Дәрбази һондоре буйин

Дәрбази навәроке буйин

Рʹазибуне Бьдьнә Кʹьфше бона Пʹешкʹеша Хԝәде кӧ «Найе Готьн»

Рʹазибуне Бьдьнә Кʹьфше бона Пʹешкʹеша Хԝәде кӧ «Найе Готьн»

«Шькьр жь Хԝәде бона ԝе дайина ԝийә кӧ найе готьн» (2 КОРН. 9:15).

КʹЬЛАМЕД: 53, 18

1, 2. а) Чь йә пʹешкʹеша Хԝәде кӧ «найе готьн»? б) Дь ԝе тʹемайеда әме кʹижан пьрса шеԝьр кьн?

ЧАХЕ Йаһоԝа Кӧрʹе хԝәйи тайе тʹәне шандә сәр әʹрде, бь ԝе йәке Әԝи жь һʹьзкьрьне пʹешкʹешәкә лапә мәзьн да мә! (Йуһʹн. 3:16; 1 Йуһʹн. 4:9, 10). Паԝлосе шанди әԝ пʹешкʹеша Хԝәде нав кьр ча пʹешкʹеша кӧ «найе готьн» (2 Корн. 9:15). Чьрʹа Паԝлос әԝ гьли да хәбате?

2 Паԝлос заньбу кӧ Хԝәде ԝе бь сайа ԛӧрбана Мәсиһ һʹәму созед хԝәйи ԛимәт әʹсә бинә сери. (Бьхунә 2 Корьнтʹи 1:20.) Әԝ пʹешкʹеша Хԝәде кӧ «найе готьн» дьдә кʹьфше рʹәʹм у һʹьзкьрьна ԝи, кʹижан кӧ әԝи бь сайа ԛӧрбана Иса мәрʹа да кʹьфше. Бь рʹастийе әԝ пʹешкʹеш ӧса гьринг ә, кӧ мәрьв нькарә ԛимәте ԝе бь хәбәра бежә. Әԝ пʹешкʹеша ԛимәт ча гәрәке сәр мә һʹӧкӧм бә? У әԝ пʹешкʹеш гәрәке мә һелан кә кӧ әм чь бькьн, чахе һазьр дьбьн сәва Биранина мьрьна Мәсиһ, 23 Адаре рʹожа Чаршәме сала 2016?

 ПʹЕШКʹЕША ХԜӘДЕЙӘ ԚИМӘТ

3, 4. а) Чахе кәсәк пʹешкʹеше дьдә тә, тӧ чь ль сәр хԝә тʹәхмин дьки? б) Пʹешкʹешәкә мәзьн ча дькарә әʹмьре тә бьгӧһезә?

3 Әм бь шабуне тʹьжә дьбьн, чахе кәсәк пʹешкʹеше дьдә мә. Һәнә пʹешкʹешед ӧса, дькарьн гәләк ԛимәт бьн бона мә у дькарьн әʹмьре мә жи бьгӧһезьн. Мәсәлә, бьдә бәр чʹәʹве хԝә кӧ тӧ рʹасти дәрәщәкә хьраб һати, чьмки тә нәһәԛ дькьн дь шьхӧле хьрабда. Ле ньшкева ӧса дьԛәԝьмә кӧ мәрьвәк кʹижан кӧ тӧ ԛә ԝи нас наки, һазьр ә нәһәԛийа тә һьлдә сәр хԝә. Һьн жи әԝ һазьр ә бона тә бьмьрә! Кьред ԝи мәрьви ԝе чаԝа сәр тә һʹӧкӧм бьн?

4 Әԝ һʹьзкьрьна мәзьн кӧ һьндава тә данә кʹьфше, ԝе тә һелан кә ԝәки әʹмьре хԝә бьгӧһези. Дьбәкә тӧйе һе мәрʹд би у бь һʹьзкьрьне тʹьжә би һьндава мәрьва, у һәла һе һеса бьбахшини ԝан кʹе тә дьхәйидинә. У дьбәкә тӧ тʹәмамийа әʹмьре хԝәда бьхԝази рʹазибуна хԝә нишан ки ԝи мәрьвирʹа, кʹижани кӧ әʹмьре хԝә дәԝса тә да.

