Дәрбази һондоре буйин

Дәрбази навәроке буйин

 СӘРҺАТИ

Бе Дәст Мьн Рʹасти Һʹәмез кьр

Бе Дәст Мьн Рʹасти Һʹәмез кьр

Чахе мәрьв ньшкева дьтьрсьн, әԝана хԝә ль тʹьштәки дьгьрьн. Ле әз әве йәке нькарьм бькьм, чьмки дәст-мьлед мьн тӧне. Әз һʹәфт сали бум чахе һʹәкима мьлед мьн бьрин, сәва кӧ әз хьлаз бьм.

Әз сала 1960-да һатьмә буйине, у һьнге дийа мьн 17 сали бу. Баве мьн һе пешийа буйина мьн, әм һиштьн. Мьн дийа хԝәва мала кальк-пирка хԝәда ль Магдәбӧргеда дьжит. Әԝ бажарәки бьчʹук бу дь Алманийайа Рʹоһьлате. Һәчʹи зәʹф жь мәрийа ԝе дәре Атеист бун у малтбәта мьн жи. Мә Хԝәде инкʹар дькьр.

Бьчʹуктайеда мьн тʹьме тʹәви кальке хԝә ԝәʹдә дәрбаз дькьр. Әԝи щурʹә-щурʹә шьхӧлед бьчʹук дьда мьн, мәсәлә әз һʹьлдькʹшийамә сәр баха у мьн чʹьԛьлед ԝан дьбьри. Мьрʹа һәԝас бу ԝан шьхӧла бькьм. Әԝ ԝәʹдәки ша у бе хәм бу.

ЖЬ БО ԚӘЗИЙЕ ЖИЙИНА МЬН ҺАТӘ ГӦҺАСТЬНЕ

Чахе әз һʹәфт сали бум у кома дӧдада бум, әз кʹәтьмә ԛәзийакә гьран. Гава әз жь мәкʹтәбе ԝәдьгәрʹийамә мал, мьн хԝәст һьлкʹшьм сәр стуна әләктрикийе кʹидәре кӧ тʹелед токе пева бун. Чахе әз 8 метра һʹьлкʹшийамә жорʹе, ньшкева токе ԛайьм мьн хьст у әз хәрьԛим. Әз нәхԝәшханеда һʹьшйар бум у мьн дәст-мьлед хԝә тʹәхмин нәдькьр. Жь бо токе дәст-мьлед мьн гәләк шәԝьти бун, у ләма жи сәва кӧ инфексийа дәрбази хуне нәбә һәкима һәрдӧ мьлед мьн бьрин. Де у кальк-пирка мьн жь бо ве йәкә гәләк бәрхԝәкʹәтьн. Ԝи чахи мьн һʹәта хьлазийе фәʹм нәдькьр, кӧ жийина бе дәст ԝе чьԛас чәтьн бә.

Чахе әз жь нәхԝәшхане дәркʹәтьм, чәнд ԝәхт дәрбаз бу у әз диса ԝәгәрʹийам мәкʹтәбе. Зарʹа ԛәрф мьн дькьрьн, мьн дәв дьдан у тьшт давитнә мьн, чьмки мьн нькарьбу хԝә хԝәйкьра. Жь бо ве йәке әз гәләк дьлтәнг дьбум. Ахьрийа-ахрийе мьн шандьн Мәкʹтәба Беркьнԝердьр, йа кӧ сәва ԝан зарʹа бу щәм кʹижана кӧ кемасийед физики һәбун. Әв мәкʹтеб жь мала мьн дур бу, ләма жи дийа мьн у кальк-пирка мьн нькарьбун тʹьме бьһатана у мьн бьдитана. Мьн ԝана тʹәне ԝәʹде тʹатʹиле дьдит, демәк ԝәʹде һесабуна мәкʹтәбе. Нава дәһа салада әз бе де у кальк-пирке мәзьн бум.

БЕ ДӘСТ МӘЗЬН ДЬБЬМ

Әз һин бум һʹәму шьхӧлед һәрʹ рʹожи бь щурʹәки тʹәзә бькьм, демәк пе ньгед хԝә. Мәсәлә мьн пе ньгед хԝә чәнгәл у кәвчʹи дьгьрт сәва кӧ хԝарьне бьхӧм. Әв гәләк чәтьн бу, ле мьн карьбу чʹар пе бькьрʹа. Әз ӧса жи һин бум пе ньгед хԝә дьране хԝә бьшом у пʹоре хԝә шә кьм. Бь тʹәбйәти, мәрьв ԝәʹде хәбәрдане дәсте хԝә дьбьн тиньн, ле әз ньгед хԝә дьбьм тиньм. Демәк ньгед мьн ча бежи мьнрʹа бунә дәст.

