Дәрбази һондоре буйин

Дәрбази навәроке буйин

Алиса

Әԝана бь Рʹәзәдьли Хьзмәт Дькьн: Ль Тʹьркйәйе

Әԝана бь Рʹәзәдьли Хьзмәт Дькьн: Ль Тʹьркйәйе

МӘСИҺИЙЕД ԚЬРʹНА йәкеда алийе хԝәда һәр тьшт дькьрьн, сәва «мьзгинийа Пʹадшатийе» бьгьһижә гәләк мәрьва (Мәт. 24:14). Һьнәк жь ԝан сәва ве йәке һәла һе чубунә ԝәлатед хәрибда жи. Бәʹса хәбәре, Паԝлосе шанди чу ԝи щийи, кʹидәре кӧ Тʹьркйәйа иройин ә. Ль ԝедәре ԝәʹде рʹеԝитийа хԝәйә мисйонерти, әԝи бь хирәт мьзгини бәла дькьр. * Паши ԝәкә 2 000 сала, сала 2014-да, Тʹьркйәйеда бона бәлакьрьна мьзгинийе диса кампанйа мәзьн дәстпебу. Ле гәло чьрʹа әв кампанйа һатә сазкьрьне? У кʹе нава ве кампанйайеда бу?

«ӘВ ЧЬ ДЬԚӘԜЬМӘ?»

Тʹьркйәйеда 2 800 зедәтьр мьзгинван һәнә, ле һәжмара мәрьва ԝедәре 79 милйон ә. Әв те һʹәсабе ԝәки жь ԝәкә 28 000 мәрьва 1 мьзгинван ә. Бәле, ча те кʹьфше шьхӧл гәләк ә, ле мьзгинван һьндьк ьн у перʹа нагьһиньн гәләк мәрьварʹа мьзгинийе бәла кьн. У нета ве кампанйе һәма әв бу кӧ ԝәʹдәки кьнда гәләк мәрьв мьзгинийе пебьһʹәсьн. Ԝәкә 550 мьзгинван кӧ сәр зьмане Тʹьрки хәбәр дьдьн, жь ԝәлатед майин һатьн Тʹьркйәйе у ԝәʹде кампанйе тʹәви мьзгинванед ԝедәре хьзмәт дькьрьн. Гәло әв кампанйа чь кʹар ани?

Шәʹдәтийа мәзьн һатә дайине. Щьватәкә Стәмболе ньвиси: «Чахе мәрьва әм дьдитьн, ԝана жь мә дьпьрсин: ‹Ԝьра щьвата ԝәйә мәзьнә мәхсус дәрбаз дьбә? Әм ԝә, Шәʹдед Йаһоԝа, һʹәму щийа дьвиньн!›» Щьватәке жи, жь шәһәре Измире ньвиси: «Мерькәк кӧ щийе таксийада дьхәбьти, незики рʹуспийе щьвата ԝе мьһале бу у жь ԝи пьрси: ‹Әв чь дьԛәԝьмә? Ча әз дьвиньм, ԝә шьхӧле хԝә һе мәзьн кьрийә?›» Бәле, әв кампанйа кʹәтә чʹәʹва!

Стефен

Хушк-бьред кӧ жь ԝәлатед хәриб һатьн, жь ве кампанйе шабунәкә мәзьн стандьн. Стефен, йе кӧ жь Дәнмарке йә, гот: «Һәр рʹож, мьн ԝан мәрьварʹа мьзгини гьли дькьр, йед кӧ ԛә дәрһәԛа Йаһоԝа нәбьһистьбун. Мьн бь рʹастийе мәрьварʹа наве Йаһоԝа дьда наскьрьне». Жан-Девид кӧ жь Франсайе йә, ньвиси: «Мә сәр кʹучәке бь сьһʹәта хьзмәт дькьр. Әԝ ӧса баш бу! Һʹәчʹи зәʹф мәрьв дәрһәԛа Шәʹдед Йаһоԝа ньзаньбун. Дькарьм бежьм, ԝәки бәр һәр дәрики, мә тʹәви хԝәйе мале хәбәр дьда, видео нишан дькьр, у әʹдәбйәт жи дьһишт».

Жан-Девид (ортʹеда)

 Нава дӧ һʹәфтийада, 550 мьзгинван кӧ сәва кампанйе һатьбун Тʹьркйәйе, ԝәкә 60 000 әʹдәбйәт бәла кьрьн! Бәле, әве кампанйайе рʹасти жи шәʹдәтикә мәзьн да.

Мьзгинван һе хирәт бунә. Әв кампанйа мәхсус, гәләк баш һʹӧкӧм бу сәр хушк-бьред Тʹьркйәйе. Гәләк жь ԝана хԝәрʹа нет данин хьзмәт кьн ча хьзмәткʹаред һәртʹьм. У бь рʹастийе, нава 12 мәһада паши ве кампанйе, һәжмара пешәнга ль Тʹьркйәйеда сәр 24 сәләфа зедә бу.

