Дәрбази һондоре буйин

Дәрбази навәроке буйин

 ГОТАРА БОНА ҺИНБУНЕ 38

«Ԝәрьнә щәм Мьн ... у Әзе Рʹьһʹәтийе Бьдьмә Ԝә»

«Ԝәрьнә щәм Мьн ... у Әзе Рʹьһʹәтийе Бьдьмә Ԝә»

«Ԝәрьнә щәм мьн һʹәмуйед ԝәстийайи у баргьран у әзе рʹьһʹәтийе бьдьмә ԝә» (МӘТ. 11:28).

КʹЬЛАМА 17 «Дьхԝазьм»

ВЕ ГОТАРЕДА *

1. Ль гора Мәтта 11:28-30, Иса чь соз да?

ИСА созәки гәләк дьлгәрм да әʹлаләте, йа кӧ гӧһ дьда ԝи. Әԝи готә ԝан: «Ԝәрьнә щәм мьн . . . у әзе рʹьһʹәтийе бьдьмә ԝә». (Бьхунә Мәтта 11:28-30.) Әԝ созе ԝи пʹучʹ нибу. Мәсәлә, бьфькьрьн дәрһәԛа кьре ԝи һьндава жьнәке, кӧ бь нәхԝәшийа гьран нәхԝәш бу.

2. Иса бона жьнка нәхԝәш чь кьр?

2 Әԝ жьньк гәләк дьлтәнг бу, чьмки һʹәԝще аликʹарийе бу. Әԝ чубу бал гәләк һʹәкима, сәва хԝә ԛәнщ кә. Ле тʹӧ тьшти али ԝе нәкьрьбу, у әԝ 12 сала жь бо ве нәхԝәшийа хԝә дьчәрчьри у ль гора Ԛануна Муса әԝ нәпаԛьж дьһатә һʹәсабе (Ԛан. Кʹаһ. 15:25). Паше әԝ пеһʹәсийа кӧ Иса нәхԝаша ԛәнщ дькә, у чу ԝи бьгәрʹә. Чахе әԝе Иса дит, дәсте хԝә да рʹишийед кʹьнще ԝи, у дәрберʹа ԛәнщ бу! Иса нә тʹәне сьһʹәт-ԛәԝата ԝе ԛәнщ кьр, ле әԝи пе хәбәрдана хԝәйә тʹәви ԝе, ԛәдьре ԝе бьльнд кьр. Мәсәлә, хәбәрданеда әԝи гьлики бь ԛәдьр у гәрм жерʹа гот, «әʹвде». Бьдьнә бәр чʹәʹве хԝә, әԝ жьньк рʹьһʹәтикә чьԛас мәзьн станд у ча шьдийа! (Луԛа 8:43-48).

3. Кʹижан пьрса әме шеԝьр кьн?

3 Дина хԝә бьдьне, кӧ әԝ жьньк хԝәха чу бал Иса, демәк әԝе хԝәха гава пешьн авит. Иро жи ӧса нә, пешийе гәрәке әм хԝәха гаве бавежьн, ԝәки бенә бал Иса. Фәʹмдари йә, ԝәʹде мәда Иса бь кʹәрәмәт нәхԝәшийед ԝан мәрьва ԛәнщ накә, йед кӧ тенә щәм ԝи. Ле әԝ иро жи мә тʹәглиф дькә: «Ԝәрьнә щәм мьн . . . у әзе рʹьһʹәтийе бьдьмә ԝә». Ве готареда, әме щаба ван пенщ пьрса пебьһʹәсьн: Ча әм дькарьн бенә бал Иса? Иса чь дьхԝәст бьгота бь ԝан гьлийа: «Нире мьн һьлдьнә сәр хԝә»? Әм жь Иса чь дькарьн һин бьн? Чьрʹа шьхӧле кӧ әԝи дайә мә, мә дьшьдинә у ԛәԝи дькә? У ча әм  дькарьн бәрдәԝам кьн бьн нире Исада рʹьһʹәтийе бьвиньн?

