Дәрбази һондоре буйин

Дәрбази навәроке буйин

 ГОТАРА БОНА ҺИНБУНЕ 34

Чаԝа Һини Кʹьфшкьрьна Тʹәзә бьн

Чаԝа Һини Кʹьфшкьрьна Тʹәзә бьн

«Хԝәде сәр нәһәԛийе нинә, ԝәки кьред ԝә у әԝ һʹьзкьрьна кӧ ԝә бона наве ԝи да кʹьфше бир бькә» (ИБРН. 6:10).

КʹЬЛАМА 38 Әԝ ԝе Тә Ԛәԝи кә

ВЕ ГОТАРЕДА *

1-3. Жь бо кʹижан һьнә мәʹнийа, хьзмәткʹаред һәртʹьм кʹьфшкьрьна хԝә дьгӧһезьн?

БЬРАКИ мә Роберт у жьна ԝи Мери гьли дькьн: «Паши 21 салед хԝәш хьзмәтийа мәйә мисйонертида, де-бавед мәрʹа аликʹари лазьм бу, чьмки ида ԛьдуме ԝан тʹӧнә бу. Әм рʹаст ә ша дьбун, кӧ мьԛати ԝан бьн, ле йәкә дьле мә дешийа, чьмки әм гәрәке жь ԝи щийи кʹижан кӧ мә гәләк һʹьз кьр, бьчуна».

2 Ԝилиам у Тери гьли дькьн: «Әм пеһʹәсийан, ԝәки жь бо сьһʹәт-ԛәԝата хԝә әме нькарьбьн кʹьфшкьрьна хԝә бәрдәԝам кьн. Һьнге әм гьрийан, чьмки тʹьме нета дьле мә әԝ бу, кӧ ԝәлате хәрибда Йаһоԝарʹа хьзмәт кьн».

3 Алексей дьбежә: «Әм һаш пе һәбун, ԝәки мәрьвед мьԛабьл дьхԝазьн әԝ филиала кӧ мьн теда хьзмәт дькьр, дадьн. Ле йәкә чахе әԝ йәк ԛәԝьми, у әз ида гәрәке жь Бәйтʹәле бьчума, әз мәтʹал мам у гәләк бәрхԝә кʹәтьм».

4. Әме ве готареда кʹижан пьрса шеԝьр кьн?

4 Гәләк хьзмәткʹаред һәртʹьм, ӧса жи йед кӧ Бәйтʹәледа хьзмәт дькьн, кʹьфшкьрьна тʹәзә дьстиньн. * Ԝан хушк-бьред амьнрʹа нәһеса йә, ԝәки кʹьфшкьрьна хԝәйә кӧ гәләк һʹьз дькьн, бьһельн. Ле чь дькарә али ԝан бькә, ԝәки һини гӧһастьнед тʹәзә бьн? Ча һун дькарьн али ԝан бькьн? Щабед ԝан пьрса дькарьн али мә һʹәмушка бькьн, ԝәки зу һини гӧһастьна бьн.

ЧАԜА ҺИНИ ГӦҺАСТЬНА БЬН

Чьрʹа хьзмәткʹаред һәртʹьмрʹа чәтьн ә кʹьфшкьрьна хԝә бьһельн? (Бьньһерʹә абзаса 5) *

5. Чахе кʹьфшкьрьна мә те гӧһастьне, әԝ йәк ча дькарә сәр мә һʹӧкӧм бә?

