Дәрбази һондоре буйин

Дәрбази навәроке буйин

Мьн хԝәш те тʹәви щаһьлед щьвате ԝәʹдә дәрбаз кьм

 КʹЬТЕБА ПИРОЗ ЖИЙИНА МӘРЬВА ДЬГӦҺЕЗӘ

Бейсбол бона Мьн Һʹәму Тьшт бу!

Бейсбол бона Мьн Һʹәму Тьшт бу!
  • САЛА БУЙИНЕ: 1928

  • ԜӘЛАТ: КОСТА РИКА

  • БӘРЕ: ӘЗ КʹӘТЬБУМ БӘР БАЙЕ СПОРТЕ У ХӦМАРЕ

ЖИЙИНА МЬНӘ БӘРЕ

Әз мәзьн бумә бажарәкида, дь Коста-Рикайеда алийе рʹӧһьлате. Һʹәйшт зарʹед де-баве мьн һәбун у әз йе һʹәфта бум. Чахе әз һʹәфт сали бум, баве мьн мьр. Ләма жи дийа мьн әм тʹәне мәзьн кьрьн.

Бейсбол * тʹьме пʹарәкә жийина мьн бу. Жь бьчʹуктайе мьн әв спорт пʹьрʹ һʹьз дькьр. Чахе әз ԝәкә 20 сали бум, әз кʹәтьмә нава кʹома листьквана, йед кӧ вәк мьн спорте һʹьз дькьрьн. Чәнд ԝәхт шунда мәрьвәки әз тʹәглиф кьрьм кӧ дь Никарагӧайеда кʹома професйоналада бьлизьм. Сьһʹәт-ԛәԝата дийа мьн сьст бу, у әз мьԛати ԝе дьбум, ләма жи мьн нәдьхԝәст дь Никарагӧайеда бьжим. У мьн сафи кьр әве тʹәглифе инкʹар кьм. Һьнә ԝәʹдә шунда мәрьвәки дьн жи әз тʹәглиф кьрьм, кӧ дь кома мьләтийейә бейсболеда сәва Коста Рикайе бьлизьм. Әв кʹом жь листькванед бьжарти бу йед кӧ спорт һʹьз дькьрьн, у әз жи ԛайил бум. Әз жь сала 1949 һʹәта 1952 ве кʹома мьләтийеда бум, у мьн чәнд листькада дь Кубайеда, Мәксикайеда у Никарагӧайеда дьлист. Әз листькванәки пʹьрʹ баш бум у мьн ԛә шашийа жи бәрнәдьда, чьмки мьн гәләк баш дьлист. Гәләк мьн хԝәш дьһат, чахе әʹлаләте бь пʹайа дькьрә гази у наве мьн һьлдьда!

Йазьх, ле мьн ӧса жи бь жийинәкә бенамуси дьжит. Рʹаст ә мьн тʹәви кәчʹькәке дьжит, ле әз тʹьме тʹәви кʹолфәтед майин жи бум. Мьн гәләк ичʹкә вәдьхԝар. Рʹожәке әз жь ичʹке ӧса геж бум, кӧ сьвәтьре чахе мьн чʹәʹве хԝә вәкьр, ԛә нәдьһатә бира мьн әз чаԝа һатьмә мал! Мьн ӧса жи һʹьз дькьр хӧмар бьлизьм. Мәсәлә, мьн домино сәр пʹәра дьлист у латарейа жи дькʹьри.

Чахе мьн бь жийинәкә ӧса дьжит, ԝан чаха дийа мьн ида Шәʹде Йаһоԝа бу. Әԝ дьхәбьти кӧ баԝәрийа хԝә бькә дьле мьн, ле пешийе щәм ԝе дәрнәдькʹәт, чьмки әз педа нав спортеда бум. Сәр листьке ԝәʹде нан-хԝарьне, мьн нәдьхԝар, чьмки тʹәхмин нәдькьр кӧ әз бьрчимә! Һʹьше мьн тʹәне сәр листьке бу. Бейсбол бона мьн һʹәму тьшт бу!

 Чахе әз 29 сали бум, ԝәʹде листькәке гава мьн дьхԝәст тʹопе бьгьрьм, мьн зийана мәзьн станд. Ле чахе әз рʹабум сәр ньга, мьн ида нькарьбу рʹьнд бьлизьм. Ле диса жи әз бейсболева гьредайи бум, мәсәлә незики мала хԝә мьн листькван һазьр дькьрьн.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ

Дь сала 1957-да әз һатьм тʹәглифкьрьне ль сәр щьвата мәзьнә Шәʹдед Йаһоԝа, йа кӧ дәрбаз дьбу ль ве стадийоне кʹидәре кӧ мьн бейсбол дьлист. Чахе мьн щийе хԝә гьрт, мьн дина хԝә дайе, кӧ фьрԛийа мәзьн һәйә ортʹа рʹабун-рʹуньштандьна Шәʹдед Йаһоԝайә маԛули у әʹлаләта кӧ тʹьме ԝәʹде листька бейсболе, жь щийе хԝә дькьрнә ԛалмә-ԛалм. Чь кӧ мьн сәр ве щьвата мәзьн дит, әз һелан кьрьм кӧ һинбуна Кʹьтеба Пироз тʹәви Шәʹдед Йаһоԝа дәрбаз бьм у тʹьме сәр щьватед ԝан һазьр бьм.

Әз гәләк әʹщебмайи дьмам чахе дәрһәԛа гәләк һинкьрьнед Кʹьтеба Пироз педьһʹәсийам. Бәʹса хәбәре, Иса пʹехәмбәрти кьр кӧ рʹожед ахьрийе шагьртед ԝи, ԝе ль нав тʹәмамийа дьнйайе, мьзгинийа хере йа Пʹадшатийа Хԝәде әʹлам кьн (Мәтта 24:14). Әз ӧса жи пеһʹәсийам, кӧ Мәсиһйед рʹаст бепʹәрә хьзмәт дькьн. Иса гот: «Ԝә беһәԛ стандийә, беһәԛ жи бьдьн» (Мәтта 10:8).

