Дәрбази һондоре буйин

Дәрбази навәроке буйин

«Хәбәра Хԝәде . . . Зор ә»

«Хәбәра Хԝәде . . . Зор ә»

«Хәбәра Хԝәде сах у зор ә» (ИБРН. 4:12).

КʹЬЛАМЕД: 96, 94

1. Әм чьрʹа дӧдьли ниньн кӧ Хәбәра Хԝәде зор у ԛәԝи йә? (Бьньһерʹә шькле әʹԝльн.)

ӘМ ХЬЗМӘТКʹАРЕД Йаһоԝа ԛә дӧдьли набьн кӧ «Хәбәра Хԝәде сах у зор ә» (Ибрн. 4:12). Әм хԝәха дьвиньн кӧ ԛәԝата Хәбәра Хԝәде ча сәр әʹмьре мә у ӧса жи сәр әʹмьре мәрьвед дьн һʹӧкӧм дькә. Мәсәлә, һьнәк хушк-бьред мә бәре дьз у наркоман бун, йан жи бенамуси дькьрьн. Һьнәк жи ве дьнйайеда пешдачуйи у дәԝләти бун, ле әԝ йәк ԝана бәхтәԝар нәдькьр (Ԝаиз 2:3-11). Бәле, гәләк мәрьвед кӧ нәрʹаст дьжитьн у нета әʹмьре ԝан тʹӧнә бу, бь аликʹарийа ԛәԝата Хәбәра Хԝәде һатьнә сәр рʹийа рʹаст у бәхтәԝар бунә. Дьбәкә ԝә гәләк сәрһатийед ԝи щурʹәйи хԝәндийә «Бьрща Ԛәрәԝьлийеда» рʹеза готарада йа бь наве «Кʹьтеба Пироз Жийина Мәрьва Дьгӧһезә». У әм дьвиньн кӧ һәла һе паши ньхӧмандьне жи Мәсиһи бь аликʹарийа Кʹьтеба Пироз бәрдәԝам дькьн рʹӧһʹанида пешда дьчьн.

2. Ԛьрʹна йәкеда ԛәԝата Хәбәра Хԝәде ча һʹӧкӧм дьбу сәр мәрьва?

2 Әм әʹщебмайи наминьн кӧ бь аликʹарийа һинбуна Хәбәра Хԝәде иро гәләк мәрьва әʹмьре хԝәда гӧһастьнед мәзьн кьрьнә. Ԛьрʹна йәкеда жи хушк-бьред мәйә бьжарти әʹмьре хԝәда гӧһастьн кьрьнә. (Бьхунә 1 Корьнтʹи 6:9-11). Чахе Паԝлосе шанди дәрһәԛа ԝан мәрьва гот, йед кӧ ԝе Пʹадшатийа Хԝәде ԝар нәбьн, әԝи зедә кьр: «Жь ԝә һьнәк ӧса бун». Ле Хәбәра Хԝәде у рʹӧһʹе ԝийи пироз али  ԝан мәрьва кьрьн у ԝана әʹмьре хԝә гӧһаст. Чахе әԝана бунә Мәсиһи, һәла һе һьнге жи һьнәка жь ԝан шашийед ӧса мәзьн кьрьн, кӧ әԝ йәк һʹӧкӧм бу сәр һәләԛәтийа ԝан тʹәви Йаһоԝа. Мәсәлә, Кʹьтеба Пирозда те готьне дәрһәԛа Мәсиһики бьжарти ԛьрʹна йәкеда, йе кӧ гәрәке жь щьвате бьһата дәрхьстьне. Ле паше әԝ һатә гӧһастьне у диса вәгәрʹийа щьвате (1 Корн. 5:1-5; 2 Корн. 2:5-8). Әԝ йәк мә гәләк ԛәԝи дькә, чьмки әм дьвиньн кӧ хушк-бьред мә бь аликʹарийа Хәбәра Хԝәде чәтьнайед хԝә сафи кьрьнә у гӧһастьнед мәзьн кьрьнә.

3. Ве готареда әме чь шеԝьр кьн?