5. Чаԝа пʹешкʹеша Хԝәдейә кʹьрʹин жь пʹешкʹешед дьн ԛимәттьр ә?

5 Әԝ пʹешкʹеша кӧ Йаһоԝа бь сайа Мәсиһ да мә, һе ԛимәттьр ә жь ԝе пʹешкʹеша кӧ дь мәсәла жорьнда һатә гьли кьрьне (1 Пәт. 3:18). Ԝәрә әм пебьһʹәсьн чьрʹа. Чьмки гӧнә дәрбази мә буйә, ләма әм дьмьрьн (Рʹом. 5:12). Ләма Йаһоԝа Кӧрʹе хԝә Иса, бь һʹьзкьрьне шандә сәр әʹрде, сәва кӧ «бона һʹәмуйа мьрьн бьдита» (Ибрн. 2:9). Йаһоԝа нә кӧ тʹәне дькарә әʹмьре мә хьлаз кә, чаԝа кӧ мәсәла жореда һатә гьликьрьне. Ле әԝи ӧса бь сайа ԛӧрбана Иса һʹим дани, сәва кӧ мьрьне бьдә һьлдане һʹәта-һʹәтайе (Иша. 25:7, 8; 1 Корн. 15:22, 26). Мәрьвед кӧ гӧмана ԝан жийина сәр әʹрде йә, ԝе һʹәта-һʹәтайе бьн Пʹадшатийа Хԝәдеда бьжин. Ле йед рʹункьри ԝе Пʹадшатийа Хԝәдеда тʹәви Иса Пʹадшатийе бькьн (Рʹом. 6:23; Әʹйан. 5:9, 10). Әԝ пʹешкʹеша жь Йаһоԝа диса кʹижан кʹәрәма тинә?

6. а) Һун һивийа кʹижан кʹәрәмед Йаһоԝа нә? б) Гьли кьн дәрһәԛа се тьшта кʹижан кӧ пʹешкʹеша Хԝәде мә һелан дькә кӧ бькьн.

6 Пʹешкʹеша Йаһоԝада ӧса жи әԝ ә, кӧ әԝ ԝе һʹәму нәхԝәшийа бьдә һьлдане, дьнйайе бькә щьнәт, у мьрийа рʹакә (Иша. 33:24; 35:5, 6; Йуһʹн. 5:28, 29). Әм Йаһоԝа у Кӧрʹе ԝи гәләк һʹьз дькьн, у әԝе пʹешкʹеша кӧ «найе готьн» гәләк ԛимәт дькьн. Ле пьрсәк дьминә: «Һʹьзкьрьна Хԝәде мә бәрбь чь һелан дькә?» Ԝәрә әм шеԝьр кьн кӧ ча һʹьзкьрьна Хԝәде мә һелан дькә кӧ әм 1) пʹегәһа Исада һәрʹьн, 2) һʹьзкьрьне бьдьнә кʹьфше һьндава хушк-бьра, у 3) бь дьл бьбахшиньнә мәрьва.

«ҺʹЬЗКЬРЬНА МӘСИҺ МӘ ДЬДӘʹФИНӘ»

7, 8. Һʹьзкьрьна Иса ча гәрәке ль сәр мә һʹӧкӧм бә, у әԝ һʹьзкьрьн мә бәрбь чь һелан дькә?

7 Йа пешийе, әм гәрәке һелан бьн кӧ бона Иса бьжин. Паԝлосе шанди гот: «Һʹьзкьрьна Мәсиһ мә дьдәʹфинә, (ИМ)». (Бьхунә 2 Корьнтʹи 5:14, 15.) Паԝлос фәʹм дькьр кӧ әԝед кӧ дьшекьриньн ԛӧрбана Иса, әԝана һелан дьбьн кӧ бона Иса бьжин. Һәрге әм жи бь тʹәмами фәʹм дькьн ԛимәте ԝе йәке кӧ чь Йаһоԝа бона мә кьр, әԝ йәк ԝе мә һелан кә кӧ бь дьл у щан пʹегәһа Исада һәрʹьн. Ле әм ча дькарьн әве йәке бькьн?