 Щаһьлтийа хԝәда мьн гәләк һʹьз дькьр кʹьтебед фантастики бьхуньм. Щарна мьн дьда бәр чʹәʹве хԝә кӧ дәстед мьн һәнә, бь сайа чь жи әз дькарьбум һʹәму тьшти бькьм. 14 салийа хԝәда мьн дәстпекьр щихаре бькʹьшиньм, чьмки әз дьфькьрим кӧ ӧса әзе мина һәʹму мәрийа бьм. У мьн хԝәрʹа дьгот: «Дә бьньһерʹьн, әз жи дькарьм әве йәке бькьм. Әԝед кӧ щихаре дькʹьшиньн мер ьн у фьрԛи тʹӧнә әԝана бь дәст йан бе дәст ьн».

Әз щурʹә-щурʹә шьхӧлава мьжул дьбум у кʹәтьмә нав шьхӧлед сосийали. У әз бумә әндаме Тʹәшкиләтәкә Алмани йа сәва Щаһьла (FDJ). Дәԝләте пе пʹәрʹа пьштгьрийа ве тʹәшкиләте дькьр. Әз ӧса жи кʹәтьмә нава кʹома стьранбежа, мьн шеред поетик дьготьн у ӧса жи спортеда кʹар дькьр, йед кӧ сазкьри бу сәва мәрьвед сәԛәт у щәм кʹижана кӧ кемасийед физики һәбун. Паши ԝе йәке, мьн дәстпекьр дь компанийәкеда бьхәбьтьм. Ԝи чахи мьн зәʹф щара протез ль хԝә дькьрьн, чьмки мьн дьхԝәст мәрьвәки тʹам бьм.

РʹАСТИЙЕ ҺʹӘМЕЗ ДЬКЬМ

Рʹожәке чахе әз һивийа тʹрене бум сәва һʹәрьмә хәбате, мерәки незики мьн бу. Әԝи пьрс да мьн: «Дькари баԝәр бьки кӧ Хԝәде дькарә тә ԛәнщ кә, ԝәки дәстед тә диса һәбьн». Әз гәләк әʹщебмайи мам. Һәмьки мьн дьхԝәст кӧ дәстед мьн һәбьн, ле әв йәк мьрʹа тьштәки нәреали һатә кʹьфше! Чаԝа атеист, әз баԝәр бум кӧ Хԝәде тʹӧнә. Мьн да кʹьфше кӧ мьрʹа һʹәԝас нинә тʹәви ԝи бәрдәԝам кьм хәбәр дьм.

Һьнә ԝәʹдә шунда, һәвалхәбаткʹара мьн әз тʹәглифи малбәта хԝә кьрьм. Чахе мә ԛаһвә ԝәдьхԝәр, де-баве ԝе дәстпекьрьн дәрһәԛа Йаһоԝа Хԝәде хәбәр дьн. Һьнге мьн щара пешьн дәрһәԛа наве Хԝәде бьһист (Зәбур 83:18). Мьн дьле хԝәда гот: «Фьрԛи тʹӧнә наве Хԝәде чь йә, чьмки бь рʹасти Хԝәде тʹӧнә. Әзе избат кьм, кӧ әԝ мәрьв хԝә шаш дькьн». Әз гәләк хԝәда баԝәр бум, ләма жи ԛайил бум дәрһәԛа Кʹьтеба Пироз тʹәви ԝана шеԝьр кьм. Ле әз гәләк әʹщебмайи мам кӧ мьн нькарьбу ԝанарʹа избат кьм, ԝәки Хԝәде тʹӧнә.

