Дәрбази һондоре буйин

Дәрбази навәроке буйин

Ләгләг

Чь Әм Һин Дьбьн Жь Чʹьвикен Әʹзмен

Чь Әм Һин Дьбьн Жь Чʹьвикен Әʹзмен

«Бьпьрсә . . . жь щьвикен әʹзманан . . . бьла бьгьһиньн тә. Дь нава ԝана һʹәмуйада . . . кʹи ньзанә кӧ, дәсте Хӧдан [Йаһоԝа] вейа чекьрийә?» (Ибо 12:7, 9).

ԜӘКӘ 3 000 сал зедәтьр пешда, Ибо пʹехәмбәр тедәрхьст, кӧ чʹьвикед әʹзмен дькарьн гәләк тьшт дәрһәԛа шьхӧлед Хԝәде бьгьһиньн мә. Һьм жи гәләк мәсәлә у метафора ль сәр һʹиме мәсәлед чʹьвика нә. Дь Кʹьтеба Пирозда жи һәнә мәсәлә бона чʹьвика у әв гәләк тьшт мә һин дькьн дәрһәԛа һәләԛәтийа мә тʹәви Хԝәде. Ԝәрен әм дина хԝә бьдьнә чәнд мәсәла.

ҺЕЛИНЕД ДУВМӘԚӘСКА

Дувмәԛәск

Бьнәлийед Оршәлиме рʹьнд заньбун, кӧ дувмәԛәск һелинед хԝә бьн банийед ханийа чедькьн. Дувмәԛәска, һелинед хԝә дь пʹарьстгәһа Сьлеманда жи чедькьрьн. Дувмәԛәскед кӧ һелинед хԝә тʹьме дь пʹарьстгәһеда чедькьрьн, дькарьбун бе хоф ԝе дәре щущукед хԝә мәзьн кьн.

Ньвискʹаре Зәбура 84, йәк жь кӧрʹед Кораһ бу, йе кӧ дь пʹарьстгәһеда шәш мәһа щарәке, ԝәкә һʹәфтеки хьзмәт дькьр. Әԝи дина хԝә да ԝан һелина йед кӧ дь пʹарьстгәһеда чекьри бун. Кораһ һьзрәт бу бьбә анәгори дувмәԛәска, һелинед кʹижана кӧ дь мала Йаһоԝада бун. Әԝи гьлийе ӧса дьгот: «ЙА ХӦДАН [Йаһоԝа] сәрԝере һәму һезан, ханийен тә чьԛас хԝәшь кьн! Щане мьн берийа һәԝшен тә дькьн, һӧндьре мьн дькʹьшинә, жь һәԝен Хӧдан. Һʹәта чʹьвикан жи һелинәк у һәщирʹәшк [дувмәԛәск] щиһәки челикен хԝә ле дәйнә дитьн, ле щәм пʹешкʹешигәһен тә, йа ХӦДАНЕ сәрԝәре һʹәму һезан, Ԛьрале мьн у Хԝәдайе мьн!» (Зәбур 84:1-3). Гәләк фәрз ә ԝәки әм жи бьхԝазьн тʹәви щаһьлед хԝә, һәргав ль мала Йаһоԝада тʹәви щьмәʹта ԝи тʹоп бьн (Зәбур 26:8, 12).

ЛӘГЛӘГ ԜӘʹДЕ ХԜӘ ЗАНӘ

Йерәмийа пʹехәмбәр ньвиси: «Бәле, ләгләга ль әʹзмана ԝәхтен хԝәйи әʹшкәрә дьзанә». Бе шьк Йерәмийа рʹьнд заньбу дәрһәԛа кʹочкьрьна ләгләга нава тʹәмамийа Әʹрде Создайида. Ль гора һʹәсабкьрьне, баһаре ԝәкә 300 000 зедәтьр ләгләгед сьпи жь Африкайе дәрбази Дәшта Урдоне дьбьн у жь ԝьр дәрбази Әԝрупайа Бакʹуре дьбьн. Сьһʹәтед ԝанә биоложи ԝанарʹа дьдә занин, кӧ әԝана гәрәке вәгәрʹьн щийе гәрм ль һелинед хԝә. Анәгори чʹьвикед дьн кӧ кʹоч дькьн, ләгләг жи «ԝәхта һатьна хԝә» заньн у тен (Йерәмйа 8:7).