8 Әԝед кӧ Йаһоԝа һʹьз дькьн тенә дәʹфандьне, демәк һеланкьрьне кӧ чʹәʹв бьдьнә Иса у пʹегәһа ԝида һәрʹьн (1 Пәт. 2:21; 1 Йуһʹн. 2:6). Чахе әм гӧһдарийа Йаһоԝа у Иса дькьн, бь ԝе йәке әм һʹьзкьрьна хԝә һьндава ԝан избат дькьн. Иса гот: «Әԝе кӧ тʹәмийед мьн ԛәбул дькә у ԝан хԝәй дькә, әԝ ә йе кӧ мьн һʹьз дькә. У әԝе кӧ мьн һʹьз дькә, әԝе жь алийе Баве мьнда бе һʹьзкьрьне. Әзе  жи ԝи һʹьз бькьм у хԝә ԝива әʹйан кьм» (Йуһʹн. 14:21; 1 Йуһʹн. 5:3).

9. Әм рʹасти кʹижан щерʹьбандьна тен?

9 Ԝәʹде незикайа Биранине, гәләк фәрз ә кӧ әм бьфькьрьн сәр ԝе йәке кӧ әм ча дьжин. Пьрсе бьдә хԝә: «Дь кʹижан тьштада әз ида ньһа чʹәʹв дьдьмә Иса? У диса чьда әз гәрәке һе баш чʹәʹв бьдьмә ԝи?» Гәләк фәрз ә кӧ әм пьрсед ӧса бьдьнә хԝә, чьмки әм дьжин дьнйа хьрабда у әԝ дьнйа дьхԝазә ԝәки әм бьжин ӧса, чаԝа кӧ әԝ дьжи (Рʹом. 12:2). Һәрге әм фәсал ниньн, әм дькарьн пәй философийа ве дьнйайе һәрʹьн, у һәла һе жи шькьрийе бьдьнә ԝан мәрьвед навдар дь спортеда йан бизнеседа (Колс. 2:8; 1 Йуһʹн. 2:15-17). Ле әм чь гәрәке бькьн сәва кӧ жь ԝе йәке хԝә дур бьгьрьн?

10. Чь пьрса әм дькарьн бьдьнә хԝә ԝәʹде незикайа Биранине, у щаба ԝан пьрса мә бәрбь чь дькарьн һелан кьн? (Бьньһерʹә шькьле әʹԝльн.)

10 Әм дькарьн ԝәʹде незикайа Биранине, диса щарәке бьфькьрьн сәр кʹьнщхԝәкьрьна хԝә, сәр ԝе йәке кӧ әм чь кʹьлама дьбьһен, чь филма дьньһерʹьн, у чь һәйә дь таблет, тʹел, у компотәред мәда. Дина хԝә бьдә сәр кʹьнще хԝә у пьрсе бьдә хԝә: «Һәрге әз бьчума ль ԝи щийи кʹидәре кӧ Иса йә, мьне жь бо кʹьнщхԝәкьрьна хԝә шәрм бькьра?» (Бьхунә 1 Тимотʹейо 2:9, 10.) «Һәрге әз әԝе кʹьнще хԝә кьм, бь ԝе йәке әзе бьдьмә кʹьфше кӧ әз пәйчуйе Иса мә?» Әм ӧса жи ԝәʹде жьбартьна филма у мусикайе дькарьн пьрсед ԝи щурʹәйи бьдьнә хԝә: «Гәло Иса ԝе бьньһерʹийа йан бьбьһиста әв филм йан кʹьлам? Һәрге Иса бьдита әԝ чь кӧ һәйә тʹел у таблета мьнда, жь бо ԝе йәке мьне шәрм кьра? Йан жи ԝе мьнрʹа чәтьн бә, ԝәки Исарʹа шьровәкьм кӧ чьрʹа мьн хԝәш те ве видео листьке бьлизьм?» Һʹьзкьрьна мә һьндава Йаһоԝа гәрәке мә һелан кә, кӧ әм инкʹар кьн ԝан һʹәму тьшта чь кӧ шагьртед Исарʹа нәщайиз ьн, дьхԝази әԝ тьшт чьԛас жи ԛимәт бьн (Кʹар. Шанд. 19:19, 20). Мә ԝәʹде тʹәсмилкьрьна хԝә соз да Йаһоԝа, ԝәки әме ида нә кӧ бона хԝә бьжин ле бона Иса. Ләма жи әм гәрәке хԝә жь ԝан тьшта дур бьгьрьн чь кӧ дькарә рʹе мә бьгьрә у нәһелә кӧ пʹегәһа Исада һәрʹьн (Мәт. 5:29, 30; Фили. 4:8).