3 Ԛәԝата Хәбәра Хԝәде гәләк зор ә. У әм гәрәке Хәбәра Хԝәде рʹьнд бьдьнә хәбате, чьмки әв Йаһоԝа дайә мә (2 Тимтʹ. 2:15). Ве готареда әме шеԝьр кьн кӧ чь дькарьн бькьн сәва ԛәԝата Хәбәра Хԝәде һʹӧкӧм бә сәр 1) әʹмьре мә, 2) хьзмәтийа мә, 3) у һинкьрьна мә жь сене. Шеԝьркьрьна ве готаре ԝе али мә бькә һʹьзкьрьн у рʹазибуна хԝә нишан кьн Баве мәйи әʹзманарʹа, йе кӧ мә һин дькә бона кʹара мә (Иша. 48:17).

ԚӘԜАТА ХӘБӘРА ХԜӘДЕ ӘʹМЬРЕ МӘДА

4. а) Әм чь гәрәке бькьн сәва Хәбәра Хԝәде сәр мә һʹӧкӧм кә? б) Һун ча ԝәʹдә дьвиньн ԝәки Кʹьтеба Пироз бьхуньн?

4 Сәва кӧ Хәбәра Хԝәде сәр мә һʹӧкӧм кә, әм гәрәке чьԛас дькарьн һәр рʹож бьхуньн (Йешу 1:8). Шьхӧле мә чьԛас зәʹф бә жи у чь щабдарийед мә жи һәбьн, йәкә әм гәрәке ԝәʹдә бьвиньн сәва кӧ Кʹьтеба Пироз бьхуньн. (Бьхунә Әфәси 5:15, 16). Бона ве йәке әм дькарьн хԝәрʹа ԝәʹдә кʹьфш кьн, мәсәлә шәбәԛа, нивро, йан жи еваре. Әм ԛайил ьн тʹәви зәбурбеж кʹижани гот: «Һинкьрьна Тә чьԛас әз һʹьз дькьм! Тʹәмамийа рʹоже әз сәр ԝе дьфькьрьм» (Зәб. 119:97).

5, 6. а) Чьрʹа фәрз ә бьфькьрьн чахе әм Кʹьтеба Пироз дьхуньн? б) Әм ча дькарьн һе зәʹф кʹаре бьстиньн чахе Кʹьтеба Пироз дьхуньн у сәр дьфькьрьн? в) Ԝә чь кʹар стандийә чахе Кʹьтеба Пироз хԝәндийә у сәр фькьринә?

5 Ле тʹәне хԝәндьна Кʹьтеба Пироз бәс нинә, гәләк фәрз ә әм ӧса жи сәр бьфькьрьн (Зәб. 1:1-3). Һьнге әме бькарьбьн ширәтед Кʹьтеба Пирозә билани әʹмьре хԝәда бьдьнә хәбате. Фьрԛи тʹӧнә әм Кʹьтеба Пироз сәр кʹахаза бьхуньн йан бь һащәтед әләктроник, ле нета мә гәрәке әԝ бә, ԝәки гьлийед теда бьгьһижнә дьле мә.

6 Әм ча дькарьн һе зедә кʹаре бьстиньн чахе Кʹьтеба Пироз дьхуньн у сәр дьфькьрьн? Гәләка тʹәхмин кьрьнә ԝәки хԝәндьна Хәбәра Хԝәде һьнге кʹаре тинә, чахе пʹарәке дьхуни, дьсәкьни у пьрсе дьди хԝә: «Жь ве пʹаре әз чь һин бум дәрһәԛа Йаһоԝа? Әԝ йәк чь кӧ мьн хԝәндийә, ча әз әʹмьре хԝәда ида тиньм сери? Диса чьда әз дькарьм һе пешда  һәрʹьм? Һәрге әм дӧа бькьн у бьфькьрьн сәр Хәбәра Хԝәде, әме бьхԝазьн бь тʹәмами ԝан ширәта биньн сери. Һьнге әме ԛәԝата Хәбәра Хԝәде әʹмьре хԝәда бьвиньн (2 Корн. 10:4, 5).