5 Фьрԛи тʹӧнә әм дәштеда хьзмәт дькьн йан Бәйтʹәледа, әм  мәрьвед дор-бәре хԝә у һәла һе ԝи щийи жи, кʹидәре әм хьзмәт дькьн, һʹьз дькьн. Ләма жи жь бо чь мәʹнийа жи әм кʹьфшкьрьна хԝә дьһельн, йәкә дьле мә дешә у әм дьлтәнг дьбьн. Әм бира ԝан хушк-бьра дькьн, у бона ԝан бәрхԝә дькʹәвьн, илаһи һәрге әм жь ԝан дьԛәтьн жь бо ԝе йәке, кӧ йед мьԛабьл пәй мә дькʹәвьн (Мәт. 10:23; 2 Корн. 11:28, 29). Чәтьнайи дькарә әԝ бә жи, кӧ чахе әм кʹьфшкьрьна тʹәзә дьстиньн, йан жи вәдьгәрʹьн мале, гәләк щар әм тʹәвһәв дьбьн, чьмки гәрәке һини култура тʹәзә бьн, йан һәла һе жи һини култура ԝәлате хԝә бьн. Роберт у Мери дьбежьн: «Мә ида култура хԝә бир кьрийә, һәла һе жи бир кьрийә ча сәр зьмане хԝә шәʹдәтийе бьдьн. Мә һаԛас ԝәхт ԝәлате хәрибда хьзмәт дькьр, кӧ мә тʹьре әм ԝәлате хԝәда хәриб ьн». Ӧса жи һьнә хушк-бьра, кʹьфшкьрьна кʹижана те гӧһастьне, дькарьн алийе пʹәрада жи ньшкева рʹасти чәтьнайа бен. Әԝана дьбәкә бәрхԝә кʹәвьн, бьтьрсьн кӧ ԝе ча бә һʹале ԝан, у тʹәвһәв бьн. Ԝи ԝәʹдәйи чь дькарә али ԝан бькә?

Гәләк фәрз ә ԝәки әм незики Йаһоԝа бьн у итʹбарийа хԝә ԝи биньн (Бьньһерʹә абзаса 6-7) *

6. Ча әм дькарьн незики Йаһоԝа бьминьн?

6 Незики Йаһоԝа бьминьн (Аԛуб 4:8). Ле әм ча дькарьн ӧса бькьн? Әм гәрәке итʹбарийа хԝә ԝи биньн, йе кӧ «дӧа дьбьһе» (Зәб. 65:2). Зәбур 62:8 дьбежә, ԝәки «һун ль Ԝирʹа дьле хԝә вәкьн». Йаһоԝа дькарә «һәр тьшти һе зедә кә, нә чаԝа әм дьхԝазьн йан дьфькьрьн» (Әфәс. 3:20). Чахе әм бь дӧа жь Йаһоԝа тьштәки һиви дькьн, әԝ нә тʹәне щаба дӧайе мә дьдә, ле дькарә ӧса али мә бькә у проблемед мә ӧса сафи кә, кӧ әм нә жи һивийе бун.

7. а) Чь ԝе али мә бькә, ԝәки незики Йаһоԝа бьминьн? б) Ль гора Ибрани 6:10-12, әме чь кʹаре бьстиньн һәрге бәрдәԝам кьн бь амьни Йаһоԝарʹа хьзмәт кьн?

7 Сәва достийа мә тʹәви Йаһоԝа незик бьминә, һәр рʹож әм гәрәке Хәбәра ԝи бьхуньн у сәр бьфькьрьн. Бьраки мә кӧ мисйонер бу, дьбежә: «Һәр гав ԛӧльхкьрьна тʹәви малбәте дәрбаз кьн у бона щьвате һазьр бьн, чаԝа ԝә ԝәʹде кʹьфшкьрьна хԝәйә бәре дькьр». Ӧса жи, чьԛас дькарьн щьвата хԝәйә тʹәзәда хьзмәтийеда хирәт бьн. Йаһоԝа бир накә ԝан, йед кӧ бәрдәԝам дькьн жерʹа бь амьни хьзмәт дькьн, һәла һе жи һәрге әԝана ида нькарьн һаԛас бькьн, чьԛас ԝана бәре дькьр. (Бьхунә Ибрани 6:10-12.)

8. Ча 1 Йуһʹәнна 2:15-17, дькарә али ԝә бькә, ԝәки бь әʹмьре сьвьк бьжин?

 8 Бь әʹмьре сьвьк бьжин. Нәһельн, ԝәки хәмед ве дьнйа Шәйтʹан, ԝә «бьхәньԛиньн», у ԝә бьдьнә сәкьнандьне (Мәт. 13:22). Гӧһ нәдьнә ԝан һәвал йан жи мәрьвед хԝәйи незик, йед кӧ бь дьле хԝәйи сах ԝә һелан дькьн пәй пʹәра кʹәвьн, сәва әʹмьре хԝә һе баш кьн. (Бьхунә 1 Йуһʹәнна 2:15-17.) Итʹбарийа хԝә Йаһоԝа биньн. Әԝ соз дьдә гава әм һʹәԝщә бьн, әԝ ԝе алийе рʹӧһʹанида, емосийалида у физикида, ԝе али мә бькә у мә нәһелә (Ибрн. 4:16; 13:5, 6).