Ширин

Әв хушк-бьред кӧ жь ԝәлатед хәриб һатьбун, гьли кьрьн кӧ чаԝа әв кампанйа сәр хьзмәтийа ԝан һʹӧкӧм бу чахе әԝана вәгәрʹийан ԝәлатед хԝә. Ширин, хушкәкә жь Алманйайе, ньвиси: «Хушк-бьред жь Тʹьркйәйе нәформал гәләк һеса хьзмәт дькьрьн. Ле мьн шәрм дькьр у ләма мьнрʹа чәтьн бу нәформал мьзгинийе бәла кьм. Ле спас ве кампанйа мәхсусрʹа, ӧса жи мәсәла хушк-бьра у гәләк дӧа али мьн кьрьн, кӧ мьн карьбу әве йәке бькьм. Мьн һәла һе метройеда жи дәрһәԛа мьзгинийе тʹәв мәрьва хәбәр дьда у бәлавок жи бәла дькьрьм! Ньһа әз ида шәрм накьм ча бәре».

Йоһанес

Йоһанес йе кӧ жь Алманйайе йә, гот: «Әз сәва хьзмәтийа хԝә, хԝәрʹа дәрса һин бумә. Хушкбьред Тʹьркйәйе чьԛас дькарьбун гәләк мәрьварʹа дәрһәԛа рʹастийе гьли дькьрьн. Ԝана тʹӧ мәщал бәрнәдьдан. Мьн жи хԝәрʹа нет дани кӧ чʹәʹв бьдьмә ԝан, чахе вәгәрʹьм Алманйайе. У ньһа әз һе зедә мәрьварʹа мьзгинийе бәла дькьм, нә кӧ бәре».

Зәйнәп

Зәйнәп кӧ жь Франсайе йә, гьлийед ӧса гот: «Әв кампанйа гәләк сәр хьзмәтийа мьн һʹӧкӧм бу. Әв али мьн кьр кӧ һе мерхас бьм у һе зедә итʹбарийа хԝә Йаһоԝа биньм».

Мьзгинван дьһа незики һәв бунә. Һʹьзкьрьн у йәкти ортʹа хушк-бьред жь щурʹә-щурʹә ԝәлата, гәләк ԝана дьлгәрм кьр. Жан-Девид бәʹса кʹижани мә жоре кьр, гот: «Мә меванһʹьзийа хушк-бьра ‹тәʹм кьр›». Паши ԝан гьлийа әԝи ӧса гот: «Ԝана әм ча һәвал у нәфәред хԝә ԛәбул кьрьн. Дәрийед мала ԝан бона мә вәкьри бун. Мьн заньбу ԝәки әм бьратийа һʹәмдьнйайе нә, у әв йәк мьн гәләк щар әʹдәбйәтед мәда жи хԝәндийә. Ле ԝәʹде ве кампанйе, мьн щара  пешьн пе чʹәʹве хԝә әв йәк дит. Әз һе фьрнаԛ бум кӧ әз жи нав щьмәʹта Йаһоԝада мә, у мьн ԝирʹа спас дькьр бона ви ԛәдьре мәзьн».

Клер (ортʹеда)

Клер кӧ жь Франсайе йә, гот: «Фьрԛи тʹӧнә әм жь кʹижан ԝәлати бун, мәсәлә Дәнмарке, Франсайе, Алманйайе, йан жи Тʹьркйәйе, әм һʹәмушк жи малбәтәк бун. Те бежи Хԝәде синоред ортʹа мьләт у ԝәлата тʹәмьз кьр».

Стефани (ортʹеда)

Стефани жь Франсайе гот: «Әве кампанйайе әм һин кьрьн, ԝәки нә кӧ әʹдәт йан зьманәк мә дькә йәк, ле һʹьзкьрьна мә һьндава Йаһоԝа».

КʹАР ПАШИ КАМПАНЙАЙЕ

Гәләк хушк-бьред жь ԝәлатед майин хԝәстьн дәрбази Тʹьркйәйе бьн, сәва кӧ аликʹарийе бьдьнә ԝи шьхӧле мәзьн, кʹижан кӧ гәрәке һе пешда һәрʹә. Гәләк ида дәрбаз бунә, у бь рʹастийе әԝана гәләк ԛимәт ьн у һежайи пʹайа нә.

Бәʹса хәбәре, кʹомәкеда кӧ жь 25 мьзгинвана йә у жь шәһәр дур ә, гәләк сала ԝедәре тʹәне рʹуспик бу. Ле бьдьнә бәр чʹәʹве хԝә кӧ хушк-бьра чьԛас шабун чахе сала 2015-да, шәш мьзгинван жь Алманйайе у Нидерланде дәрбази ве кʹоме бунә сәва аликʹарийе бьдьн.

