Дәрбази һондоре буйин

Дәрбази навәроке буйин

 ГОТАРА БОНА ҺИНБУНЕ 41

Ԝәʹде Тәнгасийа Мәзьн Амьн Бьминьн

Ԝәʹде Тәнгасийа Мәзьн Амьн Бьминьн

«Хӧдан һʹьз кьн, һʹәму амьнед Ԝи, Хӧдан ширһʹәлала хԝәй дькә» (ЗӘБ. 31:23).

КʹЬЛАМА 129 Һʹәта Хьлазийе Тәйах кьн

ВЕ ГОТАРЕДА *

1-2. а) Сәрԝеред дьнйайе зутьрәке ԝе дәрһәԛа чь әʹлам кьн? б) Щабед кʹижан пьрса әм гәрәке пебьһʹәсьн?

БЬДЬНӘ бәр чʹәʹве хԝә, ԝәки сәрԝеред дьнйайе әʹлам кьрьнә кӧ «дьне сәԛьрʹи у бехофи йә», чаԝа һатийә пʹехәмбәртикьрьне. Әԝана пʹайе хԝә дьдьн кӧ дьнйайеда тʹӧ щар әʹдьлайикә ӧса тʹӧнә буйә. Сәрԝеред дьнйайе ԝе бьхԝазьн кӧ әм бьфькьрьн, ԝәки әԝана дькарьн һʹәму проблемед инсанәте сафи кьн. Ле бь рʹасти әԝана нькарьн бьдьнә сәкьнандьне ԝе йәке, чь кӧ паше ԝе бьԛәԝьмә. Чьрʹа? Ль гора пʹехәмбәртийа Кʹьтеба Пироз, «хәзәбе ньшкева сәр ԝанда бе, . . . у ԝе нькарьбьн же хьлаз бьн» (1 Тʹеслн. 5:3).

2 Һәнә пьрсед фәрз, щаба кʹижана әм гәрәке пебьһʹәсьн. Чь ԝе бьԛәԝьмә ԝәʹде тәнгасийа мәзьн? Йаһоԝа дьхԝазә әм һьнге чь бькьн? У ча әм иро дькарьн хԝә һазьр кьн, сәва ԝәʹде тәнгасийа мәзьн амьн бьминьн? (Мәт. 24:21).

ЧЬ ԜЕ БЬԚӘԜЬМӘ ԜӘʹДЕ «ТӘНГАСИКӘ . . . МӘЗЬН»?

3. Ль гора Әʹйанти 17:5, 15-18, Хԝәде ԝе ча «Бабилона Мәзьн» кʹӧта кә?

3 Бьхунә Әʹйанти 17:5, 15-18. «Бабилона Мәзьн» ԝе бе кʹӧтакьрьне. Чаԝа мә жоре гот, сәрԝеред дьнйайе ԝе нькарьбьн әԝе йәке бьдьнә сәкьнандьне. Чьрʹа? Чьмки Хԝәде ԝе әве йәке бькә «дьле ԝан, кӧ хԝәстьна  ԝи бькьн». Ле хԝәстьна ԝи чь йә? Ԛьрʹа һʹәму религийа ԛәлп бинә, демәк ӧса жи Мәсиһийед ԝе дьнйайе. Хԝәде ԝе хԝәстьна хԝә бькә дьле «дәһә стьру» йед «щәʹнәԝьрәки соре гәвәз». Дәһә стьру бь симболик те һʹәсабе һʹәму сәрԝерти, кʹижан кӧ пьштгьрийа «щәʹнәԝьр» дькьн, демәк тʹәшкиләта Мьләтед Йәкбуйи (Әʹйан. 17:3, 11-13; 18:8). Чахе әԝ сәрԝер пәй религийа ԛәлп кʹәвьн, әв нишана ве йәке бә, кӧ тәнгасийа мәзьн дәстпебуйә. Әԝ ԝе ԛәԝьмандьнәкә хоф у тьрс бә, чьмки дьнйайеда ԝе сәр һʹәмуйа һʹӧкӧм бә.

4. а) Сәрԝеред дьнйайе дьбәкә кʹижан мәʹнийа бежьн, кӧ мьԛабьли религийа ԛәлп дәртен? б) Мәрьвед кӧ ԝан религийада бун, дьбәкә ԝе чь бькьн?