«ԜӘРЬНӘ ЩӘМ МЬН»

4-5. Чь щурʹәйи әм дькарьн бенә бал Иса?

4 Гавәк кӧ әм ча дькарьн бенә щәм Иса әԝ ә, кӧ һе зедә дәрһәԛа ԝи пебьһʹәсьн, демәк әԝи чь дьгот у чь дькьр (Луԛа 1:1-4). Тʹӧ кәс дәԝса мә нькарә ве йәке бькә, ләма әм гәрәке хԝәха леколина бькьн. Әм ӧса жи тенә бал Иса, чахе сафи дькьн кӧ бенә ньхӧмандьне у дьбьнә шагьртед ԝи.

5 Әм ӧса жи тенә щәм Иса чахе дьчьн бал рʹуспийа, гава мәрʹа аликʹари лазьм ә. Иса «пʹешкʹеш бь щурʹе мәрьва, ДТʹ» дьдә хәбате, сәва мьԛати пәзед ԝи бьн (Әфәс. 4:7, 8, 11; Йуһʹн. 21:16; 1 Пәт. 5:1-3). Ле әм хԝәха гәрәке незики рʹуспийа бьн, сәва аликʹарийе жь ԝана бьхԝазьн. Фәʹмдари йә, рʹуспи нькарьн фькьред мә бьхуньн у бьзаньбьн әм һʹәԝще чь нә. Дина хԝә бьдьне, бьраки бь наве Щулиан чь дьбежә: «Әз гәрәке жь бо сьһʹәт-ԛәԝата хԝә жь Бәйтʹәле бьчума. У һәваләки мьн ширәт да мьн, ԝәки һәрʹьм бал рʹуспийа, сәрледана шьвантийе бьхԝазьм. Пешийе әз дьфькьрим кӧ мьнрʹа әԝ йәк нәлазьм ә. Ле паше мьн аликʹари хԝәст, у ԝана тʹәсәлийа мьн кьр. Әԝ тʹәсәлийа ԝан пʹешкʹешәкә лапә ԛимәт бу бона мьн». Рʹуспийед амьн дькарьн али мә бькьн, ԝәки әм «нет-фькьра Мәсиһ» бьзаньбьн, демәк фәʹм кьн у чʹәʹв бьдьнә фькьр у ньһерʹандьна ԝи (1 Корн. 2:16; 1 Пәт. 2:21). Әԝ рʹасти жи алийе ԝанда пʹешкʹешәкә гәләк ԛимәт ә бона мә.

«НИРЕ МЬН ҺЬЛДЬНӘ СӘР ХԜӘ»

6. Иса чь дьхԝәст бьгота бь ԝан гьлийа: «Нире мьн һьлдьнә сәр хԝә»?

6 Чахе Иса гот: «Нире мьн һьлдьнә сәр хԝә», дьԛәԝьмә әԝи дьхԝәст бьгота, кӧ «Һʹӧкӧме мьн ԛәбул кьн». Ӧса жи дьбәкә әԝи дьхԝәст бьгота «Тʹәви мьн, бьн нирәкида бьн, у әме тʹәвайи бона Йаһоԝа бьхәбьтьн». Чь жи әԝи дьхԝәст бьгота, йәкә те кʹьфше, сәва кӧ нир һьлдьн лазьм ә тьштәки бькьн.

7. Ль гора Мәтта 28:18-20, кʹижан шьхӧл мәрʹа һатийә дайине, у чьда әм дькарьн дӧдьли нәбьн?