11. а) Һʹьзкьрьна мә һьндава Йаһоԝа у Иса бәрбь чь мә һелан дькә? б) Һʹьзкьрьна мә ча дькарә мә һелан кә кӧ дь щьватеда али хушк-бьра бькьн?

11 Һʹьзкьрьна мә һьндава Иса, мә һелан дькә кӧ хьзмәткьрьнеда у һазьркьрьна шагьртада әм бь дьл кʹар бькьн (Мәт. 28:19, 20; Луԛа 4:43). Ԝәʹде мәһа Биранине әм дькарьн чаԝа пешәнге кʹомәкдар 30 йан 50 сьһʹәта хьзмәт кьн. Тӧ дькари дәрәще хԝә ӧса сафи ки, сәва кӧ ԝе мәһеда хьзмәт ки чаԝа пешәнге кʹомәкдар? Мере би, кʹижан кӧ 84 сали йә, жь бо әʹмьре мәзьн у кемасийа сьһʹәт-ԛәԝате, сәр хԝә гӧман нибу кӧ ԝе бькарьбә хьзмәт кә чаԝа пешәнге кʹомәкдар. Ле пешәнгед дь мьһала ԝида сафи кьрьн кӧ ԝе йәкеда аликʹарийе бьдьнә ԝи. Ԝана хәм кьрьн бона әʹрәбе у бона мьһаләкә ӧса, кʹидәре кӧ әԝ бькарьбә 30 сьһʹәте хьзмәтийа хԝә тʹәмам кә. Ле тӧ һазьр и дь ԝе йәкеда аликʹарийе бьди кәсәки дь щьвата хԝәда, сәва кӧ әԝ жи шабуне бьстинә кӧ ча пешәнге кʹомәкдар хьзмәт кә ԝәʹде мәһа Биранине? Рʹаст ә, һәр кәс жь мә нькарә ча пешәнге кʹомәкдар хьзмәт кә. Ле йәкә, әм дькарьн һʹәму ԛәԝата хԝә у ԝәʹде хԝә бьдьнә хәбате, сәва кӧ һе зедә пәсьне Йаһоԝа бьдьн. Чахе әм ӧса дькьн, әм дьдьнә кʹьфше кӧ әм ԝәк Паԝлос бь һʹьзкьрьна Иса һатьнә һеланкьрьне. Ле һʹьзкьрьна Хԝәде диса бәрбь чь мә һелан дькә?

 ӘМ ГӘРӘКЕ ҺӘВДӦ ҺʹЬЗ БЬКЬН

12. Һʹьзкьрьна Хԝәде мә бәрбь чь һелан дькә?

12 Йа дӧда, һʹьзкьрьна Хԝәде гәрәке мә һелан кә, кӧ әм һьндава хушк-бьра һʹьзкьрьне бьдьнә кʹьфше. Йуһʹәнна әԝ йәк фәʹм дькьр: «Дәлално, һәгәр Хԝәде аһа әм һʹьз кьрьн, ԝәки ӧса йә гәрәке әм жи һәвдӧ һʹьз бькьн» (1 Йуһʹн. 4:7-11). Бәле, әме нькарьбьн һежайи һʹьзкьрьна Хԝәде бьн, һәрге әм хушк-бьре хԝә һʹьз нәкьн (1 Йуһʹн. 3:16). Ле ча әм дькарьн һʹьзкьрьна хԝә ԝанарʹа бьдьнә кʹьфше?

13. Әԝ йәк кӧ Иса мәрьвед бәләнгаз һʹьз дькьр чь мәсәлә йә бона мә?

13 Бьфькьрьн дәрһәԛа мәсәла Иса. Иса ԝәʹде хьзмәткьрьна хԝә сәр әʹрде, дина хԝә дьда ль сәр илаһи мәрьвед бәләнгаз. Әԝи мәрьвед тʹопал, кәрʹ, кор у лал ԛәнщ дькьрьн (Мәт. 11:4, 5). Мәрьвед «ньфьрʹ ле» бәр чʹәʹве сәрԝеред религийа Щьһуйа рʹәш бун, ле бона Иса шабунәкә мәзьн бу кӧ мәрьвед рʹӧһʹанида бьрʹчи тʹер кә (Йуһʹн. 7:49). Иса мәрьвед бәләнгаз һʹьз дькьр у бь дьл у щан дьхәбьти кӧ бәрдәстийе ԝанарʹа бькә (Мәт. 20:28).