4 Әм ньзаньн кӧ сәрԝеред дьнйайе ԝе чь мәʹнийа бежьн, кӧ әԝана чьрʹа мьԛабьли Бабилона Мәзьн дәрдькʹәвьн. Дьбәкә әԝана ԝе бежьн кӧ жь бо религийед дьнйайе әʹдьлайи тʹӧнә у кӧ әԝана һәр гав дькʹәвьнә нава шьхӧле политикайе. Йан жи әԝана дьбәкә бежьн, кӧ әԝ тʹәшкиләтед религи гәләк дәԝләти бунә у һәбука мәзьн хԝәрʹа ԛазанщ кьрьнә (Әʹйан. 18:3, 7). Ча те кʹьфше, кʹӧтакьрьна религийа ԛәлп найе һʹәсабе, кӧ ԝе һʹәму әндәмед ԝе, бенә ԛьрʹкьрьне. Ле те кʹьфше, ԝәки әԝ сәрԝеред дьнйайе ԝе тʹәшкиләтед религи кʹӧта кьн. Гава һʹәму тʹәшкиләт ида тʹӧнә бьн, әндәмед ԝан религийа ԝе фәʹм кьн, кӧ сәрԝеред религийед ԝан, созед хԝә нәанинә сери, у әԝана дьбәкә бежьн кӧ ида тʹӧ тьштида тʹәви ԝан религийа набьн.

5. Йаһоԝа чь соз дайә дәрһәԛа тәнгасийа мәзьн, у чьрʹа?

5 Кʹьтеба Пироз әʹйан накә кӧ кʹӧтакьрьна Бабилона Мәзьн ԝе чьԛас ԝәхт бькʹьшинә, ле әм заньн кӧ әԝ ԝәʹдә ԝе кьн бькʹьшинә (Әʹйан. 18:10, 21). Йаһоԝа соз дьдә, кӧ ԝе рʹожед тәнгасийа мәзьн «кьн» кә, сәва «бьжартийед» ԝи у һʹәбандьна рʹаст, бенә хԝәйкьрьне (Марԛ. 13:19, 20). Ле Йаһоԝа чь жь мә чь дәʹԝа дькә ԝәки әм бькьн, ԝәʹде дәстпека тәнгасийа мәзьн һʹәта шәрʹе Һармәгәдоне?

 БӘРДӘԜАМ КЬН ЙАҺОԜАРʹА ХЬЗМӘТ КЬН

6. Хенщи кӧ жь религийа ԛәлп бьԛәтьн, әм гәрәке диса чь бькьн?

6 Чаԝа мә готара пешийа ԝеда дит, Йаһоԝа һивийе йә кӧ хьзмәткʹаред ԝи жь Бабилона Мәзьн дур бьн. Ле әԝ найе һʹәсабе кӧ тʹәне жь религийа ԛәлп бьԛәтьн. Әм гәрәке ԛайим хԝә ль религийа рʹаст бьгьрьн у Йаһоԝарʹа хьзмәт кьн. Ԝәрә әм дӧ тьшта шеԝьр кьн, кӧ ча ԝе йәке бькьн.

Ԝәрә әм тʹӧ щар щьвинед хԝә нәһельн, һәла һе ԝәʹде тәнгасийа жи (Бьньһерʹә абзаса 7) *

7. а) Ча әм дькарьн бәрдәԝам кьн хԝә принсипед Йаһоԝайә дәрһәԛа намусийе бьгьрьн? б) Чьрʹа Ибрани 10:24, 25-да те готьне, кӧ әм гәрәке щьватед хԝә бәрʹнәдьн, илаһи ньһа?

