Дәрбази һондоре буйин

Дәрбази навәроке буйин

Ԛәнщи; Ча Дькарьн Нав Хԝәда Пешда Биньн?

Ԛәнщи; Ча Дькарьн Нав Хԝәда Пешда Биньн?

ҺӘР кәс жь мә дьхԝазә, ԝәки мә нас кьн ча мәрьве ԛәнщ. Ле ве дьнйайеда иро гәләк чәтьн ә әԝи һʹӧнӧри бьдьнә кʹьфше, чьмки гәләк мәрьв «нәйаред ԛәнщийе» нә (2 Тимтʹ. 3:3). Әԝана хԝә бь сәри хԝә нә у бь һʹьш-аԛьле хԝә сафи дькьн чь ԛәнщ ә у чь хьраб ә, у «жь хьрабрʹа дьбежьн ԛәнщ, жь ԛәнщрʹа дьбежьн хьраб» (Иша. 5:20). Хенщи ве йәке, әм гьшк гӧнәкʹар ьн у ԛәԝьмандьнед әʹмьре мәда жи сәр мә һʹӧкӧм дьбьн. Ләма щара әм дькарьн хԝә мина Ени * тʹәхмин кьн, йа кӧ гәләк сала Йаһоԝарʹа хьзмәт дькә, әԝ дьбежә: «Мьнрʹа чәтьн ә баԝәр кьм, ԝәки әз дькарьм мәрьвәкә ԛәнщ бьм».

Ле ча баш ә ԝәки әм дькарьн бьбьнә мәрьвед ԛәнщ! Ԛәнщи дькʹәвә нава бәре рʹӧһʹе Хԝәдейи пироз. Әԝ рʹӧһʹ жь гӧнәкʹарийа мә у жь ԝан тьшта, йед кӧ рʹе мә дьгьрьн ԛәнщ бьн, ԛәԝаттьр ә. Ләма ԝәрә әм әԝи һʹӧнӧри һе кʹур шеԝьр кьн у пебьһʹәсьн чаԝа һе зедә нав хԝәда пешда биньн.

ЧЬ ЙӘ ԚӘНЩИ?

Һәрге кьн бежьн, әԝ һәйә һʹӧнӧр йан жи хәйсәте мәрьва. Тʹӧ хьраби нав веда тʹӧнә, әԝ һʹәму тьштида тʹәмьз ә. Ԛәнщи әʹйан ә пе бәре хԝә, кʹижан кӧ мәрьварʹа кʹаре тинә. Әԝ һʹӧнӧрәки гәләк баш ә, кӧ пе шьхӧлед ӧса те кʹьфше, кʹижан кери мәрьва тен.

Гәләк мәри нәфәред хԝә у һәвалед хԝәрʹа ԛәнщийе дькьн, ле гәло ԛәнщи тʹәне әв йәк те һʹәсабе? Бь рʹасти әм һәр гав нькарьн әви һʹӧнӧри бьдьнә кʹьфше, чьмки Кʹьтеба Пироз дьбежә, ԝәки «ль рʹуйе әʹрде зьламе сальһ [рʹаст] тʹӧнә йә, кӧ һәртʹьм ԛәнщийе бькә у ԛәт гӧнә нәкә» (Ԝаиз 7:20). Паԝлосе шанди һʹәлал ани сәр хԝә: «Әз заньм кӧ нава мьнда, аԝа готи бьнйатʹа мьнда, тʹӧ тьште ԛәнщ наминә» (Рʹом. 7:18). Һәрге әм дьхԝазьн кӧ әԝ һʹӧнӧр нав мәда бә, фәʹмдари йә әм гәрәке аликʹарийе жь Канийа ԛәнщийе бьхԝазьн.

«ХӦДАН . . . ԚӘНЩ Ә»

Ԛанун у принсипед ԛәнщийе Йаһоԝа Хԝәде датинә. Дәрһәԛа ԝи әм дьхуньн: «Тӧ ԛәнщ и у ԛәнщийе дьки; Ԛанунед хԝә һини мьн бькә» (Зәб. 119:68, ИМ). Ԝәрә әм дӧ тьшта шеԝьр кьн, ԝәки Йаһоԝа ча ԛәнщийа хԝә дьдә кʹьфше, чаԝа кӧ ве рʹезеда те готьне.