Тӧ дькари али хушк-бьред әʹмьрда мәзьн бьки дь хьзмәткьрьнеда? (Бьньһерʹә абзаса 14)

14. Тӧ чь дькари бьки сәва кӧ һʹьзкьрьна хԝә бьди кʹьфше һьндава хушк-бьра?

14 Ԝәʹде незикайа Биранине мәщала мә һәйә чʹәʹв бьдьнә Иса. Тӧ дькари ԝәʹдә бьвини сәва кӧ дина хԝә бьди сәр хушк-бьред дь щьвата хԝәда. Һәрге тӧ ӧса бьки, тӧйе бьвини кӧ чаԝа әԝ мәрьв жь һʹьзкьрьна тә кʹаре дьстинә. Дьбәкә һәнә хушк-бьред әʹмьрда мәзьн, кʹижанарʹа кӧ аликʹари лазьм ә. Тӧ дькари сәрики ԝан хи? Тӧ дькари хԝарьне ԝанарʹа бини, дь мала ԝанда аликʹарийе бьди ԝан, али ԝан бьки кӧ бенә ль сәр щьвате, у ԝана тʹәглиф ки, кӧ тʹәви тә дәрен хьзмәтийе бькьн? (Бьхунә Луԛа 14:12-14.) Әм гәрәке изьне бьдьн, кӧ һʹьзкьрьна Хԝәде али мә бькә, сәва кӧ һʹьзкьрьна ӧса һьндава хушк-бьра бьдьнә кʹьфше.

ДЬЛРʹӘʹМИЙЕ БЬДӘ КʹЬФШЕ ҺЬНДАВА ХУШК-БЬРА

15. Әм гәрәке чь фәʹм бькьн?

15 Йа сьсийа, һʹьзкьрьна Йаһоԝа гәрәке мә һелан кә, кӧ бьбахшиньнә хушк-бьред хԝә. Чаԝа зӧрʹәтед Адәм, һәр кәс жь мә гӧнә у мьрьн сьтанд. Тʹӧ кәс жь мә нькарә бежә, «кӧ әз һʹәԝще кʹьрʹине ниньм». Хьзмәткʹаред Хԝәдейи амьн жи һʹәԝще бахшандьна Йаһоԝа нә, кʹижан кӧ бь сайа кʹьрʹина Иса йә. Әм һәр кәс гәрәке фәʹм бькьн кӧ дәйне мәйи  гьран мәрʹа һатийә бахшандьне. Әԝ йәк чьрʹа фәрз ә? Щаба сәр ԝе пьрсе әме бьвиньн жь мәсәләкә Иса.

16, 17. а) Әм чь һин дьбьн жь ве мәсәла Иса, демәк дәрһәԛа пʹадше у хӧламе? б) Чахе әм дьфькьрьн дәрһәԛа ԝе мәсәле кӧ Иса гьли кьр, әԝ йәк мә бәрбь чь һелан дькә?

16 Иса гьли кьр, кӧ пʹадшаки бахшандә хӧламе хԝә дәйне ԝийи мәзьн ԝәкә 10 000 таланта, йан 60 000 000 динар. Ле әԝи хӧлами кӧ дәйне ԝийи мәзьн жерʹа һатә бахшандьне, хԝәха нәбахшандә һәвале хԝә, кʹижан кӧ дәйндаре ԝи бу ԝәкә 100 динара. Пʹадша гәләк һерс кʹәт чахе пеһʹәсийа, ԝәки әԝ хӧламе кӧ әԝи бь рʹәʹмти бахшанде, берʹәʹм бу һьндава һәвале хԝә. Пʹадша гот: «Хӧламе хьраб! Мьн һʹәму дәйне тә бахшандә тә, бона ԝе йәке кӧ тә лава жь мьн кьр. Ле жь тә нәдькʹәт кӧ тӧ жи ль хӧлам-һәвале хԝә бьһатайи рʹәʹме чаԝа кӧ әз тә һатьмә рʹәʹме?» (Мәт. 18:23-35). Бәле, рʹәʹмтийа ԝи пʹадшайи гәрәке әԝ хӧлам һелан кьра, кӧ әԝи жи бь рʹәʹмтийе бьбахшанда һәвале хԝә. Ле һʹьзкьрьн у рʹәʹмтийа Йаһоԝа гәрәке мә бәрбь чь һелан кә?