7 Йа пешьн, әм гәрәке ԛәԝи хԝә принсипед Йаһоԝайә дәрһәԛа намусийе, бьгьрьн. Әм тʹӧ щар гәрәке ньһерʹандьн у принсипед ԝе дьнйайе ԛәбул нәкьн. Мәсәлә, әм һәр щурʹә бенамусийе ԛәбул накьн, дькʹәвә нава ве йәке ӧса жи зәԝаща дӧ жьна йан жи дӧ мера, у рʹабун-рʹуньштьна һомосексуалийә майин (Мәт. 19:4, 5; Рʹом. 1:26, 27). Йа дӧда, әм гәрәке бәрдәԝам кьн тʹәви хушк-бьра тʹоп бьн. Әм ԝе йәке һʹәму щийа дькьн, кʹидәре те стандьн, фьрԛи тʹӧнә ода щьватада йан чахе лазьм ә малада, у һәла һе дьзикава жи. Чь жи бьԛәԝьмә, әме тʹӧ щар щьватед хԝә нәһельн. Бь рʹасти әм гәрәке һе зедә тʹәвайи тʹоп бьн, «чьмки әм дьбиньн кӧ рʹожа ахрәте незик дьбә». (Бьхунә Ибрани 10:24, 25.)

8. Ахьрийеда әʹламәтийа мә дьбәкә ча бе гӧһастьне?

8 Ԝәʹде тәнгасийа мәзьн, мьзгинийа кӧ әм иро бәла дькьн, дьбәкә ԝе бе гӧһастьне. Ньһа әм мьзгинийа дәрһәԛа Пʹадшатийе бәла дькьн у әм чьԛас дькарьн, мәрьва дькьнә шагьрт. Ле ԝи чахи әм дьбәкә ида әʹламәтийа ӧса бәла кьн, кӧ мина тәйрокед гьр бә (Әʹйан. 16:21). Дьԛәԝьмә әме әʹлам кьн, кӧ дьнйа Шәйтʹан ԝе зутьрәке кʹӧта бә. Ԝәʹдәда әме пебьһʹәсьн, кӧ әʹламәтийа мә ԝе чь бә у чаԝа әм гәрәке әве әʹламәтийе бәла кьн. Гәло әме диса ԝан метода бьдьнә хәбате, кʹижана кӧ сәд сал зедәтьр хьзмәтийеда дьдьнә хәбате? Йан жи дьбә кӧ әме һьнәк жь ԝан метода бьдьнә хәбате? Әм гәрәке һивийе бьн у бьвиньн. Чь жи һәбә, йәкә әме бь мерхаси дәрһәԛа диԝана Йаһоԝа әʹлам кьн (Һәзԛл. 2:3-5).

9. Әʹламәтийа мә ча дьбәкә һʹӧкӧм кә сәр мьләта, ле әм чьда дькарьн дӧдьли нәбьн?

9 Дьбәкә әԝ әʹламәти кӧ әме һьнге бәла кьн, ԝе һерса мьләта бинә у әԝана ԝе бьхԝазьн мә һʹәта-һʹәтайе бьдьнә кәрʹкьрьне. Ле чаԝа кӧ иро хьзмәтийеда әм итʹбарийа хԝә Йаһоԝа тиньн, һьнге жи әм гәрәке итʹбарийа хԝә ԝи биньн. Әм дькарьн дӧдьли нәбьн, ԝәки Хԝәдайе мә ԝе ԛәԝате бьдә мә, сәва ԛьрара ԝи биньн сери (Мих. 3:8).

ҺАЗЬР БЬН БОНА ПӘЙКʹӘТЬНА СӘР ЩЬМӘʹТА ХԜӘДЕ

10. Чаԝа кӧ Луԛа 21:25-28-да һатийә пʹехәмбәртикьрьне, тьштед кӧ ԝәʹде тәнгасийа гьранда бьԛәԝьмьн, ча ԝе сәр мәрьва һʹӧкӧм бьн?

10 Бьхунә Луԛа 21:25-28. Ԝәʹде тәнгасийа мәзьн, мәрьв ԝе тʹәвһәв бьн, гава бьвиньн кӧ ча әԝ һʹәму тьшт һьлдьше, чь кӧ ԝана тʹьре ԝе һәр гав һәбә. Әԝана ԝе бьчәрчьрьн у бәрхԝә кʹәвьн, чьмки нава тʹәрихийа инсанәтеда әԝ ԝе ԝәʹдәки лапи гьран бә (Сефн. 1:14, 15). Һьнге, дьбәкә әʹмьр ԝе һе чәтьн бә, һәла һе бона щьмәʹта Хԝәде жи. Әм нә пʹара ве дьнйайе нә, ләма жи дьԛәԝьмә әме тәнгасийа бьвиньн. Дьбәкә һьнә тьшт кӧ әм һʹәԝщә бьн, бал мә тʹӧнә бьн.

