Дәрбази һондоре буйин

Дәрбази навәроке буйин

Йуһʹәннайе Ньхӧмдар: Мәсәла кӧ Али Мә Дькә Шабуна Хԝә Хԝәй кьн

Йуһʹәннайе Ньхӧмдар: Мәсәла кӧ Али Мә Дькә Шабуна Хԝә Хԝәй кьн

ДЬБӘКӘ ньһа һун бира шьхӧле хԝәйи һʹьзкьри дькьн, кʹижан ԝә бәре щьватеда дькьр. Дьԛәԝьмә әԝ шьхӧле ԝә, ньһа кәсәки дьн дькә. Йан дьбәкә кʹьфшкьрьна ԝә ӧса бу, кӧ ньһа һун нькарьн бькьн. Йан жи һун нькарьн һаԛас бькьн, чьԛас ԝә бәре дькьр, чьмки һун ида әʹмьрда мәзьн ьн, йан сьһʹәт-ԛәԝата ԝә сьст ә, йан чәтьнайа ԝә алийе пʹәрәда һәйә, йан жи малбәтеда щабдарийед ԝә һәнә. Йан жи дьԛәԝьмә һун гәләк ԝәхт кʹьфшкьрьнәкеда бун, ле жь бо гӧһастьнед тʹәшкиләтеда, һун ида ве кʹьфшкьрьнеда ниньн. Фьрԛи тʹӧнә мәʹни чь йә кӧ щабдарийа ԝә һатә гӧһастьне, дьԛәԝьмә һун тʹәхмин дькьн, кӧ ньһа ида нькарьн хьзмәтийеда һаԛаси бькьн, чьԛас һун дьхԝазьн. Дәрәщед ӧсада, фәʹмдари йә щара һуне бәрхԝә кʹәвьн у дьлтәнг бьн. Һьнге ча һун дькарьн нәһельн, ԝәки емосийед хьраб, демәк, дьлтәнги, дьлшкәстибун йан жи һерс, дьреж бькʹьшиньн? У ча һун дькарьн шабуна хԝә ӧнда нәкьн?

Әм дькарьн жь мәсәла Йуһʹәннайе Ньхӧмдар һин бьн, кӧ чаԝа шабуна хԝә хԝәй кьн. Йуһʹәнна шьхӧлед ӧса мәзьн дькьр, кӧ ԛәдьрәки гәләк мәзьн бу бона ԝи, ле әԝи ньзаньбу, кӧ әʹмьре ԝида ԝе чь бьԛәԝьмә. Әԝи нә жи дькарьбу бьда бәр чʹәʹве хԝә, кӧ әԝ чьԛас ԝәхт хьзмәт кә, жь ԝи зедәтьр ԝе кәледа рʹуне. Ле йәкә Йуһʹәнна диса жи һʹәта хьлазийа әʹмьре хԝә шабуна хԝә ӧнда нәкьр. Ве йәкеда чь али ԝи кьр? Ча әм дькарьн һьнге жи шабуна хԝә ӧнда нәкьн, чахе жь бо гӧһастьна бәрхԝә дькʹәвьн?

ШЬХӦЛ, КӦ ЙУҺʹӘННАРʹА ШАБУНӘКӘ МӘЗЬН ДЬАНИ

Баһаре сала 29 Д.М., Йуһʹәнна дәстпекьр шьхӧле кӧ Йаһоԝа дабу ԝи, бькә. Әԝи бона һатьна Мәсиһ щьмәʹт һазьр дькьр, у ԝанрʹа дьгот: «Жь гӧнәкьрьне вәгәрʹьн, чьмки Пʹадшатийа Әʹзмана незик буйә» (Мәт. 3:2; Луԛа 1:12-17). Гәләк мәрьва гӧһ данә ԝи. Әʹлаләта мәзьн жь щийе дур һатьбу, сәва әʹламәтийа ԝи бьбьһен. Жь ԝана гәләка гӧнед хԝә тʹобә кьрьн у һатьнә ньхӧмандьне. Йуһʹәнна ӧса жи бь мерхаси сәрԝеред дине щьһуйарʹа әʹлам кьр, кӧ һәрге әԝана нәйенә гӧһастьне, ԝе бенә диԝанкьрьне (Мәт. 3:5-12). Йуһʹәнна чахе пайизе сала 29 Д.М., Иса ньхӧманд, әԝи фәʹм кьр, ԝәки хьзмәтийа ԝи ида бәрбь хьлазийе дьчә. Паши ве йәке, әԝи ида мәрьв дьшандьнә бал Иса сәва пәй ԝи һәрʹьн, демәк пәй Мәсиһе создайи (Йуһʹн. 1:32-37).