Йаһоԝа ԛәнщ ә. Набә кӧ әԝ ԛәнщ нибә, чьмки һʹәму һʹӧнӧред ԝи ве йәкева гьредайи нә. Дина хԝә бьдьне, кӧ чь ԛәԝьми чахе Йаһоԝа готә Муса: «Әзе һʹәму ԛәнщийа хԝә ль бәр тәва дәрбаз кьм». Йаһоԝа рʹумәта хԝә у ӧса жи ԛәнщийа хԝә Мусарʹа әʹйан кьр. Муса дәнг бьһист кӧ гот: «Хӧдан, Хӧдан ьм! Хԝәдейе рʹәʹм у кʹәрәме, сәбьр-ськʹане, бь һʹӧб у амьнийеда хьнейо, кӧ бона һʹәзара хԝәйе һʹӧба амьн ә, нәһәԛийе, нәрʹастийе у гӧна дьбахшинә, ле сущдара бе щәза наһелә» (Дәркʹ. 33:19; 34:6, 7). Бәле, зәлал те кʹьфше, ԝәки Йаһоԝа һәр тьштида у һәр алийава ԛәнщ ә. Рʹаст ә Иса ԛәнщийеда мәсәла лапә мәзьн бу сәр әʹрде, ле әԝи гот кӧ «ԛәнщ тʹәне Хԝәде йә, пештьри ԝи кәсәки дьн тʹӧнә» (Луԛа 18:19).

Әм әʹфринада ԛәнщийа Йаһоԝа дьвиньн

 Йаһоԝа ԛәнщийе дькә. Йаһоԝа һәр тьшти жь ԛәнщийа хԝә дькә. «Хӧдан бона һʹәмуйа ԛәнщ ә, рʹәʹма Ԝи сәр һʹәму әʹфьринед Ԝи йә» (Зәб. 145:9). Йаһоԝа фьрԛийе накә нава мәрьва у жь ԛәнщийа хԝә һʹәмуйарʹа әʹмьр дьдә у тьштед кӧ бона жийине лазьм ә (Кʹар. Шанд. 14:17). Ԛәнщийа ԝи ӧса жи те кʹьфше бахшандьна ԝида. Зәбурбеж ньвиси: «Тӧ Хӧдано, ԛәнщ у афу кьр и» (Зәб. 86:5). Әм гәрәке дӧдьли нибьн, ԝәки Йаһоԝа «тʹӧ щар ԛәнщийе жь сәр ԝан набьрʹә, кʹижан кӧ дьжин беләкʹә» (Зәб. 84:11).

«ҺИНИ ԚӘНЩИКЬРЬНЕ БЬБЬН»

Әм дьлԛе Хԝәдеда һатьнә хӧльԛандьне, ләма жи әм дькарьн бьбьнә мәрьвед ԛәнщ у ԛәнщийе бькьн (Дәстп. 1:27). Йәкә Хәбәра Хԝәдеда те готьне, ԝәки хьзмәткʹаред ԝи гәрәке «һини ԛәнщикьрьне бьбьн» (Иша. 1:17). Ле чаԝа һин бьн ԛәнщийе бькьн? Дина хԝә бьдьнә се тьшта, кӧ ча ве йәке бькьн.

Йа пешьн, әм дькарьн дӧа бькьн бона рʹӧһʹе пироз, кʹижан кӧ дькарә али мә бькә ԛәнщийе нав хԝәда пешда биньн (Галт. 5:22). Бәле, рʹӧһʹе Хԝәдейи пироз дькарә али мә бькә ԛәнщийе һʹьз бькьн у хьрабийе бьтʹәрькиньн (Рʹом. 12:9). Бь рʹасти Кʹьтеба Пироз дьдә кʹьфше, ԝәки Йаһоԝа дькарә мә «нава һʹәму кьра у готьнед ԛәнщда бьшьдинә» (2 Тʹеслн. 2:16, 17).