11. а) Чьрʹа Шәʹдед Йаһоԝа ԝе бькʹәвьнә чʹәʹва? б) Чьрʹа әм гәрәке тәнгасийа мәзьн нәтьрсьн?

 11 Зу йан дәрәнг, мәрьвед кӧ религийа ԝан кʹӧта бә, дьбәкә һерс кʹәвьн, ԝәки чьрʹа религийа Шәʹдед Йаһоԝа нәһатийә кʹӧтакьрьне. Әм дькарьн бьдьнә бәр чʹәʹве хԝә, кӧ әԝана ԝе ча һерса хԝә нишан кьн, мәсәлә дьԛәԝьмә интернетеда тьштед хьраб дәрһәԛа мә бәла кьн. Әԝ мьләт у сәрԝере ԝан Шәйтʹан, ԝе мә нәфрʹәт кьн, чьмки тʹәне религийа мә ԝе бьминә. Әԝана ԝе нәгьһижьнә ве нета хԝә, кӧ сәр әʹрде ԛьрʹа һʹәму религийа биньн. Ләма жи әме бькʹәвьнә чʹәʹва. У һьнге мьләтед сәр әʹрде, ԝе бьбьнә Гог жь Магоге. * Әԝана ԝе бьбьнә йәк у пе һʹәму ԛәԝата хԝә ԝе мьԛабьли щьмәʹта Йаһоԝа дәрен (Һәзԛл. 38:2, 14-16). Дьбәкә әм бәрхԝә дькʹәвьн кӧ чь ԝе бьԛәԝьмә ԝәʹде тәнгасийа мәзьн, илаһи чьмки әм һур бь һур һәр тьшти ньзаньн. Ле тьштәки әм сәд сәләфи заньн: Әм гәрәке тәнгасийа мәзьн нәтьрсьн, чьмки Йаһоԝа ԝе рʹебәрийа бьдә мә, кӧ гәләк фәрз ьн бона әʹмьре мә (Зәб. 34:19). Әме һьнге «рʹабьн сәре хԝә бьльнд кьн», чьмки әме бьзаньбьн кӧ «азабуна» мә «иди незик ә». *

12. Чаԝа «хӧламе амьн у сәрԝахт» мә бона ԛәԝьмандьнед ахьрийе һазьр дькә?

12 «Хӧламе амьн у сәрԝахт» мә һазьр дькә, ԝәки ԝәʹде тәнгасийа мәзьн әм Хԝәдерʹа амьн бьминьн (Мәт. 24:45). Әԝ бь щурʹә-щурʹә тьшта али мә дькә, ԝәрә тʹәне мәсәләке шеԝьр кьн: хӧламе амьн у сәрԝахт бь сайа щьватед мәзьнә серʹожи, кӧ салед 2016-2018-да дәрбаз бун, ԝәʹдәда али мә кьр. Бь сайа ԝан щьватед мәзьн, әм һелан бун, ԝәки нав хԝәда ԝан һʹӧнӧра ԛәԝи кьн, кʹижан кӧ мәрʹа лазьм ьн, чьмки рʹожа Йаһоԝа ида гәләк незик ә. Ԝәрә әм кьн ԝан һʹӧнӧра шеԝьр кьн.

БӘРДӘԜАМ КЬН АМЬНИ, СӘБЬР У МЕРХАСИЙА ХԜӘ ԚӘԜИ КЬН

Ида ньһада һазьр бьн сәва ԝәʹде тәнгасийа мәзьн хьлаз бьн (Бьньһерʹә абзаса 13-16) *

13. Әм ча дькарьн амьнийа хԝә һьндава Йаһоԝа ԛәԝи кьн, у чьрʹа әм гәрәке ньһада ве йәке бькьн?

