Дәрбази һондоре буйин

Дәрбази навәроке буйин

Чьма Һежа йә Бәрдәԝам кьн Бьжин

Чьма Һежа йә Бәрдәԝам кьн Бьжин

Фәйзал жьна кʹижани кӧ мьрьбу, һʹаләки нәбашда бу. Саләк шунда паши мьрьна жьна ԝи, гәрәке дьле ԝи операсийа бькьрана. Әԝ дьбежә: «Чахе мьн кʹьтеба Ибо дьхԝанд, мьн фәʹм кьр, ԝәки Йаһоԝа бадиһәва әв йәк Кʹьтеба Пирозда нәдайә ньвисаре. Чахе әм дьлтәнг ьн у жь Кʹьтеба Пироз дьхуньн дәрһәԛа ԝан мәрийа, кʹижан кӧ мина мә дьчәрчьрин, әв дькарә мә бьшьдинә». Фәйзал зедә дькә: «Ләма жи, чь жи һәбә һежа йә бьжин».

Тарша щаһьл бу, чахе дийа ԝе мьр. Әԝ дьбежә: «Бь сайа ве йәке кӧ әз Әʹфьрандаре хԝә нас дькьм, нета жийина мьн ӧнда набә, у нава проблемед хԝәда әз диса жи дькарьм шабун у һевийе бьвиньм. Әм дькарьн баԝәр бьн, ԝәки ԛәԝата Йаһоԝа дьгьһиже, мә ԛәԝи кә у али мә бькә».

ЖЬ ԜАН ГОТАРА һатә кʹьфше, ԝәки чаԝа жь бо щурʹә-щурʹә ԛәԝьмандьнед жийине, әʹмьре мә дькарә гәләк зәһмәт бә. Дьԛәԝьмә проблемед тә жи зәʹф ьн, чь кӧ бона тә дьбьн ԝәк барәки гьран. Жь бо ԝан һʹәму тьшта, дьбә кӧ тӧ дәстпедьки бьфькьри, ԝәки ԛәԝата тә ида тʹӧнә бәрдәԝам ки бьжийи, у тʹӧ кәс бона тә хәм накә. Баԝәр бә, ԝәки Хԝәде бона дәрде дьле тә, хәм дькә. Тӧ бона ԝи ԛимәт и.

Ньвискʹаре Зәбура 86, баԝәрийа хԝә һьндава Хԝәде дьда кʹьфше. Әԝи гот: «Охьрме гьранда, Тә дькьм гази, Тӧ бона мьн дьби һәԝари» (Зәбур 86:7). Дьԛәԝьмә тӧ дьфькьри: «Гәло чь щурʹәйи, Хԝәде дькарә ‹охьрме гьранда› бона мьн бьбә һәԝари?»

Һәмьки Хԝәде дәрбера проблемед тә ԝе нәдә һьлдане, ле Хәбәра Ԝи тә дьдә баԝәркьрьне, ԝәки әԝ дькарә әʹдьлайа дьл бьдә тә, кӧ бькарьби охьрмед гьранда хԝә ԛайим бьгьри. «Бона т′ӧ тьшти хәм нәкьн, ле хԝәстьна ԝә бьра бь дӧа-дьрозга, р′азибунева т′әвайи, Хԝәдева ә′йан бә. У ә′дьлайийа Хԝәде кӧ жь һәр һ′ьш-аԛьли дәрбазтьр ә, ԝе дьл у фькьред ԝә . . . хԝәй кә» (Филипи 4:6, 7). Жь кʹәрәма хԝә дина хԝә бьдьне, кӧ чаԝа рʹезед жь Кʹьтеба Пироз мә дьдьнә баԝәркьрьне, ԝәки Хԝәде бь рʹасти жи сәва мә хәм дькә.

Хԝәде бона Тә Хәм Дькә

«Ле Хԝәде жь ԝан [чʹьвика] йәки жи бир накә. Һун жь гәләк ч′ьвика ԛимәттьр ьн» (Луԛа 12:6, 7).

ШЕԜЬР КЬН: Гәләк мәрьв чʹьвикед бьчʹук бәр тʹӧ тьшти һʹәсаб накьн, ле Хԝәде бона ԝан жи хәм дькә. Һәла һе йед лапи бьчʹук жи, бәр чʹәʹвед Хԝәде вәшарти ниньн, һәр йәк жь ԝан әʹфьринәкә ԛимәт ә. Бона Хԝәде, мәрьв жь чʹьвика дьһа ԛимәттьр ьн. Жь һʹәму әʹфьринед Хԝәде, бәндә әʹфринәкә лапә мәхсус ә, чьмки әԝ «дьлԛе» Хԝәдеда һатийә әʹфьрандьне у дькарә хәйсәт-һӧнӧред ӧса баш нав хԝәда пешда бинә, чаԝа йед Хԝәде (Дәстпебун 1:26, 27).