Йа дӧда, әм гәрәке Хәбәра Хԝәде бьхуньн. Һәрге әм ӧса бькьн, Йаһоԝа дькарә «һәр шьвәрʹийед ԛәнщ» мә һин кә у «бона һʹәму кьрьнед ԛәнщ» мә һазьр кә (Мәтʹлк. 2:9; 2 Тимтʹ. 3:17). Чахе әм Кʹьтеба Пироз дьхуньн у сәр дьфькьрьн, бь ве йәке әм бь тьштед ԛәнщ дәрһәԛа Хԝәде у ԛьрара ԝи дьле хԝә тʹьжә дькьн. Ԝи щурʹәйи әм хьзнәкә ӧса тʹоп дькьн, кӧ ахьрийеда дькарә кери мә бе (Луԛа 6:45; Әфәс. 5:9).

Йа сьсийа, әм һәр тьшти дькьн сәва чʹәʹв бьдьнә ԛәнщийе (3 Йуһʹн. 11). Кʹьтеба Пирозда һәнә сәрһатийед ԝан мәрьва, жь кʹижана әм дькарьн ԛәнщийе һин бьн. Рʹаст ә Йаһоԝа у Иса мәсәла мәзьн ьн, ле әм дькарьн ӧса жи чʹәʹв бьдьнә мәрьвед дьн, йед кӧ ԛәнщи дькьрьн. Бәʹса хәбәре, дӧ мәсәлед баш әԝ һәнә Табитʹа у Барнабас (Кʹар. Шанд. 9:36; 11:22-24). Ԝе баш бә һун бьфькьрьн дәрһәԛа сәрһатийед ԝан у дина хԝә бьдьне кӧ ԝана чьда али мәрьва дькьр. Бьфькьрьн кӧ һун чь дькарьн бькьн, сәва аликʹарийе бьдьнә нәфәред хԝә йан жи хушк-бьред щьватеда. Бир нәкьн, ԝәки әԝ һәр дӧ мәрьв әʹйан бун ча мәрьвед ԛәнщ у бона кьред хԝә кʹәрәм стандьн. Һун жи дькарьн кʹәрәмед ӧса бьстиньн.

 Иро жи һәнә гәләк мәрьв, йед кӧ ԛәнщийеда мәсәлед баш дьһельн. Мәсәлә, бьфькьрьн дәрһәԛа рʹуспийед щьвате, йед кӧ херхԝаз ьн. Хенщи ԝе йәке, гәләк хушкед амьн жи һәнә, йед кӧ пе гьли у кьред хԝә «ширәтед ԛәнщ» һин дькьн (Тито 1:8; 2:3). Хушкәк бь наве Розлин дьбежә: «Һәвала мьн һәр тьшти дькә сәва аликʹарийе у дьл бьдә хушк-бьред щьвате. Әԝ дәрһәԛа дәрәщед ԝан дьфькьрә у гәләк щар пʹешкʹешед бьчʹук дьдә ԝан, йан жи тьштед майинда али ԝан дькә. Әз дьфькьрьм әԝ бь рʹасти жи мәрьвәкә ԛәнщ ә».

Йаһоԝа щьмәʹта хԝә һелан дькә, ԝәки «ԛәнщийе бьгәрʹьн» (Амс. 5:14). Һәрге әм ӧса бькьн, әме нә кӧ тʹәне принсипед ԝи һʹьз бькьн, ле ӧса жи ԛәнщийе бькьн.

Әм дьхԝазьн ԛәнщ бьн у ԛәнщийе бькьн

Сәва кӧ ԛәнщ бьн, мәрʹа нәлазьм ә тьштед ӧса бькьн, кӧ мәрьва әʹщебмайи кьн йан жи пʹешкʹешед бьһа ԝанрʹа бьдьн. Мәсәлә: Сәва кӧ шинкайи бьгьһижә, әм щарәкерʹа гәләки авнадьн, ле һәр гав һьндьк-һьндьк авдьдьн. Мина ве йәке, ԛәнщийа мә жи кьред бьчʹукда дькарә бе кʹьфше.