13 Амьни: Тʹема щьвата мәзьнә серʹожи йа сала 2016, ӧса бу: «Йаһоԝарʹа Амьн Бьминә!». Әԝе бәрнаме әм һин кьрьн, ԝәки һәрге һәләԛәтийа мә тʹәви Йаһоԝа незик у ԛәԝи бә, әме жерʹа амьн бьминьн. Ԝедәре дьһатә готьне, ԝәки әм дькарьн незики Йаһоԝа бьн, һәрге тʹьме бь дьл у щан жерʹа дӧа бькьн, у Хәбәра ԝи кʹур леколин бькьн. Әԝ тьшт ԛәԝате дьдьнә мә, ԝәки ԝәʹде тәнгасийед гьранда жи ԛәԝи бьминьн. Ахьрийа дьнйа Шәйтʹан гәләк незик ә, у әм һивийе нә кӧ амьнийа мә һьндава Хԝәде у Пʹадшатийа ԝи, ԝе һе зедә бе щерʹьбандьне. Диса жи дьбәкә ԝе ԛәрфа мә бькьн у мә бькʹәньн (2 Пәт. 3:3, 4). Әԝ илаһи һьнге дькарә бьԛәԝьмә чахе әм тʹәвнәбуйине хԝәй дькьн. Әм гәрәке ида ньһада амьнийа хԝә ԛәԝи кьн, сәва кӧ ԝәʹде тәнгасийа мәзьн амьн бьминьн.

14. а) Чь ԝе бьԛәԝьмә тʹәви бьред сәр әʹрде кӧ рʹебәрийе дьдьнә мә? б) Чьрʹа ԝи ԝәʹдәйи фәрз ә кӧ әм амьн бьн?

14 Ԝәʹде тәнгасийа мәзьн, гӧһастьн ԝе һәбьн дәрһәԛа бьред кӧ сәр әʹрде рʹебәрийе дьдьнә мә. Ԝәʹдәки һʹәму  Мәсиһийед бьжарти йед кӧ һе сәр әʹрде нә, ԝе сәр әʹзмана бенә щьвандьне сәва шәрʹе Һармәгәдонеда шәрʹ бькьн (Мәт. 24:31; Әʹйан. 2:26, 27). Әԝ те һʹәсабе кӧ Кʹома Рʹебәрийе ида ԝе тʹәви мә сәр әʹрде нибә. Ле йәкә әʹлаләта мәзьн ԝе диса жи организә бә. Бьред щерʹьбанди ԝе рʹебәрийа бьдьнә мә. Әме һьнге амьнийа хԝә Йаһоԝарʹа нишан кьн бь ве йәке, кӧ пьштгьрийа ԝан бьра бькьн у пәй рʹебәрийа ԝан һәрʹьн, йа кӧ әԝана ԝе жь Хԝәде бьстиньн. Хьлазбуна мә ве йәкева ԝе гьредайи бә!

15. Әм ча дькарьн сәбьра хԝә ԛәԝи кьн у чьрʹа әԝ йәк гәләк фәрз ә?

15 Сәбьр: Наве щьвата мәзьнә серʹожи йа сала 2017 ӧса бу: «Ԛәԝи бьн у Сәбьр кьн!» Бәрнама ве щьвата мәзьн али мә кьр, ԝәки ԝәʹде тәнгасийа, сәбьр кьн у ԛәԝи бьминьн. Әм пеһʹәсийан ԝәки сәбьра мә дәрәщед башва гьредайи нинә. Ле сәбьра хԝә әм дькарьн һьнге ԛәԝи кьн, гава итʹбарийа хԝә Йаһоԝа тиньн (Рʹом. 12:12). Ԝәрә әм тʹӧ щар әԝ созе Иса бир нәкьн: «Кʹи кӧ һʹәта хьлазийе тәйах кә, әԝе хьлаз бә» (Мәт. 24:13). Әԝ соз те һʹәсабе ԝәки әм гәрәке ԝәʹде һәр чәтьнайа амьн бьминьн. Һәрге әм ԝәʹде тәнгасийед иро, сәбьр кьн у ԛәԝи бьминьн, әме пешийа дәстпебуна тәнгасийа мәзьн һе ԛәԝи бьн.

16. Мерхасийа мә чьва гьредайи йә, у ча әм иро дькарьн әԝи һʹӧнӧри ԛәԝи кьн?