 Дәрһәԛа шьхӧле Йуһʹәнна, Иса гот: «Жь нава әԝед кӧ жь кʹӧлфәта дьне кʹәтьнә, тʹӧ кәс жь Йуһʹәннайе ньхӧмдар мәстьр нәбуйә» (Мәт. 11:11). Йуһʹәнна бешьк ша дьбу ԝан кʹәрәмарʹа, кӧ әԝи стандьбу. Мина Йуһʹәнна, иро гәләк жь мә жь Хԝәде кʹәрәма дьстиньн. Дина хԝә бьдьнә мәсәла бьраки бь наве Тери. Әԝ у жьна ԝи Сандра 50 сала зедәтьр хьзмәткʹаред һәртʹьм ьн. Тери дьбежә: «Бона мьн ԛәдьрәки гәләк мәзьн ә, кӧ мьн хьзмәт кьрийә ча пешәнг, Бәйтʹәледа, пешәнге мәхсус, бәрпьрсийаре мьһале, бәрпьрсийаре нәһийе, у ньһа диса пешәнге мәхсус ьм». Бәле, әм ша дьбьн чахе щурʹәщурʹә кʹьфшкьрьна дьстиньн, ле әме жь мәсәла Йуһʹәнна пебьһʹәсьн, кӧ шабуна мә кʹьфшкьрьнед мәва гьредайи нинә у әм дькарьн шабуна хԝә хԝәй кьн чахе дәрәщед мә тенә гӧһастьне.

БЬШЕКЬРИНЬН ҺӘР ШЬХӦЛИ КӦ ЙАҺОԜА ДЬДӘ ԜӘ

Йуһʹәннайе Ньхӧмдар шабуна хԝә ӧнда нәдькьр, чьмки ԛимәт дькьр һәр шьхӧл кӧ Хԝәде дьда ԝи. Ԝәрә мәсәләке шеԝьр кьн. Паши ньхӧмандьна Иса, мәрьв ида кем пәй Йуһʹәнна дьчун, ле һе зедә пәй Иса дьчун. Шагьртед Йуһʹәнна бона ве йәке бәрхԝә дькʹәтьн, у жерʹа готьн: «Ва әԝ хԝәха дьньхӧминә у һʹәму дьчьнә щәм ԝи» (Йуһʹн. 3:26). Йуһʹәнна щаба ԝан ӧса да: «Бук бона кʹе бә зәʹва әԝ хԝәха йә. Ле чаԝа дәстәбьраке зәʹве сәкьни бона ԝи дьбьһе у бь дәнге ԝи ша дьбә, ӧса жи ньһа дьле мьн шабунева тʹьжи бу» (Йуһʹн. 3:29). Йуһʹәнна тʹӧ щар хԝә бәрамбәри Иса нәдькьр, нә жи дьфькьри ԝәки шьхӧле Иса һе фәрз ә, ле шьхӧле ԝи пʹучʹ у беԛимәт ә. Ләма жи, Йуһʹәнна шабуна хԝә ӧнда нәдькьр, әԝи дьшекьранд рола хԝә ча «дәстәбьраке зәʹве».

Әве ньһерʹандьна Йуһʹәнна али ԝи дькьр, ләма әԝ һәр гав рʹази бу у шабуна хԝә ӧнда нәдькьр, һьнге жи чахе шьхӧле кӧ жерʹа һатьбу дайине нәһеса бу. Мәсәлә, Йуһʹәнна жь буйина хԝә Нәзир бу, у ләма жерʹа изьн тʹӧнә бу шәраве вәхԝә (Луԛа 1:15). Иса дәрһәԛа жийина ԝи гот, кӧ «Йуһʹәнна һат, нә дьхԝар, нә вәдьхԝар». Ле Иса у шагьртед ԝи Нәзир нибун, ләма әԝана ӧса дьжитьн ча һʹәму мәрьв (Мәт. 11:18, 19). Ӧса жи, Йуһʹәнна у шагьртед кӧ пешийе пәй ԝи дьчун, тʹӧ кʹәрәмәт нәдькьрьн, ле ԛәԝата шагьртед Иса һәбу, кӧ кʹәрәмәта бькьн (Мәт. 10:1; Йуһʹн. 10:41). Йуһʹәнна дәԝса кӧ бькʹәта һʹәйра хԝә у тʹәне бьфькьрийа кӧ ча шагьртед ԝи у шагьртед Иса жь һәв щӧдә дьбьн, әԝи шьхӧле кӧ Йаһоԝа дабу ԝи, бь хирәт дьани сери.

