʹәмами итʹбарийа хԝә хԝә нәйнә у нәфькьрә, ԝәки занәбуна тә ԝе бей рʹебәри у ширәтед жь әʹдәбйәта һәр дәрәщада али тә бькә. Чʹәʹв бьдә Тимотʹейо у «һаш жь хԝә у һинкьрьна хԝә һәбә» (1 Тимтʹ. 4:16).

6. Әԝи итʹбарийа хԝә рʹӧһʹе Йаһоԝайи пироз дьани. Чахе Паԝлос дәрһәԛа хьзмәтийа Тимотʹейо дьфькьри, әԝи ани бира Тимотʹейо: «Әԝ тьштед ԛәнщә кӧ ль тә һатьнә спартьне бь ԝи рʹӧһʹе пирози нава мәда хԝәй кә» (2 Тимтʹ. 1:14). Сәва Тимотʹейо хьзмәтийа хԝә хԝәй кьра, ԝирʹа лазьм бу итʹбарийа хԝә рʹӧһʹе Хԝәдейи пироз бинә.

Доналд, кӧ ида бь дәһа сала рʹуспи йә, дьбежә: «Бьред щабдар гәрәке һәләԛәтийа хԝә тʹәви Йаһоԝа ԛимәт кьн. Ԝи щурʹәйи әԝана ԝе ‹һе ԛәԝат› бьн. Һәрге әԝана дӧа бькьн бона рʹӧһʹе Хԝәдейи пироз у бәре рʹӧһʹе пироз нав хԝәда пешда биньн, әԝана ԝе бь рʹасти бона хушк-бьра кʹәрәм бьн» (Зәб. 84:7; 1 Пәт. 4:11).

ЩАБДАРИЙА ХԜӘ БЬШЕКЬРИНӘ

Әм ша дьбьн кӧ гәләк бьра щабдарийед тʹәзә стандьнә, у рʹӧһʹанида пешда дьчьн. Щейсон, бәʹса кʹижани мә жоре кьр, дьбежә: «Чахе әз бумә рʹуспи, әз гәләк тьшт пеһʹәсийам у әз һе хԝәда баԝәр бумә. Ньһа әз бь рʹасти ләзәте дьстиньм жь щабдарийа хԝә у әԝ бона мьн ԛәдьрәки гәләк мәзьн ә!»

Ле тӧйе бәрдәԝам ки рʹӧһʹанида пешда һәрʹи? Бьра нета тә әԝ бә кӧ чʹәʹв бьди Тимотʹейо, у һьнге тӧйе бона щьмәʹта Хԝәде бьби кʹәрәм.