16 Мерхаси: Наве щьвата мәзьнә серʹожи йа сала 2018 ӧса бу: «Мерхас бьн!» Әԝе бәрнаме ани бира мә, ԝәки мерхасийа мә фәрәсәтед мәва гьредайи нинә. Чаԝа сәва сәбьр кьн баԝәри һьндава Йаһоԝа лазьм ә, ӧса жи сәва мерхас бьн, әм гәрәке итʹбарийа хԝә Йаһоԝа биньн. Ле ча әм дькарьн һин бьн һе зедә итʹбарийа хԝә Йаһоԝа биньн? Әм гәрәке һәр рʹож Хәбәра ԝи бьхуньн у бьфькьрьн кӧ ча Йаһоԝа ԝәʹде бәре щьмәʹта хԝә хьлаз дькьр (Зәб. 68:20; 2 Пәт. 2:9). Чахе мьләтед дьнйайе ԝәʹде тәнгасийа мәзьн мьԛабьли мә дәрен, әм гәрәке мерхас бьн у илаһи һьнге бь тʹәмами баԝәрийа хԝә Йаһоԝа биньн (Зәб. 112:7, 8; Ибрн. 13:6). Һәрге әм ньһа итʹбарийа хԝә Йаһоԝа тиньн, әме ԝәʹде пәйкʹәтьна Гог мерхас бьн. *

 БЬ ШАБУНЕ ҺИВИЙА ХЬЛАЗБУНА ХԜӘ БЬН

Иса у ордийа ԝийә әʹзмана зутьрәке ԝе шәрʹе Һармәгәдоне дәстпекьн, сәва ԛьрʹа дьжмьнед Хԝәде биньн! (Бьньһерʹә абзаса 17)

17. Чьрʹа әм гәрәке Һармәгәдоне нәтьрсьн? (Бьньһерʹә шькле рʹуйе журнале.)

17 Чаԝа әм готара пешийа веда пеһʹәсийан, һʹәчʹи зәʹф жь мә тʹәмамийа әʹмьре хԝә ԝәʹде рʹожед ахьрийе дьжин. Ле һевийа мә һәйә кӧ ԝәʹде тәнгасийа мәзьн хьлаз бьн. Шәрʹе Һармәгәдон ԝе бьбә хьлазийа ве дьнйайе. Ле йәкә әм гәрәке нәтьрсьн. Чьрʹа? Чьмки әԝ йәк ԝе шәрʹе Хԝәде бә (Мәтʹлк. 1:33; Һәзԛл. 38:18-20; Зәкәр. 14:3). Чахе Йаһоԝа фәрмане бьдә, Иса Мәсиһ ԝе рʹебәрийа ордийа Хԝәде бькә сәва дәрен шәрʹ. Әԝ ԝе тʹәви Мәсиһийед бьжарти у мирйада мәләка дәре шәрʹ. Тʹәвайи әԝана ԝе мьԛабьли Шәйтʹан, щьнед ԝи у ордийед әʹрде, шәрʹ бькьн (Дан. 12:1; Әʹйан. 6:2; 17:14).

18. а) Йаһоԝа чь соз дьдә? б) Чаԝа Әʹйанти 7:9, 13-17 баԝәрийа ԝә дәрһәԛа ахьрийе ԛәԝи дькә?

18 Йаһоԝа соз дьдә мә: «Ԛәт чʹәкед кӧ ль дьжи [мьԛабьли] тә һатьнә чекьрьн, ԝе жь тӧ кʹарирʹа нәбә» (Иша. 54:17). «Әʹлаләтәкә . . . мәзьн», демәк хьзмәткʹаред Йаһоԝайи амьн, ԝе ԝәʹде тәнгасийа мәзьн хьлаз бьн! Паши ве йәке, әԝана ԝе бәрдәԝам кьн жерʹа хьзмәт кьн. (Бьхунә Әʹйанти 7:9, 13-17.) Кʹьтеба Пироз баԝәрийа мә дәрһәԛа ахьрийе ԛәԝи дькә! Әм заньн ԝәки «Хӧдан ширһʹәлала хԝәй дькә», демәк йед амьн (Зәб. 31:23). Һʹәмуйед кӧ Йаһоԝа һʹьз дькьн у пәсьна дьдьнә ԝи, ԝе бьвиньн у ша бьн кӧ ча наве ԝи бе пирозкьрьне (Һәзԛл. 38:23).