Чахе мә дәрһәԛа пʹехәмбәртийед Кʹьтеба Пироз шеԝьр дькьр, һеди-һеди ньһерʹандьна мьнә атеисти, дьһатә гӧһастьне. Гәләк пʹехәмбәртийед Кʹьтеба Пироз һатьнә сери, һәла һе әв пʹехәмбәрти жи йед кӧ бь сәда у һʹәзара сал пешда һатьбун әʹлам кьрьне. Ԝәʹде шеԝьркьрьнәкә мә, мә һʹале дьнйайә иройин бәрамбәри пʹехәмбәртийа жь Мәтта сәре 24, рʹеза 21 кьр, у 2 Тимотʹейо сәре 3 дькьр. Анәгори ԝе йәке, чаԝа кӧ һәким бь аликʹарийа һьнә нишана дькарә тедәрхә нәхԝәшийа мәрьва, ӧса жи әв дәрәщед дәрһәԛа кʹижани кӧ дь ԝан пʹехәмбәртийада те готьне, али мьн кьрьн тедәрхьм кӧ әм «зәманед хьрабда» дьжин, чаԝа кӧ Кʹьтеба Пироз нав дькә. * Әв йәк гәләк ль сәр мьн һʹӧкӧм кьр. Әԝ пʹехәмбәрти бәр чʹәʹвед мьн тенә сери.

Һеди-һеди мьн баԝәр дькьр ԝәки һʹәму тьштед кӧ әз педьһʹәсьм, рʹаст ьн. Мьн дәстпекьр Йаһоԝа Хԝәдерʹа дӧа бькьм. Рʹаст ә мьн гәләк сала щьхарә дькʹьшанд, ле мьн карьбу тʹәрка ве йәке бьдьм.  Әз ԝәкә саләке Кʹьтеба Пироз һин дьбум. Дь сала 1986-да, 27 Нисане, әз дьзикава дь һәԝзеда һатьмә ньхӧмандьне.

АЛИКʹАРИЙЕ ДЬДЬМӘ ЙЕД ДЬНЕНА

Жь бо ԝе йәке кӧ ԝи ԝәʹдәйида шьхӧле Шәʹдед Йаһоԝа дь Алманйайеда ԛәдәхәкьри бу, әм бь кʹомед бьчʹук дь малада тʹоп дьбун. У мьн тʹәне чәнд хушк-бьра нас дькьр. Ньшкева, һʹӧкӧмәта Дәԝләте изьн да мьн кӧ әз дәрбази Алманйайа Роавайе бьм, кʹидәре кӧ шьхӧлед Шәʹдед Йаһоԝа ԛәдәхәкьри нибу. Щара пешьн жийина хԝәда, мьн карьбу һазьр бьм ль сәр щьватед мәзьнә Шәʹдед Йаһоԝа у бь һʹәзара хушк-бьра бьвиньм. Әв бь рʹасти жи тьштәкә мәхсус бу.

Паши ԝе йәке чаԝа кӧ Диԝаре Берлине һатә һьлшандьне, ԛәдәхәкьрьна шьхӧлед Шәʹдед Йаһоԝа һатә һьлдане. Ахьр мә ида карьбу бь сәрбәсти Йаһоԝа Хԝәдерʹа хьзмәт кьн. Мьн дьхԝәст һе зедә мьзгинийа хере бәла кьм, ле мьнрʹа чәтьн бу тʹәви мәрьвед хәриб хәбәрдане дәстпекьм. Әз хԝәда дӧдьли бум жь бо кемасийа хԝә, у кӧ тʹәмамийа заротийа хԝә мьн ԝе ханийеда дәрбаз кьр, йе кӧ сәва мәрьвед сәԛәт бу. Ле дь сала 1992-да, мьн дәстпекьр мәһе 60 сьһʹәта мьзгинийе бәла кьм. Әв йәк шабунәкә мәзьн мьрʹа ани. Ләма жи мьн сафи кьр һәр мәһ һаԛас хьзмәт кьм у се сала мьн ӧса дькьр.

Әз бира хԝәда хԝәй дькьм гьли-готьне жь Кʹьтеба Пироз: «Кʹи сьст ә, у әз жи перʹа сьст ьм» (2 Корьнтʹи 11:29). Рʹаст ә дәстед мьн тʹӧнә, ле һʹьш у дәнге мьн һәйә. Ләма жи әз һʹәму тьшти дькьм, сәва кӧ аликʹарийе бьдьмә йед дьнена. Әз дькарьм бь тʹәмами фәʹм бькьм ԝан мәрийа щәм кʹижана кӧ һьнә кемаси һәнә. Әз заньм чьԛас чәтьн ә, чахе тӧ гәләк дьхԝази тьштәки бьки чь кӧ тӧ нькари. Әз һелан дькьм ԝан мәрийа, йед кӧ жь бо һʹәстед ӧса дьлтәнг бунә. Чахе әз бь ви щурʹәйи аликʹарийе дьдьмә йед дьнена, әз пʹьрʹ бәхтәԝар дьбьм.