7 Әм тʹәглифкьрьна Иса ԛәбул дькьн, чахе әʹмьре хԝә тʹәсмили Йаһоԝа дькьн у тенә ньхӧмандьне. Әԝ тʹәглифкьрьн бона һʹәму мәрьва йә, у ләма Иса ԝе тʹӧ щар инкʹар нәкә мәрьвед дьлсах, йед кӧ дьхԝазьн Хԝәдерʹа хьзмәт кьн (Йуһʹн. 6:37, 38). Һʹәму шагьртед Мәсиһрʹа ԛәдьрәки гәләк мәзьн һатә дайине, кӧ тʹәви Иса ԝи шьхӧли бькьн, кʹижан кӧ Йаһоԝа да ԝи. У әм дькарьн дӧдьли нәбьн, ԝәки Иса ԝе тʹьме тʹәви мә бә у али мә бькә, кӧ ԝи шьхӧли биньн сери. (Бьхунә Мәтта 28:18-20.)

«ЖЬ МЬН ҺИН БЬН»

Мина Иса мәрьва гәш кьн у рʹьһʹәтийе бьдьнә ԝан (Бьньһерʹә абзаса 8-11) *

8-9. Чьрʹа мәрьвед мьлук незики Иса дьбун, у кʹижан пьрса әм гәрәке бьдьнә хԝә?

8 Мәрьвед мьлук незики Иса дьбун, чьмки ԝана хԝәш дьһат тʹәви ԝи бьн (Мәт. 19:13, 14; Луԛа 7:37, 38). Ле чьрʹа? Дина хԝә бьдьн фьрԛийа ортʹа Иса у Ферьсийа. Әԝ сәрԝеред дине щьһуйа дьлсар у ԛӧрʹә бун (Мәт. 12:9-14). Ле Иса дьлгәрм у мьлук бу. Ферьси дькʹәтьнә һʹәйра хԝә у бабах бун, чьмки нава щьмәʹтеда щийе бьльнд дьгьртьн. Ле Иса тьштед ӧса ԛәбул нәдькьр, у әԝи шагьртед хԝә һин дькьр, ԝәки мьлук бьн у кʹара мәрьва бьгәрʹьн (Мәт. 23:2, 6-11). Ферьсийа ӧса һʹӧкӧме хԝә дьданә хәбате, кӧ мәрьва жь тьрсе гӧрʹа ԝан дькьрьн, сәва алийе ԝанда нәйенә щәзакьрьне (Йуһʹн. 9:13, 22). Ле Иса пе кьред хԝә у гьлийед ширьн мәрьв дьшьдандьн у баре ԝан сьвьк дькьр.

9 Ле һун чʹәʹв дьдьнә Иса? Пьрса бьдьнә  хԝә: «Мәрьв мьн ӧса нас дькьн ча кәсе нәрм у мьлук? Әз бона мәрьва бь дьл у щан шьхӧлед ньмьз дькьм? Әз мәрьварʹа һʹәйф ьм?»

10. Мәрьвед кӧ тʹәви Иса һәвкʹари дькьрьн, хԝә тʹәви ԝи ча тʹәхмин дькьрьн?

10 Иса йәки бь әʹдьл бу у тʹәви ԝи һʹәԝас бу шьхӧлкʹарийе бькьн, у әԝи һʹьз дькьр шагьртед хԝә һин кә (Луԛа 10:1, 19-21). Әԝи дьл дьда шагьртед хԝә, ԝәки пьрса бьдьнә ԝи, у хԝәха жи пьрс дьда ԝан, чьмки дьхԝәст фькьред ԝан пебьһʹәсә (Мәт. 16:13-16). Чаԝа кӧлирьк бахче башда шин дьбьн у жь сӧр-сәрме хԝәйкьри нә, ӧса жи шагьртед Иса тʹәви ԝи гәш дьбун. Ԝана дина хԝә дьдане, кӧ Иса ча һин дькә у ԝана хԝәха жи бәред баш дьанин, демәк кьред баш дькьрьн.

Һәвалһʹьз бьн у хԝә ӧса бьгьрьн, кӧ мәрьварʹа һеса бә незики ԝә бьн

Хирәт бьн

Мьлук у хәбатһʹьз бьн *

11. Әм кʹижан пьрса гәрәке бьдьнә хԝә?