19. Кʹижан һевийа хԝәш пешийа мә йә?

19 Бьфькьрьн кӧ һәрге рʹезед жь 2 Тимотʹейо 3:2-5 бьгӧһезьн, у рʹез кьн кӧ мәрьв дьнйа тʹәзәда бей һʹӧкӧме Шәйтʹан ԝе чь щурʹәйи бьн (Бьньһерʹьн чаргошә « Мәрьв Һьнге Ԝе Чь Щурʹәйи бьн»). Щорщ Гангас бьра, йе кӧ бәре әндәме Кʹома Рʹебәрийе бу, жийина дьнйа тʹәзәда ӧса дьда бәр чʹәʹве хԝә: «Әԝ дьнйа ԝе чьԛас хԝәш бә, гава һʹәмушк Йаһоԝарʹа хьзмәт кьн! Зутьрәке ԝе ԛәдьрәки ԝәйи ӧса һәбә, кӧ һуне дьнйа тʹәзәда бьжин. Һуне һаԛас бьжин чьԛас Йаһоԝа дьжи. Әме һʹәта-һʹәтайе бьжин». Рʹасти жи һевикә чьԛас хԝәш пешийа мә йә!

КʹЬЛАМА 122 Ԛәԝи Бьсәкьньн!

^ абз. 5 Әм заньн ԝәки зутьрәке «тәнгасикә . . . мәзьн» ԝе бе сәр инсанәте. Ле һьнге ԝе чь бьԛәԝьмә тʹәви хьзмәткʹаред Йаһоԝа? Йаһоԝа дьхԝазә әм һьнге чь бькьн? Кʹижан һʹӧнӧр мәрʹа лазьм ьн, ԝәки ирода хԝә ԛәԝи кьн, сәва ԝәʹде тәнгасийа мәзьн амьн бьминьн? Әме ве готареда ԝан пьрса шеԝьр кьн.

^ абз. 11 ГОТЬН КӦ ҺАТӘ ШЬРОВӘКЬРЬНЕ: Термин Гог жь Магоге (кьн те готьне Гог), бь симболик те һʹәсабе коалисйа дәԝләта, кʹижан кӧ ԝе ԝәʹде тәнгасийа мәзьн, мьԛабьли хьзмәткʹаред Йаһоԝа дәркʹәвә.

^ абз. 11 Бона һе зедә информасийа дәрһәԛа ԛәԝьмандьнед пешийа Һармәгәдоне, бьньһерʹьн кʹьтеба «Пʹадшатийа Хԝәде Сәрԝертийе Дькә!», сәре 21. Ле дәрһәԛа пәйкʹәтьна Гог жь Магоге у кӧ чаԝа Йаһоԝа ԝе ԝәʹде Һармәгәдоне щьмәʹта хԝә хьлаз кә, бьньһерʹьн кʹьтеба «Һʹәбандьна Тʹәмьз Йаһоԝарʹа: Шькьр Һатә Вәгәрʹандьн» (Purе Worship of Jehovah—Restored At Last), сәре 17 у 18, у ӧса жи «Бьрща Ԛәрәԝьлийеда» йа 1 Тирмәһе, сала 2015, рʹупʹ. 16-21.

^ абз. 16 Наве щьвата мәзьнә серʹожи йа сала 2019, ӧса нә «Һʹьзкьрьн Тʹӧ Щар Кʹӧта Набә»! Әԝ бәрнамә ве йәкеда мә дьшьдинә, кӧ әм дькарьн һʹьзкьрьна Йаһоԝада һʹәта-һʹәтайе хԝәйкьри бьн (1 Корн. 13:8).

^ абз. 63 ШЬРОВӘКЬРЬНА ШЬКЬЛ: Ԝәʹде тәнгасийа мәзьн, кʹомәкә бьчʹук кӧ Шәʹдед Йаһоԝа нә, бь мерхаси мешәда щьвате дәрбаз дькьн.

^ абз. 65 ШЬРОВӘКЬРЬНА ШЬКЬЛ: Әʹлаләтәкә мәзьн кӧ жь хьзмәткʹаред Йаһоԝайи амьн ьн, ԝе сах у бәхтәԝар жь тәнгасийа мәзьн дәрен!