Ԝәʹде һинбуне, мьн һьмбәри һәв дькьр әв чь кӧ Кʹьтеба Пироз дьбежә у чь кӧ Шәʹдед Йаһоԝа дькьн. Мьн гәләк ԛәдьре ԝан гьрт, кӧ әԝана ӧса бь хирәт ԛәԝат дьданә хәбате сәва кӧ мьзгинийа хере йа Пʹадшатийа Хԝәде ль тʹәмамийа дьнйайе бәла кьн. Мьн дит кӧ чаԝа әԝана бь һазьрбун әв тʹәмийа Иса тиньн сери. Чахе мьн Марԛос 10:21 хԝәнд у дит тʹәглифа Иса кӧ дьбежә «пәй мьн ԝәрә», мьн хԝәст бьбьмә Шәʹде Йаһоԝа.

Ԝәʹдә мьнрʹа лазьм бу, сәва кӧ бь һазьрбун гьлийе Иса биньм сери. Мәсәлә нава гәләк салада һәр һʹәфти мьн сәр «бәхт» латарейа дьлист. Жь Кʹьтеба Пироз әз пеһʹәсийам кӧ Хԝәде мәрьвед тьма сущдар дькә у ԝан мәрийа жи, йед кӧ сәре хԝә бәр хӧдане Йазийе демәк бәр хӧдане Бәхт датанин (Ишайа 65:11; Колоси 3:5). Ләма жи мьн сафи кьр хӧмаре бьһельм. Чахе мьн листька латарейе һишт, паши ԝе йәке һәма һʹәфтийа пешьнда «бәхте» мьн лехьст, у һәжмара латарейа мьн бьр! Мәрьва ԛәрфе хԝә мьн дькьрьн, чьмки ль ве һʹәфтийе мьн ида нәдьлист у әԝана гәләк сәр мьн һʹӧкӧм дькьрьн сәва кӧ әз диса дәстпекьм бьлизьн, ле әз нәкʹәтьм бәр байе ԝан. Паши ԝе йәке мьн ида бь тʹәмами дәст жь хӧмаре бәрда.

Һәма ԝе рʹоже чахе әз ль сәр щьвата мәзьнә Шәʹдед Йаһоԝа һатьмә ньхӧмандьне, щерʹьбандьнәкә дьн рʹасти мьн һат (Әфәси 4:24). Ве еваре әз вәгәрʹийамә отеле, кʹидәре кӧ әз дьмам у мьн дит ԝәки әԝ кәчʹька кӧ мьн бәре тʹәви ԝе ԝәʹдә дәрбаз дькьр, бәр дәре отʹаха мьн һивийа мьн ә. Әԝе готә мьн: «Ԝәрә Самуйел, әм ԝәʹдәки рʹьнд дәрбаз кьн!» Ле мьн дәрбера гот: «На!» Мьн кьрә бира ԝе, кӧ ньһа әз бь нормед Кʹьтеба Пирозә нав-намусийе дьжим (1 Корьнтʹи 6:18). Әԝе гот: «Ижар чь?» Әԝе әв нормед нав-намусийе йа Кʹьтеба Пироз бәр тʹӧ тьшти һʹәсаб нәкьр у ль сәр йа хԝә дьсәкьни, сәва кӧ әм диса һәләԛәтийа хԝә тʹәзәда чекьн. Әз зьвьрим кʹәтьмә отʹаха хԝә у дәри жи пәй хԝә дадам. Иро әз дькарьм бь шабунәкә мәзьн бежьм, кӧ жь сала 1958 чахе әз бумә Шәʹде Йаһоԝа, һьнгеда әз бь амьни хԝә ль ԝан гӧһастьна дьгьрьм, чь кӧ мьн жийина хԝәда кьрийә.

ЧЬ КʹАР МЬН СТАНД

Әз дьфькьрим кʹьтебәке бьньвисьм дәрһәԛа ԝе йәке, кӧ чь кʹар мьн станд чахе хԝә ль рʹебәрийа Кʹьтеба Пироз гьрт! Мәсәлә, кʹарәкә мәзьн әԝ ә, кӧ гәләк һәвалед мьнә амьн һәнә, нета жийина мьн һәйә у әз бь рʹасти жи бәхтәԝар ьм.

Һʹәта ньһа әз бейсболе һʹьз дькьм, ле мьн ньһерʹандьна хԝә гӧһаст. Дь бейсболеда мьн нав-дәнг у пʹәрә ԛазанщ дькьр, ле әв һʹәму тьшт ԝәʹдәлу бу. Ле достийа мьн тʹәви Хԝәде у бьратийа һʹәмдьнйайе ԝе һʹәрһәйи бькʹьшинә. Кʹьтеба Пироз дьбежә: «Дьнйайе жи дәрбаз бә, һавьжийа ԝе жи, ле әԝе кӧ әʹмьре Хԝәде дьԛәдинә ԝе һʹәта-һʹәтайе бьминә» (1 Йуһʹәнна 2:17). Ньһа Йаһоԝа у щьмәʹта ԝи, сәва мьн һʹәму тьшт ә!

^ абз. 9 Бейсбол щурʹәки спорте йә, кʹидәре кӧ дӧ кʹом дьлизьн. Һәр кʹомеда нәһә листькван ьн. Дь бейсболеда листькване кʹомәки тʹопа гровәрә бьчʹук давежә у листькване кʹома дьн жи, бь гопаләки ве тʹопе дьхә.