Һәрге әм жи кʹьфшкьрьна хԝә ԛимәт дькьн, әм дькарьн шабуна хԝә хԝәй кьн. Тери, бәʹса кʹижани мә жоре кьр, дьбежә: «Мьн һʹьш-аԛьле хԝә дьда сәр һәр кʹьфшкьрьнед хԝә». Әԝ бьра тинә бира хԝә хьзмәтийа хԝәйә һәртʹьм, у дьбежә: «Әз ԛә тʹӧ щар пʹошман набьм кӧ мьн әʹмьре хԝә ча дәрбаз кьрийә. Тʹәне гәләк биранинед һʹәԝас у хԝәш манә».

Әм дькарьн хьзмәтийа хԝәда шабуна хԝә һе зедә кьн, һәрге бьфькьрьн кӧ һәр шьхӧл йан жи щабдари бь рʹасти чьрʹа ԛимәт ә. Һәр шьхӧл кӧ әм дькьн ԛәдьрәки мәзьн ә, чьмки әм дьбьнә «һәвалпʹаред Хԝәде йед хәбате» (1 Корн. 3:9, ИМ). Сәва бәдәԝбуна тьштәки ԛимәт ӧнда нәбә, лазьм ә һәр гав ве тʹәмьз кьн у бьбьрьԛиньн. Мина ве йәке, сәва кӧ әм шабуна хԝә ӧнда нәкьн, лазьм ә әм һәр гав бьфькьрьн дәрһәԛа ԝи ԛәдьре мәзьн, кӧ әм дькарьн Хԝәдерʹа хьзмәт кьн. Һәрге әм тʹьме ӧса бькьн, әме шьхӧле хԝә бәрамбәри шьхӧле тʹӧ кәси нәкьн, һәла кʹе чьԛаси дькә. Әме ӧса жи нәфькьрьн кӧ шьхӧле Хԝәде кʹижан кӧ әм дькьн, кем ԛимәт ә, ле шьхӧле кӧ йед дьн дькьн, һе зедә ԛимәт ә (Галт. 6:4).

ҺʹЬШ-АԚЬЛЕ ХԜӘ БЬДЬНӘ СӘР ШЬХӦЛЕД РʹӦҺʹАНИ

Дьԛәԝьмә Йуһʹәнна заньбу, ԝәки хьзмәтийа ԝи ԝе гәләк ԝәхт нәкʹьшинә, ле әԝ дьбәкә нә жи дьфькьри, ԝәки ԝе ньшкева ча бе сәкьнандьн (Йуһʹн. 3:30). Сала 30 Д.М., демәк ԝәкә шәш мәһ паши ве йәке, чахе Йуһʹәнна Иса ньхӧманд, Һеродәс Пʹадша Йуһʹәнна кьрә кәле. Ле йәкә Йуһʹәнна диса чьԛас дькарьбу шәʹдәти дьда (Марԛ. 6:17-20). Ле нава ԝан гӧһастьнада чь али ԝи кьр, кӧ әԝи шабуна хԝә ӧнда нәкьр? Һʹьш-аԛьле ԝи сәр тьштед рʹӧһʹани бу.