Кʹьтеба «Collins Atlas of Bird Migration» дьбежә, ԝәки чʹьвик бь рʹасти бь сайа зькмакийе кʹоч дькьн. Бәле, Йаһоԝа Хԝәде зькмаки да чʹьвикед кӧ кʹоч дькьн, сәва кӧ бькарьбьн ль гора ве йәке бьзаньбьн ԝәхте кʹочкьрьна хԝә. Ле мәрийарʹа Хԝәде фәрәсәтәкә ӧса дайә, кӧ бькарьбьн ԝәхт у дәмсала тедәрхьн (Луԛа 12:54-56). Һәмьки занәбун дәрһәԛа Хԝәде ча кʹьлит ә, кӧ аликʹарийе дьдә мә, сәва тедәрхьн фәрзбуна рʹожед иройин. Щьмәʹта Исраели ԝәʹде Йерәмйа тьштед ӧса ньзаньбун. Хԝәде ԝанарʹа әʹйан кьр кӧ проблема ԝан чьда нә: «Әв готьна Хӧдан жь хԝәва авитьн у ... чь занйари дь ԝанда һәйә?» (Йерәмийа 8:9).

 Иро гәләк избаткьрьн һәнә, кӧ әм «рʹожед ахьрийеда» дьжин, чаԝа кӧ Кʹьтеба Пироз нав дькә (2 Тимотʹейо 3:1-5). Ле һуне чʹәʹв бьдьнә ләгләга у дина хԝә бьдьнә «дәмсала»?

ТӘЙР ЖЬ ДУРВА ДЬВИНӘ

Әйло (Тәйр)

Дь Кʹьтеба Пирозда гәләк щара дәрһәԛа тәйр (әйло), те готьне у әв чʹьвик рʹьнд нас бу бона мәрьвед Әʹрде Создайи. Тәйр жь һелинед хԝә, йед кӧ бьльндайа зьнарада щиԝар кьринә, чʹәʹвньһерʹийе дькә у хԝарьне хԝәрʹа дьгәрʹә. Кʹьтеба Пироз дьбежә кӧ «чʹәʹвен ԝе жь дурва дьбиньн» (Ибо 39:27-29). Чʹәʹвед тәйр ӧса рʹьнд дьвиньн, кӧ әԝана дькарьн жь кʹилометрәке дур кʹеврʹушке бьвиньн.

Чаԝа кӧ тәйр жь дурва дьвинә, Йаһоԝа жи дькарә дур ль ахьрийе бьньһерʹә. Әԝи гьлийе ӧса гот: «Йе кӧ даԝийе жь пешийева у тьштен кӧ һьн нәбунә жь бәрева дьгһинә» (Ишайа 46:10). Чахе әм ль гора рʹебәрийа Йаһоԝа дьжин, әм кʹаре дьстиньн жь биланийа ԝи у жь занәбуна ԝийә дәрһәԛа ахьрийе (Ишайа 48:17, 18).