ԚӘԜАТА ХӘБӘРА ХԜӘДЕХЬЗМӘТИЙА МӘДА

7. Әм ча дькарьн хьзмәтийеда Хәбәра Хԝәде баш бьдьнә хәбате?

7 Чь ԝе али мә бькә, ԝәки Кʹьтеба Пироз ԝәʹде хьзмәтийе баш бьдьнә хәбате? Гава пешьн әԝ ә, ԝәки ԝәʹде хьзмәтийе у ԝәʹде һинкьрьне тʹьме рʹезед жь Кʹьтеба Пироз бьдьнә хәбате. Дәрһәԛа ве йәке бьраки гот: «Һәрге ԝә тʹәви Йаһоԝа мал бь мал хьзмәт кьра, ԝәйе тʹәне хԝәха хәбәр да, йан ԝәйе бьһишта Йаһоԝа хәбәр дә?» Демәк, чахе әм Хәбәра Хԝәде мәрьварʹа дьхуньн, бь ве йәке әм дьһельн ԝәки Йаһоԝа тʹәви мәрьва хәбәр дә. Рʹезәкә рʹьнд бьжарти дьһа ԛәԝат ә, нә кӧ гьлийед мә (1 Тʹеслн. 2:13). Пьрсәкә ӧса бьдьнә хԝә: «Гәло әз һʹәму мәщала дьдьмә хәбате сәва кӧ ԝәʹде бәлакьрьна мьзгинийе пʹарәкә жь Хәбәра Хԝәде мәрьварʹа бьхуньм?»

8. Чьрʹа бәс нинә ԝәки мәрьварʹа тʹәне рʹеза бьхуньн?

8 Ле мәрьварʹа тʹәне рʹеза бьхуньн бәс нинә. Чьрʹа? Чьмки һʹәчʹи зәʹф мәрьв йан ԛә фәʹм накьн Кʹьтеба Пироз, йан жи гәләк һьндьк фәʹм дькьн. Ԛьрʹна йәкеда жи ӧса бу у иро жи ӧса нә (Рʹом. 10:2). Ләма жи әм гәрәке нәфькьрьн кӧ мәрьв ԝе перʹа-перʹа фәʹм кә әԝ рʹеза кӧ әм жерʹа дьхуньн. Чахе әм рʹезе дьхуньн, лазьм ә дина мәрьв бьдьнә сәр гьлийед сәрәкә жь рʹезе у паше жи шьровәкьн кӧ әԝ чь те һʹәсабе. Һәрге әм ӧса бькьн, Хәбәра Хԝәде ԝе бьгьһижә дьле мәрьва. (Бьхунә Луԛа 24:32.)

9. Әм хьзмәтийеда ча дькарьн хәбәрдане дәстпекьн, ԝәки мәрьв ԛәдьре Кʹьтеба Пироз бьгьрә? Мәсәле биньн.

9 Әм ӧса жи гәрәке бьфькьрьн кӧ  пешийа хԝәндьна рʹезе чь лазьм ә бежьн, ԝәки мәрьв ԛәдьре Кʹьтеба Пироз бьгьрә. Мәсәлә, әм дькарьн бежьн: «Ԝәрен әм бьньһерʹьн һәла Әʹфрандаре мә дәрһәԛа ԝе йәке чь дьбежә». Ле чахе әм хәбәр дьдьн тʹәви мәрьвәки кʹижан кӧ Мәсиһи нинә, ԝе баш бә ԝәки әм бежьн: «Бьньһерʹьн Ньвисаред Пироз чь дьбежә». Йан жи һәрге әм рʹасти мәрьве ӧса бен кӧ тʹӧ рʹелигийа наһʹәбинә, әм дькарьн пьрсәкә ӧса бьдьнә ԝи: «Ԝә ԛә бьһистийә дәрһәԛа ве готьнәкә бәре?» Бәле, ԝәʹде хьзмәтийе әм гәрәке тʹьме һьлдьнә һʹәсаб кӧ тʹәви кʹе хәбәр дьдьн, сәва бьзаньбьн ча хәбәрдане дәстпекьн (1 Корн. 9:22, 23).