Кʹьтеба Пироз мә ширәт дькә, ԝәки «һазьр сәкьни бьн» сәва ԛәнщийе бькьн (2 Тимтʹ. 2:21; Тито 3:1). Чахе әм дәрәщед мәрьва һьлдьдьн һʹәсаб, әм дькарьн дьле ԝан ша кьн сәва баԝәрийеда бьшьдьн (Рʹом. 15:2). Мәсәлә, әм дькарьн аликʹарийе бьдьнә ԝан (Мәтʹлк. 3:27). Йан жи ԝана тʹәглифи мала хԝә кьн сәр нанхԝарьне йан жи сәва тʹәвайи ԝәʹдә дәрбаз кьн. Һәрге әм заньн кӧ кәсәк нәхԝәш ә, әм дькарьн ԝанрʹа нәʹме бьшиньн, тʹәсәлийа ԝан бькьн, йан жи ԝанрʹа тʹелехьн. Бәле, гәләк мәщалед мә һәнә, кӧ әм дькарьн «тьштед кӧ кери гӧһдара тен у кʹаре дьдьнә ԝан», ԝанрʹа бежьн (Әфәс. 4:29).

Әм мина Йаһоԝа, нав мәрьвада тьштед ԛәнщ дьгәрʹьн. Ләма әм фьрԛийе накьнә ортʹа мәрьва. Щурʹе лапә баш кӧ ве йәке бьдьнә кʹьфше, әв ә кӧ мьзгинийа Пʹадшатийе гьшкарʹа гьли кьн. Чаԝа Иса гот, әм гәрәке тьштед ԛәнщ нав ԝан мәрьвада жи бьгәрʹьн, йед кӧ мә һʹьз накьн (Луԛа 6:27). Тьштәки нәрʹаст ве йәкеда тʹӧнә, ԝәки мәрьварʹа ԛәнщ бьн у ԝанрʹа ԛәнщийе бькьн, чьмки мьԛабьли ван тьшта «ԛанун тʹӧнә» (Галт. 5:22, 23). Гава әм ԝан мәрьварʹа ԛәнщийе дькьн, йед кӧ мьԛабьли мә нә, әм бь ве йәке дькарьн ԝана биньн сәр рʹийа рʹаст у незики Хԝәде бькьн (1 Пәт. 3:16, 17).

КʹАРЕ ДЬСТИНЬН ГАВА ԚӘНЩИЙЕ ДЬКЬН

«Мәрьве ԛәнщ жь бәре кьред хԝә» рʹази йә (Мәтʹлк. 14:14). Ле әԝ чь кʹаре дьстинә? Чахе әм һьндава мәрьвада ԛәнщ бьн, әԝана жи ԝе тʹәви мә ӧса бьн (Мәтʹлк. 14:22). Һәрге жи әԝана ӧса нәкьн, әм пе кьред хԝәйи ԛәнщ дькарьн ньһерʹандьна ԝан бьгӧһезьн у дьле ԝан нәрм кьн (Рʹом. 12:20).

Гәләк мәрьва сәр хԝә тʹәхмин кьрьнә, кӧ чьԛас кʹар ә ԛәнщийе бькьн у жь хьрабийе дур бьн. Дина хԝә бьдьне Ненси чь дьбежә: «Әз бетʹалаш у һерс мәзьн дьбум, мьн тьштед нәщаийз дькьр у әз беԛәдьр бум. Ле чахе әз ԛанунед Хԝәде пеһʹәсийам у мьн әʹмьре хԝәда дьда хәбате, әз дьһа бәхтәԝар дьбум. Ньһа әз ида ԛәдьре хԝә заньм».

Мәʹнийа мәзьн кӧ чьрʹа әм гәрәке нав хԝәда ԛәнщийе пешда биньн, әԝ ә кӧ әм дьхԝазьн дьле Йаһоԝа ша кьн. Һәрге жи гәләк мәрьв навиньн әм чь дькьн, Йаһоԝа дьвинә у әԝ занә һәр шьхӧл у фькьред мәйи ԛәнщ (Әфәс. 6:7, 8). Ле ахьрийа ве йәке чь йә? «Мәрьве ԛәнщ Хӧдан херхԝазе ԝи йә» (Мәтʹлк. 12:2). Ләма ԝәрә әм бәрдәԝам кьн ԛәнщийе нав хԝәда пешда биньн. Йаһоԝа соз дьдә кӧ «һӧрмәт, рʹумәт у әʹдьлайи ԝе ԝан һʹәмуйарʹа бә, йед кӧ ԛәнщийе дькьн» (Рʹом. 2:10).

^ абз. 2 Һьнә нав һатьнә гӧһастьне.