17 Ԝәʹде мәһа Биранине мәрʹа мәщал те дайине, сәва кӧ бьфькьрьн сәр ԝе йәке һәла дьле мәда хәйд һәйә һьндава хушк-бьра. Һәрге дьле мәда хәйд һәйә, һьнге ԝәʹдәки гәләк баш ә кӧ әм чʹәʹв бьдьнә Йаһоԝа дь бахшандьнеда (Нәһәм. 9:17; Зәб. 86:5). Һәрге әм жь Йаһоԝа рʹази бьн жь бо ԝе йәке кӧ әԝи дәйне мәйи гьран бахшандә мә, һьнге әме жи бьхԝазьн бь дьл бьбахшиньнә хушк-бьра. Һәрге әм йед дьн һʹьз нәкьн у нәбахшиньнә ԝан, әме нькарьбьн һʹьзкьрьн у бахшандьна Хԝәде бьстиньн (Мәт. 6:14, 15). Рʹаст ә бахшандьн ԝе нькарьбә бьгӧһезә тьштед дәрбазбуйи, йе кӧ дьле мә ешандьн, ле әԝ йәк ԝе әʹсә ахьрийа мә дь алийе башда бьгӧһезә.

18. Һʹьзкьрьна Хԝәде ча али хушкәке кьр кӧ сәбьре бьдә кʹьфше һьндава хушкәкә дьн?

18 Гәләк жь мәрʹа дькарә чәтьн бә «сәбьр кьн» хушк-бьред хԝә. (Бьхунә Колоси 3:13, 14; Әфәси 4:32.) Мәсәлә, Лили хушка азәп ә, әԝе бь һазьрбуне али хушкәкә би дькьр, наве кʹижане Карол [1] бу. Лили әԝ хушк дьбьрә ԝе дәре, кʹидәре кӧ жерʹа лазьм бу, чь кӧ жерʹа лазьм бу дькʹьрʹи, у диса гәләк тьштед дьнда али ԝе дькьр. Лили чьԛас тьштед баш жи дькьр, ле йәкә Кароле дькьрә кӧтә-кӧт, ләма жи һеса нибу перʹа зьман бьдита. Ле йәкә Лилийе дина хԝә дьда сәр һʹӧнӧред Каролейә баш. Әԝе бәрдәԝам дькьр пәй ԝе бьньһерʹә һʹәта Карол гьран нәхԝәш кʹәт у мьр. Лили дьбежә: «Әз һивийа ԝе йәке мә, кӧ кʹәнге Карол жь мьрьне рʹабә. Дьхԝазьм ԝе бьвиньм чахе әԝ ԝе беԛьсур бә». Бәле, һʹьзкьрьна Хԝәде дькарә мә һелан кә, кӧ әм сәбьре бьдьнә кʹьфше һьндава хушк-бьра, у һивийа ԝе рʹоже бьн чахе гӧнә ида тʹӧнә бә.

19. Пʹешкʹеша Хԝәде кӧ «найе готьн» гәрәке бәрбь чь ԝе тә һелан кә?

19 Мә бь рʹастийе пʹешкʹеша ԛимәт жь Йаһоԝа сьтанд, йа кӧ «найе готьн». Ԝәрә әм әԝе пʹешкʹеше һʹәсаб нәкьн ча тьштәки беԛимәт. Дәԝса ԝе йәке, илаһи мәһа Биранине бәрдәԝам кьн бь рʹазибуне бьфькьрьн дәрһәԛа ԝе йәке чь кӧ Йаһоԝа у Иса бона мә кьрьн. Бәле, бьра һʹьзкьрьн мә һелан кә кӧ пʹегәһа Исада һәрʹьн, һʹьзкьрьне һьндава хушк-бьра бьдьнә кʹьфше, у бь дьл бьбахшиньнә ԝан.

^ [1] (абзаса 18) Һьнә нав дь ԝе тʹемайеда һатьнә гӧһастьне.