ХЬЗМӘТКЬРЬН КʹИДӘРЕ КӦ ҺʹӘԜЩӘТИ ҺӘЙӘ

Ле гәло мьзгинван кӧ сәр һьнә ԝәʹдә дәрбази Тʹьркйәйе бунә, чь дьбежьн дәрһәԛа жийина ԝедәре? Бәле, һеса нинә ԝәлате хәрибда бьжин, ле чахе бона аликʹарийе дәрбаз дьбьн, әԝана гәләк кʹәрәма дьстиньн. Дина хԝә бьдьнә һьнәка чь готьн:

Федерико

Федерико бьраки кӧ зәԝьщи йә, 41 сали йә, жь Испанйайе дәрбази Тʹьркйәйе буйә, дьбежә: «Әз дәԝләти нажим, у әв йәк али мьн дькә ԝәки дьһа зәʹф ԝәʹде хԝә хәрщ кьм бона тьштед лапи фәрз». Әв бьра йед дьн жи һелан дькә кӧ гавәкә ӧса бавежьн. Әԝ дьбежә: «Әʹсә, әве гаве бавежьн. Чахе тӧ дәрбази ԝәлате хәриб дьби сәва кӧ али мәрьва бьки Йаһоԝа нас кьн, бь рʹастийе тӧ хԝә дьди дәстед ԝи. У тӧ пе чʹәʹве хԝә дьвини кӧ Йаһоԝа чьԛас бона тә хәм дькә».

Руди

 Руди бьраки жь Нидерланде, кӧ зәԝьщи йә, 57 сали йә, дьбежә: «Әм әшԛ-ша нә ԝәки ԝи щийи хьзмәт дькьн, кʹидәре кӧ щара пешьн әм мәрьварʹа рʹастийе гьли дькьн. Чахе әм дьвиньн кӧ дьле мәрьва чьԛас ша дьбә гава әԝана рʹастийе ԛәбул дькьн, әм шабунәкә мәзьн дьстиньн».

Саша

Саша, кӧ 42 сали йә у зәԝьщи йә, жь Алманйайе дәрбаз буйә, дьбежә: «Һәр гав чахе әз хьзмәт дькьм, әз рʹасти ԝан мәрьва тем, йед кӧ щара пешьн рʹастийе дьбьһен. Әз гәләк бәхтәԝар ьм кӧ дькарьм ԝан мәрьварʹа дәрһәԛа Йаһоԝа бежьм».

Атсуко

Атсуко, бьре мә зәԝьщи йә кӧ 36-сали йә жь Жапонйайе, гьли дькә: «Бәре мьн гәләк дьхԝәст кӧ Һармәгәдон зу бе. Ле чахе әз дәрбази Тʹьркйәйе бум, мьн фәʹм кьр кӧ чьрʹа Йаһоԝа һе сәбьр дькә у һивийе йә, у әз жь ԝи гәләк рʹази мә. Гава әз дәсте Йаһоԝа ԝи шьхӧли һʹәмдьнйайеда дьвиньм, әз һе зедә дьхԝазьм незики ԝи бьм».

Алиса, хушк жь Урьсете, дьбежә: «Хьзмәткьрьн Йаһоԝарʹа ви щурʹе хьзмәтийеда, али мьн кьр кӧ бь тʹәмами тәʹм кьм ԛәнщийа ԝи» (Зәб. 34:8). Әԝ зедә дькә: «Йаһоԝа нә кӧ тʹәне Бав ә бона мьн, ле ӧса жи Досте мьни незик ә, у щурʹә-щурʹә дәрәщада әз ԝи һе рʹьнд нас дькьм. Әʹмьре мьн бь шабуне, бь ԛәԝьмандьнед һʹәԝас у бь кʹәрәма тʹьжә йә!»

«ДИНА ХԜӘ БЬДЬНӘ ЗӘВИЙА»

Бь сайа ве кампанйа мәхсусә Тʹьркйәйеда, мьзгини гьһиштә гәләк мәрьва. Ле йәкә диса һәнә щийед ӧса, кʹидәре кӧ мьзгини һе нәһатийә бәлакьрьне. Мьзгинванед кӧ дәрбази Тʹьркйәйе бунә сәва аликʹарийе бьдьн, һәр рʹож рʹасти мәрьвед ӧса тен, йед кӧ тʹӧ щар дәрһәԛа Йаһоԝа нәбьһистьнә. Ле һун дьхԝазьн щики ӧсада хьзмәт кьн? Һәрге әре, әм ԝә һелан дькьн: «Чʹәʹвед хԝә вәкьн у дина хԝә бьдьнә зәвийа әԝ чаԝа зәр бунә» (Йуһʹн. 4:35). Һун дькарьн аликʹарийе бьдьн ԝан дәштада, кʹижан кӧ «зәр бунә»? Һәрге әре, хԝәрʹа нет дайньн у нета хԝә биньн сери. У әве йәке бир нәкьн: Чахе һун аликʹарийе бьдьн сәва мьзгини бьгьһижә «һʹәта сәре дьне», һуне гәләк у гәләк кʹәрәма бьстиньн! (Кʹар. Шанд. 1:8)

^ абз. 2 Бьньһерʹьн брошура бь наве «Бьньһерʹьн Әʹрде Баш», рʹупʹ. 32-33.