11 Һәрге һʹӧкӧме ԝә һәйә, пьрсед ӧса бьдьнә хԝә: «Малда йан жи хәбатеда мәрьв тʹәви мьн хԝә рʹьнд тʹәхмин дькьн? Әз әʹдьлайе хԝәй дькьм? Әз хԝә ӧса дьгьрьм кӧ мәрьв һеса бькарьбьн пьрса бьдьнә мьн? Әз бь дьл у щан фькьред ԝан дьбьһем?». Әм тʹӧ щар нахԝазьн бьбьнә мина Ферьсийа, йед кӧ һерс дькʹәтьн чахе мәрьв ԝанда дӧдьли дьбун, у берʹәʹм бун һьндава ԝанда, йед кӧ мина ԝан нәдьфькьрин (Марԛ. 3:1-6; Йуһʹн. 9:29-34).

«ӘЗЕ РʹЬҺʹӘТИЙЕ БЬДЬМӘ ԜӘ»

12-14. Чьрʹа әм гәш у ԛәԝат дьбьн, чахе шьхӧле кӧ Иса дайә мә, тиньн сери?

12 Чьрʹа әм рʹьһʹәтийе дьстиньн у гәш дьбьн, чахе ԝи шьхӧли дькьн, кʹижан кӧ Иса да мә? Гәләк мәʹни һәнә, ле ԝәрә әм тʹәне чәнд мәʹнийа шеԝьр кьн.

13 Сәркʹаред мә лапә баш ьн. Йаһоԝа Сәркʹаре мәйи Һәри Мәзьн, нә ахаки бешекьр у дьлсар ә. Әԝ шьхӧле мә ԛимәт дькә (Ибрн. 6:10). У әԝ ԛәԝате дьдә мә, кʹижан кӧ мәрʹа лазьм ә, сәва шьхӧле ԝи биньн сери (2 Корн. 4:7; Галт. 6:5). Пʹадшайе мә Иса, мәсәләкә лапә баш мәрʹа һиштийә, кӧ әм гәрәке һьндава мәрьвада ча бьн (Йуһʹн. 13:15). Рʹуспийед кӧ шьвантийе мә дькьн, чʹәʹв дьдьнә «сәрәкшьван», демәк Иса (Ибрн. 13:20; 1 Пәт. 5:2). Әԝана сәр хԝә дьхәбьтьн сәва һьндава һʹәмуйада һʹәйф бьн, мә ԛәԝи кьн у мерхас бьн, чьмки әԝана мә һин дькьн у мьԛати мә дьбьн.

14 Һәвалед мәйи лапә баш һәнә. Ве дьнйайеда һәвалед тʹӧ кәси ӧса дәлал у бь һʹьзкьрьн ниньн чаԝа һәвалед мә, у шьхӧләки ӧса тʹӧ кәс накә, чь кӧ әм дькьн. Һәла бьфькьрьн: Ԛәдьрәки мәйи ӧса һәйә, кӧ әм тʹәви ԝан мәрьва һәвкʹарийе дькьн, йед кӧ нав-намус дьжин, ле хԝә жь кәсәки четьр һʹәсаб накьн. Әԝана аԛьл ьн у фәрәсәтед ԝанә баш һәнә, ле мьлук ьн у мәрьва сәр хԝәрʹа дьгьрьн. Әԝана мә нә тʹәне ча һәвалхәбатчи һʹәсаб дькьн, ле ча дост. У һʹьзкьрьна ԝан һьндава мә ӧса ԛәԝи йә, кӧ әԝана һәла һе һазьр ьн әʹмьре хԝә жи бона мә бьдьн!

15. Әм гәрәке ча бьн һьндава шьхӧле кӧ әм дькьн?