Чахе Йуһʹәнна кәледа бу, әԝ дәрһәԛа пешдачуйина хьзмәтийа Иса пеһʹәсийа (Мәт. 11:2; Луԛа 7:18). Йуһʹәнна дӧдьли нибу, ԝәки Иса Мәсиһ ә, ле дьбәкә әԝ дьфькьри, ԝәки гәло Иса ԝе һʹәму пʹехәмбәртийед дәрһәԛа Мәсиһ бинә сери, кʹижан кӧ Ньвисарада һәбун. Йуһʹәнна заньбу ԝәки ль гора пʹехәмбәртийа, Мәсиһ ԝе бьбә пʹадша, ләма дьԛәԝьмә әԝ  дьфькьри, гәло Иса ԝе зутьрәке пʹадшатийе дәстпекә йан на? Йан жи дьбәкә әԝ дьфькьри, кӧ Иса ԝе ԝи жь кәле дәрхә? Әԝи гәләк дьхԝәст зәлал һәр тьшти бьзаньбә, ләма жи әԝи дӧ шагьртед хԝә шандә бал Иса, сәва жь ԝи бьпьрсьн: «Тӧ әԝ и, йе кӧ гәрәке бьһата, йан әм һивийа йәки дьн бьн?» (Луԛа 7:19). Чахе шагьрт вәгәрʹийан бал Йуһʹәнна, бешьк әԝи рʹьнд гӧһ да ԝан, гава ԝана гьли кьр, кӧ Иса чь кʹәрәмәта дькә, у гот кӧ ван гьлийа бежьнә Йуһʹәнна: «Кор дьбиньн, сәԛәт дьгәрʹьн, кʹоти паԛьж дьбьн, кәрʹ дьбьһен, мьри рʹадьбьн у фәԛирарʹа жи Мьзгини те дайине» (Луԛа 7:20-22).

Әм баԝәр ьн кӧ Йуһʹәнна пе ве йәке гәләк шьдийа. Әԝи фәʹм кьр кӧ сәр Иса һʹәму пʹехәмбәртийед дәрһәԛа Мәсиһ тенә сери. Рʹаст ә һатьна Иса ԝи жь кәле аза нәкьр, ле Йуһʹәнна заньбу ԝәки хьзмәтийа ԝи тʹӧ щар бадиһәԝа нибу. Нава щурʹә-щурʹә дәрәщада, мәʹнийа ԝийә шабуне һәбу.

Һәрге әм һʹьш-аԛьле хԝә бьдьнә сәр әʹламәтийед дәрһәԛа шьхӧлед мәйи һʹәмдьнйайе, әме шабуна хԝә хԝәй кьн

Мина Йуһʹәнна, һәрге һʹьш-аԛьле мә жи сәр тьштед рʹӧһʹани бә, әме бькарьбьн бь шабуне у бь сәбьр бәр һәр чәтьнайа у гӧһастьна тәйах кьн (Колс. 1:9-11). Әм ве йәке дькарьн бькьн, һәрге Кʹьтеба Пироз бьхуньн у сәр бьфькьрьн, чьмки әԝ йәк ԝе тʹьме бинә бира мә, ԝәки һәр шьхӧле мә кӧ әм бона Хԝәде дькьн, тʹӧ щар бадиһәԝа нинә (1 Корн. 15:58). Сандра дьбежә: «Әз һәр рʹож жь Кʹьтеба Пироз сәрики дьхуньм, у әԝ йәк али мьн дькә, кӧ әз һе незики Йаһоԝа бьм у һʹьш-аԛьле хԝә бьдьмә сәр Йаһоԝа, нә кӧ сәр хԝә». Әм ӧса жи дькарьн һʹьшаԛьле хԝә бьдьнә сәр әʹламәтийед дәрһәԛа шьхӧлед мә. Әԝ әʹламәти али мә дькьн, ԝәки әм бьфькьрьн сәр шьхӧлед кӧ хушк-бьра сәва Йаһоԝа дькьн, нә кӧ бькʹәвьнә һʹәйра хԝә. Сандра дьбежә: «Бәрнамед һәрмәһи жь Бродкастинге али мә дькьн, кӧ хԝә незики тʹәшкиләта Йаһоԝа тʹәхмин кьн, у кʹьфшкьрьна хԝәда шабуна хԝә ӧнда нәкьн».

Йуһʹәннайе Ньхӧмдар ԝәʹде хьзмәтийа хԝәйә кьн, «бь рʹӧһʹ у ԛәԝата Елйас» хьзмәт дькьр, у әԝ жи мина Елйас «хут мәрьвәки мина мә бу» (Луԛа 1:17; Аԛуб 5:17). Һәрге әм чʹәʹв бьдьнә мәсәла Йуһʹәнна, кӧ рʹази бьн бона һәр шьхӧле кʹижан әм дькьн у һʹьш-аԛьле хԝә бьдьнә сәр тьштед рʹӧһʹани, әʹмьре мәда чь жи бьԛәԝьмә, әме жи хьзмәтийа хԝәда шабуна хԝә хԝәй кьн.