Кʹьтеба Пироз ԝан мәрийа, йед кӧ итʹбарийа хԝә Хԝәде тиньн бәрамбәри тәйир дькә. Ль ԝьр ӧса те готьне: «Ле бәле йен кӧ ль бәнда ХӦДАН ьн һеза хԝә тʹәзә дькьн у мина ԛәртʹәлан [тәйр] баскен хԝә вәдькьн у бьльнд дьбьн» (Ишайа 40:31). Тәйр бь сайа һәԝа гәрм дькарә бьльнд бә у бьфьрә. Чахе тәйр пʹелед һәԝе тʹәхмин дькә, әԝ баскед хԝә вәдькә у дора ван пʹела дьфьрә, чь кӧ тәйр һе бьльнд у бьльнд һьлдькʹьшинә. Ча те кʹьфше, хут бь сайа ве йәке тәйр дькарә ль һәԝеда хԝә бьгьрә. Анәгори ԝе йәке, әԝен кӧ итʹбарийа хԝә Йаһоԝа тиньн дькарьн баԝәр бьн, кӧ әԝе «зорайийа ԛәԝате» бьдә ԝан (2 Корьнтʹи 4:7, 8).

«МЬРИШК ЩУЩУКЕД ХԜӘ БЬН БАСКЕ ХԜӘДА ДЬЩЬВИНӘ»

Мьришк тʹәви щущукед хԝә

Пешийа мьрьна хԝә, Иса сәкьни у дина хԝә да дебажаре Щьһуйа. Иса гот: «Оршәлим! Оршәлим! Тә пʹехәмбәр дькӧштьн у шандийед щәм хԝә дьданә бәр кәвьра. Чәнд щара мьн хԝәст кӧ зарʹед тә ӧса бьщьванда, чаԝа мьришк щущукед хԝә бьн баске хԝәда дьщьвинә, ле тә нәхԝәст!» (Мәтта 23:37).

Щәм чʹьвика фәрәсәтәкә ԛәԝи һәйә, мәсәлә әԝана тʹьме һазьр ьн щущукед хԝә бьпʹарезьн. Чʹьвикед кӧ һелинед хԝә ль сәр әʹрде чедькьн, мәсәлә мьришк, гәрәке тʹьме дина хԝә бьдьнә дәр-дора хԝә, кӧ щущука бьпʹарезьн. Һәрге мьришк, ԛәрәԛуш (хәртәл) дьвинә, әԝ дәстпедькә бь дәнге бьльнд бькә ԛирә-ԛир, жь бо чь жи щущукед ԝе фәʹм дькьн кӧ гәрәке бьрʹәвьнә бьн баскед дийа хԝә. Хенщи ԝе йәке щущук бьн баскед дийа хԝәда, дькарьн жь ԛьжә-ԛьжә тәве у жь баране бенә хԝәйкьрьне. Анәгори ԝе йәке, Иса жи дьхԝәст пʹарастьна ӧса йане щи-сьтара ӧса бьда бьнәлийед Оршәльме. Иро, Иса мә тʹәглиф дькә бенә щәм ԝи, сәва кӧ рʹьһʹәтийе бьстиньн у хԝәйкьри бьн жь баргьранийе у жь хәмед һәр рʹожи (Мәтта 11:28, 29).

Бь рʹасти жи әм гәләк тьшт дькарьн жь чʹьвика һин бьн. Чахе һун дина хԝә бьдьнә чʹьвика, бькьнә бира хԝә гьли-готьнед Кʹьтеба Пироз дәрһәԛа ԝан. Бьра мәсәла дәрһәԛа дувмәԛәске, али тә бькә ԛимәт ки мала Йаһоԝа. Тʹьме хԝә ль Йаһоԝа бьгьрә у ԝи баԝәр бькә, бь сайа чь жи те бькарьби мина тәйир һеса у рʹаст хԝә бьгьри. Һәргав ԝәре щәм Иса сәва рʹастийа рʹӧһʹани, чь кӧ ԝе тә бьпʹарезә анәгори мьришке кӧ щущукед хԝә дьпʹарезә. У бьра мәсәла ләгләге бькә бира тә, кӧ тʹьме лазьм ә һʹьшийар бьминьн чахе дьвиньн кӧ иро дьнйа чь һалида нә. Чьмки бь сайа ве йәке әм дькарьн тедәрхьн, ԝәки чь ԝәʹдәйида дьжин.