10. а) Гьли кьн, бьраки ча Кʹьтеба Пироз да хәбате у әԝе йәке чь кʹар ани. б) Ԝә ча ԝәʹде хьзмәтийе ԛәԝата Хәбәра Хԝәде дитийә?

10 Гәләк хушк-бьра тʹәхмин кьрьнә кӧ чахе әԝана хьзмәтийеда Хәбәра Хԝәде дьдьн хәбате, әԝ дьле мәрьва һе дьгьрә у баш сәр ԝан һʹӧкӧм дькә. Ԝәрә мәсәләке шеԝьр кьн. Бьраки мә мерькәки әʹмьрда мәзьнрʹа бь сала журналед мә дьбьр у әԝи мерьки тʹьме әԝ журнал дьхԝәндьн. Щарәке әԝи бьрайи сафи кьр нә кӧ тʹәне журнала «Бьрща Ԛәрәԝьлийе» бьдә ԝи, ле рʹезәкә Кʹьтеба Пироз жи бьхунә кʹижан ве журналеда кʹьфшкьри бу. Әԝи 2 Корьнтʹи 1:3, 4 ԝирʹа хԝәнд кʹидәреда те готьне: «Баве дьлшәԝатийе у Хԝәдейе һʹәму бәрдьлийе . . . нава һʹәму тәʹли-тәнгийада дьл дьдә бәр мә». Әԝ рʹез ӧса дьле ԝи мерьки гьрт, ԝәки әԝи готә бьре мә кӧ щара дӧда бьхунә. Әԝи гот кӧ әԝ у жьна ԝи гәләк һʹәԝще бәрдьлийе бун у әԝ һе зедә дьхԝазә дәрһәԛа Кʹьтеба Пироз пебьһʹәсә. Бәле, рʹасти жи ԛәԝата Хәбәра Хԝәде гәләк зор ә (Кʹар. Шанд. 19:20).

ЧАХЕ ЖЬ СЕНЕ ҺИН ДЬКЬН

11. Чь щабдарийа ԝан бьра һәйә, йед кӧ щьватеда һин дькьн?

11 Әм гьшк жи шабунәкә мәзьн дьстиньн чахе дьчьнә щьвате у щьватед мәзьн. Мәʹнийа лапә фәрз кӧ чьрʹа әм дьчьн ԝедәре, әԝ ә кӧ Йаһоԝа бьһʹәбиньн. Әм ӧса жи кʹарәкә мәзьн дьстиньн жь ԝе рʹебәрийе кӧ щьватеда дьдьнә мә. Ләма жи бона бьра ԛәдьрәки гәләк мәзьн ә кӧ әԝана щьватеда һин дькьн. Әԝана гәрәке бир нәкьн, ԝәки әԝ щабдарикә фәрз ә (Аԛуб 3:1). Әԝана тʹьме гәрәке баԝәр бьн кӧ чь жи әԝана һин дькьн, хут сәр һʹиме Хәбәра Хԝәде йә. Һәрге һун бьре щабдар ьн у щьватеда һин дькьн, ча һун дькарьн ԛәԝата Кʹьтеба Пироз ӧса бьдьнә хәбате, ԝәки бьгьһижә дьле гӧһдара?

12. Готарван ча дькарә ӧса бькә ԝәки готара ԝи сәр һʹиме Кʹьтеба Пироз бә?