15 Әм шьхӧләки лапи баш дькьн. Әм мәрьва рʹастийа дәрһәԛа Йаһоԝа һин дькьн у дәрәԝед Мире-щьна әшкәрә дькьн (Йуһʹн. 8:44). Шәйтʹан пе дәрәԝед хԝә дәрдед мәрьва зедә дькә у әʹмьре ԝан беһеви дькә. Мәсәлә, әԝ дьхԝазә мә бьдә баԝәркьрьне, ԝәки Йаһоԝа гӧнед мә набахшинә у мә һʹьз накә. Ле бь рʹасти чахе әм тенә бал Мәсиһ, гӧнед мә тенә бахшандьне у Йаһоԝа жи мә һәр кәси гәләк һʹьз дькә. Дәрәԝед Шәйтʹан рʹасти жи мәрьва дьԛӧрӧфиньн! (Рʹом. 8:32, 38, 39). Ле әм шабунәкә мәзьн дьстиньн, чахе али мәрьва дькьн кӧ итʹбарийа хԝә Йаһоԝа биньн, у чахе әм дьвиньн әԝана ча бәхтәԝар дьбьн!

 БӘРДӘԜАМ КЬН БЬН НИРЕ ИСАДА РʹЬҺʹӘТИЙЕ БЬСТИНЬН

16. Баре Иса ча щӧдә дьбә жь баред майин, кӧ әм мәщбур дьбьн һьлдьн?

16 Баре кӧ Иса дьбежә мә һьлдьн, щӧдә дьбә жь баред майин кӧ әм мәщбур ьн һьлдьн. Мәсәлә, хьлазийа рʹоже, чахе әм жь хәбате тен, әм нә тʹәне ԝәстийайи нә, ле ләзәте жи навиньн. Ле чахе әм ԝәʹде хԝә хәрщ дькьн, гава дьчьн Йаһоԝарʹа у Мәсиһрʹа хьзмәт дькьн, әм бь шабуне тʹьжә у дьлрʹьһʹәт вәдьгәрʹьн. Дьбәкә чахе әм паши хәбате ԝәстийайи нә, зоре хԝә дькьн һәрʹьн щьвате. Ле чахе әм жь щьвате вәдьгәрʹьн мал, әм гәш у бь ԛәԝата тʹәзә вәдьгәрʹьн. Әм һьнге жи ләзәте дьвиньн чахе жь хьзмәтийе вәдьгәрʹьн у чахе Кʹьтеба Пироз леколин дькьн. Әԝ шабун у ԛәԝата кӧ  әм дьстиньн, пʹьр бьльнд ә һьмбәри щәфе мә.

17. Чьрʹа әм гәрәке сәр дәрәща хԝә рʹаст бьньһерʹьн у фәсал бьн?

17 Әм гьшк гәрәке фәʹм бькьн кӧ ԛәԝата мә бь синор ә. Ләма жи әм гәрәке мьԛати хԝә бьн у сәрԝахт бьн, һәла әм ԝәʹдә у ԛәԝата хԝә сәр чь хәрщ дькьн. Мәсәлә, әм дькарьн ԛәԝата хԝә хәрщ кьн сәр тʹопкьрьна һәбуке. Дина хԝә бьдьне, Иса чь готә мерәки дәԝләти, йе кӧ жь ԝи пьрси: «Әз чь бькьм, ԝәки жийина һʹәта-һʹәтайе ԝар бьм?». Әԝи мерьки гӧрʹа Ԛануне дькьр, у ча те кʹьфше мәрьвәки һʹәйф бу, чьмки кʹьтеба Марԛосда те готьне кӧ Иса «әԝ һʹьз кьр». Иса әԝ сәрԝере щаһьл тʹәглиф кьр бь ԝан гьлийа: «Һәрʹә чи тә һәйә бьфьрошә у пәй мьн ԝәрә». Әԝи мерьки дьхԝәст пәй Иса бьчуйа, ле «гәләк һәбука» ԝи һәбу у ча те кʹьфше әԝи һәбука хԝә нькарьбу жь дәсте хԝә бәрда (Марԛ. 10:17-22). Әԝи ԛәбул нәкьр кӧ нире Иса һьлдә у бәрдәԝам кьр «Һәбукерʹа» хӧламтийе бькә (Мәт. 6:24). Ле ԝәйе чь бьжбарта?

