Чар кʹьтебед пешьнә Пәймана Нуда дәрһәԛа мәрьвәки бь наве Йуһʹәннайе Ньхӧмдар те готьне, йе кӧ Щьһустанеда дәрһәԛа Пʹадшатийа Хԝәде гьли дькьр. Гәло әв информасийа Кʹьтеба Пирозда дәрһәԛа ви мәрьви рʹаст ә? Ԝәрен әм һьнә избатийа шеԝьр кьн:

•   Кʹьтеба Пирозда те готьне: «Ԝан рʹожада Йуһʹәннайе Ньхӧмдар һатә бәрʹийа Щьһустане, кӧ хәбәра Хԝәде бәла кә. Әԝи дьгот: ‹Тʹобә кьн, чьмки Пʹадшатийа әʹзмана незик буйә!›» (Мәтта 3:1, 2). Гәло әв информасийа ль гора канийед тʹәрихийе избаткьри йә? Бәле.

   Тʹәрихзане ԛьрʹна йәке Усьве Флавиус ньвисийә, ԝәки мәрьвәки бь наве Йуһʹәннайе Ньхӧмдар һәбу, йе кӧ «Щьһу һелан дькьрьн, ԝәки әԝана рʹаст бьжин, һьндава Хԝәдеда амьн бьн» у «бенә ньхӧмандьне»—Jewish Antiquities, Book XVIII.

•   Кʹьтеба Пироз шьровәдькә, ԝәки Йуһʹәнна кьре Һеродәс Антипас, йе кӧ сәрԝере Щәлиле у Пәреайе бу, ԛәбул нәдькьр. Һеродәс хԝә Щьһу һʹәсаб дькьр, йе кӧ гӧрʹа Ԛануне дькә. Йуһʹәнна сәва ԝе йәке Һеродәс сущдар дькьр, кӧ әԝи жьна бьре хԝә стандьбу (Маркос 6:18). Әв информасийа дәрһәԛа зәԝаща Һеродәс Антипас тʹәне Кʹьтеба Пирозда нинә.

   Тʹәрихзан Усьве Флавиус гот кӧ «дьле» Антипас «кʹәтьбу Һеродийайе» у «әԝи готьбу ԝе кӧ ԝи бьстинә». Һеродийа әв йәк ԛәбул кьр, мере хԝә һишт, ԝәки Антипас бьстинә.

•   Кʹьтеба Пироз дьбежә, ԝәки «хәлԛ жь Оршәлиме, жь тʹәмамийа Щьһустане у жь һʹәму алийед Чʹәме Урдӧне дьһатьнә бал [Йуһʹәнна] . . . у әԝи Чʹәме Урдӧнеда әԝана дьньхӧмандьн» (Мәтта 3:5, 6).

   Усьве Флавиус ве информасийайе жи избат дькә. Әԝ дьбежә кӧ «әʹлаләта гьран» дьһатә щәм Йуһʹәнна «һинкьрьнед кʹижани гәләк дьле ԝан дьгьрт».

 Әшкәрә йә, ԝәки Усьве Флавиус тʹәрихзане ԛьрʹна йәке, баԝәр дькьр кӧ Йуһʹәннайе Ньхӧмдар бь рʹасти һәбу. У әм жи дькарьн ве йәкеда баԝәр бьн.