12 Бьрано, готара ԝәда Кʹьтеба Пироз гәрәке щийе лапи фәрз бьгьрә (Йуһʹн. 7:16). Әԝ чь те һʹәсабе? Ԝәʹде готаре һун гәрәке фәсал бьн ԝәки дина мәрьва нә кӧ һе зедә һәрʹә сәр мәсәлед ԝә йан жи щурʹе хәбәрдана ԝә, ле сәр рʹезед жь Кʹьтеба Пироз. Ӧса жи бир нәкьн, ԝәки һинкьрьна жь Кʹьтеба Пироз найе һʹәсабе тʹәне гәләк рʹеза бьхуньн. Бь рʹасти, чахе гәләк рʹеза дьхуньн, һʹәчʹи зәʹф мәрьв бир дькьн ԝан рʹеза. Ләма жи ԝе дьһа баш бә, һәрге һун рʹезед сәрәкә рʹьнд бьжберьн, бьхуньн, шьровәкьн, мәсәле биньн у кʹара рʹезе нишан кьн (Нәһәм. 8:8). Чахе готара ԝә сәр һʹиме плане йә, кʹижан кӧ жь тʹәшкиләта мә йә, һун гәрәке һьн плана готаре, һьн рʹезед теда рʹьнд леколин бькьн. Һун гәрәке рʹьнд фәʹм бькьн, һәла ча фькьред жь готаре гьредайинә тʹәви рʹеза. Паше жи ԝан рʹеза бьдьнә хәбате, кʹижан ԝе дина мәрьва бькʹьшинә сәр нета готарейә сәрәкә  (Һун дькарьн жь кʹьтеба «Мәкʹтәба Даннасинкьрьне» ширәтед баш бьвиньн дәрсед 21 һʹәта 23-да). Хенщи ԝан һʹәму тьшта, Йаһоԝарʹа дӧа бькьн, ԝәки али ԝә бькә сәва һун фькьред ԛимәт жь Хәбәра ԝи мәрьварʹа әʹйан кьн. (Бьхунә Әзра 7:10; Мәтʹәлок 3:13, 14.)

13. а) Ча рʹеза кӧ сәр щьвате һатьбу хԝәндьне, сәр хушкәке гәләк һʹӧкӧм бу? б) Һун чь кʹаре дьстиньн жь ве йәке кӧ ча щьватеда Кʹьтеба Пироз те хәбьтандьне?

13 Зарʹотийа хушкәкә мәйә жь Австралйайе зәʹф чәтьн дәрбаз бьбу у гәләк тьштед нәбаш тʹәви ԝе ԛәԝьми бун. Рʹаст ә ԝәʹдә шунда әԝ дәрһәԛа Йаһоԝа пеһʹәсийа у һатә ньхӧмандьне, ле диса жи жерʹа чәтьн бу баԝәр кә кӧ Йаһоԝа ле һʹьз дькә. Ле ԝәʹдә дәрбаз бу, әԝе баԝәр кьр ԝәки Хԝәде ле бь рʹасти һʹьз дькә. Гәло чь әԝе хушке һелан кьр ԝәки дӧдьли нәбә ԝе йәкеда? Рʹеза жь Кʹьтеба Пироз кӧ сәр щьвате һатьбу хԝәндьне гәләк дьле ԝе гьрт. Паше әԝе әв рʹез леколин кьр у бәрамбәри рʹезед дьн жи кьр, у әԝе йәке зәʹф али ԝе кьр. * Ле бал ԝә жи ӧса ԛәԝьмийә кӧ ԝә сәр щьвате йан жи сәр щьвата мәзьн рʹез бьһистийә у гәләк дьле ԝә гьртийә? (Нәһәм. 8:12).

14. Әм ча дькарьн һʹьзкьрьна хԝә Йаһоԝарʹа бьдьн кʹьфше бона Хәбәра ԝи?

14 Бәле, әм гәләк жь Йаһоԝа рʹази нә ԝәки әԝи бь һʹьзкьрьне Хәбәра хԝә дайә мә. Хԝәде нә кӧ тʹәне соз дабу кӧ Кʹьтеба Пироз ԝе бе хԝәйкьрьне, ле әԝи созе хԝә ани сери (1 Пәт. 1:24, 25). Ләма жи, ԝәрен әм тʹьме Хәбәра Хԝәде бьхуньн, тʹәмийед кӧ теда һәнә биньн сери, у Хәбәра ԝи бьдьнә хәбате ԝәки али мәрьва бькьн. Ӧса әм һʹьзкьрьна хԝә һьн һьндава ве пʹешкʹеша ԛимәт дьдьн кʹьфше, һьн жи йа лапә фәрз һьндава Автор, демәк Йаһоԝа Хԝәде.

^ абз. 13 Бьньһерʹьн чаргошә бь наве « Шьк жь Дьле Мьн Дәркʹәт».