9. Ль гора Мәтʹәлок 22:3, 7, чьрʹа фәрз ә дәйнед нәлазьм нәкьнә стуйе хԝә, у чь дькарә али мә бькә сафикьрьнед аԛьлайи бькьн?

9 Дәйнед нәлазьм нәкьнә стуйе хԝә. (Бьхунә Мәтʹәлок 22:3, 7.) Чахе мәри дәрбази щики дьн дьбә, һеса дькарә бькʹәвә бьн дәйна. Ләма жи нәкʹәвьнә һʹәйра ԝан тьшта, кʹижан ԝәрʹа зәʹф нәлазьм ьн, сәва кьредит һьлнәдьн у нәкʹәвьнә бьн дәйна. Чахе әм стреседа ньн, мәсәлә чахе мьԛати мәрьве хԝәйи нәхԝәш дьбьн, дьбәкә чәтьн ә нәкʹәвьнә дәйна. Ԝан дәрәщада, биньн бира хԝә, ԝәки дӧа-дьрозгә дькарьн али ԝә бькьн сафикьрьнед аԛьлайи бькьн. Сәр щаба дӧайед ԝә, Йаһоԝа дькарә әʹдьлайе бьдә ԝә, кʹижан кӧ «ԝе дьл у фькьред ԝә . . . хԝәй кә», у али ԝә бькә кӧ дьлрʹьһʹәтийе ӧнда нәкьн (Фили. 4:6, 7; 1 Пәт. 5:7).

10. Ча әм дькарьн һәвалед баш хԝәрʹа бьвиньн?

10 Һәвалед баш хԝәрʹа бьвиньн. Дьле хԝә вәкьн у хәмед хԝә һәвалед хԝәрʹа гьли кьн, илаһи ԝанрʹа, йед кӧ мина ԝә рʹасти чәтьнайа һатьнә у хьзмәтийеда гәләк шабун дитьнә. Әԝ йәк ԝе али ԝә бькә гәләк бәрхԝә нәкʹәвьн у дьлбинийе бьстиньн (Ԝаиз 4:9, 10). Һәвалед кӧ ԝә кʹьфшкьрьна хԝәйә бәреда ԛазанщ кьрийә, диса жи һәвалед ԝә дьминьн. Ньһа, кʹьфшкьрьна хԝәйә тʹәзәда, һун гәрәке һәвалед тʹәзә хԝәрʹа бьвиньн. Бир нәкьн, ԝәки сәва хԝәрʹа һәвала бьвиньн, һун гәрәке хԝәха жи бьбьнә һәвале баш. Ле ча һун дькарьн һәвалед баш хԝәрʹа ԛазанщ кьн? Гьли кьн ԝанрʹа дәрһәԛа ԛәԝьмандьнед һʹәԝас кӧ хьзмәтийа Йаһоԝада бал ԝә һәбу, сәва әԝана шабуна ԝә бьвиньн. Һәрге жи һьнә хушк-бьред щьватеда бь тʹәмами фәʹм нәкьн әԝ хирәта ԝә хьзмәтийа һәртʹьмда, йед майин дькарьн пе мәсәла ԝә бьшьдьн у ԝәрʹа бьбьнә һәвалед баш. Ле фәсал бьн, ԝәки дина ԝан нәкʹьшиньн сәр хԝә, у дәрһәԛа тьштед нәбаш гьли нәкьн.

11. Ча һун дькарьн зәԝащеда бәхтәԝар бьминьн?

11 Һәрге һун гәрәке кʹьфшкьрьна хԝә бьгӧһезьн жь бо сьһʹәт-ԛәԝата мер йан жьна хԝә, ԝи йан ԝе сущдар нәкьн. Ӧса жи һәрге бона сьһʹәт-ԛәԝата хԝә һун кʹьфшкьрьна хԝә дьһельн, хԝә нәһәԛ нәкьн бона ве йәке, у нәфькьрьн, ԝәки  ԝә дьле мер йан жьна хԝә ешандийә. Бир нәкьн, ԝәки һун «бәдәнәк» ьн, у ԝә соз дайә Йаһоԝа ԝәки нава һʹәму дәрәщада һуне мьԛати һәв бьн (Мәт. 19:5, 6). Һәрге ԝә кʹьфшкьрьна хԝә һиштийә, чьмки һун гьран дәркʹәтьн, зарʹа ԝә гәрәке бьзаньбә кӧ бона ԝә әԝ һе фәрз ә, нә кӧ кʹьфшкьрьна ԝәйә бәре. Һәр гав жерʹа бежьн, ԝәки әԝ бона ԝә «пʹешкʹеша» жь Хԝәде йә (Зәб. 127:3-5). Ӧса жи зарʹерʹа гьли кьн ԝан ԛәԝьмандьнед һʹәԝас у хԝәш, кӧ хьзмәтийа ԝәда ԛәԝьми нә. Ԝи щурʹәйи һуне зарʹе һелан кьн, ԝәки мина ԝә әʹмьре хԝә хәрщ кә сәр хьзмәтийа Йаһоԝа, кʹижан кӧ гәләк шабуне тинә.