«Хӧдан! Тә әз әʹнәнә кьрьм у нас кьрьм. . . . Тӧ зани рʹабун у рʹуньштьна мьн, дурва Тәва әʹйан ә фькьред мьн. . . . Мьн әʹнәнә кә, Хӧдано, дьле мьн заньбә, мьн бьщерʹьбинә у фькьред мьн бьзаньбә» (Зәбур 139:1, 2, 23).

ШЕԜЬР КЬН: Хԝәде тә рʹьнд нас дькә. Һәст у хәмед дьле тә, ԝирʹа әʹйан ьн. Рʹаст ә дьԛәԝьмә мәрьвед дьн нькарьн һʹале тә фәʹм бькьн, ле Хԝәде бона тә хәм дькә у дьхԝазә али тә бькә. Хут бона ве йәке һежа йә бьжин.

 Хԝәде ԝе Пьштгьрийа Тә Бькә у Рʹебәрийа Тә Бькә

«Йа Хӧдан! Дәнге мьн бьбьһе, бьра заринийа мьн бьгьһижә Тә. . . . Рʹожа охьрмед гьранда бәре Хԝә жь мьн нәгӧһезә, гӧһе Хԝә бьдә ль сәр мьн. . . . Әԝе бьбьһе дӧайе бекәса у дӧайед ԝан ԝе беԛәдьр нәкә» (Зәбур 102:1, 2, 17).

ШЕԜЬР КЬН: Һәма жь дәстпека әʹфьрандьна инсанәте, Йаһоԝа һаш һәр һесьрәкә мәрийа һәйә, чь кӧ әԝана жь бо дәрд у кӧла дьрежьн у ча бежи һесьред ԝана мәшка хԝәда хԝәй дькә (Зәбур 56:8). Хԝәде һәр һесьрәкә тә у чәтьнайед тә жи бир накә, чьмки тӧ бона ԝи пʹьрʹ ԛимәт и.

«Нәтьрсә, чьмки әз тʹәви тә мә. Бәрхԝә нәкʹәвә, чьмки әз ьм Хԝәдайе тә. Әзе тә хԝәй кьм, бәле, әзе али тә бькьм» (Ишайа 41:10, 13, ДТʹ).

ШЕԜЬР КЬН: Хԝәде һазьр ә али тә бькә. Һәрге тӧ бькʹәви жи, әԝе тә рʹакә сәр ньга.

Һевийа Баш бона Ахьрийа Бәхтәԝар

«Ле бәле Хԝәде һ′ьзкьрьна хԝә һьндава мәда һьнге да к′ьфше, гава әмә һе гӧнәк′ар бун, Мәсиһ бона мә мьр» (Рʹомайи 5:8).

ШЕԜЬР КЬН: Тӧ ӧса сәва Хԝәде дәлал и, ԝәки әԝи бь һазьрбун Кӧрʹе хԝә Иса, сәва һʹалхԝәшийа тә, кьрә ԛӧрбан. Бь сайа ве ԛӧрбане, мәщала тә һәйә бь жийинәкә бәхтәԝар һәрһәйи бьжийи. *

Һәмьки хәмед тә ԝе һәбьн у щарна дьбә тӧ бьфькьри, кӧ ида нькари тәйах ки, ле сьст нәбә. Хәбәра Хԝәде кʹур леколин кә у баԝәрийа хԝә һьндава созед Хԝәде һе ԛәԝи кә. Әв йәк ԝе шабуне бькә дьле тә у те фәʹм бьки, ԝәки һежа йә бьжийи.

^ абз. 19 Сәва һе зедә әʹламәти дәрһәԛа ԝе йәке, кӧ чь кʹаре тӧ дькари бьстини жь ԛӧрбанбуна Иса, бьньһерʹә видео «Мьрьна Иса, Бира Хԝәда Хԝәй кьн» сәр www.jw.org. Бьньһерʹә ӘʹДӘБЙӘТ > ВИДЕО > МИНА ИСА МӘСИҺ БЬЖИН У ХЬЗМӘТ КЬН