18. Әм щара гәрәке чь бькьн у чьрʹа?

18 Щар-щара лазьм ә әм хԝә бьщерʹьбиньн һәла әʹмьре мәда чь щийе пешьн дьгьрә. Ле чьрʹа? Чьмки ӧса әме бьзаньбьн һәла әм ԛәԝата хԝә бь билани хәрщ дькьн йан на. Дина хԝә бьдьне, бьраки мәйи щаһьл Марк чь дьбежә: «Гәләк сала әз дьфькьрим кӧ әз пәй һәбуке накʹәвьм. Әз пешәнг бум, ле мьн һе зедә ԛәԝат у ԝәʹде хԝә хәрщ дькьр сәва пʹәра чекьм у һе баш бьжим. Мьн дьхԝәст бьзаньбьм кӧ чьрʹа әʹмьре мьн ӧса баргьран буйә. Паше мьн фәʹм кьр, ԝәки пешийе әз кʹара хԝә дьгәрʹьм у дькʹәвьмә һʹәйра хԝәстьнед хԝә, ле бона Йаһоԝа тʹәне ԝи ԝәʹдә у ԛәԝата хԝә хәрщ дькьм, чь кӧ дьминә». Марк ньһерʹандьна хԝә у жийина хԝә гӧһаст, сәва кӧ һе зедә Йаһоԝарʹа хьзмәт бькә. Әԝ дьбежә: «Щара әз бона пʹәра бәрхԝә дькʹәвьм, ле пе аликʹарийа Йаһоԝа у Иса, әз һʹьш-аԛьле хԝә дьдьмә сәр хьзмәтийа Йаһоԝарʹа».

19. Чьрʹа фәрз ә ньһерʹандьна мә рʹаст бә?

19 Әме жь нире Иса рʹьһʹәтийе у ԛәԝате бьстиньн, һәрге се тьшта бькьн. Йа пешьн, әм гәрәке ньһерʹандьна рʹаст хԝәй кьн. Әм шьхӧле Йаһоԝа дькьн, ләма жи гәрәке әԝи шьхӧли ӧса бькьн ча ԝи хԝәш те. Әм хәбатчи нә, ле Йаһоԝа ахайе мә йә (Луԛа 17:10). Һәрге бьн нирда га мьԛабьли рʹебәрийа хԝайе хԝә дәрте, у зоре дьхԝазә рʹийа хԝәда һәрʹә, әԝ зийане дьдә хԝә у хԝә дьчәрчьринә. Мина ве йәке, һәрге әм шьхӧле Йаһоԝа ӧса бькьн ча әм дьхԝазьн, әме нире хԝә баргьран кьн. Бәле, ле чахе әм һәр тьшти ӧса бькьн ча Йаһоԝа дьхԝазә у ча әԝ рʹебәрийе дьдә мә, әме бькарьбьн тьштед ӧса бькьн, кӧ мә тʹьре әм нькарьн. Бир нәкьн кӧ тʹӧ кәс нькарә рʹийа Йаһоԝа бьгьрә, кӧ ԛьрара хԝә бинә сери! (Рʹом. 8:31; 1 Йуһʹн. 4:4).

20. Чахе әм дькʹәвьнә бьн нире Иса, нета мә гәрәке чь бә?

 20 Йа дӧда, пе нета рʹаст шьхӧл бькьн. Нета мә әԝ ә, ԝәки пәсьна бьдьнә Баве хԝәйи һʹьзкьри Йаһоԝа. Мәрьвед ԛьрʹна йәкеда, йед кӧ тьма у хԝәһʹьз бун, у тʹәне кʹара хԝә дьгәрʹийан, зутьрәке бунә бебәхт у нире Иса һиштьн (Йуһʹн. 6:25-27, 51, 60, 66; Фили. 3:18, 19). Ле әԝед кӧ бь дьле тʹәмьз Хԝәде у мәрьв һʹьз дькьрьн, тʹәмамийа әʹмьре хԝәда бәхтәԝар бун, чьмки әԝ нир һьлдан, у һевийа ԝан һәбу кӧ тʹәви Иса сәр әʹзмана сәрԝертийе бькьн. Әме жи бәхтәԝар бьминьн, һәрге пе нета рʹаст у бь дьле сах нире Иса һьлдьн.