ЧАԜА ХУШК-БЬРА ДЬКАРЬН АЛИ ԜӘ БЬКЬН

12. а) Әм ча дькарьн али хьзмәткʹаред һәртʹьм бькьн, сәва әԝана бәрдәԝам кьн кʹьфшкьрьна хԝәда бьминьн? б) Чаԝа әм дькарьн али ԝан бькьн, ԝәки зу һини гӧһастьна бьн?

12 Гәләк щьват у ӧса жи хушк-бьред башԛә, аликʹарийе дьдьнә хьзмәткʹаред һәртʹьм, сәва әԝана бькарьбьн хьзмәтийа хԝә бәрдәԝам кьн. Мәсәлә, әԝана дьл дьдьнә ԝана кӧ бәрдәԝам кьн шьхӧле хԝә бькьн, алийе пʹәрада йан жи тьштед материалида али ԝан дькьн, йан кʹомәке дьдьн нәфәред ԝан, кʹижан кӧ дури ԝан ньн (Галт. 6:2). Һәрге щьвата ԝәда хьзмәткʹарәки һәртʹьм кʹьфш кьрьнә, нәфькьрьн ԝәки кʹьфшкьрьна ԝи һатә гӧһастьне, чьмки шьхӧле хԝә нәбаш дькьр, йан жи тьштәки хьраб кьрийә. * Дәԝсе, али ԝи бькьн, ԝәки зу һини гӧһастьна бә. Бь дьл у щан ԝи ԛәбул кьн у пʹайе ԝи бьдьн бона шьхӧле кӧ әԝ дькә, һәрге жи әԝ жь бо сьһʹәт-ԛәԝата хԝә  нькарә гәләк тьшт бькә. Тʹәви ԝи бьбьнә нас. Һуне бькарьбьн жь хушк-бьред ӧса гәләк тьшт һин бьн, чьмки ԝана һинкьрьн у занәбун стандьнә, у щерʹьбанди нә.

13. Әм ча дькарьн али ԝан бькьн, йед кӧ кʹьфшкьрьна тʹәзә стандьнә?

13 Пешийе, әԝед кӧ кʹьфшкьрьна хԝәйә тʹәзә дьстиньн лазьм ә али ԝан бькьн, мәсәлә ԝанрʹа мал бьвиньн, дәрһәԛа транспорте ԝанрʹа бежьн, ча хәбате бьвиньн, у диса тьштед майин. Дьбәкә ԝанрʹа ӧса жи лазьм ә информасийа дәрһәԛа тьштед һәррʹожи, мәсәлә чаԝа хәрще дәԝләте бьдьн, йан жи щурʹә-щурʹә документа бьстиньн. Йа лапә фәрз әԝ ә, кӧ әԝана һʹәԝщә нә кӧ ԝана фәʹм кьн, нә кӧ гӧне хԝә ԝана биньн. Дьбәкә алийе сьһʹәт-ԛәԝатеда проблема ԝан йан йа мәрьве ԝани незик һәйә. Йан жи дьбәкә мәрьве ԝани незик мьрийә. * Дьбәкә әԝана нишан накьн, ле бәрхԝә дькʹәвьн, чьмки бира һәвалед хԝә дькьн. Сәва әԝана кем бәрхԝә кʹәвьн, ԝанрʹа ԝәʹдә лазьм ә.

14. Чаԝа хушк-бьра али хушкәке кьрьн, кӧ һини кʹьфшкьрьна хԝәйә тʹәзә бә?