Чахе әз мьзгинийа хере мәрьварʹа бәла дькьм, жь бо ве йәке әз бәхтәԝар дьбьм

ЙАҺОԜА ҺӘР РʹОЖ АЛИКʹАРИЙЕ ДЬДӘ МЬН

Һәмьки щарна әз жи дьлтәнг дьбьм. Чьмки әз дьхԝазьм мәрьвәки тʹам бьм. Рʹаст ә гәләк шьхӧлед һәр рʹожи әз дькарьм хԝәха бькьм, ле сәва ве йәке һьмбәри мәрьвед дьн, гәләк ԝәʹдә у ԛәԝата мьн дьчә. Әз һәр рʹож дькьмә бира хԝә әв гьли готьн: «Әз һәр тьшти бь сайа ԝи дькарьм, йе кӧ ԛәԝате дьдә мьн» (Филипи 4:13). Һәр рʹож Йаһоԝа ԛәԝате дьдә мьн, сәва кӧ бькарьбьм шьхӧлед һәр рʹожи бькьм. Әз ль сәр хԝә тʹәхмин дькьм, кӧ чаԝа Йаһоԝа тʹьме аликʹарийе дьдә мьн. Ләма чь жи һәбә, әз дьхԝазьм бь дьл у щан ԝирʹа хьзмәт кьм.

Йаһоԝа әз кʹәрәм кьрьм у малбәтәкә баш да мьн, малбәта кӧ жь зарʹотийа хԝәда әз һьзрәт бум. Кʹӧлфәта мьнә баш һәйә, Елке, йа кӧ бь һʹьзкьрьне тʹьжә йә у дьлрʹәʹм ә. Хенщи ԝе йәке, бь милйона Шәʹдед Йаһоԝа бунә хушк-бьред мьнә рʹӧһʹани у мьн малбәтәкә һʹәмдьнйайе ԛәзанщ кьр.

Тʹәви кʹӧлфәта хԝәйә һʹьзкьри, Елке

Әз ӧса жи дьлбинийе дьстиньм жь созе Хԝәде дәрһәԛа Щьнәте, кʹидәре кӧ ԝе «һәр тьшти ну» чекә ӧса жи дәстед мьн (Әʹйанти 21:5). Чахе әз дьфькьрьм дәрһәԛа ԝе йәке, кӧ Иса чь дькьр чахе ль сәр әʹрде бу, әз һе рʹьнд фәʹм дькьм әви созе Хԝәде. Бәʹса хәбәре, Иса йед сәԛәт, шьлушәт ԛәнщ дькьрьн у һәла һе чахе гӧһе мәрьвәки жекьрьн, Иса әԝ ԛәнщ кьр (Мәтта 12:13; Луԛа 22:50, 51). Созед Йаһоԝа у кʹәрәмәтед Иса, мьн дьдьнә баԝәркьрьне кӧ зутьрәке әзе жи мәрьвәки тʹам бьм.

Ле кʹәрәма лапә мәзьн әԝ ә, кӧ мьн Йаһоԝа Хԝәде нас кьр. Әԝ буйә бав у досте мьн, йе кӧ тʹьме бәр дьле мьнда те у мьн ԛәԝи дькә. Әз сәр хԝә тʹәхмин дькьм гьлийе Даԝьд Пʹадша йе кӧ гот: «Йаһоԝа һез [ԛәԝат] у мәртʹале мьн ә. . . . Мьн аликʹари дит. Дьле мьн, бь кʹефе дьщошә» (Зәбур 28:7, ДО). Әз дьхԝазьм тʹәмамийа жийина хԝәда, хԝә ль ве рʹастийа ԛимәт бьгьрьм. У әз һәла һе бе дәст жи, әве рʹастийе ԛайим һʹәмез дькьм.

^ абз. 17 Сәва кӧ һе зедә пебьһʹәсьн дәрһәԛа нишанед рʹожед ахьрийе йане зәманед хьраб, бьньһерʹьн кʹьтеба «Чь Һин Дькә Кʹьтеба Пироз?» сәре 9 бь наве «Әм Рʹасти ль Ахьрийа ве Дьнйайе Дьжин?», йе кӧ Шәʹдед Йаһоԝа нәшьр кьрьнә, ӧса жи һун дькарьн әве ль сәр малпәра www.jw.org бь онлайн бьньһерʹьн.