21. Ль гора Мәтта 6:31-33, чьда әм дькарьн дӧдьли нәбьн?

21 Йа сьсийа, баԝәрийа хԝә хԝәй кьн. Мә әʹмьрәки ӧса бьжарт, кӧ әм гәләк тьшт жь хԝә кем дькьн у шьхӧле гьран дькьн. Иса пешда мәрʹа гот, ԝәки әме бенә зерандьне. Ле әм гәрәке баԝәр кьн у бир нәкьн, кӧ Йаһоԝа ԝе ԛәԝате бьдә мә сәва һʹәму тәнгасийада сәбьр кьн. Әм чьԛас зедә сәбьр дькьн, һаԛас баԝәрийа мә ԝе һе ԛәԝи бә у әме бьшьдьн (Аԛуб 1:2-4). Әм ӧса жи баԝәр дькьн, ԝәки Йаһоԝа ԝе али мә бькә гава әм тьштәкида һʹәԝщә бьн, ӧса жи Иса ԝе мьԛати мә бә, у хушк-бьред мә жи ԝе мә бьшьдиньн. (Бьхунә Мәтта 6:31-33; Йуһʹн. 10:14; 1 Тʹеслн. 5:11). Бәле, һʹәму тьштед мә һәнә чь кӧ мәрʹа лазьм ә, сәва чәтьнайада сәбьр кьн.

22. Әм бона чь гәрәке рʹази бьн?

22 Жьнка кӧ Иса ле ԛәнщ кьр, һәма ве рʹоже рʹьһʹәти станд у гәш бу. Ле һәрге әԝ буйә шагьрта Мәсиһ, әԝе һʹәта-һʹәтайе гәш бьминә. Ле бь тʹәхмина ԝә әԝ пәй Иса чу? Һәрге әԝе бьжартийә кӧ нире Иса һьлдә сәр хԝә, бьдьнә бәр чʹәʹве хԝә кӧ әԝе хәлатәкә чьԛас мәзьн стандийә, демәк тʹәви Иса сәр әʹзмана йә! Һәр тьшт чь кӧ әԝе жь хԝә кем кьрийә у ԛӧрбан кьрийә бона Иса, найе бәрамбәрикьрьне тʹәви ве кʹәрәме, чь кӧ әԝе стандийә! Фьрԛи тʹӧнә һевийа мә жийина сәр әʹрде йан сәр әʹзмана йә, йәкә әме гәләк бәхтәԝар у рʹази бьн, кӧ мә ԛәбул кьрийә әв тʹәглифкьрьна Иса: «Ԝәрьнә щәм мьн»!

КʹЬЛАМА 13 Иса Мәрʹа Мәсәлә йә

^ абз. 5 Иса мә тʹәглиф дькә, ԝәки бенә щәм ԝи. Ле чь әм гәрәке бькьн, сәва тʹәглифкьрьна ԝи ԛәбул кьн? Щаба ве пьрсе әме ве готареда пебьһʹәсьн. Әԝ готар ԝе ӧса жи бинә бира мә, кӧ чахе тʹәви Мәсиһ һәвкʹарийе дькьн ча әм дькарьн рʹьһʹәтийе у дьлбинийе бьстиньн.

^ абз. 60 ШЬРОВӘКЬРЬНА ШЬКЬЛ: Иса бь щурʹә-щурʹә мәтода мәрьва гәш дькә у рʹьһʹәтийе дьдә.

^ абз. 66 ШЬРОВӘКЬРЬНА ШЬКЬЛ: Чаԝа кӧ Иса, бьрак бь щур′ә-щур′ә тьшта мәрьва гәш дькә.