14 Һәрге һун тʹәви ԝан хьзмәт бькьн, у пе мәсәла хԝә дьл бьдьнә ԝана, әԝ йәк жи ԝе али ԝан бькә, кӧ зу һини гӧһастьна бьн. Хушкәкә мә, йа кӧ гәләк сала ԝәлате хәрибда хьзмәт дькьр, дьбежә: «Мьн бәре кʹидәре хьзмәт дькьр, һәр рʹож мьн тʹәви мәрьва һинбуна Кʹьтеба Пироз дәрбаз дькьр. Ле кʹьфшкьрьна мьнә тʹәзәда ӧса чәтьн бу, кӧ мьн нә жи дькарьбу мәрьварʹа һәма Кʹьтеба Пироз вәкьра, йан жи видеок нишани ԝан кьра. Ле хушк-бьред жь щьвата мьн, әз тʹәглиф дькьрьм сәр сәрледан у һинбунед хԝә. Чахе мьн хирәт у мерхасийа ԝан хушк-бьра дьдит, у ча әԝана һинбунед Кʹьтеба Пироз дәрбаз дькьн, мьн бь щурʹәки майин ньһерʹи сәр хьзмәтийа хԝә. Әз һин бум кӧ чаԝа ве територийа тʹәзәда тʹәви мәрьва хәбәрдане дәстпекьм. Әԝ һʹәму тьшт али мьн кьр шабуна хԝә вәгәрʹиньм».

БӘРДӘԜАМ КЬН ПЕШДА ҺӘРʹЬН

Мәщала бьгәрʹьн сәва хьзмәтийа мьһала хԝәда һе зедә бькьн (Бьньһерʹә абзаса 15-16) *

15. Чаԝа кʹьфшкьрьна хԝәйә тʹәзәда пешда һәрʹьн?

15 Һун кʹьфшкьрьна хԝәйә тʹәзәда дькарьн  пешда һәрʹьн. Нәфькьрьн ԝәки ԝә кʹьфшкьрьна тʹәзә станд, чьмки ԝә шьхӧле хԝә нәбаш дькьр, йан жи ида һун нәлазьм ьн. Чʹәʹв бьдьнә Мәсиһийед амьн йед ԛьрʹна йәке. Фьрԛи тʹӧнә әԝана кʹидәре бун, әԝана «дьгәрʹийан, Мьзгинийа хәбәре дьдан» (Кʹар. Шанд. 8:1, 4). Һәрге һун бәрдәԝам кьн бь хирәт хьзмәт кьн, һуне бәред баш бьстиньн. Мәсәлә, жь ԝәлатәки пешәнг аксор кьрьн шандьн ԝәлатәки незик, ле ԝедәре жи һʹәԝщәтийа мьзгинвана һәбу сәр зьмане ԝан пешәнга. У ԝедәре нава чәнд мәһада, кʹомед сәр зьмане ԝан һе зедә бун.

16. Чаԝа кʹьфшкьрьна хԝәйә тʹәзәда шабуне бьвиньн?

16 «Шабуна Хӧдан, һеза ԝә әԝ ә» (Нәһәм. 8:10). Фьрԛи тʹӧнә әм чьԛас шьхӧле хԝә һʹьз дькьн, йәкә шабуна мә гәрәке пешийе Йаһоԝа бә, нә кӧ кʹьфшкьрьна мә. Ләма жи незики Йаһоԝа бьминьн, итʹбарийа хԝә биланийа ԝи, рʹебәри у аликʹарийа ԝи биньн. Бир нәкьн, ԝәки ԝә кʹьфшкьрьна хԝәйә бәре һʹьз кьр, чьмки бь дьл хԝәст али мәрьвед ԝедәре бькьн. Кʹьфшкьрьна тʹәзәда жи бь дьл у щан һәр тьшти бькьн, у һуне бьвиньн ча Йаһоԝа али ԝә дькә, кӧ кʹьфшкьрьна хԝәйә тʹәзә жи һʹьз бькьн (Ԝаиз 7:10).

17. Әм гәрәке дәрһәԛа кʹьфшкьрьнед хԝәйә иро чь бир нәкьн?

17 Әм гәрәке бир нәкьн кӧ хьзмәтийа мә Йаһоԝарʹа һʹәта-һʹәтайе йә, ле кʹьфшкьрьна мәйә иро ԝәʹдәлу йә. Дьнйа тʹәзәда, әме һʹәмушк жи шьхӧлед тʹәзә бькьн. Алексей, бәʹса кʹижани мә жоре кьр, дьфькьрә ԝәки гӧһастьна кʹьфшкьрьна ԝи, али ԝи дькә һазьр бә бона гӧһастьнед ахьрийе. Әԝ дьбежә: «Әз дӧдьли нибум, ԝәки Йаһоԝа һәйә у дьнйа тʹәзә реали йә, ле әԝ йәк һаԛас незики дьле мьн нибу. Ле ньһа әз тʹәви Йаһоԝа гәләк незик ьм у әз пешийа хԝә дьнйа тʹәзә дьвиньм» (Кʹар. Шанд. 2:25). Фьрԛи тʹӧнә әм кʹидәре хьзмәт дькьн у чь шьхӧли дькьн, ԝәрә әм бәрдәԝам кьн незики Йаһоԝа бьн. Әԝ ԝе тʹӧ щар мә нәһелә, у ԝе али мә бькә, ԝәки һәр щурʹә шьхӧлед хьзмәтийеда у һәр щийада шабуне бьвиньн (Иша. 41:13).

КʹЬЛАМА 90 Һәвдӧ Һелан кьн

^ абз. 5 Щара хушк-бьред кӧ хьзмәткʹаред һәртʹьм ьн, жь бо һьнә мәʹнийа кʹьфшкьрьна хԝә дьһельн, йан жи кʹьфшкьрьна ԝана те гӧһастьне. Ве готареда әме шеԝьр кьн, кӧ әм рʹасти чь чәтьнайа тен у чь дькарә али мә бькә, ԝәки зу һини гӧһастьнед тʹәзә бьн. Әме ӧса жи шеԝьр кьн, кӧ хушк-бьра ча дькарьн аликʹарийе у дьл бьдьнә ԝан, йед кӧ рʹасти гӧһастьна тен, у ӧса жи әме пебьһʹәсьн кӧ кʹижан принсип дькарьн али мә һʹәмушка бькьн, кӧ һини гӧһастьна бьн.

^ абз. 4 Ӧса жи гәләк бьред щабдар жь бо әʹмьре хԝәйи мәзьн, щабдарийед хԝә дьдьн бьред щаһьл. Бьньһерʹьн әван готара «Мәсиһийед Әʹмьрда Мәзьн Йаһоԝа Амьнийа Ԝә Ԛимәт Дькә», «Бьрща Ԛәрәԝьлийеда» йа мәһа Илоне 2018, у «Ԝәʹде Гӧһастьна Дьлрʹьһʹәтийе Хԝәй кьн», «Бьрща Ԛәрәԝьлийе» йа мәһа Щотмәһе, сала 2018.

^ абз. 12 Рʹуспийед ԝе щьвате, кʹижанеда әԝ хьзмәткʹаред һәртʹьм хьзмәт дькьрьн, гәрәке чьԛас дькарьн зу бьшиньн нәʹма информасийа дәрһәԛа ԝан, сәва кӧ щьвата тʹәзәда кʹьфшкьрьна ԝан, мәсәлә ча рʹуспи, пешәнг, йан жи бәрдәстийе щьвате, дәрәнг дәстпенәбә.

^ абз. 13 Бьньһерʹьн журнала «Һʹьшйар Бьн!» № 3, йа сала 2018, рʹеза готара «Аликʹари бона Ԝан, йед кӧ Мәрьвед Хԝә Ӧнда Кьрьнә».

^ абз. 57 ШЬРОВӘКЬРЬНА ШЬКЬЛ: Жьн-мер кӧ ԝәлате хәрибда гәрәке хьзмәтийа хԝәйә мисйонерти бьһельн, бь һесьра жь щьвате хатре хԝә дьхԝазьн.

^ абз. 59 ШЬРОВӘКЬРЬНА ШЬКЬЛ: Әԝ жьн-мер вәдьгәрʹьн ԝәлате хԝә, у Йаһоԝарʹа тʹьме дӧа дькьн, сәва али ԝан бькә сәбьр кьн у һини гӧһастьна бьн.

^ абз. 61 ШЬРОВӘКЬРЬНА ШЬКЬЛ: Пе аликʹарийа Йаһоԝа, әԝ жьн-мер диса дьбьнә хьзмәткʹаред һәртʹьм. Әԝана сәр зьмане кӧ хьзмәтийа хԝәйә мисйонертида һин бунә, емигрантарʹа мьзгинийе гьли дькьн, територийа щьвата хԝәйә тʹәзәда.